Ikilisiaati

5 Mandaŋ a mɛɛ ŋ tosa sɔɔŋ yɛ teleŋ o teleŋ ŋ kuɛ pɛ o chiɛi Mɛlɛka tonyaa.+ O bɛnda ma sɔɔŋguu kpɛɛluŋ ma yaŋ nilaŋ o nyɛ nda cho dimioo loŋ ndo,+ mbo hiau salaa solioo mɛɛ diɔmnda tosa yɛ.+ Kanifuule, a sina nuaa maa nyɛ nda cho tosaa wo niŋ kposoŋ te le.

2 Wa chɔ chɔ a sondo nduyɛ ma lau le suɛi Mɛlɛka tonyaa lachi le,+ kanifuule Mɛlɛka tonyaa cho choo choo pɔ mi num wa o lɛŋndeŋ choo. Le saboo hoo nyɛ ŋ nɔ le dimioo wo nɔ ni mbo wa o biŋgi.+ 3 Te waŋndo hiu pɛ buulaŋndo tau,*+ o sɔl luaŋ. Nduyɛ tombola bɛndu bɛndoo tosa ni mi diɔmndo dimi sɔɔŋ ŋdiɔmndoŋ.+ 4 Teleŋ o teleŋ ŋ chuel pɛ Mɛlɛka buŋgɛi, duaunuŋ tamala le ndi peeloo le,+ kanifuule Mɛlɛka niŋ kɔl a diɔmnda le.+ Te a chua pɛ buŋgɛi, kindiŋ ma peelu ndi.+ 5 O wa fisa ma kɛɛ le buŋgɛi chuaa mbo hiau buŋgɛi chuaa ma kɛɛ le ndi peeloo.+ 6 Chɛl mi sondo numndo* nyindu num ma tosa hakioo le.+ Nduyɛ dimi maalikɛinɔɔ* lachi maa biondɔŋndo le ŋ tosa le.+ Le yɛɛnɛ ma tɛɛmbuu Mɛlɛka tonyaa kɔllo a nyɛ ŋ dimi wo le halikpeŋ mbo tɛɛmbuu walta ŋ tosa laŋ kpou?+ 7 Mɛɛ buulaŋnda bɛndulaŋ la tosa mi waŋnda sɔl luaŋ yɛ,+ lende koni suɛi bɛnduei tosa ni mi waŋndo dimi sɔɔŋ fondoŋ. Lelaŋ, nɔ siooŋnde le Mɛlɛka tonyaa.+

8 Te a che pɛ mi wanaa nɔ kpaayalaŋ nda wa wanaa bala fonduaa nyɛkindilaa handɔɔ choo nduyɛ ma wa kafalaŋ tosaa, ma kɛɛ sandei chɔmndo o tanda numndo niŋ, kɔndɔfili nɔ mbo bii num te.+ Kanifuule, wana nɔ kpaayaa mbo hiau nda wo cho nda chɔɔ. Nduyɛ wanaa cheleŋ cho a nɔ kpaayaa ma hiau nda kpou wa.

9 Tɔnɔla lelɛŋndaŋ bɛɛ ma piɔuwaŋ ndaŋ ndapila tɛɛŋ kpou. Nduyɛ masaa bɛɛ yondo tɔnɔ ndɔɔ fula ni.+

10 Wana kaala kaniei* yo, fɛɛŋ bɛɛ o hini kɔl a kanii o nɔ ve le. Kɛlɛŋgaa niŋ te mi wana kaala sullo wo hini kɔl a sul o nɔ wo.+ Hei bɛɛ, nyɛ fondoo fuu i cho ni.+

11 Te nyɛm kɛndɔŋ kui pɛ, wanaa dia muŋ nda bɛɛ kui.+ Mɛɛ tɔnɔ yɛɛnɛ wana nɔ muŋ ndo nɔ yɛ? Mɛɛ niŋ challe mbo mɛɛndaŋ muŋ.+

12 Buɛiyo dio tau, o dio nyɛɛmbɔ, te o hini pɛ, tueiyɔɔ o tuɛi lɔma nduaŋ yeela ni. Kɛ te waŋndo nɔ pɛ nyɛm kiɔɔŋ tau, o hini bɛɛ o lɔl te.

13 Kpundɛ bɛndu ya che o chieeŋndo choo wo cho hoo ni. Mi waŋndo lo sullo chuuŋgiaa haaa mbo chuu ndu kpundɔɔ. 14 Mi sul koŋ laasiaŋ le mɛɛ kpundɔɔ pum komal ndu yɛ. Nduyɛ mɛɛ o velu niŋ hɔɔ, nyɛm kɛŋ ve lɛ ndu o ba le ndu mello le.+

15 Mɛɛ waŋndo fula kala ndɔ o dembe kɔɔle fondo yɛ, lende koni o cho vɛlɛ faŋaŋ o chieeŋndo choo ni.+ Nduyɛ wali kala kala o tosa wo kpou, o kue niŋ a nyɛ o nyɛ le.+

16 Hei bɛɛ kpundɛ bɛndoo i cho ni. A tonya, mɛɛ o hiŋ o chieeŋndo choo yɛ, lende koni o cho lakɔ ni. Mɛɛ tɔnɔ yɛɛ waŋndo sɔla yɛ le wali kala kalaa tosaa mbo kuɛŋnuŋ o hueiye niŋ?+ 17 Lepaa o lepaa, nyɛdiaa dioo mɛɛ wana wa nuaa o nyumndaŋ niŋ yɛ. Nduyɛ mbo wa a kɔl tambɛi bɛndoo, naa, vɛlɛ a kɔl tuuwo.+

18 Nyɛ ya che o kɛndɛ nduyɛ mbo bɛnda le tosaa wo cho hoo ni: Wanachioo nɔ mbo de, mbo kol, nduyɛ mbo de saŋga ndɔɔ tɔnɔ,+ le wali kala kala o tosa o chieeŋndo choo, boondii biŋgi Mɛlɛka tonyaa chɛl ndu mbo wa yoomu ve. Kanifuule, paawa* ndɔɔ cho koŋ ni.+ 19 Te Mɛlɛka tosa vɛlɛ pɛ mi waŋndo sul nduyɛ mbo sɔla nyɛm kiɔɔŋ tau+ okoŋ mbo ke ndu kpaayaa le mbo tuei muŋ yeela, o nɔ mbo che ndi maa paawa ndɔɔ cho koŋ ni, nduyɛ mbo dɔɔnuŋ nyaale le wali kala kala o tosa wo. Ke fula Mɛlɛka o ba wo o cho ni.+ 20 Wana waa lende i wa niŋ ikala le mbo sina* mɛɛ teleŋndo cho wa hiounɔŋndo o yoomu ndɔɔ niŋ yɛ, kanifuule Mɛlɛka tonyaa tosa mbo wa kpɔndi kpɔndi o yelelaŋndo niŋ.+