Chekɔpu Kuɛ Halaŋ

A SINA pa puaa Chekɔpu cho haa suukaŋndo a nda wa? Mɛɛ Chekɔpu kuɛ le palɛi bɔɔ bɔɔ, mbo komal nda o sooŋ mamɛŋndo ikɛi. A wa saa ndaa mandaa. Mi Chekɔpu nyuna nda aa: ‘Kuɛɛnɛ nya chɛŋ yɛ?’

Ma mulul ndu aa: ‘Halaŋ naŋ chɛŋ ni.’

Mi Chekɔpu nyuna vɛlɛ aa: ‘La sina pa Lebaŋ?’

Ma chɛl aa ‘Ei. Nuawɔ pɛŋ Luechɛl chuandɔ hunɔɔ nda a saa nduaa.’ A cho pa Luechɛl chɔɔ hunɔɔ nda pɔɔli?

Mɛɛ Chekɔpu che dɔɔ Luechɛl hunɔɔ a saa Lebaŋ bomndɔ wa, mbo nyaanuŋ mbo kɔ faŋa pouwo chɔ chɔ o sooŋndo sondoo le mi saa kol. Okoŋ mi Chekɔpu sɔsa Luechɛl kuuwo, mbo chɔɔmuŋ ndu wana suu o cho wo. Mi Luechɛl naŋ kɔl tau, lelaŋ mbo kua dɔɔ chiee chɔ chɔ mbo kɔ dimul Lebaŋ finya ndɔ.

Lebaŋ wa bɔɔ a kɔlkɛndɛ le mi Chekɔpu wa a ndu latulu. Nduyɛ mɛɛ Chekɔpu dimul ndu maa o yeema Luechɛl chuandɔ le nɔɔ, mbo naŋ kɔl tau. Mi Lebaŋ dimul Chekɔpu maa te o wa lende pɛ, mɛɛ o tosa wallo wɔsilaŋ la ŋɔmmɛu le Luechɛl. Mi Chekɔpu tosa lende, kanifuule ndoo kaala bɔɔ Luechɛl. Kɛ mɛɛ teleŋndo fuuluu le mbo chua ndu niko o nɔɔ niŋ, a sina pa nyɛ ndoo yɔŋnuŋ ndo?

Mi Lebaŋ yɔŋgu Chekɔpu chua ndɔ kaasoŋnɔɔ Liya sɔŋgɔ Luechɛllo. Kɛ mi Chekɔpu chɛl vɛlɛ le Lebaŋ wallo tosallo le wɔsiŋ ŋɔmmɛuŋ cheleŋ. Mɛɛ wɔsila ŋɔmmɛulaŋ la chuu, mi Lebaŋ chua niko Luechɛl mbo ke Chekɔpu le mbo wa laandɔ. O teleŋ koŋ niŋ, mi Mɛlɛka ndoo chɛl le mi waŋnda chua laanduaa hiouwɔɔ o pilɛ choo. Kɛ o teleŋndoo niŋ, a mɛɛ Baabuiyo dimi yɛ, wana pɔnɔɔ nɔ mbo chua lanɔɔ o pilɛ kpe.