Tosa mi Nɔ leKilisiɔŋndo Sɔla Batiuwaa

1. Mi che bɛɛ teleŋnda bɔɔbɔɔ mi nɔɔ kanduŋ a kɔl kɛndɔɔ, kɛ yɛɛ wanaa chal o nɔɔ niŋnda nɔ yɛ ma kɛsiŋ o kɔl maa o cho nda komal? (Tofa fotueiyo o peeleŋ ndeŋ choo.)

TE PO cho lanɔɔ chuaa wo che pɛ lanɔ o cho chuaa o nɔɔ niŋndo chɔ tasoo o paale nɔ nda kɛsiaa choo, mi kɔllo hiu ba a nda naŋɔɔ. Teleŋ nda wa nuaŋnaŋndo le challe o nɔɔ niŋndo, ma kaaliaŋ tau. Le hei, ma yeema le challe o nɔɔ niŋ nduyɛ ma chɛlaŋ maa a cho wa sakpo ndapila tɛɛŋ. Te paale nda chal o nɔɔ niŋndeŋ le hiou pɛ, ma kandu yoomu ndaa diompilɛ. A nɔ ma tosa siŋgaŋndaŋ le ma lo diompilɛ. Chɛhowa kila nɔɔ ni. Nduyɛ, o yeema mi pɔnɔɔ a lanɔɔ wa a nyaale nduyɛ ma sɔla batiuwaa o nɔ ndaa niŋ. Le hei, o yɔŋgu sila taasioo o Baabuiyo niŋ ni. (Pulɔwaa 18:22) Kɛ a koŋ kpou, mi Baabuiyo dimul naa maa wanaa lahakiaa chal o nɔɔ niŋnda nɔ le bahawɛilaŋ sɔlaa ɔɔ “sɔɔŋ palaŋ.” (Kɔliŋtiaŋ Tasoo 7:28) Vɛɛ pɔnɔɔ a lanɔɔ dɔɔniaa yɛ bahawɛila laŋ? Nduyɛ vɛɛ Kilisiɔŋnda tosa yɛ mi nɔɔ sɔla batiuwaa?

2. Kaala suu kuɛɛ wanaa cho o nɔɔ niŋnda nɔ yɛ ma chɔm?

² Baabuiyo pɛɛku maa kaalaa cho suiliŋ sɔvɛ. Kɛ kaalaa cho suulaŋ yɛ yɛ o pɔnɔɔ a lanɔɔ yeema le chɔmndo o nɔɔ niŋndo. Le tamaseliiyo, a nɔ ma chɔm kaala ichaŋyaa vɛlɛ a kaala mɛmɛlɛsɛɛ wo. Nduyɛ te a nɔ pɛ chuauwa, mi kaala wa o yuŋgoo niŋndo bɛɛ simnuŋ nyɛ sɔvɛ. Kɛ kaala tɔlnuŋ o sawala mandaa Baabuiyo choo laŋ tosa ni mi nɔɔ sɔla batiuwaa kpeekpeiyo. Mi kiilanɔɔ Pɔɔl tɛɛsiaa kaala suu waa naa aa, “Wana pɔnɔ o wana pɔnɔ, a nɔ ma kaala laa num mɛɛ ŋ kaala num pila yɛ. Nduyɛ, wana lanɔ o wana lanɔ, a nɔ ma ke pɔnɔ num bɛɛleŋ.”​—Ɛfisiaŋnda 5:33.

TOFAA NYƐKƐNDƐI KALAŊNDA WANAA CHAL O NƆƆ NIŊNDA

3. Vɛɛ kpɛ kaalaa nɔ yɛ mbo kendu o nɔɔ niŋ?

³ Mi Pɔɔl poonyiaa aa, “Nya piaanduaa yɛ, la kaala laandaa nyaa mɛɛ Kiliti kaala kunda wanaa laalaŋnda, nduyɛ mbo chɛl mbo wu le nda yɛ.” (Ɛfisiaŋnda 5:25) Kilisiɔŋnda hau tual tamasi Chiisoo kɔɔli le ma kaaliaŋ vellaa velle mɛɛ Chiisu kaala buɛiyaa nduaa yɛ. (Nuawɔ Chɔŋ 13:34, 35; 15:12, 13.) Pɔnɔɔ a lanɔ Kilisiɔŋnɔɔ nɔ ma kaaliaŋ haaa ma lo okoŋ ma yɔŋguŋ wulee le ma vi le ndapila. Kɛ te bahawɛi kala kalaa wa pɛ o nɔɔ niŋ, mi apum yiyaŋ maa kaala ndaa kindu le. Yɛɛ mala yɛ nda? Kaala tɔlnuŋ o sawa mandaa Baabuiyo choo wo “o biunuŋ sɔɔŋ kpou, o laalaŋ sɔɔŋ kpou, o tiindaŋ sɔɔŋ kpou, nduyɛ o biunuŋ isɔɔ o isɔɔ.” Kaala waa lende “cho nyɛ mɛɛlu le.” (Kɔliŋtiaŋ Tasoo 13:7, 8, NW) Pɔnɔɔ a lanɔɔ nɔ ma loonuŋ maa ma chua buŋgɛi le kaaliaŋndo, nduyɛ le waa sakpo ndapila tɛɛŋ. Loonɔŋndo a hei okɔɔ nyindu pɔnɔɔ a lanɔ Kilisiɔŋnɔɔ ma nyuna Chɛhowa le malaa nduyɛ ma tosa wallo diompilɛ le bahawɛila ndalaŋ solioo.

4, 5. (a) Maa wana lebol o yuŋgoo niŋ, kalaŋ kuɛɛ pɔnɔɔ nɔ yɛ? (b) Vɛɛ lanɔɔ nɔ yɛ mbo che chilaŋ chuaa? (c) Yɛlɛmiaala suu kuɛɛ pɔnɔɔ a lanɔ pum ndaa tosa yɛ?

⁴ Mi Pɔɔl tɛɛsiaa kalaŋnda pɔnɔɔ a lanɔ kɛ kɛ nɔ laŋ. Mbo dimi aa, “Nya laanduaa la tuei piaanduaa nyaa diom mɛɛ nya tuei Masanɔɔ Mɛlɛka diom yɛ. Kiliti ndu cho dialluŋ ndɔŋ bolleŋ ni, koŋ cho ni, kunda wanaa laalaŋnda, a o piŋi wa. Mɛɛ lende koni i cho ni, pɔnɔɔ cho lanɔɔ bolleŋ ni.” (Ɛfisiaŋnda 5:22, 23) Hoo chɔm naa maa pɔnɔɔ hiou laa ndɔ lehɔɔya le. Mi Chɛhowa suaa a kalaŋ sɔvɛ lanɔɔ nɔ wo okɔɔ aa, “O niŋ mi wana pɔnɔɔ o wa ndu pilɛ kpe le. I cho wana malaa toosiaa le ndu, o bɛnda le ndu wo.” (Chɛnɛsee 2:18) Lanɔɔ nɔ mbo mala pɔnɔ ndɔ le mbo wa wana lebol kɛndɛ o yuŋgoo niŋ. Nduyɛ pɔnɔɔ nɔ mbo tol taamasi kɛndɛ Chiisoo kɔɔli, o cho “kunda wanaa laalaŋnda” bolleŋ ndo. Te pɔnɔɔ tosa pɛ hei, siooŋii ve laa ndɔ le. Nduyɛ, i wa tɛtɛlɛ le mi laa ndɔ ke ndu bɛɛleŋ nduyɛ mbo mala ndu.

⁵ Mi Kati, o Filɛdi chua o nɔɔ niŋndo dimi aa, “Teleŋ ya wa wɔ yembu wo, a ba ni ya wa ni nduyɛ yapila yaa tosa nyɛ o nyɛ ni. Kɛ mɛɛ ya chal o nɔɔ, mi siŋgaŋndo yɔŋnuŋ kanifuule, mi pɛɛku le tiindaŋndo dɔuwɔɔ o pɔnɔ nuu niŋ. I ve suɛi kpɛdɛ le. Kɛ miŋ sɔɔŋgaŋ ikɛi kpɛɛluŋ maa pɔnɔ a lanɔ le sɔɔŋ tosaa o nɛi Chɛhowaa choo.”^[1] (Tofa diomnda chɔɔlaalaŋ.) Mi Filɛdi dimi aa, “Kɛɛsiaalaŋ tosaa ve suɛi kpɛdɛ le ya le. O nɔɔ niŋ, mi kɛɛsiaa le waŋnda a ŋiɔɔŋ chɔɔlu kalu. Kɛ Chɛhowa nyunaa o piɛileŋ niŋ le malaa a laa nuu nilaŋ yaŋɔɔ o kɛɛsiaala ndɔlaŋ, tosa ni mi sɔɔŋ wa kɔlaŋ a yɔŋnɔŋndo mɔɔsɔlɔɔ lepaa o lepaa. I che maa nyɔɔ opilɛ kpe naŋ cho ni!”

6. Vɛɛ kaalaa cho yɛ nyɛ mɔɔsa ‘nyɛ o nyɛ mbo bɛnda nyɛ kɛndɛiyo’ te bahawɛilaŋ la buli pɛ o nɔɔ niŋ?

⁶ Nɔɔlaŋ la tiuba mi la wa la kala poŋ te piaanduaa a laanduaa “biuwaŋ vellaa velle” pɛ. “Nduyɛ, te o wa pɛ mi chaaŋ num yɔŋ num isɔɔ, mɛɛ mal ndu le suɛi wɔɔŋ o tosal num keŋ nde.” Le mɛɛ pɔnɔɔ a lanɔɔ cho wanaa lahaki yɛ, ma benduŋ teleŋndaŋ lapum. Te keŋ i yɔŋnuŋ pɛ, a pɛɛku nyɛ o biondɔŋ nda tosa koŋndo, le malɔɔ haki, nduyɛ ma chɔm kaalaa o tɔlnuŋ o sawala mandaala Baabuiyo choo laŋ. Kaalaa hoo mɔɔsa ‘nyɛ o nyɛ mbo bɛnda nyɛ kɛndɛi.’ (Kolosiaŋnda 3:13, 14) Wanaa cho o nɔɔ niŋnda chɔm kaala waa naa a mɛɛ nda wa wanaa biuwaŋ a wanaa ikɛndɛ yɛ, nduyɛ a “manda suɛi nɛiyaŋ o kɔl te.” (Kɔliŋtiaŋ Tasoo 13:4, 5) Te kɛɛ sinapɛŋgoo luɛi pɛ pɔnɔɔ a lanɔɔ tɛɛŋ, a nɔ ma kindiŋ ma toosiaŋ tɛɛŋ chɔ chɔ tuupa mi paaleŋ le del. (Ɛfisiaŋnda 4:26, 27) Tuisiŋndo a kɔl sikpaa yeemaŋ ni le dimioo aa, “Mal haki le mɛɛ ya benduŋ num yɛ.” Hei tosaa mala pɔnɔɔ a lanɔɔ le bahawɛila ndalaŋ solioo nduyɛ ma sɔɔŋgaŋ ikɛi kpɛɛluŋ.

YEEMƐI TEŊGEŊNDE LE NYƐIYE CHƆMNDO

7, 8. (a) Sila yɛɛ Baabuiyo yɔŋgu yɛ a chiɛiniŋndo o nɔɔ niŋ okɔɔ? (b) Le yɛɛ pɔnɔɔ a lanɔɔ nɔ yɛ ma chɔm nyɛiye?

⁷ Baabuiyo yɔŋgu sila kɛndɔɔ o mala pɔnɔɔ a lanɔɔ ma nɔ yiyaŋ kɛndɔɔ a chiɛiniŋndo tosaa okɔɔ wo. (Nuawɔ Kɔliŋtiaŋ Tasoo 7:3-5.) I cho suɛi sɔvɛ le mi pɔnɔɔ a lanɔɔ sina yiyaŋnda ndalaŋ a yeemaŋ ndaŋ vellaa velle. Te pɔnɔɔ nɔ nyɛiye le laa ndɔ le, i wa ikala le mi laa ndɔ tuei chiɛiniŋndo yeela. Piaanduaa nɔ ma chɔm kaala kɛndɛlaŋ o laandaa ndaa lo. (Pitɛ Tasoo 3:​7) Chiɛiniŋndo cho nyɛ wana baŋ wana le, ɔɔ ma piɛi le ndu le. Yeemɛi keŋ nɔ mii hiŋ a ba ndɔ. Wana pɔnɔɔ fɛŋ yeemɛi chiɛiniŋnde keleŋa hunɔɔ o kɔl mbo hiau wana lanɔɔ. Kɛ pɔnɔɔ a lanɔɔ nɔ ma chum mi yeemɛi keŋ hiŋ vellaa velle.

⁸ Baabuiyo yɔŋgu sawalaŋ kpeekpei a pisulta mɛmɛlɛsɛɛ suu pɔnɔɔ a lanɔɔ nɔ ma tosa laŋ te. Nduyɛ, o chɔm vɛlɛ naa nda nɔ ma kunduŋ a laŋ tosaa wa le. Kɛ mbo suaa a pisulta mɛmɛlɛsɛɛ suu waa lende okɔɔ. (Chondii Sɔlɔmɔŋ Nde 1:2; 2:6) Pɔnɔɔ a lanɔ Kilisiɔŋnɔɔ nɔ ma biyaŋ vellaa velle o nɛi kaalaa niŋ.

9. Le yɛɛ yeemɛi chiɛiniŋndo chɔmndo le wana cheleŋndo cho yɛ suɛi wɔɔŋ?

⁹ Te ŋ kaala pɛ Mɛlɛka vɛlɛ a chaaŋ naa wana chioo tau, ŋ chɛl mi wana o wana ɔɔ nyɛ o nyɛ simul nɔ naa le. Apum tosa niŋ hau mi nɔ ndaa yɔŋnuŋ pɔŋ pɔŋ ɔɔ ma tɛɛmbuu ndu kanifuule, wunduma ɔɔ fotueila tum fondolaŋ nuaa luɛi niŋ nda o koowaŋ niŋ. Ŋ nɔ miŋ kpakpala nyɛ o nyɛ nyindu naa le keŋ tosaa ɔɔ nyɛ cheleŋ kpeeŋiaa naa yeemɛi chiɛiniŋnde wo. Ŋ nɔ pɛŋ miŋ kpakpala nyɛ o nyɛ tosa miŋ kandu itɛsɛ tɛsɛi a wana cheleŋndo. Keŋ cho suɛi kɛndɛ le. Ŋ nɔ miŋ kɛsiŋ o kɔl maa Mɛlɛka sina yiyaŋnda naalaŋ vɛlɛ a nyɛ naŋ tosa wo kpou. Hoo mala naa miŋ nɔ yeemɛi ikala poŋ le ndu kɔllo nɛŋioo, nduyɛ miŋ chɔm lo lechoo wo o wana naŋ cho o nɔɔ niŋndo lo.​—Nuawɔ Maatiu 5:27, 28; Hibuluiya 4:13.

TE BAHAWƐILAŊ LA WA PƐ O NƆƆ NIŊ

10, 11. (a) Vɛɛ kpɛ kɛyaŋndo kui yɛ niŋ? (b) Yɛɛ Baabuiyo dimi yɛ a piɔuwaŋndo okɔɔ? (c) Yɛɛ mala yɛ pɔnɔɔ a lanɔɔ a piɔuwaŋ chɔ chɔ le?

¹⁰ Te pɔnɔɔ a lanɔɔ bumba pɛ bahawɛila kala kalalaŋ solioo o nɔɔ niŋ, a kɛɛsiaa le ma piɔuwaŋ, te koŋ te ma kɛyaŋ. O lɛŋnde ipum niŋ, wanaa kɛyaŋ o nɔɔ niŋnda hiou a wanaa kɛyaŋ te wa. Kaa suu waa naa hilul o kunda leKilisiɔŋndo niŋ te. Kɛ a koŋ kpou, Kilisiɔŋaa bɔɔbɔɔ cho o nɔɔ niŋnda cho bahawɛila kala kalalaŋ sɔlaa.

¹¹ Baabuiyo ke naa silalaŋ ndaŋ aa, “Wana lanɔɔ a nɔ ma kɛɛ pɔnɔ num te. Kɛ nduyɛ, te o wa pɛ ma kɛɛ pɔnɔ num kaŋgalaŋ, mɛɛ chua lɛ wana pɔnɔ cheleŋ te. Te koŋ te, mɛɛ miiŋgu niko pɔnɔ num ŋ kɛɛ koŋ ndo o ba. Nduyɛ, wana pɔnɔɔ num bɛɛ a nɔ ma kɛɛ laa num te.” (Kɔliŋtiaŋ Tasoo 7:10, 11) Mi pɔnɔɔ a lanɔɔ apum yiyaŋ maa bahawɛila ndalaŋ la cho bɔɔ. Le hei, a nɔ ma piɔuwaŋ. Kɛ, mi Chiisu chɔm maa piɔuwaŋndo cho suɛi lamamɔɔ le. Nduyɛ mbo miŋgi sondo o sabu tase Mɛlɛkaa choo a nɔɔ okɔɔ aa, “Te Mɛlɛka mɔɔsa wana lanɔɔ nda wana pɔnɔɔ naa pilɛ o nɔɔ niŋ pɛ, mɛɛ wana chiee piɔu nda tɛɛŋ te.” (Maatiu 19:3-6; Chɛnɛsee 2:24) Lelaŋ, Chɛhowa yeema mi pɔnɔɔ a lanɔɔ lo diompilɛ. (Kɔliŋtiaŋ Tasoo 7:39) Naa kpou nɔ miŋ kɛsiŋ o kɔl maa ŋ cho dɔunɔŋ kona o Chɛhowa lo le kelala naalaŋ. Hoo mala naa le bahawɛilaŋ solioo chɔ chɔ tuupa mi la hiou naa mayoomu.

12. Yɛɛnɛ nyindu yɛ pɔnɔɔ a lanɔɔ le ma kɛɛsiaa le piɔuwaŋndo?

¹² Le yɛɛ wanaa cho o nɔɔ niŋnda a bɔɔbɔɔ sɔla yɛ bahawɛila kala kala laŋ? Le apum, o cho lende le ndaa yiyaŋ maa nɔ ndaa cho wa le. Le saboo hoo, ma yiyaŋ maa a sɔla nyɛ nda wa kɔl o nɔɔ niŋndo le ɔɔ ma tuulu kɔl. Sabu cheleŋ cho vɛlɛ ni, mɛɛ waŋnda sɔla mandaa yɛ a yiyaŋ nda nɔ wo, huŋ a bahawɛilaŋ. Simultaŋ a lefuaa okɔɔ, ɔɔ kɛɛ sinapɛŋgoo a mɛɛ nda nɔ ma soliŋ nyɛ sɔlaa kpeku yɛ, ɔɔ mɛɛ nda nɔ ma manda chuauwa yɛ bɛɛ huŋ a bahawɛiyo. Kɛ, i cho suɛi kɛndɛ le chɔɔ maa Kilisiɔŋaa cho o nɔɔ niŋnda cho batiuwaa sɔlaa le bahawɛila ndalaŋ solioo. Kanifuule, a cho chɛlɔɔ mi Mɛlɛka wa nda nɛiyo chɔmndo.

13. Sabula kpeekpei kuɛɛ tosa yɛ mi pɔnɔɔ a lanɔɔ piɔuwaŋ?

¹³ Lepum, mi sabula kpeekpeilaŋ la wa le mi pɔnɔɔ a lanɔɔ piɔuwaŋ. O teleŋnda kala kalalaŋ lapum niŋ, mi apum kɛɛsiaa le piɔuwaŋndo. Laŋ la cho ni, kiɔɔ yuŋgoo malaa a siɛlɛi fuu, te waŋndo opilɔɔ wa pɛ ŋua ŋua, nduyɛ te Mɛlɛka piɛiyaa Kilisiɔŋnɔɔ wa pɛ o kpundɔɔ niŋ. Te bahawɛila kala kalalaŋ la wa pɛ, wanaa cho o nɔɔ niŋnda dimul bɛnduaa kundaa le malaa. Puaa haa nɔ sinapɛŋgoo tau, nduyɛ a nɔla ma mala wanaa cho o nɔɔ niŋnda ma dɔu sila Mɛlɛkaa o wali niŋ o yoomu ndaa niŋ. Nduyɛ te wanaa cho o nɔɔ niŋnda nyuna pɛ Chɛhowa le nyina ndɔ diandaa, o mala nda ma dɔu sawala mandaala Baabuiyo o wali niŋ nduyɛ ma chɔm suiliŋnda leKilisiɔŋndaŋ. (Kaleesiaŋnda 5:​22, 23)^[2]​—Tofa diomnda chɔɔlaalaŋ.

14. Yɛɛ Baabuiyo dimi yɛ a Kilisiɔŋaa cho o nɔɔ niŋ nda wanaa cho Chɛhowa piɛi le wa okɔɔ?

¹⁴ Baabuiyo chɔm maa sabula kɛndɛlaŋ la cho le mi wanaa cho o nɔɔ niŋnda lo diompilɛ o yɔŋ bɛɛ mi waŋndo opilɔɔ ve Chɛhowa piɛi le. (Nuawɔ Kɔliŋtiaŋ Tasoo 7:12-14.) Wana cho wana laalaŋ te wo cho o “yɔŋgaŋ o Mɛlɛka lo” kanifuule, o cho o nɔɔ niŋ nda buɛi Mɛlɛkaa. Mi chuauwaa ndaa pɔmbuaa simnuŋ “wanaa cho le Mɛlɛka.” Nduyɛ mi hei ke nda dioo le waa o ba Mɛlɛkaa bɛŋgu. Mi Pɔɔl dɛɛniaa Kilisiɔŋnda aa, “Num wana lanɔ cho hoo wana laalaŋ ndo ma wa pɔnɔ cho wana laalaŋ te wo o ba wo, ko a nɔla niŋ ma muli pɔnɔ num cho hoo wana laalaŋ te wo mbo simnuŋ wana laalaŋ, a sina le. Nduyɛ, num wana pɔnɔ nɔ hoo lanɔ cho wana laalaŋ te wo, ko a nɔla niŋ ma muli laa num cho hoo wana laalaŋ te wo mbo simnuŋ wana laalaŋ, a sina le.” (Kɔliŋtiaŋ Tasoo 7:16) Tamaseliila kɛndɛ laŋ la cho tau a piaanduaa a laanduaa Kilisiɔŋnda okɔɔ, a mala wanaa nda cho o nɔɔ niŋnda le simnɔŋndo buɛiyaa Chɛhowaa wa.

15, 16. (a) Sila yɛɛ Baabuiyo ke yɛ laanduaa Kilisiɔŋnda a piaandaa ndaa cho buɛiyaa Mɛlɛka le wa? (b) Yɛɛ Kilisiɔŋnɔɔ nɔ yɛ mbo tosa “te wana cho wana laalaŋ te wo o yeema le pɔnɔ wana laalaŋndo kɛlɛŋgaa lanɔ wana laalaŋndo malɔɔ pɛ”?

¹⁵ Mi kiilanɔɔ Pitɛ sila laanduaa Kilisiɔŋnda le ma tuisiŋ piaandaa ndaa o ba bɛŋgu, okoŋ “a yɔŋ bɛɛ mi a pum a ve wanaa laalaŋ te, kɛ o wa bɛɛ kaa nya kɛndɔɔ o tosa mi piaanduaa nyaa kaŋ a simnuŋ wanaa laalaŋ, mi la dimul nda bɛɛ nyɛ o nyɛ a Kiliti okɔɔ le. Hei cho yɔnɔŋ kani fuule, a cho chɔɔ mɛɛ kpɛ nya ke nda bɛɛleŋ yɛ, a mɛɛ kaala nya laŋ la cho sakpo yɛ.” Tuupa mi lanɔɔ wa suɛi teleŋ o teleŋ a laalaŋnda ndɔlaŋ okɔɔ, o nɔla mbo mala pɔnɔ ndɔ le mbo chɛl tonyaa te o chɔm pɛ naŋɔɔ cho “mɔɔsɔlɔɔ” wo. “Nduyɛ naŋɔɔ suu waa nuaa, ndu Mɛlɛka chua ni maa naŋɔɔ kpeekpeiyo.”​—Pitɛ Tasoo 3:1-4.

¹⁶ Te o wa yɛ mi wana cho wana laalaŋ te wo o kɛɛsiaa le piɔuwaŋndo? Baabuiyo dimi aa, “Kɛ nduyɛ, te wana cho wana laalaŋ te wo o yeema le pɔnɔ wana laalaŋndo kɛlɛŋgaa lanɔ wana laalaŋndo malɔɔ pɛ, mɛɛ o chaa malɔɔ. O koŋ, wana laalaŋ koŋ nɔ di mbo mal ndu. Mɛlɛka chua machuaa nya le mi la wa o kɔlta nyulu niŋ.” (Kɔliŋtiaŋ Tasoo 7:15) Mi che bɛɛ mi piɔuwaŋndo hiŋ a kɔl nyuloo o tiŋ, kɛ Baabuiyo dimi maa pɔnɔɔ ɔɔ lanɔ Kilisiɔŋnɔɔ nɔ di mbo chua nɔ cheleŋ te. O beŋ wana nda chal o nɔɔ niŋndo le ma wa diompilɛ le. Teleŋ wa niŋ, mi pɔnɔ ɔɔ lanɔ cho koŋ wana laalaŋ te wo kɛɛsiaa le ma miiŋgu o nɔ ndaa niŋ maa paandu. Nduyɛ o chilaŋ niŋ, kɛlɛŋgaa wana cho koŋ wana laalaŋ te wo cho simnɔŋ buɛi Chɛhowaa.

YƐƐ NƆ YƐ MBO WA NYƐ TASOO O NƆƆ NIŊ?

17. Yɛɛ nɔ yɛ mbo wa nyɛ tasoo peŋ le Kilisiɔŋaa cho o nɔɔ niŋnda?

¹⁷ Le mɛɛ naŋ cho o mɛɛlula “palɛi mɛɛlɛi” kpɛɛluŋ yɛ, lelaŋ naŋ cho o “nyɛ palaa” niŋ ni. (Timoti Diiŋ Ndɔɔ 3:1-5) Lelaŋ naŋ yeema ni mi chaŋyɛi naa Chɛhowaa tɛɛŋ wa ikala poŋ le naa mandaa. Mi kiilanɔɔ Pɔɔl poonyiaa aa, “Teleŋndo o bendu lɛ le. Nduyɛ, chɔŋ niŋ a boondei hei nya puaa nɔ laanduaa wa, la wa niko maa wanaa nɔ ŋlaandu le. . . . Wanaa cho yakoleŋ o chieeŋndo hoo choo wa, la wa niko maa la cho bɛɛ a tuandaŋ a laŋ te.” (Kɔliŋtiaŋ Tasoo 7:29-31) O cho dimi le Pɔɔl wa maa wanaa cho o nɔɔ niŋnda nɔ ma mal wanaa nda cho o nɔɔ niŋnda le. Kɛ le mɛɛ naŋ cho o palɛi mɛɛlɛi niŋ yɛ, ŋ nɔ miŋ kɛsi Chɛhowa piɛiyo nyɛ tase.​—Maatiu 6:33.

18. Le yɛɛ Kilisiɔŋnda nɔla yɛ ma sɔla kɔl kɛndɔɔ a batiuwaa o nɔɔ niŋ?

¹⁸ O teleŋ kalaa hoo niŋ, ŋ cho chɔɔ nɔla bɔɔbɔɔ puusiaŋndo. Baa ŋ nɔla pa miŋ sɔla kɔl kɛndɔɔ a batiuwaa o nɔɔ niŋ? Ei, te ŋ lo pɛ Chɛhowa ikɛi kpɛɛluŋ a wanaa nduaa, miŋ dɔu sawala mandaala Baabuiyo o wali niŋ, nduyɛ miŋ chɛl nɛi chɔmaa nyina Chɛhowaa cho naa kioo wo. Te ŋ tosa pɛ hei, mɛɛ ŋ ke nyɛ “Mɛlɛka mɔɔsa” naapilɛ wo bɛɛleŋ.​—Maki 10:9.