Nɔmbaa

28 Okoŋ kɔɔli, mi Chɛhowa dimul Muuse aa: 2 “Dimul Isɔluɛiya aa, ‘La nɔ mi la chua nyɛdiaa* cho le ya wo, mi la soli ndu salaa o ya lo. Salala nya nɔ le lomɔɔ o ya lo mi chuŋ kɛndɛ koŋ komal la wo, la nɔ mi la soli laŋ a teleŋ kpeekpeiyo.’+

3 “Dimul nda aa, ‘Sala luamaa nya nɔ mi la soli o ya Chɛhowa lo teleŋ o teleŋ ndo+ cho hoo ni: saa piaanduaa kɛndɛ kɛndiaa chii niŋ wɔsioo o pilɛ wa a ŋiɔɔŋ. 4 La soli saa piaandoo o pilɛ salaa idiiyo, nduyɛ mi la soli o pilɔɔ salaa a paale delaa leŋ.+ 5 Te la wa pɛ o kɛ kɛ salaa solioo, la chua kpeyaŋ kɛndɛ kɛndɔɔ ɛfaa cha,* mi la muuliaŋ ndu a chuɛiyaŋ hiŋndo piɔuwo le hiɔɔlu,* okoŋ mi la soli sala ŋkullo.+ 6 Sala luamaa hoo nɔ mbo wa tosaŋndo teleŋ o teleŋ,+ a mɛɛ i kɛɛsiaŋ o Pembii Sanai Ve choo yɛ, le mi chuŋ kɛndɛ koŋ wa ya Chɛhowa komallo. 7 Te la wa pɛ saa piaandu kɛ kɛ salaa solioo, la chua muɛiyaŋ hiŋndo piɔuwo le hiɔɔlu, mi la soli sala mamuɛiyo a ndu latulu.+ La tala muɛiyaŋ o fondaŋ diandaa maa sala mamuɛi o Chɛhowa lo. 8 Okoŋ kɔɔli, mi la soli saa fɔŋndɔ piaandoo o pilɔɔ salaa a paale delaa leŋ. Nduyɛ sala ŋkul a sala mamuɛi nya soli idiiyo wo, ndu koni nya nɔ ni mi la soli salaa o yiŋ, le mi chuŋ kɛndɛ koŋ komal ya Chɛhowa.+

9 “‘Kɛ o paale pɛŋgiaa leŋ choo,+ nyɛm nya nɔ mi la soli salaa woŋ cho muŋ ni: saa piaanduaa kɛndɛ kɛndiaa chii niŋ wɔsioo o pilɛ wa a ŋiɔɔŋ, a kpeyaŋ kɛndɛ kɛndɛ nda muuliaŋ a chuɛiyaŋ le sala ŋkullo wo ɛfaa le diiŋ, latulu a sala ndɔ mamuɛiyo. 10 Sala luamaa hoo nya nɔ le solioo o paale pɛŋgiaa leŋ choo ni, latulu a sala luamaa, vɛlɛ a sala mamuɛi nya soli teleŋ o teleŋ ndo.+

11 “‘O paŋgii kɛ kɛ kandɔŋndo,* nyɛm nya nɔ mi la soli sala luamaa o Chɛhowa lo woŋ cho muŋ ni: nauwaa towaa fɔŋnduaa a ŋiɔɔŋ, saa kondoo o pilɛ, a saa fɔŋnduaa piaanduaa kɛndɛ kɛndiaa a ŋɔmmɛu a chii niŋ wɔsioo o pilɛ wa.+ 12 Te la wa pɛ nau towa kɛ kɛ salaa solioo, la chua kpeyaŋ kɛndɛ kɛndɛ nda muuliaŋ a chuɛiyaŋ le sala ŋkullo wo kiloo le yaa.+ Nduyɛ te la wa pɛ saa kondoo salaa solioo, la chua kpeyaŋ kɛndɛ kɛndɛ nda muuliaŋ a chuɛiyaŋ le sala ŋkullo wo kiloo le diiŋ,+ 13 a kpeyaŋ kɛndɛ kɛndɛ nda muuliaŋ a chuɛiyaŋ le sala ŋkullo wo kiloo cha le saa piaandu kɛ kɛ. Okoŋ mi la soli sala luamaa, le mi chuŋ kɛndɛ koŋ komal ya Chɛhowa.+ 14 Salala mamuɛila nya nɔ mi la soli le chɔluaa haa laŋ la cho laŋ ni: muɛiyaŋ hiŋndo tɛndaa tɛɛŋ le nau towaa,+ muɛiyaŋ hiŋndo piɔuwo le yaa le saa kondoo,+ a muɛiyaŋ hiŋndo piɔuwo le hiɔɔlu le saa fɔŋndɔ piaandoo.+ Sala luamaa hoo nya nɔ ni mi la wa solioo ipaŋgu o ipaŋgu o wɔsioo niŋ. 15 O fulawɔ o sala luamaa a sala mamuɛi nya soli teleŋ o teleŋ ndo kɔɔli, la nɔ mi la soli vɛlɛ chuiŋ fɔŋndɔɔ sala hakioo o Chɛhowa lo.

16 “‘O paŋgii tasei niŋ malɔ 14, Bɔŋaŋ Hiouwɔɔ Choo Wo cho wa le Chɛhowa.+ 17 Nduyɛ o paŋgei hei niŋ malɔ 15, bɔŋaŋndo cho wa. Le palɛi i ŋɔmmɛu, la cho wa beedii nɔ yiisii* leniŋ te wo dioo.+ 18 O paale tasele bɔŋaŋ diandaa hoo choo, la nɔ mi la tosa wali kala kɛ kɛ le. 19 La nɔ mi la soli sala luamaa o ya Chɛhowa lo a nauwaa towaa fɔŋnduaa a ŋiɔɔŋ, saa kondoo o pilɛ, a saa piaanduaa chii niŋ wɔsioo o pilɛ wa a ŋɔmmɛu. Chɔluaa kɛndɛ kɛndiaa nya nɔ ni mi la soli salaa.+ 20 La nɔ mi la soli nda salaa latulu a kpeyaŋ kɛndɛ kɛndɛ nda muuliaŋ a chuɛiyaŋ le sala ŋkullo wo.+ Kpeyaŋndo kiloo le yaa a tɛndaa tɛɛŋ le nau towaa, a kpeyaŋndo kiloo le diiŋ le saa kondoo. 21 Le saa piaanduaa ŋɔmmɛu wa o kɛ kɛ salaa solioo, la nɔ mi la chua kpeyaŋndo kiloo cha, mi la soli salaa a ndu. 22 Nduyɛ la nɔ mi la soli vɛlɛ chuiŋndo sala hakioo, le mi hakila nyalaŋ la sɔla malnɔŋndo. 23 O fulawɔ o salala luamaala nya soli teleŋ o teleŋ idiiyo laŋ kɔɔli, salalaŋ ndaŋ nya nɔ vɛlɛ ni mi la soli. 24 Mɛɛ nya soli salalaŋ o paale taseleŋ choo yɛ, lende koni nya nɔ ni mi la soli laŋ o palɛi ŋɔmmɛu ve choo kpou maa nyɛdiaa, le mi chuŋ kɛndɛ koŋ komal ya Chɛhowa. La nɔ mi la soli laŋ latulu a salala luamaala nya soli teleŋ o teleŋ ndaŋ, vɛlɛ a sala ndɔ mamuɛiyo. 25 O paale ŋɔmmɛu leŋ choo, la nɔ mi la bii bɔŋaŋ diandaa.+ Nduyɛ, la nɔ mi la tosa wali kala kɛ kɛ le.+

26 “‘O paale tasele nya cho wa bɔŋaŋ chiɔɔŋ kuauwaa* biyɔɔ leŋ choo,+ te la wa pɛ sala ŋkullo solioo o Chɛhowa lo,+ la nɔ mi la bii bɔŋaŋ diandaa.+ Nduyɛ, la nɔ mi la tosa wali kala kɛ kɛ le.+ 27 La nɔ mi la soli nauwaa towaa fɔŋnduaa a ŋiɔɔŋ, saa kondoo o pilɛ, a saa piaanduaa chii niŋ wɔsioo o pilɛ wa a ŋɔmmɛu+ sala luamaa o ya Chɛhowa lo, le mi chuŋ kɛndɛ koŋ komal la. 28 Te la wa pɛ nau towa kɛ kɛ salaa solioo, la chua kpeyaŋ kɛndɛ kɛndɛ nda muuliaŋ a chuɛiyaŋ le sala ŋkullo wo kiloo le yaa. Nduyɛ te la wa pɛ saa kondoo salaa solioo, la chua kpeyaŋ kɛndɛ kɛndɛ nda muuliaŋ a chuɛiyaŋ le sala ŋkullo wo kiloo le diiŋ, mi la soli salaa a ndu. 29 Le saa piaanduaa ŋɔmmɛu wa o kɛ kɛ salaa solioo, la nɔ mi la chua kpeyaŋndo kiloo cha mi la soli salaa a ndu. 30 Nduyɛ la nɔ mi la soli vɛlɛ chuiŋndo sala hakioo, le mi hakila nyalaŋ la sɔla malnɔŋndo.+ 31 Salalaŋ ndaŋ nya nɔ ni mi la soli, o fulawɔ o sala luamaa nya soli teleŋ o teleŋ latulu a sala ndɔ ŋkullo wo kɔɔli. Chɔluaa kɛndɛ kɛndiaa nya nɔ ni mi la soli salaa+ latulu a salala mamuɛilaŋ.