Chɛnɛsi

50 Okoŋ mi Choosɛ del finya ndɔ choo+ a chaŋndo, nduyɛ mbo sɔsa ndu kuuwo. 2 Okoŋ kɔɔli, mi Choosɛ dimul wanaa sina a koowaŋ okɔɔ wa le ma toosiaa* dialuŋ+ finya ndɔ woŋ. Okoŋ, ma toosiaa muŋ. 3 Nduyɛ, ma chua palɛi 40 kpulukuu le ndu toosiaa. Kanifuule, boondei hei ndaa chua ni le dialuŋ vilɛiyoŋ toosiaa. Le palɛi 70 waŋnda Ichipi wa ndu chaŋndo.

4 Mɛɛ palɛi ndaa chua le ndu chaŋndo ve chuu, mi Choosɛ dimul laŋgbaa kalaa Feloo wa o pilɛ aa: “Te I cho pɛ wana sɔvɛ num o hɔl, mɛɛ a yandii, dimul la Feloo yooŋgoo hoo aa: 5 ‘Mi finya nuu dimul la aa: “Piɔmndo ya hiŋ nuaa ni.+ Lelaŋ, mɛnaŋ+ po maa te I vi pɛ, a cho ya lakɔ kumbɔɔ o lɛŋnde Kenaŋ ndeŋ niŋ,+ o fondaŋ ni ya toosiaa le waŋvilɛiyaa niaa kumbɔɔ wo.”+ Lelaŋ a yandii, chɛl la mi kɔ kumbu finya nuu. Te I chii pɛ, I cho miiŋgu nanuŋ.’” 6 Mi Feloo muli aa: “Mɛɛ lo o buŋgɛi ŋ chua ve choo.+ Kɔ kumbu finya num.”

7 Okoŋ, mi Choosɛ kua finya ndɔ kumbɔɔ. Nduyɛ mi buɛiyaa Feloo wa, laŋgbaa nduaa kalla, vɛlɛ a waŋ banaa+ o lɛŋnde Ichipi leŋ niŋ kpou kua a ndu latulu. 8 Mi Choosɛ kua vɛlɛ a yuŋgu ndɔɔ, bɛndaa nduaa a pɔmbɔ ndɔ, vɛlɛ a wana o wana wa o yuŋgu finya ndɔ wo niŋ.+ Chuauwaa ndaa pɔmbuaa, saa ndaa, chuiŋaa ndaa, a nauwaa ndaa kinɛi nda mɛi Koosiɛŋ ni. 9 Mi puaa kua a nyɛm nyaanaŋ suaa naŋndoŋ+ nda, a wanaa nyaanuŋ suaa wa bɛɛ kua a ndu latulu. Faŋga bɛndoo pila nda wa ni. 10 Mɛɛ nda fuuluu o yasaba Atadi wo o tanda Chɔɔdaŋ ndo niŋ, ma chaŋ chaŋndo pila. Nduyɛ, mi Choosɛ chaŋ finya ndɔ le palɛi i ŋɔmmɛu. 11 Mɛɛ Kenanaitiiyaa wa o lɛŋnde leŋ niŋnda che nda chaŋndo o yasaba Atadi wo, ma dimi aa: “Biisi bɛndoo pila cho hoo le Ichipiaŋnda ni!” Le sabu koŋ nda ke fondaŋ koŋ diolaŋ ni aa, Ebɛl-misiluim.* O tanda Chɔɔdaŋ ndo niŋ fondaa hoo cho ni.

12 Okoŋ, mi puaa Chekɔpu wa tosa mɛɛ o dimul nda yɛ.+ 13 Mi puaa nduaa kua a ndu o lɛŋnde Kenaŋ ndeŋ niŋ, ma kɔ kumbu ndu o buuloo niŋ o yondoo Makipila, o cho Mamilue lachi wo. Yondoo hoo Ebilaham pendu Ɛfulɔŋ, Hitaitiinɔɔ o ba ni, le waa wanaa nduaa vilɛiya kumbɔɔ.+ 14 Mɛɛ Choosɛ chii finya ndɔ kumbɔɔ, mi ndu, bɛndaa nduaa a pɔmbɔ ndɔ, vɛlɛ a wanaa liila ndu finya ndɔ kumbɔɔ wa kpou miiŋgu Ichipi.

15 Mɛɛ bɛnduaa Choosɛ wa che maa finya nda vi, ma dimi aa: “Wana che pɛ maa Choosɛ bii naa o kɔl, nduyɛ maa o cho naa maa miŋgul le nyɛ o nyɛ wɔɔŋ naŋ tosal ndu.”+ 16 Okoŋ, ma yɔŋ yooŋgoo o Choosɛ lo aa: “Tuupa mi finya num wu, mbo mɛi lediom aa: 17 ‘La dimul Choosɛ aa: “Nyɛ bɛndaa numnda tosal numndo niŋ kposoŋ te. Kɛ a yandii, I cho num nyɔɔloo le ma mal nda haki le nyɛ nda tosal numndo.’” Kanifuule Mɛlɛka finya num ndoo piɛiyo, buɛiyaa nduaa naŋ cho ni. Lelaŋ a yandii, mal naa haki.” Mɛɛ Choosɛ tuei nyɛ nda dimi wo, mbo chaŋ. 18 Okoŋ mi bɛndaa nduaa huŋ ma del ndu o labɛŋgu niŋ, ma dimi aa: “A che naa, chiaa numnda naŋ cho ni!”+ 19 Mi Choosɛ dimul nda aa: “La yɔŋ isiooŋ te. Baa ya cho Mɛlɛka ni le mi kilul nya yamɛi? 20 Mi che bɛɛ mi nyaa tuu le ya iwɔɔŋnde tosallo,+ kɛ a mɛɛ nya cho ndi chɔɔ hau yɛ, mi Mɛlɛka tosa mi i simnuŋ ikɛndɛ, le yoomula bɔɔbɔɔ chiindiaa.+ 21 Lelaŋ la yɔŋ isiooŋ te. I cho hiouwɔɔ lachi a nya, vɛlɛ a chuauwaa nyaa nyɛdiaa kioo.”+ Mi nyɛ o dimi hoo wo dɛɛniaa nda kɔltaŋ, nduyɛ mbo ke nda tiindaŋndo.

22 Okoŋ, mi Choosɛ a yuŋgu finya ndɔ wo hiau lachi a waa o lɛŋnde Ichipi leŋ niŋ. Choosɛ wa achal le wɔsilaŋ 110. 23 Mi Choosɛ cha chuaa mamaa Ifiluem nda.*+ Mbo cha vɛlɛ puaa Makaya+ wa, Manaasɛ po ndɔɔ. Nda kpou mi Choosɛ bii nda o bɛŋgu.* 24 O mɛɛlulaŋ kpɔŋ, mi Choosɛ dimul bɛndaa nduaa aa: “Piɔmndo ya hiŋ nuaa ni. Kɛ Mɛlɛka cho nya hɔlla mulul,+ nduyɛ mbo soli nya o lɛŋndeŋ ndeŋ niŋ, mbo kuɛ a nya o lɛŋnde o chuel Ebilaham, Aase, a Chekɔpu buŋgɛi leŋ niŋ.”+ 25 Mi Choosɛ dimul Isɔluɛi puaa nduaa aa: “Mɛlɛka cho nya hɔlla mulul. Lelaŋ, la mɛnaŋ maa te I vi pɛ, la cho paala nilaŋ faŋa nanuŋ, mi la kuɛ a laŋ.”+ 26 Okoŋ kɔɔli, mi Choosɛ wu. O wa wɔsilaŋ 110. Ma toosiaa dialuŋ ndɔŋ,+ ma wou muŋ o kɔfiŋndo* niŋ Ichipi.