Chekɔpu Sɔla Nyɛm Kiɔɔŋ

Aase wa wɔsilaŋ 40 mbo chua Lubeka o nɔɔ niŋ. Aase ndoo kaala ndu bɔɔ. Mɛɛ nyɔɔ viou tiŋ, ma vialu puaa nda ŋiɔɔŋ, nduyɛ pɛnduaa nda wa ni.

Iisɔ wa kaasoŋnɔɔ ni, Chekɔpu wa pɔmbɔɔ ni. Kelaa pila Iisɔ ndoo kaala ni, nduyɛ ndoo chaa bɔɔ doosuleŋ. Kɛ Chekɔpu ndu, o bɛɛ ndoo kaala challe ni.

O teleŋ koŋ niŋ, te finyaa vi pɛ, po ndɔ tasoo ndoo hiau lɛŋndeŋ a kaniŋ finya ndɔ mɛi yoŋ sɔla. Nyɔɔŋ muŋ nda veelu ni aa nyɛm kiɔɔŋ. O yuŋgu Aase wo niŋ, nyɛm Chɛhowa ndoo dimul Ebilaham le ndu tosallo woŋ wa vɛlɛ o nyɛm kiɔɔŋ muŋ tɛɛŋ. Iisɔ ndoo chi nyɛm Chɛhowa dimi muŋ ndoŋ ŋ sɔvɛ le. Kɛ Chekɔpu ndoo sina maa ŋ cho bɔɔ ŋ sɔvɛ.

Paale pilɛ, mɛɛ Iisɔ kɔ niilu doosuleŋ kpɛŋ, mbo miiŋgu o bɛɛ o saŋgɛi yɔkɔɔ. O komal Chekɔpu nyɛdiaa kɛndɛ kɛndɔɔ yauwo. Mɛɛ o tuei nyɛdiaa koŋ chuŋndo, mbo dimi aa: ‘Yiaaŋ ma cho ya bɔɔ nɛiyo. Ke ya nyɛdiaa ŋ cho koŋ yauwo wo o tiŋ.’ Mi Chekɔpu dimul ndu aa: ‘I cho num ke. Kɛ dimul la fɛlɛŋ maa a cho ya nyɛm kɛŋ numndoŋ ke.’ Mi Iisɔ dimul ndu aa: ‘I heuba a nyɛm kɛŋ muŋ te! Num chua muŋ. Nyɛdiaa kinɛi ya yeema ni.’ A yiyaŋ pa maa chuaŋ chua kɛndɔɔ Iisɔ ndoo tosa koŋ ni? Ɛ ɛ, o ve chuaŋ chua kɛndɛ le. Mi Iisɔ kɛɛ ke sɔvɛ sɔvɛ ndoo nɔ wo le nyɛdiaa.

Mɛɛ Aase yuuwa, mi teleŋndo fuuluu le mbo dɔu po ndɔ tasoo sala. Kɛ mi Lubeka kala nda tosa, mi Chekɔpu pɔmbɔ ndɔ sɔla sala koŋ. Mɛɛ Iisɔ sina hei, mbo tuulu kɔllo tau. Okoŋ mbo kɛɛsiaŋ o kɔl le mbo dii pɔmbɔ ndɔ. Aase nda Lubeka ndaa yeema mi Iisɔ dii pɔmbɔ ndɔ le. Le hei, ma dimul Chekɔpu aa: ‘Kɔ naa Lebaŋ bom num chua, ma kɔ wa loŋ haaa mi Iisɔ pɔlul kɔl.’ Mi Chekɔpu yaŋ nyɛ kala ndɔ a finya ndɔ dimul ndu wo nilaŋ, okoŋ mbo nyaanuŋ le yoomu ndɔɔ.