Wana Maa Vɛɛ Chiisu Cho Yɛ?

Te ŋ pɛɛku pɛ a sɔɔŋ Chiisu dimi woŋ vɛlɛ a sɔɔŋ o tosa o chieeŋndo choo woŋ, koŋ tosa miŋ sina suliŋnda ndɔlaŋ. Nduyɛ hei mala naa miŋ sɔɔŋguu ndu a Chɛhowa Finya ndɔ ikɛi kpɛɛluŋ. Ɔɔ suliŋnda kɛndɛlaŋ ndaŋ lapum? Nduyɛ vɛɛ naŋ tuallɛ tamasi Chiisu wo kɔɔli o yoomu naa niŋ?

1. O nɛila kuɛɛ niŋ Chiisu vellɛ Finya ndɔ?

Tuupa mi Chiisu huŋ o lɛŋndeŋ choo, mbo cha mɛɛ Finya ndɔ kaalaa tosa sɔɔŋ yɛ. Nduyɛ le wɔsilaŋ o biiliɔŋndaŋ niŋ, mbo pɛɛku ndu sɔɔŋ bɔɔbɔɔ o ba. Le hei, mbo yiyaŋ, mbo sinaŋ nduyɛ mbo tosa sɔɔŋ maa Finya ndɔ. (Nuawɔ Chɔŋ 5:​19.) Chiisu vel bɔɔ Finya ndɔ o kaalaŋ niŋ. Le sabu koŋ kpeekpei o dimi ni aa: “Wana o wana che ya pɛ, mɛɛ o chii Finya nuu chɔ.” (Chɔŋ 14:​9) Te a wa pɛ pɛɛkoo a suliŋnda Chiisulaŋ okɔɔ, a cho Chɛhowa sina nyɛkɛndɛi. Le tamaseliiyo, nyɛiyii Chiisu nɔ le waŋnda ve chɔm mɛɛ kpɛ Chɛhowa buulaŋ a num yɛ.

2. Vɛɛ Chiisu chɔm yɛ maa o kaala Chɛhowa?

Mi Chiisu dimi aa: “Mɛɛ Finya nuu vem ya le tosaa yɛ, lende kinɛi ya cho tosaa ni le mi chieeŋndo sina maa I kaala Finya nuu.” (Chɔŋ 14:​31) Teleŋ o wa o chieeŋndo choo wo, mi ndoo diikuŋ Finya ndɔ o yɔŋ bɛɛ mi ndii wa ikala. Hei chɔm ni kɛsɛ maa ndoo kaala ndu. Chiisu ndoo hɛnaŋ bɔɔ suɛi a Finya ndɔ okɔɔ. Nduyɛ, mi ndoo mala vɛlɛ waŋnda le ma nɔ chaŋyɛi a Finya ndɔ.—Chɔŋ 14:​23.

3. Vɛɛ Chiisu chɔm yɛ maa o kaala waŋnda chieeya?

Baabuiyo dimi maa Chiisu “naŋ kɔl a waŋnda chieeya” tau. (Pulɔwaa 8:​31) Mbo chɔm kaalaa le nda a mɛɛ ndoo dɛɛniaa nda kɔltaŋ yɛ, nduyɛ mbo soliŋ sala le nda malaa. Mbo tosa kaamaalaŋ, o cho ko le kpaaya ndɔɔ chɔmndo le, kɛ le mɛɛ ndoo nɔ nyɛiye le waŋnda yɛ. (Maki 1:​40-42) Mi ndoo bii waŋnda nyɛkɛndɛi nduyɛ o ve wana hɛliaa le. Mi pɛɛkula ndɔlaŋ la ke wanaa ndaa nɔ yeemɛi le suɛi Mɛlɛkɛi tueiyɔɔ wa kɔl dɛɛniaa a tiindaŋndo. Le mɛɛ Chiisu kaala waŋnda chieeya yɛ, mbo yɔŋguŋ wulee le mbo sɔla saŋgaa a piɔmndo le nda. Kɛ wanaa tual pɛɛkula ndɔlaŋ kɔɔli wa o hiou kaala.—Nuawɔ Chɔŋ 15:​13, 14.

CHƆƆLU YAASIAA

4. Chiisu kaala Finya ndɔ

Tamasi Chiisu wo pɛɛku naa mɛɛ naŋ chɔm kaalaa le Mɛlɛka yɛ. Nuawɔ Luku 6:​12 a Chɔŋ 15:​10; 17:​26. Te la veelu diomndaŋ o bolle Baabuile kɛ kɛ niŋ pɛ, la suukaŋ o nyunaa hoo choo:

• Vɛɛ naŋ tuallɛ tamasi Chiisu wo kɔɔli le chɔmndo maa ŋ kaala Chɛhowa?

6. Chiisu nɔ kɛndɛi

Mi Chiisu ndoo tosal waŋnda kɛndɛi mi che bɛɛ ndoo nɔ tau le. Nduyɛ o dɛɛniaa naa le mi naa bɛɛ nɔ kɛndɛi. Nuawɔ Walta Kiilaa 20:​35, okoŋ mi la suukaŋ o nyunaa hoo choo:

• A mɛɛ Chiisu dimi yɛ, yɛɛ tosa yɛ miŋ wa a kɔl kɛndɛ?

Handu VIDUEIYO, okoŋ mi la suukaŋ o nyunaa hoo choo:

VIDUEIYO: “Waŋndo Nyɔɔ Kioo Wana Hiau Wa a Kɔl Kɛndɛ”​—Buŋgɛi Pɔmbɔ (4:​00)

• O nɛila kuɛɛ choo naŋ tosa yɛ kɛndɛi o yɔŋ bɛɛ miŋ nɔ tau le?

A sina pa?

Baabuiyo pɛɛku naa maa naŋ piɛi o Chɛhowa lo o diola Chiisulaŋ niŋ. (Nuawɔ Chɔŋ 16:​23, 24.) Te ŋ piɛi pɛ lende, keŋ chɔm maa ŋ nɔ balika melaa le nyɛ Chiisu tosa le naa malaa miŋ simnuŋ chaaŋaa Chɛhowaa wo.

SƆƆŊ KULLOŊ

Chiisu kaala Chɛhowa a waŋnda chieeya. Mɛɛ ŋ pɛɛku a ndu okɔɔ fau, lende koni ŋ sina Chɛhowa ni kanifuule, kaala pilɛlaŋ kpe nda nɔ ni.

Nyunala miiŋgaa choo laŋ

• Vɛɛ naŋ chɔm yɛ maa ŋ kaala Chɛhowa maa Chiisu?

• Vɛɛ naŋ chɔm yɛ maa ŋ kaala waŋnda maa Chiisu?

• O suliŋnda Chiisulaŋ tɛɛŋ kpou, o kuɛɛ hiou yɛ num hɛnaŋ?

CHƆƆLU SƆƆŊ PUM TOFA

Tofawɔ suliŋnda Chiisulaŋ lapum, nduyɛ miŋ che mɛɛ naŋ tual laŋ kɔɔli yɛ.

“Tol Tamasi Chiisu Wo Kɔɔli” (Chiisu Cho Nɛiyo, a Tonyaa, a Yoomoo Ni, peele 317)

Pɛɛku ma sina le sabu naŋ nɔ miŋ piɛi o diola Chiisulaŋ niŋndo.

“Le Yɛɛ Naŋ Nɔ yɛ Miŋ Piɛi o Diola Chiisulaŋ Niŋ?” (Bandu Mɛŋgɛlaa, Doŋdoŋndo 1, 2008)

Baa Baabuiyo soo pa a kɔɔle Chiisuleŋ, bandii nduɛi, ɔɔ hɔlaa nduaa?

“Vɛɛ Kpeekpei Chiisu Wa Yɛ?” (Kɔ o tɛɛŋgei choo)

Vɛɛ Chiisu ndoo bii yɛ waŋ laanduaa, nduyɛ yɛɛ hei pɛɛku yɛ naa?

“Mɛlɛka Yeema Mi Waŋ Laanduaa Sɔla Bɛɛleŋ a Biyɔɔ Kɛndɔɔ” (Bandu Mɛŋgɛlaa, Tapioo 1, 2012)