Yɛɛ Naŋ Nɔ yɛ Miŋ Tosa le Mi Mɛlɛka Hini Kɔl a Piɛile Naaleŋ

A mɛɛ naŋ pɛɛku o suɛi lebolii naŋ hiou ve niŋ yɛ, o cho piɛiye kpou le Mɛlɛka chɛl te. Kɛ o wa bɛɛ lende ni, ŋ nɔla miŋ biilu Wana Toosiaa naa wo o nɛi nɛŋi ndu kɔllo wo choo. Piɛile kuɛɛnɛ le nɛŋi yɛ ndu kɔllo? (Chemisi 1:​27) Tofawɔ nyɛ Baabuiyo pɛɛku a hei okɔɔ wo.

1. O yɛɛ choo piɛile naaleŋ le nɔ yɛ mi le tɔlnuŋ?

Piɛile naalaŋ le nɔ mi le tɔlnuŋ o Baabuiyo choo. Mi Chiisu dimul Mɛlɛka aa: “Diom numndo cho tonyaa ni.” (Chɔŋ 17:​17) Piɛiye ipum kɛɛ tonya cho o Diom Mɛlɛkaa niŋndo. Okoŋ, ma muliŋ kɔl kalula waŋnda chieeya a naamulaŋ pɛɛkoo. Kɛ Chɛhowa niŋ kɔl a wanaa kɛɛ “sawala” ndɔlaŋ nda le. (Nuawɔ Maki 7:​9.) O baa pilɔɔ choo, te o yɔŋ pɛ miŋ tol Baabuiyo kɔɔli nduyɛ miŋ bii sawala ndɔlaŋ, mbo naŋ kɔl tau.

2. Vɛɛ naŋ nɔ yɛ miŋ piɛi Chɛhowa?

Chɛhowa toosiaa naa ni. Le hei, ndupilɛ kpe naŋ nɔ ni miŋ piɛi. (Sɔɔŋ Chɔɔmaŋndoŋ 4:​11) Hei sim ni maa ŋ nɔ miŋ kaala ndu. Nduyɛ, ŋ nɔ miŋ soliŋ piɔmnda ɔɔ fotueilaŋ kpeku le ndu piɛiyo le.—Nuawɔ Aisaya 42:​8.

Ŋ nɔ miŋ tosa mi piɛile naaleŋ le “dendu nduyɛ mi Mɛlɛka chɛl” teŋ. (Luomaŋnda 12:​1) Hei sim ni maa, ŋ nɔ miŋ bii sawala Chɛhowalaŋ. Le tamaseliiyo, wanaa kaala Chɛhowa wa kaala sawala ndɔlaŋ a nɔɔ okɔɔ nduyɛ ma wa laŋ dɔwɔɔ o wali niŋ. A luei vɛlɛ balaŋ o sɔɔŋ wɔɔŋndoŋ niŋ te, mɛɛ sikɛɛtiiyo ɔɔ taaŋ bɛndoo kolɔɔ, koowaŋ chuaa o nɛi bɛnda le wo choo, a muɛiyaŋ kolɔɔ bɛndoo cho naa yɛ.a

3. Le yɛɛ naŋ nɔ yɛ miŋ piɛi Chɛhowa a chaaŋaa naa laalaŋnda latulu?

Mi bɔŋaŋnda naŋ bii o lɔɔ o lɔɔ bɛŋgulaŋ la ke naa fondaa le Chɛhowa “saŋgalaa o wanaa chuuŋgiaŋ le ndu sooluuwo wa tɛɛŋ.” (Sam 111:​1, 2) Nɛiyo opilɛ o naŋ saŋgala Mɛlɛka wo cho chondoŋ solioo o ndu lo ni. (Nuawɔ Sam 104:​33.) Chɛhowa yeema naa miŋ wa kɔlaŋ o bɔŋaŋndaŋ kanifuule, o kaala naa. Nduyɛ, o sina maa la cho naa mala miŋ tuei yoomoo yeela lefafɛɛŋ. Te ŋ chuuŋgiaŋ pɛ o bɔŋaŋnda naalaŋ, miŋ dɛɛniaŋ kɔltaŋ vellaa velle.

CHƆƆLU YAASIAA

4. Ŋ nɔ miŋ soliŋ piɔmnda ɔɔ fotueilaŋ kpeku le Mɛlɛka piɛiyo le

VIDUEIYO: Baa Mɛlɛka Chɛl Pa Miŋ Soliŋ Piɔmnda Kpeku le Ndu Piɛiyo? (3:​26)

• Yɛɛ ndoo yɔŋnuŋ yɛ mɛɛ wanaa Mɛlɛkaa o sindɔɔ niŋ toosiaa piɔmndo le Mɛlɛka piɛiyo?

Mi waŋnda apum yiyaŋ maa te a soliŋ pɛ piɔmnda kpeku o Mɛlɛka piɛiyo niŋ, a nɔla ma sɔɔŋguu ndu ikɛi. Kɛ baa a sina pa maa mi hei tosa mi Mɛlɛka wa landaŋ a nda? Nuawɔ Ɛsɔdɔɔ 20:​4-6 a Sam 106:​35, 36, okoŋ mi la suukaŋ o nyunalaŋ ndaŋ choo:

• Nyɛm yɛɛ num che yɛ niŋ waŋnda soliŋndo kpeku o Mɛlɛka piɛiyo niŋ?

• Vɛɛ kɔllo wa yɛ Chɛhowa te ŋ soliŋ pɛ piɔmnda kpeku?

• Vɛɛ num yiyaŋ yɛ a piɔmnda soliŋndo kpeku okɔɔ?

5. Miŋ sɔla baŋaa te ŋ piɛi pɛ Chɛhowa ndupilɛ kpe

VIDUEIYO: Tonyaa Baŋa Ya (5:​16)

Nuawɔ Sam 91:​14, okoŋ mi la suukaŋ o nyunaa hoo choo:

• Yɛɛ Chɛhowa dimi yɛ le naa tosallo te ŋ kaala ndu pɛ miŋ piɛi ndu ndupilɛ kpe?

6. Miŋ piɛi Mɛlɛka o bɔŋaŋndaŋ

Miŋ saŋgala Chɛhowa nduyɛ miŋ dɛɛniaŋ kɔltaŋ vellaa velle te ŋ soli pɛ chondoŋ miŋ yɔŋgu vɛlɛ mulilaŋ o bɔŋaŋndaŋ. Nuawɔ Sam 22:​22, okoŋ mi la suukaŋ o nyunalaŋ ndaŋ choo:

• Baa ma naŋ pa kɔl te waŋnda wa pɛ mulilaŋ yɔŋgoo o bɔŋaŋndaŋ?

• A yeema pa ma bɛɛndiaŋ le mulioo yɔŋgoo o bɔŋaŋndo?

7. Mi Chɛhowa naŋ kɔl tau te ŋ chɔm pɛ waŋnda nyɛ naŋ pɛɛku wo

Nɛilaŋ la cho tau la naŋ chɔm waŋnda tonya cho o Baabuiyo niŋndo. Nuawɔ Sam 9:​1 a 34:​1, okoŋ mi la suukaŋ o nyunaa hoo choo:

• Yɛɛ ŋ pɛɛku yɛ o Baabuiyo niŋ ma yeema wana cheleŋ dimullo a ndu okɔɔ?

SƆƆŊ KULLOŊ

Ŋ nɔla miŋ nɛŋi Wana Toosiaa naa wo kɔl te ŋ piɛi ndu pɛ ndupilɛ kpe, miŋ saŋgala ndu o bɔŋaŋndaŋ, nduyɛ miŋ dimul wanaa cheleŋ a nyɛ naŋ pɛɛku wo okɔɔ.

Nyunala miiŋgaa choo laŋ

• Kuɛɛ Mɛlɛka chɔm yɛ naa mɛɛ naŋ nɔ miŋ piɛi ndu yɛ?

• Le yɛɛ naŋ nɔ yɛ miŋ piɛi Chɛhowa ndupilɛ kpe?

• Le yɛɛ naŋ nɔ yɛ miŋ piɛi Mɛlɛka a wanaa kaala ndu wa latulu?

CHƆƆLU SƆƆŊ PUM TOFA

Veelu diomndaŋ o bundɛi hei niŋ, “I Cho lɛ Chɛ le Piɔmnda Le.” Okoŋ, ma sina le sabu wɛɛŋ pilɛ cho a kɔl kɛndɛ le balaŋ solioo o piɔmnda sooluuwo niŋndo.

“Baabuiyo Siŋga Yoomulaŋ” (Bandu Mɛŋgɛlaa, Suɛɛsɔɔ 1, 2011)

Pɛɛku le ma sina nyɛ mala num ma yɔŋgu mulilaŋ o bɔŋaŋndaŋ ndo

“Saŋgala Chɛhowa o Bɔŋaŋnda Naalaŋ” (Bandu Mɛŋgɛlaa, Tɛɛkpaa 2019)

Tofawɔ mɛɛ po feleŋgɔnɔ pilɛ sɔla tɔnɔɔ o bɔŋaŋndaŋ niŋ yɛ, mi che bɛɛ o ve bɛɛŋ le mi ndoo kuɛ o laŋ te.

Chɛhowa Buulaŋ a Ya (3:07)

Wanaa bɔɔbɔɔ chua yɔm siŋgafilaa maa ndu sim le Kilisiɔŋndeŋ ni. Kɛ baa ŋ nɔ pa miŋ soliŋ ndu kpeku o Mɛlɛka piɛiyo niŋ?

“Le Yɛɛ Seiyaa Chɛhowaa Soliŋ Yɔm Siŋgafilaa Kpeku o Mɛlɛka Piɛiyo Niŋ Te?” (Kɔ o tɛɛŋgei choo)