Haki Masaa Deeve Tosa Wo

Mɛɛ Sɔɔ vi, mi Deeve simnuŋ masaa. Nduyɛ o wa wɔsilaŋ 30. Mɛɛ Deeve tosa wɔsilaŋ latiŋ o masaleŋ choo, ichɔl pilɛ, o wa o chiɛi ndɔɔ tullo, mbo cha wana lanɔ kɛndɛ kɛndɔɔ. Mi Deeve saaluŋ maa Ba-siɛɛba chuaa hoo ndoo nɔ diolaŋ ni. Nduyɛ maa po chɔuwo Yulaya, laa ndɔ chuaa hoo wa ni. Mi Deeve veelu Ba-siɛɛba mbo huŋ o chiɛi ndɔ lemasaa. Okoŋ, mbo hini a ndu, nduyɛ mbo chua folioo. Mi Deeve kindiŋ le nyɛ o tosa wo vioŋɔɔ. Mbo dimul wana wa puaa nduaa chɔuwa bolleŋ ndo le mbo hivi Yulaya lachi naa chɔuwo wa o kala kpoke wa, okoŋ mi nda miiŋguŋ kɔɔli. Mɛɛ nda dii Yulaya o chɔuwo, mi Deeve chua Ba-siɛɛba o nɔɔ niŋ.

Kɛ mi Chɛhowa cha sɔɔŋ wɔɔŋ Deeve tosa woŋ kpou. Yɛɛ Chɛhowa ndoo tosa yɛ? Mbo viam wana suaa le ndu wo Netaŋ naa Deeve chua. Mi Netaŋ dimul Deeve aa: ‘Po sulaa pilɛ ndoo nɔ saa tau. Kɛ wana bala fondoo, saa o pilɛ kpe ndoo nɔ ni, nduyɛ ndoo kaala ndu tau. Mi wana sulaa hoo bii saa wana bala fondoo hoo.’ Okoŋ mi Deeve duaunuŋ tumbe, mbo dimul Netaŋ aa: ‘Wana sulaa koŋ nɔ mbo sɔla piɔmndo!’ Mi Netaŋ dimul Deeve aa: ‘Num cho wana sulaa koŋ ni.’ Mi Deeve tambu kɔl tau, nduyɛ mbo dimul Netaŋ aa: ‘I tosa hakioo a Chɛhowa.’ Mi haki Deeve tosa hoo wo chuu ndu a yuŋgu ndɔɔ kpundɛla bɔɔbɔɔ. Chɛhowa dii ndu le, kanifuule ndoo sandu, nduyɛ o wa wana tusiaŋ. Kɛ mbo tusi ndu nyɛpalaa choo.

Deeve ndoo yeema chiɛiyo taŋgullo le Chɛhowa. Kɛ Sɔlɔmɔŋ po ndɔ Chɛhowa hɛli ni le mbo taŋgul ndu. Mi Deeve kandu nyɔɔŋ chuuŋgiaa le Sɔlɔmɔŋ malaa. Okoŋ mbo dimi aa: ‘Chiɛi Chɛhowa wo nɔ mbo wa o kɛndɛ kɛndɛ. Poombɔɔ Sɔlɔmɔŋ cho wɔ ni, kɛ I cho ndu mala nyɛm taŋgulaŋ chuuŋgiaa.’ Mi Deeve yɔŋgu kaniŋ ndɔŋ tau le nyɛm taŋgulaŋ piondɔɔ. Mbo nuuviaa wanaa chaa taŋgullo nyɛkɛndɛiya. Mbo chuuŋgiaa kooliiyoŋ, kaniŋ humboŋ, a yɔmii sida nda fula Taaya a Saidɔŋ nde. Tuupa mi Deeve wu, mbo tuula o yauwo choo mɛɛ chiɛiyo hoo ndoo nɔ le taŋgulɔŋndo yɛ. Okoŋ, mbo ke Sɔlɔmɔŋ yau koŋ. Mbo dimul ndu aa: ‘Chɛhowa pila chɔm ya ni maa I tuuliaa chiɛiyo hoo lende. Chɛhowa cho num mala. Yɔŋ isiooŋ te. Wa a dialuŋ kala, ma tosa wallo hoo.’