Kɔliŋtiaŋ Tasoo

13 A yɔŋ bɛɛ mi dimi sɔɔŋ maŋgalaŋ waŋnda chieeya a sɔɔŋ maŋgalaŋ maalikɛiya dimi woŋ, kɛ te I nɔ kaalaa le, mɛɛ bɔɔluu fondoo fuu ya cho ni. 2 A yɔŋ bɛɛ mi nɔ kioo le waŋnda yooŋgu Mɛlɛkaa dimullo, le sɔɔŋ cho ŋ viaŋnaŋndoŋ kpou biyɔɔ bila, a le sɔɔŋ sinaa pɛŋgu,+ nduyɛ mi nɔ laalaŋndo tau le pemboŋ faŋaa, kɛ te I nɔ kaalaa le, I cho nyɛ o nyɛ le.+ 3 A yɔŋ bɛɛ mi soliŋ nyɛ o nyɛ ya nɔ kpeku le acheleŋnda malaa,+ nduyɛ mi soliŋ yoomu nuu sala le mi sɔla saŋgalaa, kɛ te I nɔ kaalaa le,+ I sɔla tɔnɔ leniŋ te.

4 Kaalaa+ biunuŋ,+ nduyɛ o nɔ kɛndɛi.+ O paŋala le,+ o kuundiaŋ te, o nɔ yoŋga le,+ 5 o tosa sɔɔŋ lasiɔmbu le,+ o kindiŋ le dɛnɛ ndɔ kɛndɔɔ suee le,+ o tuulu kɔl chɔ chɔ le,+ o kɛsiŋ suɛi nɛiyaŋ o kɔl te.+ 6 O doonuŋ nyaale le suɛi wɔɔŋnde le,+ kɛ mbo dɔɔnuŋ nyaale le tonyaa. 7 O vi ŋdial o nyɛ o nyɛ niŋ te,+ o laalaŋ nyɛ o nyɛ,+ o tiindaŋ nyɛ o nyɛ,+ o biunuŋ nyɛ o nyɛ.+

8 Kaalaa cho nyɛ mɛɛlu le. Kɛ kioo le waŋnda yooŋgu Mɛlɛkaa dimullo cho mɛɛlu. Kioo le sɔɔŋ maŋgalaŋ dimioo cho mɛɛlu. Kioo le sɔɔŋ sinaa pɛŋgu cho mɛɛlu. 9 Kanifuule, nyɛɛmbɔ koni naŋ sina sɔɔŋ pɛŋgu ni, nduyɛ nyɛɛmbɔ koni naŋ dimul waŋnda yooŋgu Mɛlɛkaa ni.+ 10 Kɛ te ŋ huŋ chii pɛ sɔɔŋ kpou sina pɛŋgu, sɔɔŋ naŋ sina nyɛɛmbɔ woŋ cho mɛɛlu. 11 Teleŋ ya wa o pɔmbɔ wo, maa chuaambɔ yaa suaa ni, maa chuaambɔ yaa yiyaŋ ni, nduyɛ maa chuaambɔ yaa cha sɔɔŋ ni. Kɛ mɛɛ ya simnuŋ kaasoŋnɔ, mi mal sɔɔŋ ŋchuaambɔyaŋ. 12 Ŋ cho sɔɔŋ chɔɔ mɛɛ wana wa nuaa nyɔɔ chɔɔ o tofaŋ yim yimndo niŋ yɛ. Kɛ boondii cho fuuluu miŋ che muŋ walaŋ. Sɔɔŋ nyɛɛmbɔ koni ya sina suŋ suŋ ni, kɛ I cho hunɔɔ sɔɔŋ sina nyɛkɛndɛ walaŋ, mɛɛ Mɛlɛka sina ya nyɛkɛndɛ walaŋ yɛ. 13 Sɔɔŋ sala yaa woŋ muŋ cho wa lefafɛɛŋ. Muŋ cho ni: laalaŋndo, tiindaŋndo, a kaalaa. Kɛ i hiou muŋ kpou ve cho kaalaa ni.+