Lɛvitikɔɔ

6 Mi Chɛhowa dimul Muuse aa: 2 “Te o yɔŋ pɛ mi waŋndo tosa hakioo mbo kɛɛ le lo lechoo wo chɔmndo o ya Chɛhowa lo,+ le mɛɛ o dimul wana nda chiɛɛliaŋ ndo choolaŋ le nyɛ o ke ndu le kɛsioo ɔɔ lendul ndu o ba wo+ yɛ, ɔɔ le mɛɛ o chiimbuu ndu ɔɔ mbo dia nyɛ ndɔɔ a lediɔɔmu yɛ, 3 ɔɔ le mɛɛ o saaluŋ nyɛ waŋndo kɛ mbo dimi choolaŋ, nduyɛ mbo mɛnaŋ mɛnaŋ lachoowaa le haki kɛ kɛ o tosa wo+ yɛ, nyɛ o nɔ mbo tosa wo cho hoo ni: 4 Sɔɔŋ muŋ kinɛi, i kɛ kɛ o tosa pɛ mi i bii ndu, o nɔ mbo miŋgi nyɛ o chiimbuu wo. O wa nyɛ o de a lediɔɔmu, o wa nyɛ o chua a lakafa, o wa nyɛ nda ke ndu le kɛsioo ɔɔ nyɛ o saaluŋ ndo, 5 ɔɔ nyɛ o nyɛ o mɛnaŋ mɛnaŋ lachoowaa, o nɔ mbo paawa* ndu+ kpou. Te o nɔ pɛ le paawaa 100, o handu 20 lechoo. Paale suɛi keŋ cho ndu biyɔɔ leŋ, paale leŋ o nɔ ni mbo ke wana nyɔɔ nyɛ ndɔɔ. 6 O nɔ mbo hɛli saa kɛndɛ kɛndɔɔ o chɔluaa nduaa tɛɛŋ, mbo hiŋ a ndu o wana soliaa lasalaa lo, le sala hakioo+ solioo o ya Chɛhowa lo. Saa koŋ nɔ mbo sulaŋ a baa wana soliaa lasalaa cho kiolɔɔ wo. 7 Wana soliaa lasalaa cho nyuna le malɔɔ hakioo le ndu ya Chɛhowa lachi, nduyɛ mbo sɔla malɔɔ hakioo le nyɛ o nyɛ o tosa, mbo luei ndu o hakioo niŋ.”+

8 Mi Chɛhowa dimul vɛlɛ Muuse aa: 9 “Dimul Elɔŋ nda puaa nduaa aa, ‘Sawa cho a sala luamaa+ okɔɔ wo cho hoo ni: Sala luamaa nɔ mbo lo o fondaŋ nda kiisuu yiŋndeŋ o bandu luamaa lasalaa wo choo haaa diimandɔɔ. Nduyɛ, yiŋndeŋ le nɔ mi le wa sandei o bandu luamaa lasalaa choo. 10 Wana soliaa lasalaa nɔ mbo wounuŋ nyɛla ndɔla soliaa lasalalaŋ,+ nduyɛ mbo wounuŋ lɛmbɛ biŋgioo+ lebɛŋgu. Okoŋ, mbo faŋa pulta+ nda lom sala luamaa laŋ o bandu luamaa lasalaa choo, mbo kɛsi laŋ o bandu luamaa lasalaa ikɛi. 11 O nɔ mbo soli nyɛla laŋ+ mbo wounuŋ nyɛla cheleŋ, nduyɛ mbo chua pulta laŋ mbo soli laŋ o dɔɔŋgɔɔ niŋ,+ mbo kuɛ a laŋ o fondaŋ diandaa. 12 Yiŋndeŋ le nɔ mi le wa sandei o bandu luamaa lasalaa choo, le nɔ mi le nyum te. Wana soliaa lasalaa nɔ mbo wa yɔmnde wouwo+ lechoo idii o idii, mbo hɛɛnduu buŋgaŋ chɔlu sala luamaa lechoo, nduyɛ mbo lom chuɛima salala kɔl nyulu laŋ lechoo.+ 13 Yiŋndeŋ le nɔ mi le wa sandei o bandu luamaa lasalaa choo. Le nɔ mi le nyum te.

14 “‘Sawa cho a sala ŋkullo+ wo cho hoo ni: Nya puaa Elɔŋ nda nɔ ni mi la hiŋ a ndu ya Chɛhowa lachi o bandu luamaa lasalaa. 15 Wana pilɛ o nda tɛɛŋ nɔ mbo kɔndu kpeyaŋ kɛndɛ kɛndɛ sala ŋkul koŋ baa cha a chuɛiyaŋ ma tiŋ, vɛlɛ a filaŋkiŋsɛŋ cho o sala ŋkul koŋ choo wo kpou, mbo lom ndu o bandu luamaa lasalaa choo maa tamasi, le mi chuŋ kɛndɔɔ komal ya Chɛhowa.+ 16 Elɔŋ nda puaa nduaa nɔ ni ma de o tɔ cho lo wo.+ A nɔ ma de ndu mɛɛ nda dia beedii nɔ yiisii* leniŋ te wo yɛ, o fondaŋ diandaa. O luŋ balu tɛndii bɔŋaŋndo+ wo nda nɔ ni ma de ndu. 17 A nɔ ma toosiaa ndu a yiisii le.+ O salala nda luam o yiŋ+ ndaŋ tɛɛŋ, o ya soli mi ke nda wo cho koŋ ni. Nyɛ hiou diondɔɔ wo+ o cho ni, maa sala hakioo a sala yɔŋ wɔɔŋndo. 18 Waŋ piaanduaa o pulale Elɔŋ ndeŋ choo nɔ ni ma de ndu.+ O salala nda luam+ o ya Chɛhowa lo laŋ tɛɛŋ, nyɛ nda nɔ ma wa sɔlaa wo cho koŋ ni. Nduyɛ nyɛ o nyɛ pilaŋ pɛ salala laŋ, nyɛ koŋ bɛɛ simnuŋ o diandaa.’”

19 Mi Chɛhowa suaa vɛlɛ o Muuse lo aa: 20 “Sala Elɔŋ nda puaa nduaa nɔ ma hiŋ ya Chɛhowa lachi o paale nda cho Elɔŋ pɔya+ leŋ choo wo cho hoo ni: kpeyaŋ kɛndɛ kɛndɔɔ ɛfaa cha*+ le sala ŋkullo.+ Idii ɛfaa tɛɛŋ, ichɔl ɛfaa tɛɛŋ. 21 La nɔ mi la muuliaŋ ndu a chuɛiyaŋ nyɛkɛndɛi, okoŋ mi la toosiaa ndu o kpɛɛnɛi tɛsɛi+ niŋ. Nduyɛ mi la chua kpuŋgbaŋ muŋ, mi la soli muŋ sala ŋkullo, le mi chuŋ kɛndɔɔ komal ya Chɛhowa. 22 Wana soliaa lasala nda pɔya o puaa nduaa+ tɛɛŋ mbo miiŋgu o foofo ndɔɔ wo nɔ ni mbo toosiaa ndu. Sawaa hoo cho le fɛɛŋ a fɛɛŋ: La nɔ mi la lom salaa hoo kpou o ya Chɛhowa lo. 23 Sala ŋkul kɛ kɛ le wana soliaa lasalaa nɔ mbo wa kpou. Wana o wana nɔ mbo de ndu le.”

24 Mi Chɛhowa dimul vɛlɛ Muuse aa: 25 “Dimul Elɔŋ nda puaa nduaa aa, ‘Sawa cho a sala hakioo+ okɔɔ wo cho hoo ni: Fondaŋ nda nɔ ma dii+ chɔloo le sala luamaa wo, loŋ koni nda nɔ ni ma dii chɔloo le sala hakioo ya Chɛhowa lachi. Nyɛ hiou diondɔɔ wo o cho ni. 26 Wana soliaa lasala cho sala koŋ soli le hakioo wo nɔ mbo de ndu.+ O fondaŋ diandaa o nɔ ni mbo de ndu, o luŋ balu tɛndii bɔŋaŋndo+ wo.

27 “‘Nyɛ o nyɛ pilaŋ pɛ chɔlu koŋ, nyɛ koŋ bɛɛ simnuŋ o diandaa. Nduyɛ wana o wana kooma chɔlu koŋ ma fasaŋiaŋ pɛ o doma ndɔɔ, o nɔ mbo tɔɔ doma koŋ o fondaŋ diandaa. 28 Te a yau ndu pɛ o kpɛɛnɛi puuluei niŋ, a nɔ ma pɛl ndi. Kɛ te o yɔŋ pɛ maa o kpɛɛnɛi chiliŋii siaŋɛi* niŋ nda yau ndu ni, a nɔ ma susa ndi, nduyɛ ma tuei ndi a mɛŋndaŋ.

29 “‘Wanaa soliaa lasalaa kinɛi nɔ ni ma de ndu.+ Nyɛ hiou diondɔɔ wo+ o cho ni. 30 Kɛ nduyɛ, sala haki kɛ kɛ nda chua pɛ kooma nduaŋ ma huŋ a maŋ o tɛndii bɔŋaŋndo le nyunaa le malɔɔ hakioo o fondaŋ diandaa,+ la nɔ mi la de ndu le. La nɔ mi la lom ndu.