Vɛɛ Ŋ Looku Yɛ Ma Simnuŋ Chaaŋ O Mɛlɛka?

1, 2. Nɛɛ yaa wa yɛ chaaŋaa Chɛhowaa?

NƐƐ ŋ yeema yɛ mbo wa chaaŋ num? Wana ŋ hɛnaŋndo. Wana nya chɛlaŋ o sɔɔŋ choo nduyɛ mi la wa luɛiyɔɔ a fulaa diompilɛ wo. Wana nɔ kaa kɛndɔɔ vɛlɛ a suiliŋnda kɛndɛla ŋ yeema laŋndo.

² Mi Chɛhowa Mɛlɛka hɛli waŋchieeya apum le ma wa chaaŋaa nduaa. Le taamaseliiyo, Ebilaham wa waŋndo opilɛ o chaaŋaa Chɛhowaa tɛɛŋ. (Aisaya 41:​8; Chemisi 2:​23) Chɛhowa ndoo kaala vɛlɛ Deeve. Mbo dimi maa Deeve wa ‘wana o ihini kɔl lo ni.’ (Walta Wanaa Chiisuaa 13:​22) Nduyɛ Daaniɛɛ ndoo suaa le Mɛlɛka wo, Chɛhowa ndoo ‘kaala ndu tau tau.’—Daaniɛɛ 9:​23.

3. Le yɛɛ Ebilaham, Deeve, a Daaniɛɛ wa yɛ chaaŋaa Chɛhowaa?

³ Vɛɛ Ebilaham, Deeve, a Daaniɛɛ ndaa simnuŋ yɛ chaaŋaa Chɛhowaa? Mi Chɛhowa dimul Ebilaham aa, ‘A tosa nyɛ ya dimul num ndo.’ (Chɛnɛsee 22:​18) Mi Chɛhowa simnuŋ chaaŋ o wanaa tusiŋ nduyɛ ma diikuŋ ndu wa. Waŋnda o kaalaŋ niŋ nɔla ma simnuŋ chaaŋaa nduaa. Mi Chɛhowa tɛɛsial kaaleŋ Isɔluɛi aa, “La tusiŋ o diom nuu bɛŋgu, koŋ tosa ni mi wa Mɛlɛka nya, nduyɛ mi nya bɛɛ wa wanaa ni.” (Chɛluimaya 7:​23) Lelaŋ, num bɛɛ nɔ ma diikuŋ Chɛhowa te a yeema pɛ kɛsɛ kɛsɛ ma simnuŋ chaaŋ ndɔ.

CHƐHOWA MANDA CHAAŊAA NDUAA

4, 5. Vɛɛ Chɛhowa manda yɛ chaaŋaa nduaa?

⁴ Baabuiyo dimi a Chɛhowa okɔɔ maa “wanaa cho ndu o hɔl sakpo ma tosa nyɛ o dimul nda wo wa, dialluŋ kalaŋ o ke nda ni.” (Koloniko Diiŋ Ndɔɔ 16:​9) O Sam 32:​8, mi Chɛhowa chuel chaaŋaa nduaa opilɛ buŋgɛi aa, “I cho num pɛɛku, mi chɔm num nɛi ŋ nɔ ma kuɛ choo wo. I cho num sila nduyɛ, mi manda num nyɛ yɔnuŋ num te.”

⁵ Yaamɔɔnɔ bɛndoo yeema naa kuunaa le miŋ simnuŋ chaaŋaa Mɛlɛkaa. Kɛ Chɛhowa yeema mbo manda naa. (Nuawɔ Sam 55:​22.) Maa chaaŋaa Chɛhowaa, ŋ cho ndu piɛiyo a kɔl naa kpou. Ŋ chɔm lo lechoo wo o ndulo o yɔŋ bɛɛ miŋ wa o teleŋnda kala kalalaŋ bɛŋgu. Nduyɛ ŋ nɔ tiindaŋ pilɔɔ a mɛɛ wana ŋchondoo ndoo nɔ tiindaŋndo yɛ. Mbo poonyiaa a Chɛhowa okɔɔ aa, “Le pɛŋgu o pɛŋgu o cho ya ikɛi, le hei, nyɛ o nyɛ hiiluu ya le.” (Sam 16:​8; 63:​8) Vɛɛ Setana cho yɛ kindiŋndo le naa kuunaa simnɔŋndo chaaŋaa Mɛlɛkaa?

SETANA BAALAŊ WAŊCHIEEYA

6. Yɛɛ Setana dimi yɛ a waŋchieeya okɔɔ?

⁶ O Buŋgɛi 11 ve niŋ, miŋ pɛɛku a mɛɛ Setana simul Chɛhowa yɛ, nduyɛ mbo dimi maa wana lachoowaa Mɛlɛka cho ni. Nduyɛ maa o chɛl mi Adam nda Ifi kɛɛsiaa a ba nda le sinaa o kɛndɔɔ a o wɔɔŋndo le. Yau Choobu wo o Baabuiyo niŋ pɛɛku naa maa mi Setana baalaŋ vɛlɛ waŋchieeyaa yeema simnɔŋndo chaaŋaa Mɛlɛkaa wa. Mi Setana dimi maa le mɛɛ waŋchieeyaa cho Mɛlɛka nyɔɔŋ sɔlaa o ba yɛ nda cho Ndu piɛiyo ni, kɛ o cho le mɛɛ nda kaala Ndu yɛ le. Mi Setana dimi vɛlɛ maa o nɔla mbo tosa mi wana o wana simul Mɛlɛka. Ŋ yaasiaŋndɔ nyɛ naŋ pɛɛku Choobu o ba wo nduyɛ a mɛɛ Chɛhowa manda ndu yɛ.

7, 8. (a) Nɛɛ wa yɛ Choobu? (b) Yɛɛ Setana ndoo dimi yɛ a Choobu okɔɔ?

⁷ Nɛɛ wa yɛ Choobu? Wana kɛndɔɔ o wa ni. Chɔŋ a teleŋ o wa achallo mbo huŋ bii a hau, o cho niŋ le wɔsilaŋ 3,600. Mi Chɛhowa dimi maa o teleŋ koŋ niŋ, wana ve maa ndu o chieeŋndo choo le. Choobu ndoo nɔ bɛɛle yiŋgoloŋndeŋ le Mɛlɛka. Nduyɛ, mbo tul o wɔɔŋndo leyɛ. (Choobu 1:​8) A tonya, chaaŋ o Chɛhowa kpeekpei Choobu wa ni.

⁸ Mi Setana dimi maa a kaayei Choobu cho Mɛlɛka piɛiyo ni. Mi Setana dimul Chɛhowa aa, “Le teleŋ o teleŋ a cho Choobu mandaa a chiɛi ndɔɔ, nduyɛ a nyɛ o nyɛ o nɔ. Nduyɛ ma lo o koŋ ma duau ndu sala o nyɛ o nyɛ niŋ o tosa, ma tosa mbo sul sullo pila a chɔluaa. Chɔluaa nduaa a cho a tiuwaa lɛŋndeŋ kpou. Kɛ te a poondiaa Choobu nyɛm muŋ o ba pɛ kpou, Choobu cho lasisi num o hɔl mbo yiei num.”—Choobu 1:​10, 11.

9. Yɛɛ Chɛhowa ndoo chɛllɛ Setana le tosaa?

⁹ Mi Setana dimi maa le nyɛm Choobu cho sɔlaa Chɛhowa o ba kinɛiyoŋ o cho Ndu piɛiyo ni. Mi Setana dimi vɛlɛ maa o tiuba mbo kuuna Choobu Chɛhowa piɛiyo. Chɛhowa chɛl nyɛ Setana dimi wo le. Kɛ mbo ke Setana dioo le Choobu tɔɔndaŋndo le sinaa te chaaŋ o Chɛhowa Choobu wa ni, nduyɛ te o kaala pɛ Chɛhowa.

SETANA TƆƆŊNDAŊ CHOOBU

10. Vɛɛ Setana ndoo tɔɔndaŋ yɛ Choobu, nduyɛ yɛɛ Choobu tosa yɛ?

¹⁰ O tasoo, mi Setana tɛɛmbuu chɔluaa Choobu ndoo nɔ wa kpou. Nduyɛ mbo diu buɛiyaa Choobu wa a bɔɔbɔɔ. Mi nyɛ o nyɛ Choobu ndoo nɔ tambu. O tɔɔndaŋ mɛɛlaa niŋ, mi Setana diu chuauwaa Choobu wa tɔ a hueiyii bɛndu bɛnduei. Kɛ mi Choobu chɔm lo lechoo wo o Chɛhowa lo. “O sɔɔŋ palaŋ komal muŋ Choobu woŋ kpou, Choobu tosa yɔŋ wɔɔŋ o yɔŋ wɔɔŋ te, nduyɛ o bii vɛlɛ Mɛlɛka tɔɔyaŋ le nyɛ yɔnuŋ ndu wo le.”—Choobu 1:​12-19, 22.

11. (a) Yɛɛ cheleŋ Setana ndoo tosallɛ Choobu? (b) Kɛ yɛɛ Choobu tosa yɛ?

¹¹ Kɛ Setana mɛɛlu le. Mbo simul Mɛlɛka mbo dimi aa, “Kɛ dɔu wɔ Choobu naa choo, Choobu cho lasisi num o hɔl mbo yiei num.” Lelaŋ, mi Setana duau Choobu naa wɔɔŋ wɔɔŋndo choo. (Choobu 2:​5, 7) A koŋ kpou, mi Choobu chɔm lo lechoo wo o Chɛhowa lo. Nduyɛ o vi lende, o “dimi diomnde wɔɔŋ a Mɛlɛka le.”—Choobu 2:​10.

12. Vɛɛ Choobu chɔm yɛ maa wana lachoowaa Setana wa ni?

¹² Pesiŋ bɛɛ Choobu ndoo sina nyɛ o nyɛ a sɔɔŋ Setana hɛɛnduu ndu choo woŋ te, ɔɔ le sabu o wa saŋgaa tau tau wo le. Mbo yiyaŋ maa Chɛhowa wa ndu kpundɛlaŋ tusioo choo ni. (Choobu 6:​4; 16:​11-14) Kɛ a koŋ kpede, mi Choobu chɔm lo lechoo wo o Chɛhowa lo. Kɛ kiisaŋ o kiisaŋ ve lɛ ndu le. Choobu ve wana ikaaye le. Chaaŋ o Mɛlɛka o wa ni, nduyɛ ndoo kaala Mɛlɛka. Choolaŋ sɔɔŋ Setana dimi woŋ kpou wa ni!

13. Yɛɛ wa yɛ fulamakɔɔlioo le lo lechoo Choobu wo?

¹³ Mi che bɛɛ Choobu ndoo sina nyɛ wa yɔŋnɔŋndo o choo choo niŋndo le, kɛ mbo chɔm lo lechoo wo o Mɛlɛka lo. Nduyɛ mbo chɔm maa wana dɛnɛ wɔɔŋndo Setana wa ni. Mi Chɛhowa duau Choobu sala le lo lechoo ndɔɔ.—Choobu 42:​12-17.

MƐƐ SETANA HƐƐNDUU NUM SƆƆŊ CHOO YƐ

14, 15. Sɔɔŋ yɛɛ Setana hɛɛnduu yɛ waŋpiaanduaa a waŋlaanduaa kpou choo?

¹⁴ Hau, mi Setana dimi maa ŋ cho fuu Mɛlɛka piɛiyo le kanifuule, nyɔɔŋ naŋ cho ndu sɔlaa o ba ni. O Choobu 2:​4, mi Setana dimi aa, “Waŋndo mbo yɔŋgu nyɛm ndɔɔŋ kpou le yoomu ndɔɔ baŋaa.” Lelaŋ, mi Setana bii waŋpiaanduaa a waŋlaanduaa kpou tɔɔyaŋ maa a nɔ kaayei, o cho ko Choobu le. Mɛɛ wɔsilaŋ la hiou o kɛmɛlaŋ niŋ o piɔm Choobu wo kɔɔli, Setana wa wɔ hiouwɔɔ lachi a Chɛhowa yioulaŋ vɛlɛ a buɛiyaa nduaa sɔɔŋ hɛɛnduu wo choo. Le taamaseliiyo, o Pulɔwaa 27:​11, mi Chɛhowa dɛɛniaa naa aa, “Wa wana kɔl kalu po nuu, ma tosa mi naŋ kɔl. Koŋ tosa ni, wana o wana kindi le ya chuaa chɔdɔ pɛ, I sɔla nyɛ ya I muli ndu diom ndo.”

¹⁵ A nɔla ma tosa chuaŋ chuaa le Chɛhowa diikɔŋndo nduyɛ ma chɔm lo lechoo wo o ndu lo maa chaaŋ ndɔ. Okoŋ, ma chɔm maa wana lachoowaa Setana cho ni. O yɔŋ bɛɛ maa a nɔ le siŋgaŋnda bɛndaŋ tosaa o yoomu numndo niŋ le simnɔŋndo chaaŋ o Mɛlɛka, kɛɛsiaa kɛndɔɔ pila ŋ cho koŋ tosa ni. O cho kɛɛsiaa lamamɔɔ le cho koŋ te. Setana dimi maa te a nɔ pɛ bahawɛilaŋ, a tuiba ma chɔm lo lechoo wo le. Mbo kindiŋ le naa huiyo le halikpeŋ miŋ kɛɛ lo lechoo wo chɔmndo o Mɛlɛka lo. Vɛɛ o tosa yɛ keŋ?

16. (a) Nɛila kuɛɛ Setana cho yɛ soliŋndo kpeku le waŋnda kuunaa Chɛhowa piɛiyo? (b) Vɛɛ Nyina Wɔɔŋndo kindiŋ yɛ le num kuunaa Chɛhowa piɛiyo?

¹⁶ Setana cho nɛila bɔɔbɔɔ soliŋndo kpeku le naa kuunaa simnɔŋndo chaaŋaa Mɛlɛkaa. Mbo chiŋalaŋ naa “mɛɛ kpɔkuŋ bɛndoo balu visiaa kɔɔli le nda diyɔɔ yɛ.” (Pitɛ Tasoo 5:​8) Kaamaa nɔ mbo bii naa le te chaaŋaa naa, yuŋgu naa, ɔɔ wanaa cheleŋ kindiŋ pɛ le naa kuunaa Baabuiyo pɛɛkoo a tosaa nyɛ cho o kɛndɔɔ wo. Ma yiyaŋ maa simullo nda cho num ni.a (Chɔŋ 15:​19, 20) Mi Setana chɔm vɛlɛ maa “kiilanɔ Mɛlɛka cho le nyɛ wawoŋndo wo o cho ni.” Lelaŋ mbo kindiŋ le naa huiyo le halikpeŋ miŋ kɛɛ Chɛhowa diikɔŋndo. (Kɔliŋtiaŋ Diiŋ Ndɔɔ 11:​14) Nɛi cheleŋ Setana soliŋ kpeku le naa kuunaa Chɛhowa piɛiyo wo cho ni, maa ŋ bɛnda kposoŋ le Mɛlɛka piɛiyo le.—Pulɔwaa 24:​10.

DIIKUŊ SAWALA CHƐHOWALAŊ

17. Le yɛɛ naŋ diikuŋ yɛ Chɛhowa?

¹⁷ Te ŋ diikuŋ pɛ Chɛhowa, miŋ chɔm maa wana lachoowaa Setana cho ni. Yɛɛ mala yɛ naa miŋ diikuŋ? Baabuiyo dimi aa, “Kaala Mɛlɛka Yaawɛɛ, o cho Mɛlɛka ŋ piɛiyo wo nyɛ kɛndɛ kɛndɛ. Kaala ndu a kɔl numndo kpou, nduyɛ ma wa yiyaŋndo a ndu okɔɔ le teleŋ o teleŋ. Kaala ndu a kpaaya numndo kpou.” (Ditɔnɔmii 6:​5) Ŋ diikuŋ Chɛhowa kanifuule ŋ kaala ndu. Mɛɛ kaala naa le Chɛhowa hiau lachi fau, miŋ yeema tosaa nyɛ o nyɛ o dimul naa. Mi Chɔŋ, wana Chiisu vem hɔlte ndɔ wo poonyiaa aa, “Mɛlɛka kaalaa cho hoo ni, nyɛ o dimul naa wo tosaa. Nduyɛ, nyɛ o dimul naa le tosaa wo, o cho nyɛ kendu maa mi ŋ bumba ndu tosa le.”—Chɔŋ Tasoo 5:​3.

18, 19. (a) Ɔɔ sɔɔŋ ŋpum ŋ Chɛhowa dimul naa maa ŋ wɔu woŋ? (b) Vɛɛ naŋ sina yɛ maa Chɛhowa dimul naa le tosaa nyɛ naŋ tuiba le wo le?

¹⁸ Ɔɔ sɔɔŋ ŋpum ŋ Chɛhowa dimul naa maa ŋ wɔu woŋ? Taamaseliilaŋ lapum la cho o kɔfoo hoo niŋ, “Tul Kaala Chɛhowa Kɛɛ Laŋ Leyɛ.” O kandɔŋndo, ma yiyaŋ maa kaalaŋ ndaŋ lapum la wɔu le. Kɛ te a veelu pɛ diomndaŋ o Baabuiyo niŋ nduyɛ ma yiyaŋ nyɛkɛndɛi o laŋ choo, a cho sina le sabu i cho suɛi taasi le sawala Chɛhowalaŋ diikɔŋndo wo. Ma yiyaŋ vɛlɛ maa a nɔ ma tosa siŋgaŋndaŋ lapum o yoomu numndo niŋ. Lepum, hei ve suɛi kpɛdɛ le. Kɛ te a tosa laŋ pɛ, a cho kɔl nyuloo a nyaaloo sɔla le waa chaaŋ o Mɛlɛka chɔm lo lechoo wo wo. (Aisaya 48:​17, 18) Vɛɛ naŋ sina yɛ maa ŋ tiuba miŋ tosa siŋgaŋnda waa naa?

¹⁹ Pɛ pɛ bɛɛ Chɛhowa nyuna naa le tosaa nyɛ naŋ tiuba le wo le. (Ditɔnɔmii 30:​11-14) Chaaŋ naa kpeekpei o cho ni. O sina naa mbo hiau naapila. O sina kpaaya naa a dialuŋ naŋ vilɛiyoŋ. (Sam 103:​14) Mi Pɔɔl, wana Chiisu vem hɔlte ndɔ wo dɛɛniaa naa aa, “Kɛ nduyɛ, buŋgɛi Mɛlɛka chua le tosaa ve tosaa o tosa ndi ni. O chɛl mi tɔɔndaŋ nya nɔ kpaaya le hiouwɔɔ le wo o komal nya le. Boondii tɔɔndaŋndo o komal nya ve Mɛlɛka nɔla mbo chɔm nɛi nya looku mi la hɛluŋ leniŋ ndo.” (Kɔliŋtiaŋ Tasoo 10:​13) Ŋ nɔ tiindaŋndo maa Chɛhowa cho naa lɔɔlɔɔ kpaaya ke le o kɛndɔɔ tosaa. O cho num ‘kpaaya bɛndoo’ ke le num malaa ma biunuŋ bahawɛila kala kalalaŋ.—Kɔliŋtiaŋ Diiŋ Ndɔɔ 4:​7.

KAALA NYƐ MƐLƐKA KAALA WO

20. Suliŋnda kuɛɛ ŋ nɔ yɛ ma tol kɔɔli, nduyɛ le yɛɛ?

²⁰ Te ŋ yeema pɛ le waa chaaŋaa Chɛhowaa, ŋ nɔ miŋ pɛŋgi tosaa nyɛ Chɛhowa dimi maa o wɔu wo. Kɛ ŋ nɔ miŋ tosa tau. (Luomaŋnda 12:​9) Chaaŋaa Mɛlɛkaa kaala nyɛ o kaala wo. A nɔ ma tosa nyɛ Sam 15:​1-5 dimi wo. (Nuawɔ.) Chaaŋaa Chɛhowaa nɔ ma tol suliŋnda ndɔlaŋ kɔɔli. Suliŋnda nda nɔ ma chɔm ndaŋ la cho laŋ ni, “kaaliaŋndo, a kɔl kɛndɛ kpeekpeiyo nɔɔ, a waa naa pilɛ sɛɛŋgiaŋ ve le, a biuwaŋndo vellaa velle, a maaliaŋndo, a waa wana kɛndɛ o chaaŋ num ndo, a waa wana wana nɔla ma tiindaŋ, a waa wana tusiaŋ, a kɔl numndo baa tiuwo.”—Kaleesiaŋnda 5:​22, 23.

21. Vɛɛ ŋ looku yɛ ma chɔm suliŋnda Mɛlɛka kaala laŋ?

²¹ Vɛɛ ŋ chɔm yɛ suliŋnda kɛndɛlaŋ ndaŋ? A nɔla ma sina nyɛ Chɛhowa kaala wo te a wa pɛ nuaa o Baabuiyo niŋ nduyɛ ma wa ndu pɛɛkoo lɔɔlɔɔ. (Aisaya 30:​20, 21) Te a tosa lende pɛ, kaala numndo le Chɛhowa cho hiouwɔɔ lachi. Nduyɛ te kaala numndo le ndu hiou lachi pɛ, a cho yeema le ndu diikɔŋndo.

22. Yɛɛ cho yɛ wa fulamakɔɔlioo te a diikuŋ pɛ Chɛhowa?

²² Siŋgaŋnda ŋ yeema ma tosa o yoomu numndo niŋndaŋ cho ko mɛɛ ŋ soli naa nyɛla paandulaŋ nduyɛ ma wounuŋ la sɛilaŋ yɛ. Mi Baabuiyo dimi maa a nɔ ma “chii a wana chieeyɛi paanduei” nduyɛ ma wounuŋ “wana chieeyɛi sɛnɛiye.” (Kolosiaŋnda 3:​9, 10) Hei cho suɛi kpɛdɛ le. Kɛ te ŋ tosa pɛ siŋgaŋ waa naa nduyɛ miŋ diikuŋ Chɛhowa, o chua buŋgɛi maa o cho naa “tɔnɔ bɛndoo” ke. (Sam 19:​11) Hɛli le Chɛhowa diikɔŋndo nduyɛ ma chɔm maa wana lachoowaa Setana cho ni. Piɛi Chɛhowa, o wa ko le tɔnɔ cho o chilaŋ niŋndo le, kɛ le kaala kpeekpei ŋ nɔ le ndu wo. O hei niŋ, a cho simnɔŋ chaŋyɛi kpeekpeiye le Mɛlɛka!