Nɔmbaa

30 Okoŋ, mi Muuse dimul waŋ banaa+ o kaalaŋ Isɔluɛi niŋ kpou aa: “Nyɛ Chɛhowa dimi wo cho hoo ni: 2 Te o yɔŋ pɛ mi waŋndo chua buŋgɛi+ o ya Chɛhowa lo, ɔɔ mbo mɛnaŋ po+ le nyɛ tosa o yoomu ndɔɔ niŋ, o nɔ mbo lo o lediom.+ O nɔ mbo tosa nyɛ o nyɛ o chua buŋgɛi le tosaa.+

3 “Te wana lanɔ feleŋgɔnɔɔ wa wɔ pɛ o finya ndɔ lo chiɛiniŋ, nduyɛ mbo chua buŋgɛi o ya Chɛhowa lo ɔɔ mbo mɛnaŋ po le kiɔɔ nyɛ tosa o yoomu ndɔɔ niŋ, 4 okoŋ mi finya ndɔ tuei a buŋgɛi o chua ve ɔɔ a nyɛ o mɛnaŋ po le kiɔɔ tosaa o yoomu ndɔɔ niŋndo okɔɔ, mbo kuuna ndu le, mɛɛ i cho ndu kuee le mbo peelu buŋgaŋ o chua woŋ, vɛlɛ a nyɛ o nyɛ o dimi le kiɔɔ tosaa o yoomu ndɔɔ niŋ. 5 Kɛ te finya ndɔ tuei pɛ a buŋgaŋ o chua woŋ ɔɔ a nyɛ o kɛɛsiaa le kiɔɔ tosaa o yoomu ndɔɔ niŋndo okɔɔ, nduyɛ mbo kuuna ndu, mɛɛ i cho ndu kuee le mbo peelu buŋgaŋ o chua woŋ te. Chɛhowa cho ndu malɔɔ haki, kanifuule finya ndɔ kuuna ndu.+

6 “Kɛ te o yɔŋ pɛ mbo chal o nɔɔ, nduyɛ mbo wa wɔ o buŋgɛi o chua ve bɛŋgu, ɔɔ mbo chua buŋgɛi luku luku le nyɛ tosa o yoomu ndɔɔ niŋ, 7 nduyɛ mi pɔnɔ ndɔ tuei a ndi okɔɔ, kɛ mbo kuuna ndu paale o tuei a ndi okɔɔ leŋ te, mɛɛ buŋgaŋ o chua woŋ ɔɔ nyɛ o kɛɛsiaa le kiɔɔ tosaa o yoomu ndɔɔ niŋndo cho ndu kuee le tosaa. 8 Kɛ te pɔnɔ ndɔ tuei pɛ a ndi okɔɔ nduyɛ mbo kuuna ndu paale o tuei a ndi okɔɔ leŋ, mɛɛ pɔnɔ ndɔ puusiaa buŋgɛi o chua ve ɔɔ nyɛ o kɛɛsiaa le tosaa luku luku o yoomu ndɔɔ niŋndo.+ Nduyɛ, Chɛhowa cho ndu malɔɔ haki.

9 “Kɛ te wana lanɔ vii pɔnɔɔ wo ɔɔ o nda kɛɛ o nɔɔ niŋndo chua pɛ buŋgɛi, nyɛ o nyɛ o dimi le tosaa o yoomu ndɔɔ niŋ, o cho ndu kuee le tosaa.

10 “Kɛ te o yɔŋ pɛ mi wana lanɔɔ wa o pɔnɔ ndɔ lo chiɛiniŋ mbo chua buŋgɛi le nyɛ tosa ɔɔ le kiɔɔ nyɛ tosa o yoomu ndɔɔ niŋ, 11 nduyɛ mi pɔnɔ ndɔ tuei a ndi okɔɔ, kɛ mbo kuuna ndu le, mɛɛ buŋgaŋ o chua woŋ kpou ɔɔ buŋgɛi o chua le kiɔɔ nyɛ tosa o yoomu ndɔɔ niŋndo cho ndu kuee le tosaa. 12 Kɛ paale pɔnɔ ndɔ cho tueiyɔɔ a ndi okɔɔ leŋ, okoŋ mbo puusiaa buŋgaŋ o chua woŋ, ɔɔ nyɛ o chua buŋgɛi le kiɔɔ tosaa wo, mɛɛ ŋ cho ndu kuee le tosa le.+ Kanifuule pɔnɔ ndɔ puusiaa muŋ, nduyɛ Chɛhowa cho ndu malɔɔ haki. 13 Buŋgɛi kɛ kɛ wana lanɔɔ chua pɛ ɔɔ mbo mɛnaŋ po le kiɔɔ nyɛ tosa o yoomu ndɔɔ niŋ, pɔnɔ ndɔ nɔ dioo mbo chɛl ndu le buŋgɛi keŋ peeloo, ɔɔ mbo kɛɛlu ndu. 14 Kɛ te pɔnɔ ndɔ tuei pɛ a buŋgaŋ o chua woŋ ɔɔ buŋgaŋ o chua le kiɔɔ nyɛ tosa o yoomu ndɔɔ niŋndoŋ okɔɔ, nduyɛ mi palɛi hiou o suu nyɛ o nyɛ a ndi okɔɔ le, mɛɛ o chɛl buŋgaŋ ndɔŋ. Kanifuule, paale o tuei a muŋ okɔɔ leŋ, o kuuna ndu le. 15 Kɛ te palɛi tiŋ hiou pɛ okoŋ kɔɔli chɔŋ a paale o tuei a muŋ okɔɔ leŋ, okoŋ mbo kɛɛlu ndu muŋ peeloo, mɛɛ pɔnɔ ndɔ tɔɔyaŋ koŋ cho wa choo ni.+

16 “Sawalaŋ ndaŋ Chɛhowa ke Muuse ni a pɔnɔɔ a lanɔɔ okɔɔ, vɛlɛ a finyaa a chua ndɔ laandu cho ndu o ba chiɛiniŋ ndo.”