Lɛvitikɔɔ
21 Mi Chɛhowa dimul Muuse aa: “Dimul puaa Elɔŋ nda, a cho wanaa soliaa lasalaa wa aa, ‘Wana o wana nɔ mbo simnuŋ o nɔɔlɛi le wana vi wanaa nduaa tɛɛŋ+ ndo le. 2 Kɛ o nɔla mbo simnuŋ o nɔɔlɛi le wanayɛi nduɛi kpɛɛluŋnde, mɛɛ kala ndɔ, finya ndɔ, po ndɔɔ, chua ndɔɔ, pɔmbɔ ndɔ, ɔɔ bɛ ndɔ cho nuaa yɛ. 3 O nɔla vɛlɛ mbo simnuŋ o nɔɔlɛi le yema ndɔ cho ndu ikɛi o chellɔ o nɔ le nduyɛ mbo wa yufuaanɔɔ wo. 4 Kɛ, o nɔ mbo simnuŋ o nɔɔlɛi le wana lanɔ chal niŋ o nɔɔ wanaa nduaa tɛɛŋ ndo le. 5 Wanaa soliaa lasalaa nɔ ma sendi tembeltaŋ,+ ma sendi siɛiye ikɛi kɛi, ɔɔ ma tɛɛndiaa dialuŋ ndaŋ te.+ 6 A nɔ ma wa a diandaa ya Mɛlɛka ndaa+ o hɔl. A nɔ ma nɔɔliaa diola nilaŋ te, kanifuule nda luam salalaŋ o ya Chɛhowa Mɛlɛka ndaa+ lo ni, beedii* cho le ya Mɛlɛka wo. Lelaŋ, a nɔ ma wa a diandaa.+ 7 A nɔ ma chua wana lanɔ suundɛiyo,+ wana lanɔ cho niŋ o nɔɔlɛi, ɔɔ wana lanɔ kɛyaŋ nda pɔnɔ ndɔ+ wo o nɔɔ niŋ te. Kanifuule, wana diandaa wana soliaa lasalaa cho ya Mɛlɛka ndɔɔ o hɔl ni. 8 La nɔ mi la chua ndu maa wana diandaa o cho ni,+ le mɛɛ o soli salalaŋ o ya Mɛlɛka nyaa lo yɛ. Nduyɛ o nɔ mbo wa o diandaa, kanifuule ya Chɛhowa, ya cho nya dindioo wo, wana diandaa ya cho ni.+
9 “‘Te chua wana soliaa lasalaa simnuŋ pɛ o nɔɔlɛi o niilu kaa suundɛiyo niŋ, mɛɛ o nɔɔliaa finya ndɔ. A nɔ ma lom+ chua koŋ.
10 “‘Wana soliaa lasalaa, o nda tala chuɛima pɔyaŋ o lebol+ le mbo wa masa wanaa soliaa lasalaa puaapiliaa nduaa tɛɛŋ, nduyɛ mbo wounuŋ nyɛla wanaa soliaa lasalaa+ wo nɔ mbo kɛɛ yiiŋii nduɛi saandiaa, ɔɔ mbo sɛɛsiaŋ nyɛlaŋ+ lekɔɔ le. 11 O nɔ mbo sɔɔŋguu wana vilɛiyo+ ikɛi le, o yɔŋ bɛɛ aa finya ndɔ ɔɔ kala ndɔ, yɔŋii o simnuŋ wana nɔɔlɛi. 12 O nɔ mbo faŋaŋ o chiɛi nuu, ɔɔ mbo nɔɔliaa chiɛi ya Mɛlɛka ndɔɔ+ le. Kanifuule ndu nda pɔya a chuɛiyaŋ ni, mi tamasi chɔm maa o cho o yɔŋgaŋ o ya Mɛlɛka ndɔɔ+ lo wo wa ndu choo. Ya cho Chɛhowa ni.
13 “‘Wana lanɔ yufuaanɔɔ+ o nɔ ni mbo chua o nɔɔ niŋ. 14 O nɔ mbo chua wana lanɔ vii pɔnɔɔ wo, o nda kɛyaŋ nda pɔnɔ ndɔ wo, wana lanɔ nɔɔlɛiyo, ɔɔ wana lanɔ suundɛiyo o nɔɔ niŋ te. Kɛ, wana lanɔ yufuaanɔɔ wanaa nduaa tɛɛŋ o nɔ ni mbo chua o nɔɔ niŋ. 15 O nɔ mbo tosa mi chuauwaa nduaa simnuŋ a nɔɔlɛi wanaa nduaa tɛɛŋ te.+ Ya cho Chɛhowa, wana cho ndu dindioo wo ni.’”
16 Mi Chɛhowa suaa vɛlɛ o Muuse lo aa: 17 “Dimul Elɔŋ aa, ‘O puaa nduaa tɛɛŋ kinɛi, wana o wana nɔ namtaleŋ, o nɔ mbo sɔɔŋguu le beediiyo salaa solioo o ya Mɛlɛka ndɔɔ lo le. 18 Wana pɔnɔ o wana pɔnɔ nɔ pɛ namtaleŋ, o nɔ mbo sɔɔŋguu le salaa solioo le: o wa wana sumɛi, ɔɔ wana pelii tambɛiyo, ɔɔ wana miŋ tambɛiyo, ɔɔ wana kua o pelei choo wo, 19 wana pelii yomɛiyo ɔɔ ba yomɛiyo, 20 wana ibuuwo ɔɔ tuŋgoo, wana hɔlte tambɛiyo, ɔɔ wana nɔ huiinde ɔɔ tɛɛŋndo wo, ɔɔ wana buŋ kpoloo piɔl lo.+ 21 O puaa Elɔŋ nda tɛɛŋ, wana pɔnɔ o wana pɔnɔ nɔ pɛ namtaleŋ, o nɔ mbo sɔɔŋguu le salaa lomɔɔ o ya Chɛhowa lo le. Le mɛɛ o nɔ namtaleŋ yɛ, o nɔ mbo sɔɔŋguu le beediiyo salaa solioo o ya Mɛlɛka ndɔɔ lo le. 22 O nɔla mbo de nyɛm hiou diondɔɔ kpou woŋ,+ a nyɛm cho ŋ diandaa woŋ,+ ŋ cho ŋ yɔŋgaŋ o ya Mɛlɛka ndɔɔ lo woŋ. 23 O nɔ mbo hiŋ o kola bɛndoo+ ikɛi, nduyɛ mbo sɔɔŋguu o bandu luamaa lasalaa+ le. Kanifuule, o nɔ namtaleŋ. Nduyɛ, o nɔ mbo nɔɔliaa chiɛi nuu+ le. Ya cho Chɛhowa, wana cho nda dindioo wo ni.’”+
24 Mi Muuse suaa o Elɔŋ ndo, puaa nduaa, a o Isɔluɛiya lo kpou.