Mɛlɛka Hini Kɔl a Wanaa Cho Tiindaŋndo Dɔuwɔɔ o Ndu Niŋnda

1, 2. Simul kuɛɛ ndoo komallɛ Chɛfitaa nda chua ndɔɔ?

MI CHUAAMBƆ laandu pilɛ nyaanuŋ le finya ndɔ demullo. Ndoo naŋ bɔɔ kɔl le mɛɛ finya ndɔ fula o chɔuwo mbo huŋ kɛndiaa yɛ. Yomɔɔ finya ndɔ yem chɔuwo wo tosa ni mbo wa yolaŋ a chondei solioo a kɔl kɛndɛ. Kɛ nyɛ finya ndɔ tosa, a nyɛ o dimi okoŋ kɔɔli wo bii ndu kɔndɔfili. Mi finya ndɔ sɛɛsiaŋ nyɛlaŋ lekɔɔ nduyɛ mbo mal yioo choo choo kpeleŋ aa, “Kpou chua nuu, a dii ya fɔ! A tusi ya kpundɔɔ choo fɔ!” Okoŋ, mbo dimul chua ndɔɔ maa o chua buŋgɛi o Chɛhowa lo i cho yoomu chua ndɔɔ siŋga lefafɛɛŋndo. Buŋgɛi o chua keŋ nde wa ni maa chua ndɔɔ nɔla lɛ niŋ kposoŋ mbo chal o nɔ ɔɔ mbo velu chua le. Kɛ o foofo koŋ choo, mi chua ndɔɔ ke ndu muli dɛɛniaa ndu kɔllo wo maa o faŋaŋ o buŋgɛi o chua ve choo le. Mi muli chuaambɔɔ hoo chɔm maa o tiindaŋ o Chɛhowa niŋ a kɔl ndɔɔ kpou, maa Chɛhowa dimul ndu le iwɔɔŋ tosa le. (Chɔɔchiaa 11:​34-37) Mɛɛ finya ndɔ che tiindaŋ ndɔɔ, mbo naŋ kɔllo tau a ndu kanifuule, chɛlɔɔ chua ndɔɔ chɛl koŋndo cho Chɛhowa kɔllo nɛŋi.

² Mi Chɛfitaa nda chua ndɔɔ duau tiindaŋ ndaa kpou o Chɛhowa niŋ nduyɛ a mɛɛ o tosa sɔɔŋ yɛ. Ma lo o tiindaŋ ndaa choo mi che bɛɛ o wa ikala kpoke le nda. Ndaa yeema mi Chɛhowa hini kɔl a nda, nduyɛ hei ndii hiou sala soliaŋ kɛ kɛ.

3. Vɛɛ tamaselii Chɛfitaa nda chua ndɔɔ mala yɛ naa hau?

³ I cho suɛi kpɛdɛ le loo o tiindaŋndo choo o Chɛhowa lo le. Ŋ nɔ ‘miŋ sim kpeekpei, miŋ manda suɛi Mɛlɛkɛi.’ (Chudi 3) Le miŋ nɔla hei tosaa, ŋ pɛɛkuŋndɔ mɛɛ Chɛfitaa nda chua ndɔɔ ndaa biunuŋ simultaŋ yɛ. Vɛɛ ndaa looku yɛ lo o tiindaŋ ndaa choo o Chɛhowa lo?

LO O TIINDAŊNDO CHOO MI CHE BƐƐ NIILULA CHIEEŊNDO LA CHO NAA LA BALAA

4, 5. (a) Yɛɛ Chɛhowa ndoo dimullɛ Isɔluɛya teleŋ nda luɛi o Lɛŋnde Mɛyaaleŋ niŋndo? (b) A mɛɛ Sam 106 chɔm yɛ, yɛɛ ndoo yɔŋnuŋ yɛ Isɔluɛiya le nila kalula ndalaŋ?

⁴ Lepaa o lepaa Chɛfitaa nda chua ndɔɔ wa yiyaŋndo a fulamakɔɔli wɔɔŋ Isɔluɛiya sɔla le Chɛhowa nila kalulaŋ tosallo wo. O wa niŋ le wɔsilaŋ 300 chɔŋ a teleŋ Chɛhowa dimul Isɔluɛiya maa a diu wana o wana cho o piɛile lachoowaleŋ niŋ o Lɛŋnde Mɛyaaleŋ niŋndo. Kɛ ma kɛɛ sila koŋ diikɔŋndo. (Ditɔnɔmii 7:​1-4) Mi Isɔluɛiya a bɔɔbɔɔ kandu Kenanaitiiya tolɔɔ kɔɔli, a ndaa piɛi mɛlɛkaa lachoowaa nduyɛ ma wa o kaa nɔɔlɛiyo niŋnda.​—​Nuawɔ Sam 106:​34-39.

⁵ Le mɛɛ Isɔluɛiya kɛɛ Chɛhowa diikɔŋndo yɛ o kɛɛ nda piŋioo yaamɔɔwaa ndaa o ba ni. (Chɔɔchiaa 2:​1-3, 11-15; Sam 106:​40-43) A boondii keŋ, le mi yuŋgulaŋ la hiou lachi a Chɛhowa kaalaa nduyɛ mi la lo o tiindaŋ ndaa choo, i ve suɛi kpɛdɛ le. Kɛ mi Baabuiyo chɔm wanaa ndaa dɔu tiindaŋndo o Chɛhowa niŋnda, mɛɛ Chɛfitaa, chua ndɔɔ, Ɛlikana, Hana, a Saamiɛɛ wa naa yɛ. Ndaa nɔ kɔl sikpaa le Chɛhowa kɔllo nɛŋioo.​—⁠Saamiɛɛ Tasoo 1:​20-28; 2:⁠26.

6. Sɔɔŋ yɛɛ cho yɛ hau o chieeŋndo niŋ, nduyɛ yɛɛ naŋ nɔ yɛ miŋ tosa?

⁶ O teleŋ naa hoo niŋ, mɛɛ Kenanaitiiya wa yɛ ko waŋnda cho ni. Yoomula ndalaŋ kpou la tɔlnuŋ o hiniei choo, niilu latandaa, a kaala ikanioo. Kɛ Chɛhowa cho naa silala walaŋ ndaŋ kioo. O yeema mbo manda naa mɛɛ ndoo yeema Isɔluɛiya mandaa le niilula wɔɔŋndaŋ kpakpalaa yɛ. Ŋ sɔla pa silaa o biondɔŋnda nda tosa laŋ niŋ? (Kɔliŋtiaŋ Tasoo 10:​6-11) Ŋ nɔ miŋ kindiŋ o nɛi o nɛi niŋ le kaa chieeŋndo kpakpalaa. (Luomaŋnda 12:⁠2) Ŋ cho pa kindiŋ le hei tosaa?

MI CHƐFITAA LO O TIINDAŊ NDƆƆ CHOO A SƆƆŊ KƆL TAMBƐI KOMAL NDU WOŊ FAU

7. (a) Yɛɛ wanaa Chɛfitaa wa tosallɛ ndu? (b) Kɛ yɛɛ ndoo tosa yɛ?

⁷ O teleŋ Chɛfitaa niŋ, Isɔluɛiya wa saŋgaa Filiitiaŋnda a Amɔnaitiiya o ba bɛŋgu le mɛɛ nda kɛɛ Chɛhowa diikɔŋndo yɛ. (Chɔɔchiaa 10:​7, 8) O fulawɔ bɛɛ o lɛŋii wa nda saaŋgiaa ve kɔɔli, Chɛfitaa ndoo nɔ vɛlɛ simulta cheleŋ. Mi puaa finya ndɔ velu wa, a masaa Isɔluɛi paŋala ndu, nduyɛ ma tul ndu leyɛ. Ma tuau ndu o finya ndɔ lo chiɛiniŋ. (Chɔɔchiaa 11:​1-3) Kɛ Chɛfitaa chɛl mi dɛnɛ wɔɔŋ ndaa tɛɛmbuu kaa ndɔ kɛndɔɔ le. Vɛɛ naŋ looku yɛ keŋ sina? Mɛɛ waŋ bɛnduaa o Isɔluɛi niŋ huŋ dɛɛniaa ndu le mbo mala nda, mbo chɛl chɔ chɔ le keŋ tosaa. (Chɔɔchiaa 11:​4-11) Yɛɛ ndoo nyindu yɛ Chɛfitaa le keŋ tosaa?

8, 9. (a) Sawala mandaala kuɛɛ o Sawa Muuse wo niŋ laa mala yɛ Chɛfitaa? (b) Yɛɛ Chɛfitaa ndoo che yɛ nyɛ sɔvɛ bɛndu?

⁸ Kuubanɔ chɔuwo Chɛfitaa wa ni. Nduyɛ ndoo sina bundɛi Isɔluɛiya a Sawa Muuse wo nyɛkɛndɛi. Mɛɛ Chɛhowa ndoo bii wanaa nduaa yɛ pɛɛku ndu ni le teŋgeŋndo sinaa ikɛndɛi tɛɛŋ a iwɔɔŋnde. (Chɔɔchiaa 11:​12-27) Mi Chɛfitaa soliŋ kɔlkalu koŋ kpeku le kɛɛsiaalaŋ tosaa o yoomu ndɔɔ niŋ. Mbo sina yiyaŋ Chɛhowaa walaŋ a kɔl tuuwo vɛlɛ a maa miŋgiaa okɔɔ. Nduyɛ a mɛɛ Mɛlɛka yeema wanaa nduaa le ma kaaliaŋ vellaa velle yɛ. Le handɔɔ lachoo, mi Sawa Muuse wo pɛɛku ndu mɛɛ o nɔ mbo bii acheleŋnda, a wanaa ndaa tul ndu leyɛ wa yɛ.​—⁠Nuawɔ Ɛsɔdɔɔ 23:5; Lɛvitikɔɔ 19:​17, 18.

⁹ Kɛlɛŋgaa tamaselii Choosɛ wo ndoo mala Chɛfitaa ni. Mi ndoo pɛɛku dɔɔ mɛɛ Choosɛ ndoo chɔm bɛndaa nduaa ndaa tul ndu leyɛ wa nyɛiye yɛ. (Chɛnɛsee 37:​4; 45:​4, 5) Kɛlɛŋgaa yiyaŋ Chɛfitaa wa o tamaseliiyo hoo choo wo mala ndu ni mbo tosa nyɛ nɛŋi Chɛhowa kɔllo. Mi nyɛ puaa finya ndɔ velu wa tosal ndu wo tɛɛmbuu ndu kɔllo tau. Kɛ chɔulabaa le diola Chɛhowalaŋ a wanaa nduaa piŋioo wa suɛi sɔvɛ bɛndu mbo hiau kɔl tambɛi ndɔɔ. (Chɔɔchiaa 11:​9) Ndoo nɔ kɔl sikpaa le loo o tiindaŋ ndɔɔ choo o Chɛhowa lo. Mi Chɛhowa duau ndu a Isɔluɛiya sala le kaa ndɔ kɛndɔɔ.​—⁠Hibuluiya 11:​32, 33.

10. Vɛɛ sawala mandaala Mɛlɛkalaŋ la mala yɛ naa hau le kaa leKilisiɔŋndo chɔmndo?

¹⁰ Yɛɛ tamaselii Chɛfitaa wo pɛɛku yɛ naa? Yɛɛ naŋ cho yɛ tosa te puaapiliaa naa Kilisiɔŋnda tɛɛmbuu naa pɛ kɔl ɔɔ ma chiee naa biyɔɔ le? Pɛ pɛ bɛɛ ŋ chɛlnuŋ yiyaŋnda iwanachieeya laŋ le mi la kuuna naa Chɛhowa piɛiyo le. Kialu kɔlaŋ o bɔŋaŋnda leKilisiɔŋndaŋ ɔɔ chaŋyɛi tosaa a puaapiliaa numnda le. Ŋ tolnuŋ tamaselii Chɛfitaa wo kɔɔli nduyɛ miŋ diikuŋ Chɛhowa. Hei cho naa mala miŋ chɔulaba simulta komal naalaŋ le halikpeŋ mi naa bɛɛ wa wanaa tamasi kɛndɛ.​—⁠Luomaŋnda 12:​20, 21; Kolosiaŋnda 3:⁠13.

SALALA NAŊ YƆŊGU A KƆL NAA WULEE LAŊ CHƆM NI MAA Ŋ NƆ TIINDAŊNDO

11, 12. Buŋgɛi yɛɛ Chɛfitaa ndoo chua yɛ, nduyɛ yɛɛ hei ndii sim yɛ?

¹¹ Mi Chɛfitaa sina maa o yeema mala Mɛlɛkaa le Isɔluɛiya solioo Amɔnaitiiya o ba bɛŋgu. Mbo chua buŋgɛi o Chɛhowa lo maa te O mala ndu pɛ mbo yem chɔu koŋ, o cho wana tase cho fula o ndulo chiɛiniŋ le ndu demullo wo “sala luamaa” soli. (Chɔɔchiaa 11:​30, 31) Yɛɛ hei ndii sim yɛ?

¹² Chɛhowa tul waŋchieeya salaa solioo leyɛ. Nduyɛ hei mala naa le sinaa maa Chɛfitaa ndoo nɔ mbo lom chua ndɔɔ le sala koŋ solioo le. (Ditɔnɔmii 18:​9, 10) O Sawa Muuse wo bɛŋgu, ke teŋgeŋ waŋndo ndoo yɔŋgu a kɔl ndɔɔ kpou o Chɛhowa lo wo wa sala luamaa ni. Hei sim ni maa wana Chɛfitaa wa yɔŋgu o Chɛhowa lo wo ndoo nɔ mbo tosa wallo o maaŋndo niŋ haaa a yoomu ndɔɔ mɛɛlulaŋ. Mi Chɛhowa yaŋ Chɛfitaa nilaŋ nduyɛ mbo mala ndu le chɔu koŋ yomɔɔ. (Chɔɔchiaa 11:​32, 33) Kɛ nɛɛnɛ Chɛfitaa wa yɛ yɔŋgu o Chɛhowa lo?

13, 14. Yɛɛ nyɛ Chɛfitaa dimi o Chɔɔchiaa 11:​35 niŋndo chɔm yɛ tiindaŋ ndɔɔ?

¹³ Yiyaŋndɔ a nyɛ ndoo yɔŋnuŋ o buŋgɛi hei kandɔŋndo wo. Mɛɛ Chɛfitaa fula o chɔuwo, wana tase fula le ndu hunɔɔ demullo wo wa chuale ndɔle pilɛle o kaala leŋ ni! Baa Chɛfitaa ndoo lo niŋ pa o lediom? Baa ndoo yɔŋgu niŋ pa chuale ndɔle pilɛleŋ o Chɛhowa lo le wallo tosaa o maaŋndo niŋ haaa a yoomu ndɔɔ mɛɛlulaŋ?

¹⁴ Le handɔɔ lechoo, sawala mandaalaŋ o Diom Mɛlɛkaa niŋ mala Chɛfitaa ni mbo tosa kɛɛsiaa kɛndɔɔ. Kɛlɛŋgaa mi ndoo loonuŋ nyɛ Ɛsɔdɔɔ 23:19 dimi wo, maa wanaa Mɛlɛkaa nɔ ma ke Chɛhowa nyɛ bɛnda wo a kɔllo wulee. Mi Sawaa dimi vɛlɛ maa te waŋndo chua pɛ buŋgɛi o Chɛhowa lo, ‘o nɔ mbo tɛɛmbuu buŋgɛi keŋ te, o nɔ mbo lo o diomnde ndɔleŋ choo mbo tosa nyɛ o chua buŋgɛi yo.’ (Nɔmbaa 30:⁠2) Kɛlɛŋgaa Hana wa wɔ yoomu o teleŋ Chɛfitaa niŋ. Maa Hana, Chɛfitaa ndoo nɔ mbo lo o lediom mi che ndoo sina maa i wa ikala le chua ndɔɔ a ndupila. Kanifuule, chua ndɔɔ wa lo wallo tosaa o maaŋ Mɛlɛkaa niŋ nduyɛ fɛɛŋ bɛɛ o ve chua violɔɔ le. Lelaŋ, wana o wana ve diola Chɛfitaalaŋ loo vɛlɛ a lɛŋnde ndɔleŋ te. (Chɔɔchiaa 11:​34) Kɛ a koŋ kpou, mi Chɛfitaa dimi a tiindaŋndo aa, “I chua buŋgɛi i kala kala o Mɛlɛka Yaawɛɛ lo. Nduyɛ I nɔla mi tɛɛmbuu buŋgɛi keŋ te!” (Chɔɔchiaa 11:35) Mi Chɛhowa chɛl sala bɛndu Chɛfitaa soli hoo wo, nduyɛ mbo duau ndu sala. Baa num oo duau niŋ pa tiindaŋndo o Chɛhowa niŋ maa Chɛfitaa?

15. Buŋgɛi yɛɛ naa bɔɔbɔɔ chua yɛ? Nduyɛ vɛɛ naŋ chɔm yɛ tiindaŋndo o Mɛlɛka niŋ?

¹⁵ Teleŋ naŋ yɔŋgu yoomu naa o Chɛhowa lo wo, miŋ chua buŋgɛi maa mɛɛmɛɛ la wa, ŋ cho hɛnaŋ ndɔɔ tosa. Miŋ sina maa i ve niŋ suɛi kpɛdɛ le loo o buŋgɛi naŋ chua keŋnde choo le. Kɛ vɛɛ naŋ cho yɛ muli te a dimul naa pɛ le tosaa nyɛ naŋ yeema le wo? Te ŋ chɔulaba pɛ yiyaŋnda iwanachieeya laŋ nduyɛ miŋ diikuŋ Mɛlɛka a kɔllo wulee, ŋ cho chɔm maa ŋ lo o lediom. Sala soliaŋ naa chuu naa saŋgaa, kɛ tɔnɔla Chɛhowa ke naa lɔɔlɔɔ laŋ la hiou poloŋ. (Malakai 3:​10) Kɛ chua Chɛfitaa niŋ yɛ? Yɛɛ ndoo tosa yɛ a buŋgɛi finya ndɔ chua ve?

16. Mɛɛ chua Chɛfitaa tuei buŋgɛi finya ndɔ chua ve, yɛɛ ndoo tosa yɛ? (Tofa fotueiyo o peele naŋ kandu leŋ choo.)

¹⁶ Buŋgɛi Chɛfitaa ndoo chua ve wa teŋgeŋ a i Hana ve. Mi Hana chua buŋgɛi maa o cho Saamiɛɛ po ndɔ yɔŋgu le wallo tosaa o maaŋndo niŋ maa Naasaluɛinɔ. (Saamiɛɛ Tasoo 1:11) Naasaluɛinɔɔ ndu ndoo nɔ dioo le lanɔɔ chuaa nduyɛ mbo kɛsi yuŋguleŋ. Kɛ chua Chɛfitaa ndu, mbo yɔŋguŋ kpou maa “sala luamaa.” Lelaŋ, ndoo simnuŋ niŋ lanɔ ɔɔ kala chua le. (Chɔɔchiaa 11:​37-40) Yiyaŋndɔ a hei okɔɔ! Ndoo nɔla mbo chal o nɔɔ wana pɔnɔ sɔviɔɔ o ba o lɛŋnde leŋ niŋ kanifuule, masaa finya ndɔ wa o Isɔluɛi niŋ ni. Kɛ suŋ suŋ niŋ, ndoo nɔ mbo tosa wali taaniŋndo o maaŋndo niŋ. Kɛ yɛɛ chuaambɔ laandoo hoo ndoo tosa yɛ? Mbo chɔm maa wali Chɛhowaa cho nyɛ tasoo o yoomu ndɔɔ niŋ ni. Mbo dimul finya ndɔ aa, “Mɛɛ tosa nyɛ ŋ chuel Mɛlɛka buŋgɛi maa a cho tosa a ya wo.” (Chɔɔchiaa 11:​36) Mbo kɛɛ yeemɛi nduɛi ŋdialle le pɔnɔɔ chuaa a chuauwa violɔɔ peeloo le wallo tosaa o maaŋ Chɛhowaa niŋ. Vɛɛ naŋ tuallɛ tamasi kaa sala soliaŋ ndɔɔ kɔɔli?

17. (a) Vɛɛ naŋ tuallɛ tamasi Chɛfitaa nda chua ndɔɔ kɔɔli? (b) Vɛɛ nyɛ Hibuluiya 6:​10-12 dimi wo dɛɛniaa yɛ num le salaa soliŋndo?

¹⁷ Kilisiɔŋaa feleŋguaa o waalaŋ niŋ cho yɔŋgɔŋndo wulee le kiɔɔ nɔɔ chuaa ɔɔ chuauwa violɔɔ le suŋ suŋndɔ. Le sabu yɛɛ? Le ma chɔɔlu tosa tau o wali Chɛhowaa niŋ. Vɛlɛ, kaasoŋaa bɔɔbɔɔ naa tɛɛŋ cho teleŋ nda nɔ ma chua a chuauwaa ndaa ɔɔ chuauwaa ndaa mamaa wo soliŋndo kpeku le wali Chɛhowaa tosaa. Apum cho wali taŋgulaa tosaa o kɔɔna Chɛhowaa niŋ ɔɔ mi apum kuɛ o Sukuuwo le Wanaa Dimiaa Yooŋgu Kɛndiaa. Nduyɛ te a chii pɛ sukuu koŋ, a kuɛ o kundala wanaa dimiaa yuŋgu kɛndiaa cho tau le wa. Mi apum kɛɛsiaa le yooŋgu kɛndɔɔ chɔɔloo dimioo a boondii Loonuŋyaa. Chɛhowa puɛɛnuŋ kposoŋ a sala soliaŋ wanaa kaala ndu haa wa le. (Nuawɔ Hibuluiya 6:​10-12.) Kɛ num yɛ? A soliŋ niŋ pa sala le wali Chɛhowaa chɔɔloo tosaa?

YƐƐ NAŊ PƐƐKU YƐ O BUŊGƐI HEI NIŊ?

18, 19. Yɛɛ bundɛi Chɛfitaa ve nda chua ndɔɔ o Baabuiyo niŋ pɛɛku yɛ naa, nduyɛ vɛɛ naŋ tuallɛ tamasi ndaa kɔɔli?

¹⁸ Yɛɛ mala yɛ Chɛfitaa le simulta ndɔlaŋ chɔulabaa? Mbo chɛl le mi Chɛhowa chɔm ndu nɛiyo le kɛɛsiaalaŋ tosaa o yoomu ndɔɔ niŋ. O tul niilula wanaa o wa tɛɛŋnda kɔɔli le. A kɔl tambɛi wanaa cheleŋnda ke ndu wo fau, Chɛfitaa feŋaŋ o tiindaŋ ndɔɔ choo le. Mi Chɛhowa duau ndu sala nda chua ndɔɔ le sala soliaŋ ndaa. Nduyɛ mbo soliŋ nda kpeku le piɛile tonyaleŋ pɛŋgɛlaa. Mi che bɛɛ naa mi acheleŋnda mal suɛi kɛndɛi tosaa, kɛ mi Chɛfitaa nda chua ndɔɔ lo o tiindaŋ ndaa choo o Chɛhowa lo.

¹⁹ Baabuiyo dimi aa, “Nyɛ naa ŋ hɛnaŋ ndo cho ni maa wanaa dɔu tiindaŋ ndaa o Mɛlɛka niŋ, ma biuŋ, nduyɛ o hei niŋ ma sɔla nyɛ Mɛlɛka chuel nda buŋgɛi yo wa, la chua nda maa taamasi nya.” (Hibuluiya 6:​12) Maa ŋ tolnuŋ tamasi Chɛfitaa kɔɔli nda chua ndɔɔ fɔ. Nduyɛ te naa bɛɛ lo pɛ o tiindaŋ naa choo, Chɛhowa cho naa salaa dɔuwɔɔ.