Mi Chɛhowa Biunuŋ Chona

O chiee bɛndu Asiiliaŋnda niŋ Ninivɛɛ, waŋnda ndaa nɔ bɔɔ dɛnɛ wɔɔŋndo. Mi Chɛhowa viam Chona, wana ndoo suaa le ndu wo Ninivɛɛ le mbo kɔ dimul waŋnda maa a nɔ ma siŋgaŋ. Kɛ mi Chona nyaanuŋ, mbo kuaŋnuŋ naa cheleŋ. Mbo kɔ luɛi o dɛndɛ wa kɔlaŋ Taasi wo niŋ, mbo kuaŋnuŋ.

Mɛɛ dɛndɔɔ wa o mɛŋndaŋ choo, mi hueiyii fuku fukuei kandu hɔŋndo. Nduyɛ, mi siooŋnde bii wanaa wa kɔlaŋ a dɛndɔɔ wa. Ma piɛi o mɛlɛkaa ndaa lo, okoŋ ma nyuna aa: ‘Le yɛɛnɛ hei cho yɛ yɔŋnɔŋndo?’ O mɛɛlulaŋ kpɔŋ, mi Chona dimul nda aa: ‘Ya tosa ni mi kpundɔɔ hoo komal naa. Kanifuule, wali Chɛhowa vem ya tosaa wo ya kɛɛ ni, mi wa nyaanɔŋndo. La chua ya mi la mal la o peelo, hueiye cho pɛŋgi hɔŋndo.’ Wanaa wa kɔlaŋ a dɛndɔɔ wa ndaa yeema ma mal Chona o peelo le. Kɛ mbo lambaŋ nda dimullo maa a mal ndu o peelo. Mɛɛ nda mal Chona o peelo, mi hueiye pɛŋgi hɔŋndo.

Chona ndoo yiyaŋ ko maa o cho wu. Kɛ mɛɛ nda mal ndu o peelo mbo wa tolɔɔ o mɛŋndaŋ bɛŋgu, mbo piɛi o Chɛhowa lo. Okoŋ mi Chɛhowa yɔŋ suu bɛndu bɛndoo, mi suu koŋ mial Chona kɛ o dii ndu le. Chona wa suu koŋ o dembe mbo piɛi aa: ‘I chua buŋgɛi maa lɔɔlɔɔ, I cho num wa diomndo tueiyɔɔ.’ Mi Chɛhowa manda Chona suu koŋ o dembe le palɛi i yaa. Okoŋ kɔɔli, mbo tosa mi suu koŋ kɔ tufu ndu o kɔŋgɔ.

Le mɛɛ Chɛhowa ndoo chiindiaa Chona yɛ, baa keŋ chɔm ni maa ndoo nɔ lɛ mbo kuɛ Ninivɛɛ le? Pɛ pɛ bɛɛ. Mi Chɛhowa dimul vɛlɛ Chona le mbo kuɛ loŋ. O laŋ niŋ, mi Chona tosa nyɛ Mɛlɛka dimul ndu wo. Mbo kua Ninivɛɛ, mbo kɔ dimul wanaa dɛnɛ wɔɔŋnda haa aa: ‘O palɛi 40 bɛŋgu, Mɛlɛka cho hunɔɔ Ninivɛɛ tɛɛmbuu.’ Mi nyɛ Chona ve bɛɛ kɔl te wo yɔŋnuŋ. Mi waŋnda Ninivɛɛ yaŋ nilaŋ o yooŋgoo hoo, nduyɛ ma tosa siŋgaŋ ndaŋ. Mi masaa Ninivɛɛ dimul wanaa nduaa aa: ‘La piɛi Mɛlɛka, nduyɛ mi la wookuŋ. Naapum o cho naa tɛɛmbuu le.’ Mɛɛ Chɛhowa che maa waŋnda haa wookuŋ, o tɛɛmbuu lɛ Ninivɛɛ le.

Mi Chona tuulu kɔl le mɛɛ Mɛlɛka kɛɛ le Ninivɛɛ tɛɛmbuuwo yɛ. Yiyaŋndɔ a hei okɔɔ: Chɛhowa wa Chona biuwɔŋndo, nduyɛ mbo tuiinuŋ ndu inyiɛɛ. Kɛ Chona tuiinuŋ waŋnda Ninivɛɛ inyiɛɛ le. Mi Chona faŋaŋ chiee, mbo kɔ chal o wundule tɔlɔɔ pum bɛŋgu. Nduyɛ mɛɛ tɔlɔɔ koŋ o vi, mi Chona tambu kɔllo tau. Mi Chɛhowa dimul ndu aa: ‘A buulaŋ le tɔlɔɔ hoo mbo hiau le waŋnda Ninivɛɛ. I tuiinuŋ waŋnda Ninivɛɛ inyiɛɛ, nduyɛ I tɛɛmbuu lɛ nda le.’ Yɛɛnɛ hei pɛɛku yɛ naa? Hei pɛɛku naa maa waŋnda Ninivɛɛ wa a sɔvɛ mbo hiau tɔlɔɔ koŋ poloŋ.