Mɛɛ Masaa Choosaya simnuŋ kaasoŋnɔɔ, mbo kandu chiɛi Chɛhowaa miŋgioo toosiaa. A teleŋ nda wa wali koŋ tosaa wo, ma saaluŋ “yau lasawa Mɛlɛka Yaawɛɛ wo, o Mɛlɛka ndu oo ke buɛi ndɔɔ Muuse wo.” Mɛɛ nda veelu diomndaŋ o yau koŋ niŋ, mi nyɛ masaa tueiyo nyindu ndu le mbo tosa nyɛ wa o yau koŋ niŋndo. (2 Kolo. 34:​14, 19-21) Baa a hɛnaŋ pa diomndaŋ veeloo o Baabuiyo niŋ teleŋ o teleŋ? Te o yɔŋ pɛ maa a cho kindiŋndo le hei tosaa, vɛɛ sɔɔŋ cho yɛ kɔlaŋ? Baa ma handu pa pondaleŋ o bolii Baabui tiuba mi i mala num nde? Mɛɛ Choosaya fuuluu wɔsilaŋ 39, mbo tosa biondɔŋndo. Nduyɛ mi keŋ tosa mbo sɔla piɔmndo. Mbo duau tiindaŋndo o ndupila niŋ, o nyuna Chɛhowa le nɛi chɔmaa le. (2 Kolo. 35:​20-25) Yɛɛ naŋ pɛɛku yɛ o hei niŋ? Ŋ pɛɛku maa, o yɔŋ bɛɛ miŋ wa o yuuwɛi, ɔɔ miŋ viou niŋ Baabuiyo pɛɛkoo, ŋ nɔ miŋ hiou lachi a Chɛhowa nyunaa le nɛi chɔmaa. Hei sim ni maa, ŋ nɔ miŋ wa piɛileŋ teleŋ o teleŋ o ndu lo le nɛi chɔmaa, Diom ndɔɔ pɛɛkoo, vɛlɛ a sila wanaa kendu o ndu piɛiyo niŋnda nilaŋ yaŋɔɔ. Hei tosaa cho naa mala, ŋ tosa biondɔŋnda wɔɔŋ wɔɔŋndaŋ te. Nduyɛ ŋ cho wa a kɔl kɛndɛ tau.—Chemi. 1:25. w23.09 12 ¶15-16

Mi Baabuiyo suaa a waŋ laanduaa ndaa kaala Chɛhowa, nduyɛ ma piɛi ndu o laalaŋndo choo wa okɔɔ. “Waŋ laanduaa haa” wa “wanaa tiu kɔlta ndalaŋ ba.” (1 Tim. 3:11) Le handɔɔ lechoo, ndepiliaa tiuba ma saaluŋ o kundala ndalaŋ niŋ, waŋ laanduaa kendu o Mɛlɛka piɛiyo niŋnda, a nda tiuba ma tol tamaseliila ndalaŋ kɔɔli wa. Ndepiliaa feleŋguaa, la yiyaŋ a ndepiliaa nya sina maa a kendu o Mɛlɛka piɛiyo niŋnda okɔɔ, mi la tol tamaseliila ndalaŋ kɔɔli, okoŋ mi la mɛɛndaŋ suliŋnda ndala kɛndɛ laŋ. Nduyɛ mi la yiyaŋ a mɛɛ nya bɛɛ tiuba mi la nɔ suliŋnda laŋ yɛ. Tusiŋndo cho suliŋ sɔvɛ sɔviɔɔ opilɛ, o Kilisiɔŋnɔ kendu o Mɛlɛka piɛiyo niŋndo nɔ mbo nɔ wo. Te wana lanɔɔ tusiŋ pɛ, o tiuba mbo tuei chaŋyɛi kɛndɛi yeela a Chɛhowa vɛlɛ a acheleŋnda. Le tamaseliiyo, te wana lanɔ kaala Chɛhowa wo tusiŋ pɛ, mi keŋ mala mbo toolu kɛɛsiaa Finya ndɔ o choo choo niŋ tosa a chilaŋ chuaa okɔɔ wo. (1 Kɔl. 11:3) Kɛɛsiaa koŋ piiliaŋ kundaa vɛlɛ a yuŋguleŋ. w23.12 18-19 ¶3-5

Chɛhowa yeema mi pɔnɔɔ kaala laa ndɔ, mbo ke ndu nyɛm o hauba woŋ, mbo dɛɛniaa ndu kɔllo, nduyɛ mbo mala ndu o ndu piɛiyo niŋ. Kɔl kaloo a sinapɛŋgoo, bɛɛleŋ nɔɔ le waŋ laanduaa, vɛlɛ a waa wana wana nɔla ma tiindaŋndo, mala num ma wa pɔnɔ kɛndɛ. Te o yɔŋ pɛ ma chua lanɔɔ, naapum la cho chuauwa violɔɔ. Yɛɛ ŋ pɛɛku yɛ Chɛhowa o ba le waa finya kɛndɛ? (Ɛfi. 6:4) Mi Chɛhowa dimul Chiisu Po ndɔ maa o kaala ndu vɛlɛ maa o hini kɔl a ndu. (Mat. 3:17) Te o yɔŋ pɛ ma simnuŋ finyaa, wa chuauwaa numnda dimullo teleŋ o teleŋ maa a kaala nda. Wa nda chandɔɔ teleŋ o teleŋ le sɔɔŋ kɛndɛŋ nda tosa woŋ. Te finyaa tol pɛ tamasi Chɛhowaa kɔɔli, mi keŋ mala chuauwaa nduaa ma simnuŋ Kilisiɔŋaa kendu o Mɛlɛka piɛiyo niŋnda. A bɛɛndiaŋ le kalaŋ koŋ suŋ suŋ, te a buulaŋ pɛ le acheleŋnda o yuŋgoo niŋ, vɛlɛ a o kundaa niŋ, nduyɛ ma pɛɛku le nda chandɔɔ vɛlɛ a nda kaalaa chɔmndo.—Chɔŋ 15:9. w23.12 28-29 ¶17-18