A Sina Pa?

Vɛɛ chondoŋ solioo wa yɛ nyɛ sɔvɛ o Isɔluɛi niŋ sindɛ?

NYƐ sɔviɔɔ pila Chondoŋ solioo wa o naamu Isɔluɛiya niŋ ni. Teleŋnda bɔɔbɔɔ, mi Baabuiyo soo a wanaa chaa nyɛm chaaŋ lɔɔ a chondoŋ solioo wa. Yaulaŋ lapum o Baabuiyo niŋ, yaula ŋchondulaŋ la cho ni. Mɛɛ yau Sam ndo, Chondii Sɔlɔmɔŋ Nde a Chaŋ Imɔnɔɔ cho nuaa yɛ. Mi yau pilɛ soo a mɛɛ yoomoo wa o sindɔɔ niŋ yɛ okɔɔ, dimi maa teleŋnda bɔɔbɔɔ o sɔɔŋ Isɔluɛiya ndaa tosa o yoomu ndaa niŋndoŋ, mi ndaa soli chondoŋ.

Chondoŋ solioo wa o sɔɔŋ ndaa tosa o yoomu ndaa niŋndoŋ. Mi Isɔluɛiya ndaa soliŋ nyɛm chaaŋ kpeku, nduyɛ mi ndaa soli chondoŋ le chɔmndo mɛɛ nda wa sinaŋndo yɛ. (Aisaya 30:29) Mi waŋlaanduaa ndaa lɔɔ dundula pɔmbɔlaŋ, mi ndaa soli chonduŋ kɔl kɛndɔŋ, nduyɛ mi ndaa ye o palɛi dunyɛi choo, te masa sɛnɛiyo ndoo sul pɛ, te puaa chɔuwa ndaa yem pɛ chɔuwo, vɛlɛ a boondii ndaa bii bɔŋaŋndaŋ le Mɛlɛka piɛiyo wo. (Chɔɔchi. 11:34; 1 Saam. 18:​6, 7; 1 Masaa. 1:​39, 40) Mi Isɔluɛiya ndaa soli vɛlɛ chonduŋ ŋmɔnɔŋ le kɔl tambɛi ndaa chɔmndo te wanayɛi ndɛi ndii vi pɛ. (2 Kolo. 35:25) A mɛɛ yau yaasiaa ŋsɔɔ pilɛ dimi yɛ, i cho kpendekele maa, “wanaa ndaa kaala nyɛchaa a chondoŋ solioo wa Isɔluɛiya wa ni.”

Mi masaa o Isɔluɛi niŋ ndaa tuei nyɛchaa yeela. Mi Masaa Sɔɔ veelu Deeve o chiɛi ndɔ lemasaa niŋ le mbo loolul ndu nyɛchaa. (1 Saam. 16:​18, 23) Okoŋ kɔɔli, mɛɛ Deeve simnuŋ masaa, mbo toosiaa nyɛm chaaŋ, mbo poonyiaa chonduŋ kɛndɛ kɛndɔŋ. Mbo kɔɔna vɛlɛ waŋnda apum le nyɛm chaaŋ lɔɔ a le chondoŋ solioo o chiɛi Mɛlɛkaa niŋ. (2 Kolo. 7:6; Emɔɔ. 6:5) Masaa Sɔlɔmɔŋ ndoo nɔ waŋpiaanduaa a waŋlaanduaa le ndu chondoŋ solullo o chiɛi ndɔ lemasaa niŋ.—Ikili. 2:8.

Mi Isɔluɛiya ndaa soli chondoŋ le Chɛhowa saŋgalaa. Puaa ŋwaŋ 4,000 wa le nyɛm chaaŋ lɔɔ a chondoŋ solioo o chiɛi Mɛlɛkaa niŋ Chulusalɛm ni. (1 Kolo. 23:5) Mi ndaa soliŋ chɛŋchɛŋndoŋ, nyɛm chaaŋ iyooŋ, towalaŋ a bululaŋ kpeku le nyɛchaa lɔɔ. (2 Kolo. 5:12) O ve ko wanaa ndaa pɛɛku haa le nyɛchaa lɔɔ wa kinɛi le ndaa soli chondoŋ le Chɛhowa piɛiyo le. Mi Isɔluɛiya ndaa soli chondoŋ te ndaa wa pɛ kɔlaŋ Chulusalɛm le bɔŋaŋnda iwɔsilaŋ biyɔɔ. Chondoŋ muŋ ndaa veelu ni aa, Chondoŋ le Helɔɔ Chulusalɛm. (Sam 120–134) A mɛɛ konala Chuuwa la chɔm yɛ, mi Isɔluɛiya ndaa soli chonduŋ cho o yau Sama ndo niŋndoŋ ŋpum, te ndaa wa pɛ nyɛdiaa Bɔŋaŋ Hiouwɔɔ Choo Wo dioo.

Hau bɛɛ, chondoŋ solioo cho suɛi sɔvɛ le buɛiyaa Mɛlɛkaa. (Chemi. 5:13) Miŋ soli chondoŋ le Chɛhowa saŋgalaa. (Ɛfi. 5:19) Mi chonduŋ naŋ soli diompilɛ woŋ tosa miŋ chɔɔlu puaapiliaa a ndepiliaa sɔɔŋguu ikɛi kpɛɛluŋ. (Kolo. 3:16) Nduyɛ, miŋ luei naa yoomuaŋ le nyɛpalaa biuwɔŋndo. (Walta. 16:25) Chondoŋ solioo cho nɛiyo opilɛ, o naŋ chɔm laalaŋ naa o Chɛhowa niŋndo a kaala naŋ nɔ le ndu wo.