Ditɔnɔmii
17 “La nɔ mi la soli nauwo ɔɔ saa nɔ sɔŋndo wo salaa o Chɛhowa Mɛlɛka nyaa lo le. Kanifuule, Chɛhowa Mɛlɛka nyaa tul sala waa lende leyɛ.+
2 “Te o yɔŋ pɛ mi la saaluŋ wana pɔnɔɔ ɔɔ wana lanɔɔ nya tɛɛŋ o chieeŋ nyaŋ bɛnduŋ Chɛhowa Mɛlɛka nyaa cho nya kioo woŋ niŋ i pilɛ, mbo wa sɔɔŋ bɛnda Chɛhowa Mɛlɛka nyaa o hɔl te woŋ tosaa, mbo tɛɛmbuu kpema o yii a nya wo,+ 3 nduyɛ mbo muliŋ mɛlɛkaa cheleŋ, ɔɔ paaleŋ, paŋgei, ɔɔ nyɛ o nyɛ cho o choo choo niŋ wulaŋ beŋndo le ndu sooluuwo,+ nyɛm ya dimul nya maa la sooluu le woŋ,+ 4 te a dimul nya pɛ a suɛi waa lende okɔɔ ɔɔ mi la tuei ndi, la nɔ mi la yaasiaa ndi nyɛkɛndɛ kɛndɛi. Nduyɛ te i wa pɛ tonya+ maa suɛi wɔɔŋ waa lende yɔŋnuŋ o Isɔluɛi niŋ, 5 la nɔ mi la soli po koŋ ɔɔ chua tosa suɛi wɔɔŋii keŋ ndo o dio kpaki chioo sondoo, nduyɛ mi la vii vii ndu a poutaŋ haaa mbo vi.+ 6 Te seiya a ŋiɔɔŋ ɔɔ a yaa+ timbi pɛ seileŋ a wana koŋ okɔɔ, mɛɛ o nɔ mbo sɔla piɔmndo. Kɛ la nɔ mi la dii ndu le seiyo o pilɛ kpe le.+ 7 Wanaa timbi kaŋ seileŋ nda fɛlɛŋ nɔ ni ma kandu ndu vii viiyo, okoŋ mi a tuaa kpou tol nda kɔɔli ma lo ndu vii viiyo haaa mbo vi. La nɔ mi la faŋa wana dɛnɛ wɔɔŋndo nya tɛɛŋ.+
8 “Te suɛi yɔŋnuŋ pɛ o chieeŋ nyaŋ bɛndoŋ niŋ i pilɛ, mi i wa nya ikala o ba le yamɛi kiolɔɔ, o wa suɛi diyaa+ ɔɔ suɛi nda kua a waŋndo o lemasa, o wa suɛi sɔŋgɔ ɔɔ sɛɛŋgiaŋnda cheleŋ, la nɔ mi la kuɛ a ndi o fondaŋ Chɛhowa Mɛlɛka nyaa hɛli wo.+ 9 La kɔ a suɛi keŋ o wanaa soliaa lasalaa fula o pulale Livai leŋ choo wa, a o wana kialaa ŋyama+ cho wa wallo a teleŋ koŋ ndo lo, mi la kɔ doonuŋ nda kona. A cho yaasiaa leniŋ ma dimul nya yamɛi nda kelu ve.+ 10 Mɛɛ nda kelu yamɛi a suɛi keŋ okɔɔ o fondaŋ Chɛhowa hɛli wo yɛ, lende nya nɔ ni mi la tosa. La nɔ mi la wa yekeŋ le tosaa nyɛ o nyɛ nda dimul nya. 11 La nɔ mi la tol sawa nda dou nya wo kɔɔli, nduyɛ mi la tosa mɛɛ nda kelu yamɛi yɛ.+ La faŋaŋ o yamɛi nda kelu ve choo mi la sei ikɛi le.+ 12 Wana o wana kɛɛ pɛ wana soliaa lasala cho wallo le Chɛhowa wo, ɔɔ wana kialaa ŋyamaa nilaŋ yaŋɔɔ a yoŋga, o nɔ mbo sɔla piɔmndo.+ La nɔ mi la faŋa wana dɛnɛ wɔɔŋndo o Isɔluɛi niŋ.+ 13 Te keŋ yɔŋnuŋ pɛ, wanaa tuaa kpou cho tueiyɔɔ mi siooŋnde bii nda, nduyɛ fɛɛŋ bɛɛ a tosa lɛ yoŋga waa lende le.+
14 “Te la luɛi pɛ o lɛŋnde Chɛhowa Mɛlɛka nyaa cho nya kioo leŋ niŋ mi la hɛlu leŋ nduyɛ mi la chal leniŋ, okoŋ mi la dimi aa, ‘Ŋ yuluŋ waŋndo iso le mbo wa masa naa maa lɛŋii balu naa ve kpou,’+ 15 te keŋ yɔŋnuŋ pɛ, la nɔ mi la yulu masa Chɛhowa Mɛlɛka nyaa hɛli wo iso.+ Puaapiliaa nyaa tɛɛŋ nya nɔ ni mi la hɛli wana koŋ. La nɔ mi la hɛli miallo o cho puaapilɛnɔ nya le wo le. 16 Kɛ nduyɛ, masa koŋ nɔ mbo nɔ suaa tau le,+ nduyɛ o nɔ mbo tosa mi waŋnda miiŋgu Ichipi le ma kɔ sɔla suaa tau le.+ Kanifuule, mi Chɛhowa dimul nya aa, ‘Fɛɛŋ bɛɛ la miiŋgu lɛ Ichipi le.’ 17 O nɔ vɛlɛ mbo chua laanduaa tau le, yɔŋii o faŋa kɔl ndɔɔ o nɛi tonyaa choo.+ Nduyɛ, o nɔ mbo nuuviaa kaniŋ humboŋ a kooliiyoŋ tau le.+ 18 Te o chal pɛ o kpeŋgbei ndɔ lemasaa choo, o nɔ mbo bii yau* laSawaa wanaa soliaa lasalaa fula o pulale Livai leŋ choo wa o ba, mbo miŋgi laŋ poonyiaa le ndupila.+
19 “Yau koŋ nɔ mbo wa ndu o ba, nduyɛ mbo wa diomndaŋ veeloo leniŋ haaa a teleŋ o cho wa yoomu wo,+ le halikpeŋ mbo pɛɛku le siooŋnde nɔɔ le Chɛhowa Mɛlɛka ndɔɔ, mbo bii sawala cho o yau koŋ niŋndaŋ kpou, nduyɛ mbo tosa nyɛ la dimi wo.+ 20 Hei cho tosa o chueŋnuŋ o bɛndu puaapiliaa nduaa choo, mbo faŋaŋ o sawalaŋ choo mbo sei ikɛi le. Nduyɛ, mi ndu a puaa nduaa viou o masaleŋ choo o Isɔluɛi niŋ.