Nyɔɔŋ Tuuliaa Mala Num Ma Loonuŋ

Lepum, i ve bɛɛŋ bɛɛŋ le ma loonuŋ nyɛ ŋ pɛɛku wo le. Kɛ mi i wa tɛtɛlɛ le miŋ loonuŋ nyɛ Chiisu pɛɛku naa wo kanifuule, teleŋnda bɔɔbɔɔ mi ndoo soliŋ tamaseliilaŋ kpeku le naa pɛɛkoo. Ma cheŋnuŋ ndaŋ o kɔl kpendekele, vɛlɛ mi keŋ mala num le ma loonuŋ ndaŋ. O nɛi pilɛ koŋ choo, a tiuba ma loonuŋ nyɛ ŋ pɛɛku wo, te a wa pɛ yiyaŋndo a ndu o kɔl niŋ. Vɛɛ ŋ tiu yɛ ba ma tosa keŋ? Le batiuwaa sɔlaa, wa fotueilaŋ tuuliaa a teleŋ ŋ cho wa pɛɛkoo wo.

Teleŋnda bɔɔbɔɔ, mi wanaa tuuliaa fotueilaŋ a nyɛm sɛnɛi nda pɛɛku woŋ nda loonuŋ muŋ tau. Mi fotueilaŋ tuuliaa la mala nda o cho ko le diomndaŋ loonɔŋndo le, kɛ ma loonuŋ vɛlɛ sɔɔŋ kuluŋ nda cho pɛɛkoo woŋ. Fotueila nda tuuliaa laŋ la kindu bila biyɔɔ le, vɛlɛ la cho tɛtɛlɛ. Nduyɛ wanaa sɔla tɔnɔɔ tau o taasioo hoo niŋnda cho bɛnduaa yuuwa ni.

Lɔɔ cheleŋ te a wa pɛɛkoo pɛ, naapum a kindiŋ le ma tuuliaa fotueilaŋ a nyɛ ŋ pɛɛku wo okɔɔ. Kɔndɔfillo cho num biyɔɔ le chɔɔ mɛɛ kpɛ ŋ loonuŋ yɛ.