Dɔu Tiindaŋndo o Chɛhowa niŋ le Teleŋ o Teleŋ!

1-3. Vɛɛ tiindaŋ Pɔɔl dɔu o Chɛhowa niŋndo luei yɛ ndu yoomuaŋ? (Tofa fotueiyo o peeleŋ ndeŋ choo.)

I WA boondii wɔɔŋ bɛndu le waa Kilisiɔŋnɔɔ o Luom niŋ. O wɔsi 64 niŋ boondii Chiisu ve, mi waŋnda nyiinduu buɛiyaa Chiisuaa choolaŋ choo maa nda mal chioo o yiŋ ni, nduyɛ maa a tul waŋnda leyɛ. Te num oo wa pɛ Kilisiɔŋnɔɔ o boondii keŋ niŋ, a wa num wa biyɔɔ teleŋ o teleŋ nduyɛ ma tuisi num kotaa choo. Mi ndaa bii puaapiliaa a ndepiliaa numnda apum ma dɔu nda visiaa tɛɛŋ le nda sɛɛsiaa. Ɔɔ mi ndaa baŋ nda o suŋgbule yɔmndo choo nduyɛ mi ndaa lom nda le nda nyɛ wawoŋndo kioo ichɔl.

² Kɛlɛŋgaa dɔɔ o boondii wɔɔŋnde hei bɛŋgu kiilanɔɔ Pɔɔl wa o biyɔɔ diiŋ ndɔɔ niŋ o chiɛi manyumndo niŋ Luom ni. Kilisiɔŋaa cheleŋ ndaa mala ndu pa a boondii keŋ? O kandɔŋndo, buulaŋ Pɔɔl lo wa koŋ ni. Nyɛ koŋ o poonyial Timoti ni aa, “Boondii tasii nda va kɔɔsɔɔ a ya ve, wana o wana pilɛ bɛɛ sim mbo soo le ya le. Waŋnda kpou ma mal la. Kɛ nduyɛ, I cho piɛileŋ maa Mɛlɛka o chɔm nda nyɛ nda tosa koŋ ndo choo le.” Kɛ a koŋ kpou, mi Pɔɔl sina maa a mel ndu lende waŋ waŋ ma kɛɛ ndu mala le. Mbo poonyiaa aa, “Kɛ Masanɔɔ Mɛlɛka ndu va ya kɔɔli mbo ke ya kpaayaa.” A tonya, mi Masanɔɔ Chiisu ke Pɔɔl kpaaya o yeema wo. Vɛɛ mala koŋ wa yɛ nyɛ sɔvɛ a boondii keŋ? Nuawɔ fulamakɔɔlioo. “Mi Masanɔɔ Mɛlɛka piŋi ya a dii ya le.”—Tim. Diiŋ Ndɔɔ 4:16, 17.

³ Yiyaŋndo o nyɛ yɔŋnuŋ ndu koŋndo choo luei Pɔɔl yoomuaŋ ni. Ndu mala ndu ni mbo tiindaŋ Chɛhowa maa o cho ndu kindi poŋ le mbo biunuŋ tɔɔndaŋndaŋ a simulta cho ndu komal o chilaŋ niŋndaŋ. O hei niŋ, mbo hiau lachi chɔ chɔ a dimioo aa, “Masanɔɔ cho ya soli o isɔɔ o isɔɔ wɔɔŋ niŋ.” (Tim. Diiŋ Ndɔɔ 4:18, naapila piimiaa ndu diki diki ni) Mi Pɔɔl pɛɛku maa o yɔŋ bɛɛ mi wanachioo nɔ kpaaya bɔɔ le mala le, kɛ mala Chɛhowa a Po ndɔɔ yɔŋgu wo, ndu cho mala kpeekpeiyo ni!

SƆƆŊ TOSA MA DƆU “TIINDAŊ NUMNDO O CHƐHOWA NIŊNDO”

4, 5. (a) Nɛɛnɛ o ba ŋ sɔla yɛ mala kpeekpeiyo? (b) Vɛɛ ŋ kindi yɛ chaŋyɛi numnde a Chɛhowa?

⁴ Kani bɛɛ bahawɛiyo komal num niŋ ma yiyaŋ maa a nɔ wana malaa le ndu solioo le? Naapum mbo wa wali lepɛŋndo, simultaŋ o sukuu, kɛndiaa lepɛŋndo, ɔɔ bahawɛila cheleŋnda tɛɛmbuu num kɔllo laŋ. Kɛlɛŋgaa ma nyuna wanaa cheleŋ le malaa, kɛ ma hui num. Ma kɛɛ le num nyɛ ŋ yeema wo kioo. O kpeekpei niŋ, bahawɛilaŋ lapum wanachioo nɔla laŋ soli le. O boondii waa ndoo bɛŋgu, baa sila Baabuiyo le ma “dɔu tiindaŋ numndo o Chɛhowa niŋ” cho pa nyɛ sɔvɛ? (Tal. 3:5, 6, NW) Baa sila koŋ bɛnda le? O cho lende le icho le! Mala Chɛhowaa cho nyɛ kpeekpeiyo ni, a mɛɛ bundɔŋ Baabui bɔɔbɔɔ chɔm yɛ.

⁵ Lelaŋ, te wanachioo nɔla num mala le, bii ndu o kɔl te. Chɔ suɛi keŋ mɛɛ kiilanɔɔ Pɔɔl che ndi yɛ, maa teleŋndo cho koŋ ni le ma dɔu tiindaŋ numndo kpou o Chɛhowa niŋ, nduyɛ ma che mɛɛ o cho num mala o keŋ niŋ yɛ. Hoo cho tosa ma chɔɔlu tiindaŋndo dɔuwɔɔ o ndu niŋ nduyɛ mi chaŋyɛi numnde a ndu chɔɔlu simnɔŋ nyɛ kpeekpeiyo.

TIINDAŊNDO CHO NYƐ SƆVƐ LE CHAŊYƐI NƐI A MƐLƐKA

6. Le yɛɛ i wa yɛ suɛi kala le tiindaŋndo dɔuwɔɔ o Chɛhowa niŋ te ŋ wa pɛ o nyɛ kindilaa bɛŋgu?

⁶ A nɔla pa ma dimul Chɛhowa a bahawɛi cho num ŋɔwɔɔ wo okɔɔ o piɛileŋ niŋ le ma sɔla kɔl hiniaa, nduyɛ ma sina maa a tosa nyɛ ŋ nɔ le tosaa wo ma mal ndu o tɔɔ o ba? Ei, a nɔla ma tosa keŋ! (Nuawɔ Chondei 62:8, NW; Pitɛ Tasoo 5:7.) Hei tosaa cho nɛi sɔviɔɔ opilɛ ni le chaŋyɛi kilaa a Chɛhowa. Kɛ, tiindaŋndo nɔɔ maa Chɛhowa cho num ke nyɛ ŋ yeema wo wa simullo. Le yɛɛ? Saboo opilɛ cho ni maa o cho lɔɔlɔɔ le Chɛhowa muli piɛile naaleŋ chɔ chɔ le.—Chon. 13:1, 2; 74:10; 89:46; 90:13; Hab. 1:2, NW.

7. Le yɛɛ o cho lɔɔlɔɔ le Chɛhowa muli piɛile naaleŋ chɔ chɔ le?

⁷ Le yɛɛ o cho sɔɔŋ naŋ nyuna Chɛhowa woŋ kpou le o yala naa mulul te? Loonuŋ maa o tuu chaŋyɛi nɛi naa ndaa tɛɛŋ mɛɛ chuauwa cho a finyaa yɛ. (Chon. 103:13, NW) Chuaambɔɔ nɔ mbo yiyaŋ maa nyɛ o nyɛ o nyuna pɛ finya ndɔ o ndu ke le, ɔɔ mbo ke ndu o foofo le. Lepum chuaambɔɔ nyuna dɔɔ le nyɔɔ pɛ o sɔla o foofo. Apum a nɔ ma chum mi teleŋ nda nɔ ma sɔla wo fuuluu. Kɛ apum yɛ, a saalaŋ yeemɛi chuaambɔɔ le ɔɔ yeemɛi acheleŋnda le. Le handɔɔ lechoo, te chuaambɔɔ nyuna dɔɔ num pɛ le nyɔɔ ma ke ndu, mɛɛ tɔmndo ŋ cho chiŋndoŋ siɔlɔɔ naa ni. Chua numndo cho simnɔŋ masaa, mi num simnuŋ chiɔɔ le ndu. Lende koni, lepum le tɔnɔ naa, mɛɛ mi Chɛhowa chum mi teleŋ biŋgi hiou malaŋ o muli piɛile naaleŋ. O nɔ dioo le keŋ tosaa kanifuule, ndu Toosiaa naa ni nduyɛ o nɔ taasioo. Masanɔ naa kaalaa o cho ni, nduyɛ ndu cho Finya naa o choo choo niŋ ni. Te ŋ nyuna ndu dɔɔ pɛ le nyɛ mbo mulul naa, mɛɛ chaŋyɛi nɛi naa ndaa tɛɛŋ cho yɔŋyɔla.—Tuuwɔ Aisaya 29:16; 45:9, NW.

8. Diomnde yɛɛ Chɛhowa mei yɛ a naa kpaaya naa mɛɛlu wa okɔɔ?

⁸ Saboo opilɔɔ cho ni, Chɛhowa sina naa kpaaya naa mɛɛlu wa. (Chon. 103:14, NW) Lelaŋ, o mel naa lende miŋ biunuŋ o kpaaya naa niŋ te. Kɛ le mɛɛ o cho finya naa yɛ, mbo mala naa. Lepum miŋ yiyaŋ maa ŋ tiu lɛ ba le nyɛ tosa a ba naa kposoŋ te. Kɛ Chɛhowa ke naa tiindaŋndo maa fɛɛŋ fɛɛŋ bɛɛ o chɛl mi wanaa nduaa hiou kpeleŋ nda nɔla ma biunuŋ ndo le. A tonya, ‘O chɛl mi tɔɔndaŋ naŋ nɔ kpaaya le hiouwɔɔ le wo o komal naa le.’ (Nuawɔ Kɔliŋtiaŋ Tasoo 10:13.) Lelaŋ, ŋ nɔ sabu kɛndɔɔ le miŋ tiindaŋ Chɛhowa le mɛɛ o sina nyɛ naŋ nɔla miŋ biunuŋ ndo yɛ.

9. Te ŋ piɛi pɛ le malaa miŋ keleŋa muli sɔla le, yɛɛ naŋ nɔ yɛ miŋ tosa?

⁹ Te ŋ piɛi pɛ le malaa miŋ keleŋa muli sɔla le, ŋ chumnuŋ Wana sina teleŋ bɛnda le mbo muli naa diomndo. Loonuŋ maa ndu bɛɛ cho chumndo, kanifuule yeemɛi cho ndu tau le naa malaa. “Chɛhowa cho chumndo le mbo mala nya. Nduyɛ o cho o bɛɛndiaŋ le mbo tuiinuŋ nya inyɛɛ. Kanifuule, Chɛhowa, Mɛlɛka tosa sɔɔŋ sakpo wo o cho ni. Nduyɛ kɔl kɛndɔɔ cho le wana o wana tiindaŋ o ndu niŋ.”—Ais. 30:18, NW.

MƐƐ MƐLƐKA PIŊI NAA YƐ

10-12. (a) Vɛɛ sɔɔŋ kiandu yɛ le Kilisiɔŋnɔ cho mandaa wana ndɔ cho a naa ŋkɔŋyaa o yuŋgoo niŋndo? (b) Vɛɛ tiindaŋndo dɔuwɔɔ o Chɛhowa niŋ teleŋ nyɛ kindilaa paaliaŋ yɛ chaŋyɛi nɛi a ndu? Chɔmndɔ tamaseliiyo.

¹⁰ Te a wa pɛ o nyɛ kindilaa bɛŋgu, ma yiyaŋ maa Pɔɔl. Ma yiyaŋ maa piɔmndo ko ŋ hiŋ sɔlaa ni. O teleŋnda waa ndoo bɛŋgu, mi tiindaŋndo dɔuwɔɔ o Chɛhowa niŋ simnuŋ suɛi kala vɛlɛ a suɛi sɔvɛ. Le tamaseliiyo, yiyaŋndɔ maa a cho wana numndo o yuŋgoo niŋ mandaa a naa ŋkɔŋyaa. Kɛlɛŋgaa a piɛi niŋ le taasioo a kpiiliaa.a Te a tosa pɛ nyɛ ŋ nɔ le tosaa wo o hei niŋ, ma sina maa Chɛhowa cho num hɔlteŋ choo, nduyɛ maa o cho num ke nyɛ ŋ yeema le biunɔŋndo wo, vɛ, a sɔla kɔl hiniaa tiŋ te?—Ais. 30:18, NW.

¹¹ Mi nyɛ yɔŋnuŋ o tosa mi sɔɔŋ siŋgaŋndo. Mi wanaa chiɔwaa dimul num yiyaŋnda ndala yɛyɛlaŋ. Te koŋ te, mi wanayaŋ num oo tiindaŋ maa ŋ cho num kɔllo dɛɛniaa wo tosa mi suɛi kalɛi chɔɔlu num kalu choo. Lambaŋ Chɛhowa nuaa le num kpaayaa kioo. Lambaŋ ndu sɔɔŋgoo ikɛi. (Nuawɔ Samiɔŋ Tasoo 30:3, 6, NW.) Te malaa hiŋ pɛ, chaŋyɛi numnde nya ndu tɛɛŋ cho chɔɔlu kalu.

¹² Mi Lindab cha tonyaa o hei niŋ mɛɛ o manda kala ndɔ a finya ndɔ wa a naa o yuuwɛi ndɛi niŋndo. “O teleŋ koŋ bɛŋgu, pɔnɔ nuu, yema nuu, a ya, cha ndi ikala kpoke le sinaa nyɛ naŋ nɔ miŋ tosa wo. Lepum mi naŋ yiyaŋ maa mala cho le naa kposoŋ te. Kɛ te ŋ yiyaŋ pɛ o paandoo niŋ, miŋ che kpendekele mɛɛ Chɛhowa wa a naa latulu yɛ. Mi ndoo ke naa kpaayaa a nyɛ naŋ yeema wo, o wa bɛɛ mi nɛi o nɛi fulaa ve le naa le.”

13. Vɛɛ tiindaŋndo dɔuwɔɔ o Chɛhowa niŋ mala yɛ yema naa pilɛ mɛɛ sɔɔŋ kɔl tambɛiyoŋ komal ndu o lepula?

¹³ Te kpundɔɔ komal naa pɛ, tiindaŋ naa kpou dɔuwɔɔ o Chɛhowa niŋ nɔla mbo mala naa. Teleŋ Landa pɔnɔ ndɔ cho Chɛhowɛinɔ le wo ndoo tuu le ndu kiɔɔ wo, ma saaluŋ yema ndɔ a naa pum ma veelu ndu o puuluei niŋ “lupus” (naa hoo bii wana ba o ba o dialloŋ). Nduyɛ mbo paaliaŋ yoomu waŋndo chalaŋ. Mɛɛ paŋgoŋ hiou ŋtiŋ, mi lanɔɔ yema ndɔ wu. Mɛɛ Landa yiyaŋ maa o kandu puɛɛnɔŋndo a nyɛ kindilaa keeku ndu choo wo, mbo kandu kɔɔfaleŋ. Kɛ o viu bɛɛ le mi kala ndɔ wu. Yɛɛ mala yɛ Landa mbo biunuŋ? Mbo tɛɛsiaa aa, “Lepaa o lepaa I wa suukaŋndo a Chɛhowa, o yɔŋ bɛɛ aa kɛɛsiaa taaniŋndo ya yeema tosaa ni. Hei mala ya ni mi sina maa wana kpeekpeiyo Chɛhowa cho o ya lo ni. Mbo pɛɛku ya le tiindaŋndo dɔuwɔɔ o Chɛhowa niŋ, tuupa mi tiindaŋ o ya pila niŋ, ɔɔ o wanaa cheleŋ niŋ. Nduyɛ mala kpeekpeiyo mala o ke ya wo wa ni. Nyɛ o nyɛ ya hau ba le ndu mi sɔla. Le hei, mi sina maa I cho wallo kɔɔlɔŋ kɔɔlɔŋ a Chɛhowa.”

14. Tiindaŋ yɛɛ Kilisiɔŋnɔ laalaŋ wana ndɔɔ sɔla solioo wo nɔ yɛ?

¹⁴ Tofawɔ vɛlɛ suɛi cheleŋ. Te wanayɛi num ŋ kaala ve sɔla pɛ solioo. O pɛɛku num Baabuiyo niŋ, a sina mɛɛ naŋ nɔ miŋ bii wanaa soliaa yɛ. (Kɔl. Diiŋ Ndɔɔ 5:11; Chɔŋ Diiŋ Ndɔɔ 10) Kɛ le kɛɛsiaa cho a solioo okɔɔ wo chɛlɔɔ, lepum mbo wa kpekiee, maa i sim wali le.c A tiindaŋ pa Finya num o choo choo niŋ maa, o cho num yoomuaŋ ke le ma sim o kala yi le sawa Baabuiyo biyɔɔ a solioo okɔɔ? A cho pa chɔɔ maa nɛiyo cho koŋ ni le chaŋyɛi numnde a Chɛhowa chɔɔloo kindioo, nduyɛ ma chɔɔlu ndu sɔɔŋguu ikɛi kpɛɛluŋ?

15. Le yɛɛ Adama kɛɛ yɛ sawa Chɛhowaa diikɔŋ o kpeloo Idɛŋ niŋ?

¹⁵ O hei niŋ, yiyaŋndɔ a po tasoo okɔɔ, Adama. Ndoo laalaŋ pa kpeekpei maa o tosal bɛɛ Chɛhowa nila kalulaŋ o wa achal? Sako. Baabuiyo dimi maa o cho Adama le sɔla huiyo le. (Tim. Tasoo 2:14) Le yɛɛ Adama tosa yɛ niko nila kalulaŋ? Komɔɔ yɔm Ifi laandɔ ke ndu koŋ mbo bii mbo dia wo chɔm maa ndoo kaala laandɔ. Mbo yaŋ ndu nilaŋ mbo hiau Chɛhowa Mɛlɛka.—Kan Ch. 3:6, 17.

16. Le nɛɛ kaala naa nɔ yɛ mbo wa o kala poŋ, nduyɛ le yɛɛ?

¹⁶ Baa hoo chɔm ni maa ŋ nɔ miŋ nɔ kaalaa o kala poŋ le wanayaŋ naŋ te? O cho lende le icho le! Kɛ wana naŋ nɔ miŋ kaala mbo hiou kpou wo cho Chɛhowa ni. (Nuawɔ Maatiu 22:37, 38.) Hei cho tɔnɔɔ le wanayaŋ naŋ, a wa Chɛhowa piɛi, a wa ndu piɛi le. Lelaŋ hiou lachi a kaala numndo kindioo le Chɛhowa, a tiindaŋ numndo dɔuwɔɔ o ndu niŋ. Nduyɛ te suɛi wa num pɛ paaliaŋndo a wana num sɔla solioo wo okɔɔ, tɛi kɔl numndo wakpa naa Chɛhowa cha o piɛileŋ niŋ.d (Luom. 12:12; Fil. 4:6, 7) Soliŋ boondii kɔl tambɛiye hei kpeku le chaŋyɛi numnde a Chɛhowa tosaa nyɛ kpeekpeiyo. Hei mala num ma tofa Chɛhowa le fulamakɔɔli kɛndɔɔ.

TE Ŋ WA PƐ CHUMNDO

17. Te ŋ wa pɛ yooŋgu kɛndɛ leMasaa dimioo lɔɔlɔɔ, vɛɛ naŋ chɔm yɛ maa ŋ tiindaŋ o Chɛhowa niŋ?

¹⁷ Le sabu yɛɛ Masanɔɔ Mɛlɛka piŋi yɛ Pɔɔl a dii ndu le? Mbo dimi aa, “Le mi nɔla mi dimul waŋnda Yooŋgu Kɛndɛ Mɛlɛkaa mɛɛ o cho fau le mi wanaa cho a Chuu le va kpou ma tuei.” (Tim. Diiŋ Ndɔɔ 4:17) Te ŋ wa pɛ o wali dimiaa yooŋgu kɛndɔɔ niŋ lɔɔlɔɔ maa Pɔɔl, ŋ nɔ tiindaŋndo maa Chɛhowa cho naa “nyɔɔŋ ŋ tɔɔŋ” fau ke. (Mat. 6:33) Maa wanaa dimiaa yooŋgu kɛndɛ, a ke naa wallo le yooŋgu kɛndɔɔ dimioo, nduyɛ Chɛhowa che naa maa wanaa walla naŋ cho a ndu latulu ni. (Kɔl. Tasoo 3:9, NW; 1 Tɛs. 2:4) Te ŋ kindiŋ pɛ miŋ wa lɔɔlɔɔ o wali Mɛlɛkaa niŋ, i wa tɛtɛlɛ le chumndo tei mi Chɛhowa soli naa o nyɛ kindilaa bɛŋgu.

18. O nɛila kuɛɛ choo naŋ tiindaŋ yɛ Chɛhowa nduyɛ miŋ kindi chaŋyɛi nɛi a ndu?

¹⁸ Lelaŋ, ŋ soliŋ teleŋndo hoo kpeku le chaŋyɛi nɛi kindioo a Chɛhowa. Te suɛi kɔl landɛiye komal naa pɛ, soliŋ suɛi keŋ kpeku le ma sɔɔŋguu Chɛhowa ikɛi kpɛɛluŋ. Te ŋ yiŋnuŋ pɛ o Diom Mɛlɛkaa niŋ, miŋ wa piɛiyo teleŋ o teleŋ, nduyɛ miŋ wa lɔɔlɔɔ o walta iMɛlɛkaya laŋ niŋ, la ŋ tiindaŋ Chɛhowa maa o nɔla mbo soli naa o bahawɛila naalaŋ niŋ, vɛlɛ a nyɛ o nyɛ nɔ le naa komallo o chilaŋ niŋ.