SUƐI LEBOLLE O KƆƆ | NƐƐ YAA CHO YƐ SEIYAA CHƐHOWAA?
Le yɛɛ naŋ dimi yɛ yooŋgu kɛndɔɔ a Mɛlɛka okɔɔ?
Keleŋgaa yooŋgu kɛndɛ naŋ kua dimioo o chiɛila waŋnda, o fondala waŋnda wa tau laŋ, a ba o ba fee waŋnda cho, tosa naa teŋgeŋ ni. Le yɛɛ naŋ tosa yɛ hei?
Seiyaa Chɛhowaa cho yooŋgu kɛndɔɔ dimioo le Mɛlɛka saŋgalaa, nduyɛ le mi waŋnda sina diola ndɔlaŋ. (Hibuluiya 13:15) Ŋ yeema vɛlɛ miŋ diikuŋ sila Chiiisu Kiliti ke naa hoo wo aa, “Lelaŋ, la kɔ o ŋwaŋnda chiee lo ba o ba fee mi la siiŋguu nda buɛiyaa ni. . . . Mi la pɛɛku nda ma tosa nyɛ o nyɛ ya dimul nya le tosaa.”—Maatiu 28:19, 20.
Le handɔɔ lechoo, ŋ kaala vɛlɛ chaaŋ naa wanachioo. (Maatiu 22:39) Kɛ ŋ sina maa waŋnda nɔ laalaŋnda kaaŋii ndɛi, nduyɛ o cho wana o wana fee le nɔ yeemɛi o yooŋgu naŋ cho dimioo wo niŋ te. Kɛ a koŋ kpou, ŋ nɔ yiyaŋndo maa nyɛ Baabuiyo cho pɛɛkoo wo piŋi yoomula waŋchieeya. Lelaŋ naŋ cho hiouwɔɔ lachi “a waŋnda pɛɛkoo a nda yooŋgu kɛndɔɔ chɔmndo maa Chiisu ndu cho Kiliti” ni. Nduyɛ lende koni Kilisiɔŋnda wa tosaa o wɔsiŋ kɛmɛ tasoŋ niŋ ni.—Walta Wanaa Chiisuaa 5:41, 42.
Mi wana pɛɛku a kaala waŋchieeya okɔɔ wo diolaŋ Antonio Kova Madulo poonyiaa maa “Seiyaa Chɛhowaa cho kindiŋndo o nɛi o nɛi niŋ . . . , le halikpeŋ mi Diom Mɛlɛkaa fuuluu o lesɔŋgi o lesɔŋgi o chieeŋndo choo.”—Ɛl Yunivasal, yau layooŋgoo le Vɛnɛsueela
Wanaa nua o yaula naala niŋnda a bɔɔbɔɔ cho ŋChɛhowɛi le. Nduyɛ wanaa cho Baabuiyo pɛɛkoo a naa o miiliɔŋndaŋ niŋnda cho o kaaŋii cheleŋnde niŋ. Kɛ a cho a kɔl hiniaa le mɛɛ Seiyaa Chɛhowaa cho kɔlaŋ o bɛɛla ndalaŋ le hei tosaa yɛ.
Kɛlɛŋgaa ma nɔ vɛlɛ nyunala cheleŋ a Seiyaa Chɛhowaa okɔɔ. Ŋ yeema num ma soliŋ nɛilaŋ ndaŋ kpeku le nyunala numndaŋ mulioo.
Nyuna Chɛhowɛinɔɔ.
Kɔ o tɛɛŋgii nɛi, www.jw.org.
Huŋ o bɔŋaŋnda naala leKilisiɔŋndaŋ. A cho nyɛsɔlaa yɔŋgu le, nduyɛ la cho le wana o wana.