Lɛvitikɔɔ

23 Mi Chɛhowa suaa vɛlɛ o Muuse lo aa: 2 “Dimul Isɔluɛiya aa, ‘Bɔŋaŋnda diandaala nya nɔ mi la bii+ a boondoŋ+ le ya Chɛhowa piɛiyo laŋ la cho laŋ ni:

3 “‘La nɔ mi la tosa wallo le palɛi i ŋɔmpum, kɛ paale ŋɔmmɛu leŋ le nɔ mi le wa paale pɛŋgiaaleŋ.+ O paale leŋ choo nya nɔ ni mi la bii bɔŋaŋ bɛndu cho o diandaa wo. La nɔ mi la tosa wali kɛ kɛ o paale leŋ choo le. Le nɔ mi le wa paale pɛŋgiaaleŋ le ya Chɛhowa, ba o ba nya wa pɛ.+

4 “‘Bɔŋaŋnda diandaala ŋboondula nya nɔ mi la bii le ya Chɛhowa, a teleŋ kpeekpei nya nɔ mi la bii laŋ ndo la cho laŋ ni: 5 O paŋgii tasei niŋ malɔ 14,+ a paale delaaleŋ, la nɔ mi la bii Bɔŋaŋ Hiouwɔɔ Choo Wo+ le ya Chɛhowa.

6 “‘O paŋgei hei niŋ malɔ 15, la nɔ mi la bii Bɔŋaŋ Beedii Nɔ Yiisii* Leniŋ Te Wo le ya Chɛhowa.+ La nɔ mi la wa beedii nɔ yiisii leniŋ te wo dioo le palɛi i ŋɔmmɛu.+ 7 O paale taseleŋ choo, la nɔ mi la bii bɔŋaŋ diandaa.+ Nduyɛ, la nɔ mi la tosa wali o wali kala le. 8 Le palɛi i ŋɔmmɛu, la nɔ mi la lom salalaŋ o ya Chɛhowa lo. Kɛ o paale ŋɔmmɛu leŋ choo, la nɔ mi la bii bɔŋaŋ diandaa. La nɔ mi la tosa wali o wali kala le.’”

9 Mi Chɛhowa suaa vɛlɛ o Muuse lo aa: 10 “Dimul Isɔluɛiya aa: ‘Te la luɛi pɛ o lɛŋnde ya cho nya kioo leŋ niŋ, nduyɛ mi la kendi tɔlɔɔla nyalaŋ, la nɔ mi la hiŋ a kɔmnde taseleŋ+ o wana soliaa lasalaa lo.+ 11 Wana soliaa lasalaa cho komɔɔ koŋ keeliaa ya Chɛhowa o hɔl, le mi hini kɔl a nya. Nduyɛ te paale pɛŋgiaaleŋ le hiou pɛ, diimandɔɔ wana soliaa lasalaa nɔ mbo keeliaa ndu ni. 12 Paale wana soliaa lasalaa cho ndu keeliaa leŋ, a nɔ ma kuɛ a saa kondo fɔŋndɔ kɛndɛ kɛndɛ chii niŋ wɔsioo o pilɛ wo, le mbo soli ndu sala luamaa o ya Chɛhowa lo. 13 Sala ŋkul nda cho soli le ndu wo, o nɔ mbo wa kpeyaŋ kɛndɛ kɛndɛ nda muuliaŋ a chuɛiyaŋ ndo ɛfaa le diiŋ,* nduyɛ ma soli ndu sala nda luam o ya Chɛhowa lo wo, le mi chuŋ kɛndɔɔ komal la. Sala ndɔ mamuɛiyo nɔ mbo wa muɛiyaŋ hiŋndo piɔuwo le hiɔɔlu.* 14 Haaa paale nya cho hunɔɔ a sala nya nɔ le yɔŋgoo o ya Mɛlɛka nyaa lo wo, beediiyo, kuluŋ tuaŋaŋ, ɔɔ kuluŋ sɛnɛiyoŋ, la nɔ mi la de o kɛ kɛ le. Sawaa hoo cho wa le nya a chuauwaa nyaa le fɛɛŋ a fɛɛŋ, ba o ba nya wa pɛ.

15 “‘Te paale pɛŋgiaaleŋ le hiou pɛ, la nɔ mi la chɔm lɔɔlaŋ la ŋɔmmɛu* chɔŋ a paale nya hiŋ a tɔlɔɔla nyalaŋ le sala keeliaa+ leŋ. Lɔɔ kɛ kɛ nɔ mbo chiŋa palɛi kpou. 16 Te lɔɔ ŋɔmmɛu wo chuu pɛ, diimandɔɔ o paale 50 choo,+ la soli sala ŋkul sɛnɛiyo o ya Chɛhowa lo.+ 17 La nɔ mi la chɛŋ a beediiyo o chalta nyalaŋ kpuŋgbaŋ ŋ muuŋ, mi la hiŋ a ndu le sala keeliaa. La nɔ mi la toosiaa ndu a kpeyaŋ kɛndɛ kɛndɔɔ ɛfaa le diiŋ. La nɔ mi la lom ndu latulu a yiisiiyo,+ le mbo wa maa komɔɔ diuwaa tasoo o chiɔɔŋ nyaŋ niŋ le ya Chɛhowa.+ 18 A nɔ ma soli beedii koŋ salaa latulu a saa fɔŋnduaa a ŋɔmmɛu, o kɛ kɛ nɔ mbo wa wɔsioo o pilɛ, a nau towa fɔŋndɔɔ, vɛlɛ a saa konduaa a ŋiɔɔŋ.+ La nɔ mi la soli nda sala luamaa o ya Chɛhowa lo, latulu a sala ŋkullo, vɛlɛ a sala mamuɛiyo, le mbo wa sala nda luam o ya Chɛhowa lo le mi chuŋ kɛndɔɔ komal la wo. 19 Nduyɛ, la nɔ mi la yɔŋgu chuiŋ fɔŋndɔɔ le sala hakioo,+ a saa piaanduaa a ŋiɔɔŋ, o kɛ kɛ nɔ mbo nɔ wɔsioo o pilɛ, le sala kɔl nyuloo.+ 20 Wana soliaa lasalaa cho nda keeliaa latulu a beediila nda toosiaa a komɔɔla tasela diu o chiɔɔŋ ndaŋ niŋ ndoŋ maa sala keeliaa ya Chɛhowa lachi, a saa piaanduaa a ŋiɔɔŋ. Nyɛm cho ŋ diandaa le ya Chɛhowa woŋ ŋ cho ni. Nduyɛ, wana soliaa lasalaa nɔ muŋ ni.+ 21 O paale leŋ choo, la nɔ mi la chuuŋgiaŋ+ le bɔŋaŋ bɛndu cho o diandaa wo biyɔɔ le nyapila. La nɔ mi la tosa wali o wali kala le. Sawaa hoo cho wa le nya a chuauwaa nyaa le fɛɛŋ a fɛɛŋ, ba o ba nya wa pɛ.

22 “‘Te la wa pɛ chiɔɔŋ kouwɔɔ, la nɔ mi la fuuluu a kouwɔɔ o daŋgaltaŋ te. Nduyɛ, la nɔ mi la chɔuviaa ŋ nya mɛi kɔɔli woŋ te.+ La nɔ mi la mɛi muŋ le wanaa bala fonduaa*+ a mialaa cho nya tɛɛŋ nda.+ Ya cho Chɛhowa Mɛlɛka nyaa ni.’”

23 Mi Chɛhowa hiau lachi a suɛi o Muuse lo aa: 24 “Dimul Isɔluɛiya aa, ‘Paale taseleŋ o paŋgii ŋɔmmɛu ve niŋ, la nɔ mi la pɛŋgi o paale leŋ choo. La nɔ mi la hɔŋ bululaŋ le waŋnda dimullo+ maa bɔŋaŋ diandaa bɛndoo cho wa paale leŋ. 25 La nɔ mi la tosa wali o wali kala le, nduyɛ la nɔ mi la hiŋ a sala nda luam o ya Chɛhowa lo wo.’”

26 Mi Chɛhowa dimul vɛlɛ Muuse aa: 27 “Kɛ malɔ tɔ o paŋgii ŋɔmmɛu ve niŋ, Paale Malaa laHaki Leŋ+ le cho ni. La nɔ mi la bii bɔŋaŋ bɛndu cho o diandaa wo, mi la bii mɔnɛi* le nyapila,+ nduyɛ mi la yɔŋgu sala nda luam o ya Chɛhowa lo wo. 28 La nɔ mi la tosa wali o wali o paale leŋ choo le. Kanifuule, paale malaa lahaki leŋ le cho ni, le mi la nyuna ya Chɛhowa Mɛlɛka nyaa le mi mal nya haki.+ 29 Te wana o wana bii mɔnɛi* o paale leŋ choo le, o nɔ mbo sɔla piɔmndo.+ 30 Nduyɛ wana o wana tosa pɛ wali kɛ kɛ o paale leŋ choo, I cho tosa mi wana koŋ sɔla piɔmndo. 31 La nɔ mi la tosa wali o wali o paale leŋ choo le. Sawaa hoo cho wa le nya a chuauwaa nyaa le fɛɛŋ a fɛɛŋ, ba o ba nya wa pɛ. 32 Paale pɛŋgiaaleŋ le cho le nya ni, nduyɛ la nɔ mi la bii mɔnɛi+ o paale ŋɔmahiɔɔlu leŋ choo o paŋgii keŋ niŋ a paale delaaleŋ. La nɔ mi la bii paale pɛŋgiaaleŋ ndeŋ chɔŋ a paale delaaleŋ mbo kɔ bii paale delaaleŋ diimandɔɔ.”

33 Mi Chɛhowa suaa vɛlɛ o Muuse lo aa: 34 “Dimul Isɔluɛiya aa, ‘O paale 15 leŋ choo o paŋgii ŋɔmmɛu ve niŋ, la nɔ mi la bii Bɔŋaŋ laBafɛiyo* le palɛi i ŋɔmmɛu le ya Chɛhowa.+ 35 La nɔ mi la bii bɔŋaŋ diandaa bɛndoo o paale taseleŋ choo, nduyɛ la nɔ mi la tosa wali o wali kala le. 36 Le palɛi i ŋɔmmɛu, la nɔ mi la wa salalaŋ lomɔɔ o ya Chɛhowa lo. O paale ŋɔmaa leŋ choo, la nɔ mi la bii bɔŋaŋ bɛndu cho o diandaa wo,+ nduyɛ mi la soli sala nda luam o ya Chɛhowa lo wo. Bɔŋaŋ teŋgeŋndo o cho ni. La nɔ mi la tosa wali o wali kala le.

37 “‘Bɔŋaŋnda diandaala+ nya nɔ mi la bii a boondoŋ,+ le ya Chɛhowa piɛiyo laŋ la cho laŋ ni. Nduyɛ salala nya nɔ mi la lom o ya Chɛhowa lo laŋ la cho laŋ ni: sala luamaa,+ sala ŋkullo,+ a sala mamuɛiyo,+ a mɛɛ i cho i kɛɛsiaa le paale kɛ kɛ yɛ. 38 O fulawɔ o salala nya soli o palɛi pɛŋgiɛi ya Chɛhowa ve choo laŋ,+ kela nyalaŋ,+ salala waŋndo chua buŋgɛi le nyɛ tosa laŋ,+ a salala nya kɛɛsiaŋ o kɔl le solioo+ o ya Chɛhowa lo laŋ, la nɔ vɛlɛ mi la soli salalaŋ ndaŋ. 39 Kɛ te la chii pɛ chiɔɔŋ nyaŋ kouwɔɔ, malɔ 15 o paŋgii ŋɔmmɛu ve niŋ, la nɔ mi la bii bɔŋaŋndo le ya Chɛhowa le palɛi i ŋɔmmɛu.+ O paale taseleŋ choo, la nɔ mi la tosa wali o wali le, nduyɛ o paale ŋɔmaa leŋ choo bɛɛ, la nɔ mi la tosa wali o wali le.+ 40 O paale taseleŋ choo, la nɔ mi la chua komɔɔla kɛndɛ kɛndɛlaŋ, siɔɔla waulaŋ,+ lɛuwuŋ yɔmii puiyɛi, a yɔmii cho o kpoloŋndo choo ve, mi la dɔɔnuŋ nyaale+ ya Chɛhowa Mɛlɛka nyaa lachi, le palɛi i ŋɔmmɛu.+ 41 La nɔ mi la bii bɔŋaŋndo hoo le ya Chɛhowa le palɛi i ŋɔmmɛu o wɔsioo niŋ.+ La nɔ mi la wa ndu biyɔɔ o paŋgii ŋɔmmɛu ve niŋ. Nduyɛ sawaa hoo cho wa le nya a chuauwaa nyaa le fɛɛŋ a fɛɛŋ. 42 La nɔ mi la wa o bafɛilaŋ niŋ le palɛi i ŋɔmmɛu.+ Isɔluɛiya kpou nɔ ma wa o bafɛilaŋ niŋ, 43 le halikpeŋ mi chuauwaa nyaa mamaa sina+ maa teleŋ ya wa nya solioo Ichipi+ wo, o bafɛilaŋ niŋ nyaa lɔl ni. Ya cho Chɛhowa Mɛlɛka nyaa ni.’”

44 Okoŋ, mi Muuse dimul Isɔluɛiya a bɔŋaŋnda ŋboondula Chɛhowa laŋ ndaŋ okɔɔ.