Nyunala Wanaa Nua O Yaula Naalaŋ Niŋnda

Le yɛɛ Kilisiɔŋnda nɔ yɛ ma mandaŋ te a wa pɛ nyɛm mapuuloŋ soliŋndo kpeku le yooŋgulaŋ yɔŋndo?

Mi Kilisiɔŋaa bɔɔbɔɔ soliŋ nyɛm mapuuloŋ kpeku le suukaŋndo a yuŋgula ndalaŋ vɛlɛ a chaaŋaa ndaa Kilisiɔŋnda. Kɛ Kilisiɔŋnɔ kendu o Mɛlɛka piɛiyo niŋndo nɔ mbo kɛsiŋ silaa hoo o kɔl: “Wana kɔl kaloo o nɔla mbo cheŋnuŋ kpundɔɔ ndu lachi, mbo kpɛkpɛla ndu. Kɛ wana nɔ kɔl kalu bɔɔ le wo ndu, o lo kɔlaŋ mbo kɔ del o kpundɔɔ niŋ.”—Pulɔ. 27:​12.

Wana manda naa wo Chɛhowa cho ni. Lelaŋ, o yeema naa miŋ holiaŋ a wanaa soliaa, wanaa huŋ a piɔuwaŋndo wa, ɔɔ a wanaa tosa mi waŋnda faŋaŋ o nɛi tonyaa choo wa le. (Luomaŋ. 16:​17; 1 Kɔliŋ. 5:​11; 2 Chɔŋ 10, 11) O cho waŋnda kpou o kunda leKilisiɔŋndo niŋ te diikuŋ sawala Chɛhowalaŋ te. (2 Timo. 2:​20, 21) Lelaŋ ŋ nɔ miŋ wa yekeŋ, kanifuule i wa ikala le chaŋyaŋ kɛndɔŋ hɛlioo te ŋ wa pɛ nyɛm mapuuloŋ soliŋndo kpeku.

Mbo wa ikala le sinaa wanaa suu ŋ bii chaŋyɛi wa, te o yɔŋ pɛ mi chaŋyaŋ numndoŋ kila kundaa o intanɛtiiyo choo a waŋnda tau leniŋ, nduyɛ mi num bɛɛ wa nda tɛɛŋ. Kilisiɔŋnda apum wa o kundala waa naa niŋ, nduyɛ ma sɔla fulamakɔɔlila wɔɔŋndaŋ. Lelaŋ, le yɛɛ puaapilɛnɔɔ ɔɔ ndepilɛnɔɔ nɔ yɛ mbo mandaŋ te o wa pɛ o kunda nɔ waŋnda o kɛmɛlaŋ niŋ ɔɔ o waalaŋ niŋndo choo? Kanifuule, o tiuba mbo sina wanaa suu nda cho kpeekpeiya le. Nduyɛ o tiu vɛlɛ ba mbo sina mɛɛ chaŋyɛi ndɛi cho a Chɛhowa yɛ le. Sam 26:​4 dimi aa: “Ŋ dou labali naa wana lachoowa le, nduyɛ I yee naaŋaŋ a wana sondo yeelɛi le.” Hei sim ni maa, wanaa naŋ sina nyɛkɛndɛiya kinɛi naŋ nɔ ni miŋ yɔŋ yooŋgulaŋ.

O yɔŋ bɛɛ mi kunda naŋ cho o intanɛtiiyo choo wo ve o bɔɔ le, ŋ nɔ miŋ wa yekeŋ a mɛɛ naŋ soliŋ teleŋ naa kpeku yɛ, vɛlɛ a sɔɔŋ naŋ suukaŋ choo woŋ. Ŋ nɔ miŋ kɛsiŋ o kɔl maa, o cho yooŋgu kɛ kɛ le naŋ nɔ miŋ muli le. Nduyɛ o cho sɔɔŋ kpou le naŋ nɔ miŋ wa suukaŋndo choo le. Mi Pɔɔl sila Timoti a wanaa kei “sondolaŋ wouwo o sɔɔŋ cho sɔɔŋ nda le woŋ niŋ, ma suaa sɔɔŋ nda nɔ bɛɛ ma soo a muŋ okɔɔ le” wa okɔɔ. (1 Timo. 5:​13) Hau, naa bɛɛ nɔ miŋ tosa nyɛ pilɔɔ hoo kpe te ŋ wa pɛ nyɛm mapuuloŋ soliŋndo kpeku.

Kilisiɔŋnɔ kendu o Mɛlɛka piɛiyo niŋndo pɛɛsa chaaŋ ndɔ Kilisiɔŋnɔɔ ɔɔ mbo chɔm waŋnda a sɔɔŋ nda nɔ ma sina a ndu okɔɔ le woŋ o intanɛtiiyo choo le. (Sam 15:​3; Pulɔ. 20:​19) Nduyɛ te o kiisaŋ pɛ a yooŋgu o sɔla wo, o keeliaa ndu le. (Ɛfi. 4:​25) Miŋ sɔla nyɛm mala naa o Mɛlɛka piɛiyo niŋndoŋ a yooŋgulaŋ tau o tɛɛŋgii nɛi jw.org, a o Tɛlivisiɔŋ Seiyaa Chɛhowaa choo. Nduyɛ ŋ tiindaŋ nyɔɔŋ muŋ a yooŋgulaŋ ndaŋ.

Mi Seiyaa Chɛhowaa apum soliŋ nyɛm mapuuloŋ kpeku le nyɔɔŋ piondɔɔ a le pisioo. Nduyɛ ma soliŋ vɛlɛ muŋ kpeku le ma luei waŋndo o wallo niŋ. Muŋ kpou cho sɔɔŋ iMɛlɛkaya le, kɛ sɔɔŋ leyulaŋ ŋ cho ni. Kilisiɔŋnɔ yeema mbo fafaŋ “kaala ŋkanioo” wo soliŋ puaapiliaa nduaa kpeku le kanioŋ nuuviaa le.—Hibu. 13:​5.

Baa ŋ nɔ pa miŋ soliŋ nyɛm mapuuloŋ muŋ kpeku le puaapiliaa chuuŋgiaa biyɔɔ o ba le wanaa kpundɔɔ komalla malaa? I cho tonya maa ŋ kaala puaapiliaa naa. Lelaŋ te kpundɔɔ komal nda pɛ, miŋ nɔ yeemɛi tau le nda malaa a nda kɔltaŋ dɛɛniaa. (Chemi. 2:​15, 16) Kɛ nɛi waa naa soliŋndo kpeku tosa mii wa ikala le mi lɛuve ɔɔ kundaa ke nda mala nda yeema wo. (1 Timo. 5:​3, 4, 9, 10, 16) Nduyɛ, ŋ nɔ miŋ tosa mi puaapiliaa naa yiyaŋ maa naa le lɛuve hɛli le nda malaa o nɛi teŋgeŋ koŋ choo le.

Ŋ nɔ miŋ tosa nyɛ o nyɛ le halikpeŋ mi Mɛlɛka sɔla saŋgalaa. (1 Kɔliŋ. 10:​31) Lelaŋ, te a wa pɛ nyɛm mapuuloŋ soliŋndo kpeku le yooŋgulaŋ yɔŋndo, sina kpundɛla cho leniŋ ndaŋ nduyɛ ma wa yekeŋ.