Tol Taamasi Kaa Inyiɛɛ Chɛhowaa Kɔɔli

1. Vɛɛ Chɛhowa chɔɔmuŋ yɛ o Muuse lo? Le yɛɛ hei cho yɛ suɛi sɔvɛ?

BOONDII pilɛ, mi Mɛlɛka chɔɔmuŋ o Muuse lo, okoŋ, mbo chɔm ndu diola ndɔlaŋ a suliŋnda ndɔlaŋ la tiŋ. Chɛhowa ndoo nɔla mbo kindila kpaaya ndɔɔ ɔɔ taasi ndɔɔ, kɛ yɔŋi o tosa keŋ, mbo suaa fɛlɛŋ a nyiɛɛyii nduɛi okɔɔ. (Nuawɔ Ɛsɔdɔɔ 34:​5-7.) Muuse ndoo nɔ mbo sina te Chɛhowa mala ndu niŋ pɛ. Lelaŋ, mi Chɛhowa kindilal ndu suliŋnda ndɔlaŋ le chɔmndo maa o yeema kpeekpei mbo mala buɛiyaa nduaa. (Ɛsɔdɔɔ 33:​13) Vɛɛ ŋ yiyaŋ yɛ a mɛɛ Chɛhowa nɔ buulaŋndo tau a naa yɛ? Buŋgɛi hei cho yaasiaa a nyiɛɛye okɔɔ, ndu cho yɛ mɔnɛi nɔɔ le wanaa cho o saŋgaa niŋnda ni, nduyɛ a mɛɛ wana chɔm yeemɛi le nda malaa yɛ.

2, 3. (a) Sabu yɛɛ chɔm yɛ maa waŋchieeya nɔ ma chɔm nyiɛɛye? (b) Le yɛɛ ŋ nɔ yɛ ma nɔ yeemɛi o nyɛ Baabuiyo dimi a nyiɛɛye okɔɔ wo?

² Chɛhowa nɔ nyiɛɛye, nduyɛ o velaŋ ndɔɔ niŋ o toosiaa waŋchieeya ni. Le saboo hoo waŋchieeya buulaŋ le acheleŋnda ni. Nduyɛ mi wanaa sina bɛɛ Chɛhowa le wa chɔm nyiɛɛye lɔɔlɔɔ le acheleŋnda. (Chɛnɛsee 1:​27) O Baabuiyo niŋ, ŋ cha bundɔŋ tau a wanaa ndaa chɔm nyiɛɛye wa. Le taamaseliiyo, mɛɛ Sɔlɔmɔŋ yeema sinaa waŋ laanduaa ŋiɔɔŋnda tɛɛŋ le wana nɔ chɛlɛkpɔɔ wo, mbo tofa nda kɔltaŋ le sinaa wana kpeekpei nɔ ndu wo. Mbo dimi maa a kiolu chɛlɛkpɛ koŋ tɛɛŋ kpali. Mi nyiɛɛye bii kala chua nɔ chɛlɛkpɛ koŋndo, mbo nyɔɔlu masaa maa o yɔŋgu chɛlɛkpɛ koŋ chuaa opilɔɔ. (Masaa Bɛnduaa Tasiaa 3:​23-27) Taamaselii cheleŋ le wana chɔm vɛlɛ nyiɛɛye wo cho chua Felo wo ni. Mɛɛ o saaluŋ Muuse, mbo sina maa po Hibuluiya Muuse wa ni, nduyɛ ndaa nɔ ma dii ndu. Kɛ mi “nyiɛɛye bii ndu” le ndu, nduyɛ mbo kɛɛsiaa le ndu mandaa maa po ndɔ.—Ɛsɔdɔɔ 2:​5, 6.

³ Le yɛɛ naŋ nɔ yɛ miŋ pɛɛku tau a nyiɛɛye okɔɔ? Kanifuule, Chɛhowa yeema naa miŋ tol taamasi ndɔɔ kɔɔli. (Ɛfisiaŋnda 5:​1) Mi che bɛɛ naa Chɛhowa toosiaa naa le miŋ nɔ nyiɛɛye, wanaa lahakiaa naŋ cho ni nduyɛ lepum miŋ chɔm kaayei. Teleŋndaŋ lapum o ve suɛi kpɛdɛ le kɛɛsiaa tosaa le acheleŋnda malaa ɔɔ le buulaŋndo kinɛi a naapila okɔɔ le. Kɛ yɛɛ mala yɛ naa le yeemɛi nɔɔ tau o acheleŋnda niŋ? O tasoo, ŋ yaasiaŋndɔ mɛɛ Chɛhowa a acheleŋnda ndaa chɔm nyiɛɛye yɛ. O diiŋ ndɔɔ, ŋ tofaŋndɔ mɛɛ naŋ tual taamasi Mɛlɛkaa kɔɔli le nyiɛɛye chɔmndo yɛ, nduyɛ le sabu o bɛnda miŋ tosa lende wo.

CHƐHOWA, WANA TAAMASI KƐNDƆƆ LE NYƐƐIYE CHƆMNDO

4. (a) Le yɛɛ Chɛhowa ndoo vem yɛ maalikɛiya Sodɔm? (b) Yɛɛ naŋ pɛɛku yɛ a nyɛ yɔŋnuŋ yuŋgu Lɔtu wo wo?

⁴ Baabuiyo nɔ taamaseliilaŋ tau a mɛɛ Chɛhowa chɔm nyiɛɛye yɛ. Le taamaseliiyo, yiyaŋndɔ a nyɛ o tosa le Lɔtu wo. Wana sakpoo Lɔtu wa ni o ndoo “tambu kɔl tau” a niilu nɔɔlɛi waŋnda Sodɔm a Komoolua wa tosaa wo. Waŋnda haa ndaa nɔ lebɛɛ le Mɛlɛka le, nduyɛ mi Chɛhowa kɛɛsiaa maa a nɔ ma sɔla piɔmndo. (Pitɛ Diiŋ Ndɔɔ 2:​7, 8) Mi Chɛhowa viam maalikɛiya naa Lɔtu cha le ndu dimullo maa Sodɔm a Komoolua nɔ le tambei sɔlaa nduyɛ o nɔ mbo nyaanuŋ. Baabuiyo dimi aa, “Mi Lɔtu saa tamaltaŋ. Kɛ mi Mɛlɛka Yaawɛɛ o tuiinuŋ ndu inyiɛɛ. O koŋ, mi kiilaa Mɛlɛkaa saaliaa nda balaŋ, ndu ni, laa ndɔ ni, a chuauwaa nduaa laanduaa ŋiɔɔŋnda, ma faŋa nda chiee.” (Chɛnɛsee 19:​16) Mɛɛ Chɛhowa ndoo sina naa bahawɛi Lɔtu wo yɛ, lende koni naa bɛɛ nɔ tiindaŋndo ni maa Chɛhowa sina nyɛkindilaa naŋ cho le bɛŋgu wo.—Aisaya 63:​7-9; Chemisi 5:​11; Pitɛ Diiŋ Ndɔɔ 2:​9.

5. Vɛɛ Diom Mɛlɛkaa pɛɛku yɛ naa le nyiɛɛye chɔmndo?

⁵ Mi Chɛhowa pɛɛku vɛlɛ wanaa nduaa le nyiɛɛye chɔmndo. Yiyaŋndɔ a sawala ndoo ke Isɔluɛiya laŋ opilɛ okɔɔ. Te waŋndo ndoo bii kuoo pɛ, o nɔ mbo lendul doma ndɔɔ le chɔmndo maa o nɔ le kuee koŋ solioo. (Nuawɔ Ɛsɔdɔɔ 22:​26, 27.) Kɛ wana ke ndu kuoo wo nɔ mbo miŋgi doma wana bii ndu kuoo o ba wo a paale delaa leŋ le mbo wounuŋ ichɔl. Naapum wana ndoo nɔ inyiɛɛ le wo yeema mbo miŋgi doma koŋ te. Kɛ mi Chɛhowa pɛɛku wanaa nduaa le ma nɔ nyiɛɛye. Yɛɛ sawa mandaa cho o sawaa hoo niŋndo pɛɛku yɛ naa? Fɛɛŋ bɛɛ pɛɛsa bahawɛi cho chaaŋ num Kilisiɔŋnɔɔ choo wo le. Te ŋ nɔla pɛ le miŋ mala puaapilɛnɔɔ ɔɔ ndepilɛnɔɔ cho o saŋgaa niŋndo, mɛɛ ŋ mala ndu.—Kolosiaŋnda 3:​12; Chemisi 2:​15, 16; nuawɔ Chɔŋ Tasoo 3:​17.

6. Yɛɛ naŋ pɛɛku yɛ a nyiɛɛyii Chɛhowɛi le Isɔluɛiyaa yɔŋ wɔɔŋnda?

⁶ Mi Chɛhowa ndoo chɔm Isɔluɛiya nyiɛɛye ndoo yɔŋ bɛɛ mi ndaa tosal ndu yɔɔŋ wɔɔŋndo. Mbo dimi aa, “Kɛ, a koŋ fau, mi Mɛlɛka Yaawɛɛ, Mɛlɛka finyaa ndaa mamaa hiau lachi a wanaa nduaa suaa le ndu wa yɔŋndo naa nda chua le nda silaa. Kani fondole, nyiɛɛye wa ndu le wanaa nduaa a chiɛi ndɔɔ.” (Koloniko Diiŋ Ndɔɔ 36:​15) O nɛi pilɛ koŋ niŋ kpe, ŋ nɔ miŋ chɔm nyiɛɛye le wanaa sina wɔ Chɛhowa le wa. Naapum a siŋgaŋ niŋ nduyɛ ma simnuŋ chaaŋaa nduaa. Chɛhowa yeema mi wana o wana huŋ sɔla tambei le. (Pitɛ Diiŋ Ndɔɔ 3:​9) Lelaŋ, mɛɛ teleŋndo cho wɔ yɛ, ŋ yeema miŋ chɔm wana o wana yooŋgu silaa hoo nduyɛ miŋ mala a bɔɔbɔɔ mɛɛ naŋ tiuba yɛ, le ma sɔla tɔnɔɔ o nyiɛɛyii Mɛlɛkɛi niŋ.

7, 8. Le yɛɛ yuŋgu pilɛ dimi yɛ maa Chɛhowa chɔm nda nyiɛɛye ni?

⁷ Hau, buɛiyaa Chɛhowaa a bɔɔbɔɔ sina niŋ nyiɛɛyii Chɛhowɛi. Le taamaseliiyo, a teleŋ wɔsi 1990 o Bosiniaa niŋ, kayii yɛ yɛi wa sɔŋgaa nduyɛ a wa diuwaŋndo vellaa velle. Yuŋgu pilɛ wa loŋ a poombɔ ndaa wɔsilaŋ 12 diolaŋ Milaŋ. Milaŋ ni, pɔmbɔ ndɔ ni, wanaa velu ndu wa ni, a Seiyaa Chɛhowaa cheleŋ wa kɔlaŋ o mɔmbillo niŋ chɔnɔŋndo Bosiniaa le kɔlaŋ Saabiaa. O bɔŋaŋ bɛndoo nda wa kɔlaŋ ni. O bɔŋaŋ koŋ wanaa velu Milaŋ nda ndaa kɛɛsiaa le yiŋɔɔ ni. Mɛɛ nda fuuluu o pɛŋgula lelɛŋndaŋ, mi puaa chɔuwa apum sina maa kaale cheleŋ yuŋgoo hoo cho ni. Nduyɛ ma soli nda o mɔmbillo niŋ. Okoŋ ma mal puaapiliaa a tuaa le ma kuɛŋnuŋ. Le palɛi i ŋiiŋ puaa chɔuwa mel yuŋgoo hoo le ma kuɛ le. O mɛɛlulaŋ, mi wana wa puaa chɔuwa chilaŋndo veelu wana cho ndu bolleŋndo, nduyɛ mbo nyuna ndu nyɛ o tosa a waŋnda haa wo. Yuŋgoo hoo wa isisi loŋ ma tuɛi nyɛ wana bɛndoo hoo dimi wo aa, “Soli nda o bɛɛ ma diu nda!”

⁸ Mɛɛ puaa chɔuwa wa baltaŋ, mi wanaa nda sina lepilɛ bɛɛ le wa a ŋiɔɔŋ sɔɔŋguu yuŋgoo hoo ikɛi. Ma dimul nda toolo maa nda bɛɛ Seiyaa Chɛhowaa nda cho ni, nduyɛ puaapiliaa cho o mɔmbillo niŋnda dimul nda nyɛ yɔŋnuŋndo. Mi Seiyaa Chɛhowaa ŋiɔɔŋnda haa dimul Milaŋ nda pɔmbɔ ndɔ le ma luɛi o mɔmbil ndaa niŋ le ma hiou pɛŋgula lelɛŋndaŋ. Kanifuule, puaa chɔuwa ve chuaambuaa nyuna le la yau le. Okoŋ, mi puaapiliaa dimul wanaa velu nda wa le ma wa kɔlaŋ a ŋpelu o poonyiaala nda simi o pɛŋgula lelɛŋndaŋ ndo kɔɔli le ma komal nda kpeŋgei pilɛi. Mi siooŋnde bii Milaŋ haaa ndoo sina pɛɛŋ mɛɛ ndoo nɔ mbo mam ɔɔ chaŋ yɛ le. Mi wanaa velu ndu wa nyuna aa, “La yiyaŋ pa maa a cho naa malɔɔ miŋ kuɛ?” Kɛ mɛɛ nda wa kɔlaŋ, mii yɔŋnuŋ maa puaa chɔuwa ve pɛɛŋ nda chɔ le. Mi Milaŋ nda pɔmbɔ ndɔ komal wanaa velu nda wa o pɛŋgula lelɛŋndaŋ kpeŋgei pilɛi, nduyɛ ma kua niko o bɔŋaŋ bɛndoo. Ma sina kɛsɛ maa Chɛhowa muli piɛile nda leŋ! Ŋ sina o Baabuiyo niŋ maa Chɛhowa kiindiaa ko buɛiyaa nduaa lɔɔlɔɔ o nɛi waa ndoo choo le. (Walta Wanaa Chiisuaa 7:​58-60) Kɛ o hei niŋ, mi Milaŋ dimi aa, “Le ya, i cho ko maa maalikɛiya suumiaa puaa chɔuwa ni, nduyɛ mi Chɛhowa kiindiaa naa.”—Sam 97:​10.

9. Vɛɛ Chiisu ndoo yiyaŋ yɛ a faŋga bɛndu ndoo tol ndu kɔɔli wo? (Tofa fotueiyo o peele naŋ kandu leŋ choo.)

⁹ Chiisu wa bɔɔ wana taamasi kɛndɛ le nyiɛɛye chɔmndo. Mi nyiɛɛye bii ndu le waŋnda kanifuule, mbo cha maa “mɛɛ saa wa nuaa a nɔ wana mandaa le yɛ, lende nda wa ni.” Lelaŋ, yɛɛ o tosa yɛ? “Mbo kandu nda pɛɛkoo a sɔɔŋ tau tau.” (Maatiu 9:​36; nuawɔ Maki 6:​34.) Teŋgeŋndo cho ni, Falisiiya ndaa nɔ inyiɛɛ le nduyɛ ndaa yeema waŋnda mala le. (Maatiu 12:​9-14; 23:​4; Chɔŋ 7:​49) Maa Chiisu, a nɔ pa yeemɛi yiŋgoloŋnde le waŋnda malaa nduyɛ ma pɛɛku nda a Chɛhowa okɔɔ?

10, 11. Baa o bɛnda pa miŋ chɔm nyiɛɛye lɔɔlɔɔ? Tɛɛsiaawɔ.

¹⁰ Hei chɔm naa maa o bɛnda miŋ chɔm nyiɛɛye lɔɔlɔɔ fee le. Le taamaseliiyo, Masaa Sɔɔ ndoo yiyaŋ ko maa nyiɛɛye o wa Akaki chɔmndo ni mɛɛ o kɛɛ le ndu diyɔɔ. Akaki wa masa Amalakaitiiya ni nduyɛ yaamɔɔnɔɔ o wa ni le wanaa Mɛlɛkaa. Sɔɔ dii vɛlɛ visiaa Amalakaitiiya kpou le. Kɛ mi Chɛhowa dimul Sɔɔ maa o dii Amalakaitiiya a visiaa ndaa kpou. Kɛ le mɛɛ Sɔɔ kɛɛ diikɔŋndo yɛ, mi Chɛhowa kɛɛ ndu le mbo wa masa. (Saamiɛɛ Tasoo 15:​3, 9, 15) O nɛi sakpoo choo Chɛhowa kɔɔsa waŋnda ni. O sina nyɛ cho o kɔlta waŋchieeya niŋndo, nduyɛ o sina vɛlɛ teleŋ o nɔ mbo chɔm nyiɛɛye le wo. (Chaŋ Imɔnɛ Chɛluimaya Wo 2:​17; Isikiaa 5:​11) O cho suŋ hunɔɔ wanaa kɛɛ le ndu diikɔŋndo wa kpou tɛɛmbuu. (Tɛsaloniaŋ Diiŋ Ndɔɔ 1:​6-10) Chɛhowa chɔm lɛ niŋ wanaa dɛnɛ wɔɔŋnda nyiɛɛye a boondii keŋ te. O wa bɛɛ lende, te o tɛɛmbuu nda pɛ, o cho nyiɛɛye chɔm le wanaa cho sakpo wa, nduyɛ nda o cho kiindiaa ni.

¹¹ Lelaŋ, o cho wali naa le miŋ kɔɔsa waŋnda te a sɔla niŋ pɛ yoomoo ɔɔ a sɔla niŋ te. Kɛ nyɛ naŋ nɔ miŋ tosa wo kinɛi cho ni, ŋ tosa o naŋ tiuba wo le waŋnda malaa. Ɔɔ nɛila kɛndɛlaŋ lapum la naŋ chɔm nyiɛɛye o acheleŋnda lo wo? Kɛɛsiaalaŋ la tiŋ la cho laŋ ni.

MƐƐ NAŊ CHƆM NYƐƐIYE YƐ

12. Vɛɛ ŋ chɔm yɛ nyiɛɛye a mɛɛ ŋ bii acheleŋnda yɛ?

¹² Wa wana mala acheleŋnda wo. Chɛhowa dou Kilisiɔŋnda sawaa maa a nɔ ma chɔm nyiɛɛye o chaaŋaa ndaa lo vɛlɛ a puaapiliaa ndaa. (Chɔŋ 13:​34, 35; Pitɛ Tasoo 3:​8) Nyiɛɛye chɔmndo sim vɛlɛ ni, “saŋgaa diompilɛ.” Wana chɔm nyiɛɛye wo kindiŋ o nɛi o nɛi niŋ le wanaa cho o saŋgaa niŋnda malaa. Lelaŋ, ŋ nɔ miŋ nuuviaa nɛilaŋ le acheleŋnda malaa, naapum ŋ yɔŋguŋ le nda walta nda hau ba laŋ tosallo.—Maatiu 7:​12.

13. Yɛɛ wanaa Mɛlɛkaa tosa yɛ te sɔɔŋ kpundɔŋ yɔŋnuŋ pɛ?

¹³ Yɔŋguŋ le wallo le waŋnda malaa. Te ŋ che pɛ waŋnda o saŋgaa niŋ le mɛɛ kpundɔɔ komal nda yɛ, ŋ yeema miŋ chɔm nda nyiɛɛye. Waŋnda sina bɔɔ Seiyaa Chɛhowaa le waŋnda malaa o teleŋnda waa ndoo niŋ. (Pitɛ Tasoo 2:​17) Le taamaseliiyo, ndepilɛnɔɔ o lɛŋnde Chepaŋndeŋ niŋ wa o fondaŋ lɛŋndeŋ le nyiiya mi mɛŋma koŋgi bɛnduaŋ ma wɔɔsuu chiɛilaŋndo o wɔsi 2011 niŋ. Mbo dimi maa “mbo sɔla kɔl dɛɛniaa” mɛɛ o che waŋnda yɔŋgɔŋndo wulee fulaa o fondaŋ nda yɛ yɛlaŋ o Chepaŋ niŋ vɛlɛ a lɛŋii cheleŋ le chiɛilaŋ a Toŋgola leMasala tambu laŋ bɛɛndiaa. Mbo chɔɔlu dimi aa, “Mi suɛi yɔŋnaŋnde hei mala ya mi sina maa Chɛhowa buulaŋ a naa. Nduyɛ chaaŋaa naa Chɛhowɛiya buulaŋ le opilɛ a o acheleŋndo. Puaapilaa a ndepilaa bɔɔbɔɔ chieeŋndo balɔɔ silɔ cho piɛileŋ le naa.”

14. Vɛɛ ŋ mala yɛ wanaa cho a naalaŋnda vɛlɛ a bɛnduaa yuuwa?

¹⁴ Mala yuuwa a wanaa cho a naalaŋnda. Te ŋ che pɛ wanaa lanaa saŋgaa vɛlɛ a yuuwa, mi nyiɛɛye bii naa le nda. Yeemɛi cho naa le mi bahawɛilaŋ ndaŋ la chuu. Lelaŋ, ŋ cho piɛileŋ le mi Masale Mɛlɛkaleŋ le hiŋ. Le suŋ suŋndɔ, ŋ tosa o naŋ tiuba wo le wanaa cho a naalaŋ nda malaa vɛlɛ a yuuwa. Mi wana poonyiaa pilɛ poonyiaa maa paale pilɛ mi kala ndɔ yuwɛiyo, o ndoo nɔ naa o hullaŋ niŋndo linda nyɛla ndɔlaŋ. Mɛɛ o wa kindiŋndo le laŋ tɔɔ, mbo tuɛi waŋnda dioo kundɔɔ. Seiyaa Chɛhowaa a ŋiɔɔŋ a ndaa kua ndu yilɔɔ lɔɔlɔɔ wa wa o dio ni. Mi ndepiliaa nyuna ndu te a mala ndu. Mi wɛɛŋndo dimi aa, “I cho bɔɔ suɛi lasiɔmbu, kɛ la mala ya.” Mi ndepiliaa mala ndu ma toolul ndu nyɛla ndɔlaŋ. Okoŋ, ma toosial ndu kafioo nduyɛ ma chal le baltaŋ dɔuwɔɔ a ndu. Mi nyɔɔ hɛnaŋ po ndɔɔ tau. Nduyɛ mbo dimi maa Seiyaa Chɛhowaa “nyɛ nda dimul waŋnda wo ndu nda tosa ni.” Baa nyiɛɛyii ŋ nɔ le wanaa cho a naalanŋnda vɛlɛ a yuuwa wo nyindu num le ma tosa nyɛ o nyɛ ŋ tiuba le nda malaa?—Filipiaŋnda 2:​3, 4.

15. Vɛɛ yooŋgu kɛndɛ naŋ dimi wo mala yɛ acheleŋnda?

¹⁵ Mala waŋnda ma sina Chɛhowa. Nɛi sɔvɛ bɛndu naŋ mala waŋnda wo cho ni, pɛɛkoo nda a Mɛlɛka okɔɔ vɛlɛ a Masale ndɔ leŋ. Nɛi cheleŋ cho vɛlɛ ni, malaa nda le ma che maa sawala Chɛhowalaŋ diikɔŋndo cho suɛi kɛndɛ le nda. (Aisaya 48:​17, 18, NW) Yooŋgu kɛndɔɔ dimioo cho bɔɔ nɛi sɔvɛ bɛndu le Chɛhowa diikɔŋndo vɛlɛ a nyiɛɛye chɔmndo o acheleŋnda lo. A nɔla pa ma chɔɔlu tosa o yooŋgu kɛndɔɔ dimioo niŋ?—Timoti Tasoo 2:​3, 4.

NUM BƐƐ O BƐNDA MA CHƆM NYIƐƐYE!

16. Tɔnɔ yɛɛ naŋ sɔla yɛ te ŋ nɔ pɛ nyiɛɛye?

¹⁶ Wanaa tosa pɛɛku bɛndoo a hullaŋ okɔɔ wa dimi maa nyiɛɛye chɔmndo hivi kɛndiaa naa lachi vɛlɛ a chaŋyɛi nɛi a acheleŋnda. Ma wa a kɔl kɛndɛ tau te o yɔŋ pɛ ma mala wanaa cho o saŋgaa niŋnda. Mi hei ke num tiindaŋndo, a ve yololɛ le, nduyɛ a yiyaŋ a sɔɔŋ wɔɔŋ tau le. O bɛnda bɔɔ ma chɔm nyiɛɛye. (Ɛfisiaŋnda 4:​31, 32) Te kaalaa nyindu naa pɛ miŋ mala acheleŋnda, miŋ nɔ kɔl iyama walaŋndo kanifuule, ŋ sina maa nyɛ Chɛhowa yeema naa miŋ tosa wo naŋ cho tosaa ni. Nyiɛɛye mala naa miŋ wa kalaŋ chuauwaa kɛndɛ, pɔnɔɔ a lanɔɔ kɛndɛ, vɛlɛ a chaŋyaŋ kɛndɛ. Le handɔɔ lechoo, mi wanaa chɔm nyiɛɛye o acheleŋnda lo wa sɔla malaa teleŋ o teleŋ nda yeema pɛ.—Nuawɔ Maatiu 5:​7; Luku 6:​38.

17. Le yɛɛ ŋ yeema yɛ ma wa wana inyiɛɛ?

¹⁷ Mi che bɛɛ nyiɛɛye chɔmndo cho suɛi kɛndɛ le naa, kɛ sabu kpeekpei naŋ chɔm nyiɛɛye wo cho ni, ŋ yeema miŋ tol taamasi Chɛhowaa kɔɔli nduyɛ mi saŋgalaa kuɛ o ndu lo. Ndu cho Puundule kaalaa a nyiɛɛye ni. (Pulɔwaa 14:​31) O kɛsi taamaselii kɛndɔɔ le naa. Lelaŋ, ŋ tosaŋ o kɛ kɛ naŋ tiuba le miŋ tol taamasi Mɛlɛkaa kɔɔli le nyiɛɛye chɔmndo. Hei cho tosa miŋ sɔɔŋguu puaapiliaa a ndepiliaa naa ikɛi kpɛɛluŋ nduyɛ miŋ nɔ chaŋyɛi kɛndɛi a wanaa cheleŋ balu naa wa.—Kaleesiaŋnda 6:​10; Chɔŋ Tasoo 4:​16.