La Wa A Puɛiyaŋ Te Setana Yeema mbo Tɛɛmbuu Nya!

1. Tɛɛsiaa wɔ mɛɛ nyɛ yoomaa cho o inyinaya wo looku simnɔŋ Setana yɛ.

TELEŊ pilɛ, chaŋyɛi kɛndɛi wa nda tɛɛŋ nda Chɛhowa. Kɛ a teleŋndo opum, mi nyɛ yoomaa cho hoo o inyinaya wo yeema le mi waŋchieeya piɛi ndu. Yɔŋi o soliŋ yeemɛi wɔɔŋii keŋ o kɔl, mbo lo ndi vɛɛloo haaa mbo luɛi o hakioo niŋ. (Chem 1:14, 15) Ŋ sina maa nyina koŋ cho Setana ni, o ndoo “sim o tonya choo le” wo. Mbo tosal Chɛhowa nila kalulaŋ nduyɛ mbo simnuŋ “wana lachoovaa.”—Chɔŋ 8:44.

2, 3. Yɛɛ diomndaŋ ndaŋ “Setana” “Nyina Wɔɔŋndo,” “kɛuwo,” a “tambalakaa” la chɔm yɛ a yaamɔɔnɔ bɛndu Chɛhowaa?

² Chɔŋ a teleŋ Setana tosa nila kalulaŋndo, mbo simnuŋ yaamɔɔnɔ bɛndu Chɛhowaa. Nduyɛ chaŋyɛi bɛɛ o nɔ a waŋchieeya le. Diola nda ke Setana laŋ la chɔm mɛɛ kpɛ o cho wana kalabi kalabi yɛ. Setana sim ni, “Wana simul waŋnda wo.” Hoo chɔm ni maa nyina wɔɔŋndo hoo cho kpuluŋgumayɛi Mɛlɛkɛi toolu le. Kɛ o tul ndi leyɛ nduyɛ mbo wa ndi chɔulabaa. Setana cho kindiŋndo o nɛi o nɛi niŋ le mbo che kpuluŋgumayɛi Chɛhowɛi o mɛɛlulaŋ.

³ A mɛɛ naŋ che o Sɔɔŋ Chɔɔmaŋndoŋ 12:9 niŋ yɛ, Setana nda veelu vɛlɛ ni aa Nyina Wɔɔŋndo. Ndu sim ni, “Wana dimi choola dii waŋnda laŋ ndo.” Hoo loonuŋ naa maa Setana tɛɛmbuu Chɛhowa tɔɔ maa wana lachoowaa o cho ni. Diomndaŋ ndaŋ “kɛu paandu paandoo” yiyalaŋ naa a paale kpundɛ le bɛndu Setana soliŋ kɛuwo kpeku o kpeloo Idɛŋ niŋ le Ifi huiyo wo. Diomndo hoo “tambalakaa” yiyalaŋ naa a visi weyaŋ bɛndoo. Nduyɛ diolaŋ ndaŋ la chɛl Setana le mɛɛ o cho a kɔl tuu bɛndoo le sabu Chɛhowaa kuunaa, nduyɛ mbo tɛɛmbuu wanaa Nduaa yɛ.

4. Yɛɛ naŋ cho yɛ yaasiaa o buŋgɛi hei niŋ?

⁴ Ŋ che walaŋ maa Setana cho naa kɔŋgɔlaŋndo le naa faŋaa o pimbi simiaa choo. Lelaŋ kpeekpei Baabuiyo sila naa ni aa, “La manda kaala nyalaŋ, mi la wa yekeŋ! Yaamɔɔnɔ nyaa, Nyina Wɔɔŋndo cho balɔɔ le wana o cha mbo tɛɛmbuu wo, mɛɛ mɛɛ yalakanaa kuuliaa visiaa kɔɔli le nda biyɔɔ yɛ.” (Pitɛ Tasoo 5:8, NW) A sila koŋ okɔɔ, buŋgɛi hei cho yaasiaa kaala Setana laŋ la yaa le chɔɔ sabu naŋ nɔ miŋ wa yekeŋ a yaamɔɔnɔ Chɛhowaa hoo a wanaa nduaa wo.

SETANA NƆ KPAAYAA

5, 6. (a) Tamaseliila kuɛɛ chɔm yɛ maa nyaa yoomaa toosiaŋ o inyinaya wa nɔ “kpaayaa.” (b) O nɛi kuɛɛ choo Setana tosa yɛ “mi waŋnda sɔla piɔmndo”?

⁵ Nyaa yoomaa inyinaya nda veelu aa maalikɛiya wa nɔ “kpaayaa.” (Chon. 103:20, NW) Waŋchieeya tuuŋgaŋ a nda le, nduyɛ a nɔ kɔlkaloo a kpaayaa ma hiau naa. Maalikɛiyaa tiindaŋ Mɛlɛka wa soliŋ kpaaya ndaa kpeku le o kɛndɔɔ tosaa. Le tamaseliiyo, o teleŋ pilɛ niŋ, mi maalikɛinɔ Chɛhowaa diu puaa chɔuwaa Asiiliaŋnda 185,000. Yaamɔɔwaa Chɛhowaa nda wa ni. Ndoo lo pɛ o kpaaya wanachioo niŋ kinɛi, a ve chɔu koŋ batiu le. (Masaa Diiŋ Nduaa 19:35, NW) O teleŋ pilɛ niŋ vɛlɛ, mi maalikɛinɔɔ soliŋ kpaaya ndɔ bɛndoo kpeku a taasioo le buɛiyaa Chiisuaa solioo o chiɛi manyumndo niŋ. Mi nyɛ yoomaa inyinaya koŋ kumbi diolaŋ, mbo soli buɛiya Chiisuaa o bɛɛ, nduyɛ mbo miŋgi diolaŋ kiindiaa nda kɔɔli. Wanaa mɛŋgɛlaa wa loŋ, kɛ a nɔla ndu kuuna le keŋ kpou tosaa le!—Walta Wa. 5:18-23.

⁶ Nyaa yoomaa cho o inyinaya wa cho kpaaya ndaa soliŋndo kpeku le o kɛndɔɔ tosaa, kɛ Setana ndu cho kpaaya ndɔɔ soliŋndo kpeku le o wɔɔŋndo tosaa. Nduyɛ nuawɔ se kpaaya o nɔ hau le waŋnda hɔlla hiŋndo wo! Baabuiyo veelu ndu aa, “masaa le chieeŋndo hoo” a “mɛlɛka le chieeŋ yɔŋ wɔɔŋndo hoo.” (Chɔŋ 12:31; Kɔl. Diiŋ Ndɔɔ 4:4) Setana Nyina Wɔɔŋndo nɔ vɛlɛ kpaayaa le tosaa “mi waŋnda sɔla piɔmndo.” (Hibu. 2:14) Hoo chɔm naa maa ndupila le cho waŋnda kpou diuwo le. Kɛ kaa ndɔ diyaa tiu hau silɔ o chieeŋndo choo. Le handɔɔ lechoo, le mɛɛ Ifi laalaŋ choola Setana laŋ nduyɛ mi Adama tosal Mɛlɛka nilakalulaŋ yɛ, waŋchieeya luɛi o hakioo niŋ a piɔmndo ni. (Luom. 5:12) O nɛiyo hoo choo Nyina Wɔɔŋndo tosa ni “mi waŋnda sɔla piɔmndo.” Lelaŋ Chiisu ke ndu diolaŋ ni aa, “wana diuvaa.” (Chɔŋ 8:44) Nuawɔ yaamɔɔnɔ bɛndu Setana ke naa wo se!

7. Vɛɛ nyinaa wɔɔŋnda chɔm yɛ maa a nɔ kpaayaa?

⁷ Te ŋ simul pɛ Setana, mɛɛ o cho ko ndu le naŋ simul te, kɛ wana o wana sim ndu kɔɔli le kpuluŋgumayɛi Chɛhowɛi simullo. Nyinaa wɔɔŋaa nila kaluaa bɛɛ cho o wanaa sim Setana kɔɔli wa tɛɛŋ. (Chɔɔmɔŋndo 12:3, 4) Le teleŋnda bɔɔbɔɔ nyinaa wɔɔŋnda cho kpaaya nda bɛndoo chɔmndo. Nduyɛ ma tuisi kpundɔɔ wanaa nda paaliaŋ nda choo. (Mat. 8:28-32; Mak. 5:1-5) Lɔɔlɔɔ bɛɛ pɛɛsa kpaaya maalikɛiyaa dɛnɛ wɔɔŋnda, ɔɔ “Masa nyinaa wɔɔŋnda” le. (Mat. 9:34) Te o ve a mala Chɛhowaa le, ŋ nɔla kposoŋ miŋ tiuba Setana chɔulaba le.

WANA DƐNƐ WƆƆŊNDO SETANA CHO NI

8. (a) Yɛɛ cho yɛ kpeleŋ Setanaa? (Tofa fotueiyo o peele naŋ kandu leŋ choo.) (b) A mɛɛ numpila cho chɔɔ yɛ, vɛɛ chieeŋndo hoo chɔm yɛ kaa dɛnɛ wɔɔŋ Setana nɔ wo?

⁸ Kiilanɔɔ Pitɛ tuu Setana a mɛɛ “yalakanaa kuuliaa” yɛ. A mɛɛ yau tɛɛsiaa ŋsɔɔ pum chɔm yɛ, diom maKilikiiyo “kuuliaa” sim ni, “te visi biyaa koŋul pɛ a yiaŋ.” Tɛɛsiaa hoo chɛl bɔɔ kaa dɛnɛ wɔɔŋ Setana nɔ wo! Mi che bɛɛ naa chieeŋndo kpede cho o kpaaya ndɔɔ bɛŋgu, kɛ Setana cho a yiaŋ le chɔɔloo waŋnda sɔlaa mbo de. (Chɔŋ 5:19) Le ndu, chieeŋ ndoo cho maa “nyɛ tindi wana yeemɛi yo.” Le saboo hoo, Setana muli hɔlla naa “kpeekpeiya” ni, o Kilisiɔŋaa pɔyaŋnda lo, a chaaŋaa ndaa “saa cheleŋ” nda. (Chɔŋ 10:16; Chɔɔmɔŋndo 12:17) Setana yeema le mbo tɛɛmbuu wanaa Chɛhowaa. Tɔɔndaŋ Setana tuisi buɛiyaa Chiisuaa choo chɔŋ a wɔsiŋ kɛmɛ tasoŋ kandɔŋndo mbo huŋ bii a hau wo, chɔm kaa dɛnɛ wɔɔŋ o nɔ wo kpendekele.

9, 10. (a) Vɛɛ Setana ndoo kindiŋ yɛ le kaaleŋ Isɔluɛi soliŋndo kpeku le sabu Mɛlɛkaa kuunaa? (Chɔmndɔ tamaseliilaŋ.) (b) Le yɛɛ Setana ndoo nɔ yɛ sabu teŋgeŋndo le hɔlla mulioo o kaaleŋ Isɔluɛi lo sindɛ? (c) Vɛɛ Nyina Wɔɔŋndo yiyaŋ yɛ te buɛi Chɛhowaa luɛi pɛ o haki wɔɔŋ wɔɔŋndo niŋ hau?

⁹ O kindi kindiŋ Setanaa niŋ le sabu Mɛlɛkaa kɛɛloo, mbo chɔm o nɛi cheleŋ niŋ maa wana dɛnɛ wɔɔŋndo o cho ni. Yalakana cho a yiaŋndo nɔ inyɛi a visi o cho biyɔɔ wo le. Mɔnɛi bii ndu pɛŋ le diyɔɔ o cho visi koŋ ndo le. Nduyɛ kɔl tembu ndu le mɛɛ o dii ndu yɛ le. Lende koni, Setana bii imɔnɔ le wanaa o cho tɛɛmbuu wa le. Le tamaseliiyo, yiyaŋndɔ a mɛɛ Setana Nyina Wɔɔŋndo ndoo wa Isɔluɛiya yaŋɔɔleŋ yeŋndo o fondaa pum yɛ, ma luei balaŋ o kaa ihinioo niŋ a hɔlteŋ. Te a pɛɛku pɛ a kpundɛ bɛndu yɔŋnuŋ Similai suundɛiyo nda Kehasi lehɔl bɛndoo wo, a nɔla pa ma “che” mɛɛ yalakana cho kuuliaa wo sɔla batiuwaa yɛ?—Ch. 25:6-8, 14, 15; Masaa Diiŋ Ndɔɔ 5:20-27, NW.

¹⁰ Setana ndoo nɔ saboo teŋgeŋ le hɔlla mulioo o kaaleŋ Isɔluɛi lo sindɛ. Nduyɛ Mɛsayanɔɔ ndoo nɔ mbo fula o kaale leŋ niŋ. Ndu ndoo nɔ mbo pɛl Setana bolleŋ ni nduyɛ mbo saŋgala kpuluŋgumayɛi Chɛhowɛi. (Kan Ch. 3:15) Setana ndoo yeema mi Isɔluɛiya ndaa fula leniŋ te, lelaŋ o wa kindi kindiŋndo a dɛnɛ wɔɔŋ ndɔɔ le nda lueiyo o hakioo niŋ ni. Yiyaŋ naa maa mi nyɛiye bii Setana le Deeve teleŋ o suunda wo le. Ɔɔ teleŋ Mɛlɛka kɛɛlu Muuse luɛiyɔɔ o Lɛŋnde Mɛyaaleŋ niŋndo le. Kɛ o baa pilɔɔ choo, mi Setana dɔɔŋ nyaale te buɛiyaa Mɛlɛkaa luɛi pɛ o haki wɔɔŋ wɔɔŋndo niŋ. Batiuwaa waa naa Nyina Wɔɔŋndo soliŋ kpeku ni le Chɛhowa chɔɔ chɔdɔ.—Tal. 27:11, NW.

11. Yɛɛ wa yɛ Setana o kɔl mɛɛ yeŋ Sela yaŋɔɔleŋ?

¹¹ Setana ndoo nɔ yaamɔɔleŋ teŋgeŋ le pulale Mɛsayanɔɔ ndoo nɔ le fulaa leŋ. Le tamaseliiyo, tofawɔ nyɛ yɔŋnuŋndo mɛɛ Mɛlɛka dimul dɔɔ Ebilaham maa o cho simnɔŋ “kaale bɛndu.” (Kan Ch. 12:1-3) Teleŋ Ebilaham nda Sela wa Ichipi wo, mi Felo huŋ a Sela o ndu lo chiɛi niŋ, le halikpeŋ mbo simnuŋ laandɔ. Kɛ, mi Chɛhowa luei balaŋ le Sela solioo o hakioo hoo bɛŋgu. (Nuawɔ Kandɔŋ Chieeŋndo 12:14-20) Nyɔɔ viu bɛɛ le tuupa mi Aisaki vialuŋ, mi nyɛ pilɛ koŋ kpe yɔŋnuŋ o lɛŋnde Kɛlua leŋ niŋ. (Kan Ch. 20:1-7) Baa Setana wa sɔɔŋ wa muŋ yɔŋnɔŋndo woŋ kɔɔli ni? Baa ndoo yiyaŋ pa maa Sela mɛi chiee ndɔ kɛndɛ bɛndoo Ɔɔ, mbo wa o tɛndiilaŋ niŋndo, cho hɔlteŋ luɛiyɔɔ le nyɛm kɛndɛŋ bɛnduŋ cho o fondaŋ lemasa Felo nda Abimilɛɛ wo woŋ? Baa Setana ndoo yiyaŋ pa maa Sela cho pɔnɔ ndɔ kɛɛ nda Chɛhowa le balaŋ lueiyo o nɔ suundɛiyo niŋ? Baabuiyo suu a keŋ okɔɔ le. Kɛ ŋ nɔ saboo le miŋ laalaŋ maa Nyina Wɔɔŋndo ndoo yeema mbo che maa Sela bɛnda lɛ kposoŋ le mbo velu kulii Mɛlɛka dimi ve le. O cho Setana le wa kɔl tambu le te chua kɛndɔɔ hoo ndoo tɛɛmbuu pɛ nɔ ndɔɔ, kaa ndɔ kɛndɔɔ, vɛlɛ a chaŋyɛi nduɛi nda Chɛhowa tɛɛŋ. Nuawɔ dɛnɛ wɔɔŋ Setana nɔ wo se!

12, 13. (a) Vɛɛ Setana ndoo chɔm yɛ kaa dɛnɛ wɔɔŋ ndɔɔ lɔɔ Chiisu veeluŋ ndo? (b) Ɔɔ yiyaŋ Setanaa a feleŋguaa kaala Chɛhowa nduyɛ ma wa kindiŋndo le Ndu piɛiyo hau wa?

¹² Chɔŋ a teleŋ Ebilahamndo, mi wɔsioŋ hiau o kɛmɛlaŋ niŋ tuupa mi Chiisu vialuŋ. Yiyaŋ naa maa chɛlɛkpɔɔ hoo ndoo naŋ, o waŋ hɛlɛŋ, ɔɔ o kɛndɛ Setana o hɔl te. Sako bɛɛ. Setana ndoo sina maa chɛlɛkpɛ sɛnɛiyo hoo cho sulɔɔ mbo simnuŋ Mɛsayanɔ Mɛlɛka dimi wo. A tonya, Chiisu wa wana tasoo le kulii Ebilahamnde ni, wana ndoo nɔ “le mbo tɛɛmbuu nyɛ o nyɛ Masa Nyinaa Wɔɔŋnda cho tosaa.” (Chɔŋ Tasoo 3:8) Baa Setana ndoo yiyaŋ pa maa o chal le ba hiouwɔɔ te o dii pɛ chɛlɛkpɔɔ hoo? O cho wana kaa kɛndɛ le Setana cho le. Nduyɛ Setana mel suɛi Chiisu wa koŋ chɛlɛkpɛ wo lɛŋ te. Vɛɛ naŋ looku yɛ sina?

¹³ Mi masaa Hɛlɔɔ tambu kɔl tau mɛɛ wanaa pɛɛku a looŋ okɔɔ wa nyuna ndu a chɛlɛkpɛ nda velu maa “masaa Chuuva wo” okɔɔ. Nduyɛ ndoo yeema le ndu diyɔɔ. (Mat. 2:1-3, 13) Le chɛlɛkpɛ koŋ diyɔɔ, mi Hɛlɔɔ viam waŋnda le ma diu puaambuaa pɔmbuaa cho wɔsilaŋ la tiɔɔŋ nda kpou o tanda Bɛtilihɛm ndo niŋ fau. (Nuawɔ Maatiu 2:13-18.) Mi piɔm Chiisu ve hoo kɔl te wo biandu ndu. Kɛ yɛɛ hei dimullɛ naa a yaamɔɔnɔ naa Setana okɔɔ? Hei chɔm kpendekele maa Nyina Wɔɔŋndo ke yoomu wanachioo le bɛɛ le. Kposoŋ bɛɛ o nɔ lamamɔɔ a chuaambuaa le. “Yalakana cho kuuliaa” wo kɛsɛ Setana cho ni. Lɔɔlɔɔ bɛɛ pɛɛsa kaa dɛnɛ wɔɔŋ ndɔɔ le!

WANA HUIYAA SETANA CHO NI

14, 15. Vɛɛ Setana tosa yɛ mi waŋnda kɛɛ ‘suɛi Mɛlɛkɛi sina pɛŋgu’?

¹⁴ Mi Setana soliŋ huiyo kpeku le halikpeŋ mi waŋnda simul Mɛlɛka kaalaa, Chɛhowa. (Chɔŋ Tasoo 4:8) Setana soliŋ nɛi huiyaa kpeku le waŋnda tosaa ma kɛɛ “landuŋ kɔl le suɛi Mɛlɛkɛi.” (Mat. 5:3, NW) O tosa waŋnda “a sina suɛi Mɛlɛkɛi pɛŋgu le. Nduyɛ, o tosa matosaa hei yɔŋi nda chɔ nyɛ wawoŋ cho nda diondɔɔ choo wo. Ndu yɔŋnuŋ ni maa Kiliti o cho Mɛlɛka velaŋ ndɔ kpeekpeiyo wo yooŋgu kɛndɔɔ a naŋɔɔ ndɔɔ okɔɔ” wo.—Kɔl. Diiŋ Ndɔɔ 4:4.

¹⁵ Nɛi bɛndoo opilɛ, o Setana cho soliŋndo kpeku le waŋnda huiyo wo cho kaŋnde lachoowaleŋ ni. Nuawɔ se mɛɛ Setana naŋ kɔl lɛ, te o che pɛ waŋnda finyaa ndaa mamaa piɛiyo, ɔɔ nyɛm Mɛlɛka toosiaa woŋ, ɔɔ visiaa, ɔɔ wana o wana, ɔɔ nyɛ o nyɛ o Chɛhowa kɔɔli, Mɛlɛka naŋ nɔ miŋ piɛi ndu pilɛ kpe wo! (Ɛs. 20:5, NW) Nduyɛ wanaa bɔɔbɔɔ, a yiyaŋ maa a cho Mɛlɛka piɛiyo o nɛi sakpoo choo wa, cho a yiyaa o yɔlɔŋ laalaŋnda lachoowalaŋ a sooluula fondolaŋ. O mɔnɛi niŋ pila nda cho ni, nuawɔ ko bɛɛ mɛɛ wanaa Chɛhowa nyɔɔlu wa wa naa yɛ. Mbo dimi aa, “Vɛ mi la wa nyɛ sɔlaa pisioo le nyɛ cho nyɛdiaa le wo piondɔɔ? Nduyɛ, vɛ mi la wa nya pila yɔɔkpiaa, le nyɛ ke nya tɔnɔ o tɔnɔ le wo? La yaŋ ya nilaŋ nyɛ kɛndɛ kɛndɛi, mi la tuei nyɛdiaa kɛndɔɔ yeela. Nduyɛ la cho nyɛ ke nya tɔnɔɔ wo tueiyɔɔ yeela.”—Ais. 55:2, NW.

16, 17. (a) Le yɛɛ Chiisu dimullɛ Pitɛ aa, “faŋaŋ ya naŋ, Setana”? (b) Vɛɛ Setana looku yɛ mbo hui naa le kiɔɔ waa yekeŋ?

¹⁶ Wanaa nɔ dialuŋ fulaŋ o Chɛhowa piɛiyo niŋnda bɛɛ, mi Setana hui nda. Le tamaseliiyo, yiyaŋndɔ a nyɛ yɔŋnuŋ teleŋ Chiisu dimul buɛiyaa nduaa maa a nɔ ma dii ndu wo. Icho tonya maa, a yiyaŋ kɛndɔɔ, mi Pitɛ veelu Chiisu nda ŋiɔɔŋ kpe mbo dimul aa, “Yiyaŋ yiyaŋ vaa lende ma tuunuŋ keŋ te. Mɛlɛka tuɛi bɛɛ nyɛ ŋ dimi hoo wo le, Masanɔɔ. Chɛl mi i vaa lende i yɔŋnuŋ a num te.” Mi Chiisu mulul Pitɛ a kɔllo sikpa aa, “Faŋaŋ ya naŋ, num Setana, masa nyinaa wɔɔŋnda.” (Mat. 16:22, 23) Le yɛɛ Chiisu veelu yɛ Pitɛ aa, “Setana”? Kanifuule Chiisu ndoo sina nyɛ nɔ le yɔŋnɔŋndo wo. Mi teleŋndo fuuluu le mi ndoo sɔla piɔm sala baŋaa, nduyɛ le mbo chɔm maa wana lachoowaa Nyina Wɔɔŋndo cho ni. O cho a teleŋ kala koŋ o yoomu waŋchieeya niŋ te Chiisu ndoo nɔ mbo kaala yoomu ndɔɔ le. Te Chiisu ndoo ve yekeŋ te, o wa tosa nyɛ Setana yeema wo.

¹⁷ Ŋ cho niŋ kpɛɛluŋ o mɛɛlula chieeŋ dɛnɛ wɔɔŋndo hoo, nduyɛ naa bɛɛ cho o teleŋ kalaa niŋ. Setana yeema naa miŋ wa yekeŋ te, nduyɛ o yeema naa miŋ kaalaa naapila le foofoo sɔlaa o chieeŋndo hoo niŋ, o tosa miŋ kɛɛ wa yekeŋ o Mɛlɛka piɛiyo niŋndo. Chɛl kposoŋ mi keŋ yɔŋnuŋ num te! Kɛ, ŋ “va a puɛiyaŋ te.” (Mat. 24:42) Lɔɔlɔɔ bɛɛ laalaŋ a hui Setana cho waŋchieeya wo le, maa mɛɛlula laŋ la choŋnuŋ ndɔ landaŋ te, ɔɔ la hiŋ niŋ kposoŋ te le.

18, 19. (a) Vɛɛ Setana kindiŋ yɛ le naa huiyo a mɛɛ naŋ yiyaŋ a naapila okɔɔ yɛ? (b) Vɛɛ Chɛhowa mala yɛ naa le taasioo sɔlaa le miŋ wa yekeŋ?

¹⁸ Mi Setana kindiŋ le naa huiyo vɛlɛ o nɛi cheleŋ niŋ. Mbo tosa naa miŋ laalaŋ maa Mɛlɛka kaala naa le, nduyɛ o mel naa haki le hakila naalaŋ te. Hui Setanaa kpou cho koŋ ni. Kɛ o baa pilɔɔ choo, nɛɛ kpeekpei Chɛhowa che yɛ maa o nɔ kaala le? Setana. Nɛɛ kpeekpei mel lɛ haki le yɛ? Setana vɛlɛ koni. Kɛ Baabuiyo ke naa tiindaŋndo maa, “Mɛlɛka ndu o nɔ lakafa le. Nduyɛ, o puɛɛŋ a mɛɛ nya chɔm kaala nya nɔ le ndu wo yɛ le.” (Hibu. 6:10) Chɛhowa hini kɔl le kindi kindiŋ naŋ cho le ndu kɔllo nɛŋioo wo, nduyɛ wali naa cho nyɛ fondo fuule. (Nuawɔ Kɔliŋtiaŋ Tasoo 15:58.) Lelaŋ, ŋ chɛlnuŋ Setana le mbo hui naa le.

¹⁹ Ŋ che maa Setana nɔ kpaayaa, o cho wana dɛnɛ wɔɔŋ, a wana huiyaa. Vɛɛ naŋ lookuyɛ yaamɔɔnɔ wɔɔŋ waa naa chɔulaba miŋ tiuba ndu ba? Chɛhowa mel naa lende le mi Setana tiu naa ba le. Diom ndɔɔ cho naa pɛɛkoo a nɛila Setana laŋ okɔɔ, nduyɛ “ŋ sina nɛila ndɔla lakaŋgalalaŋ walaŋ.” (Kɔl. Diiŋ Ndɔɔ 2:11) Te ŋ sinapɛŋgu pɛ mɛɛ Setana tosa sɔɔŋ yɛ, ŋ nɔla miŋ wa nyɛ kɛndɛ yekeŋ. Kɛ, o cho ko sinaa mɛɛ Setana tosa sɔɔŋ yɛ le cho suɛi le. Baabuiyo dimi aa, “La simul Masa Nyinaa Wɔɔŋnda. Te la simul ndu pɛ, o nyaanuŋ nya.” (Chem. 4:7. Naapila piimiaa ndu diki diki ni) Buŋgɛi cho lachi ve cho tɛɛsiaa sɔɔŋ sala yaa, ŋ naŋ chɔulaba Setana miŋ tiu ndu ba wo.