Baa waŋvilɛiya miiŋgu lɛ niŋ pa yoomu?

YƐƐ BAABUIYO NDU DIMI YƐ?

“Waŋvilɛiya cho hunɔɔ fula sɛiniŋndo sɔla.”—Walta Wanaa Chiisuaa 24:​15, New World Translation.

VƐƐ HEI MALA YƐ NUM?

I dɛɛniaa num kɔllo te wana ŋ kaala wo vi pɛ.​—Kɔliŋtiaŋ Diiŋ Ndɔɔ 1:3, 4.

Siooŋii piɔmnde fula num o kɔl maa wu bɛɛ, a cho vɛlɛ miiŋgu yoomu.​—Hibuluiya 2:15.

Hei ke num tiindaŋndo lekɛndɛi maa wanaa num aa kaalaa vi wa cho hunɔɔ miiŋgu yoomu mi la wa diompilɛ.​—Chɔŋ 5:28, 29.

LE YƐƐ KPEEKPEI NAŊ NƆ YƐ MIŊ LAALAŊ NYƐ BAABUIYO DIMI WO?

Ŋ nɔ miŋ laalaŋ nyɛ Baabuiyo dimi wo le sabulaŋ la yaa:

• Mɛlɛka toosiaa yoomoo ni. Baabuiyo dimi maa Chɛhowa Mɛlɛka “tosa ni mi ŋ wa yoomu.” (Walta Wanaa Chiisuaa 17:​28; 17:​24, 25) Te o yɔŋ pɛ maa Chɛhowa toosiaa yoomoo ni, mɛɛ o tiuba mbo miŋgi vɛlɛ waŋvilɛiya yoomu pila.

• Mi Mɛlɛka miŋgi sindɛ wanaa vi wa yoomu. Wanaa vi ma miiŋgu yoomu wa, a ŋɔmaa Baabuiyo soo okɔɔ ni. O waŋnda haa tɛɛŋ, chuaambuaa pɔmbuaa wa, kaasoŋnda, waŋlaanduaa vɛlɛ a puaa. Apum le teleŋ biŋgi koni nda wa a vilɛi ni. Kɛ waŋndo opilɛ wa nda tɛɛŋ, mbo chii palɛi i hiɔɔlu o sɛiyo niŋ.​—Chɔŋ 11:39-44.

• Mɛlɛka nɔ vɛlɛ yeemɛi tau le wanaa vi wa miŋgioo yoomu. Chɛhowa tul piɔmndo leyɛ. O che ndu maa yaamɔɔnɔɔ o cho ni. (Kɔliŋtiaŋ Tasoo 15:​26) Chɛhowa cho hunɔɔ piɔmndo chɔulaba mbo tiu ndu ba. Teleŋ o cho hunɔɔ waŋvilɛiya miŋgi yoomu wo hei cho yɔŋnɔŋ ni. Wana o wana cho o loonɔŋ Mɛlɛka wo niŋ, Mɛlɛka nɔ yeemɛi kpeekpei le nda hunɔɔ miŋgioo yoomu. O nɔ yeemɛi le nda chɔɔ vɛlɛ achal o lɛŋndeŋ choo.​—Choobu 14:14, 15.