Nɔmbaa

6 Mi Chɛhowa suaa vɛlɛ naa Muuse chua aa: 2 “Dimul Isɔluɛiya aa, ‘Te wana pɔnɔɔ ɔɔ wana lanɔɔ chua pɛ buŋgɛi teŋgeŋnde le waa Naasiluɛinɔɔ*+ le Chɛhowa, 3 o nɔ mbo kol mamuɛi o mamuɛi le. O nɔ mbo kol muɛima waalɛi ɔɔ nyɛ o nyɛ waalɛi nɔ muɛiyaŋ leniŋ te. Muɛima kɛ kɛ nda toosiaa a kilepiiyaŋ, o nɔ mbo kol maŋ te.+ O nɔ mbo de kilepiiyaŋ te, o wa ma kiyɛi ɔɔ ma vesɛi. 4 Teleŋ o cho wa Naasiluɛinɔɔ wo kpou, nyɛ o nyɛ nda toosiaa a kilepiiyaŋ, o nɔ mbo de ndu le. O nɔ mbo de ma piiyaŋ te, kɛlɛŋgaa niŋ te boolaŋ.

5 “‘Teleŋ o chua buŋgɛi le waa Naasiluɛinɔɔ wo kpou, o nɔ mbo sendi le.+ Haaa mi palɛi o yɔŋguŋ o Chɛhowa lo ve i chuu, o nɔ mbo mal yiiŋii nduɛi mi i yimbu ndu o lebol, le mbo wa o diandaa. 6 Teleŋ o cho wa o yɔŋgaŋ o Chɛhowa lo wo kpou, o nɔ mbo sɔɔŋguu wana* vilɛiyo ikɛi le. 7 O yɔŋ bɛɛ aa finya ndɔ vi ni, ɔɔ kala ndɔ, ɔɔ bɛ ndɔ, ɔɔ pɔmbɔ ndɔ, ɔɔ yema ndɔ, o nɔ mbo nɔɔliaa ndupila le.+ Kanifuule, nyɛ chɔm maa Naasiluɛinɔɔ o cho le Mɛlɛka ndɔɔ ni wo cho ndu o lebol.

8 “‘Teleŋ o cho wa Naasiluɛinɔɔ wo kpou, o cho wa o diandaa Chɛhowa o hɔl. 9 Kɛ te o yɔŋ pɛ mi waŋndo vi ndu ikɛi o lepilɛ niŋ kpe,+ nduyɛ mbo nɔɔliaa yiiŋii chɔm maa o cho o yɔŋgaŋ o Mɛlɛka lo ve, o nɔ mbo sendi+ o paale o nɔ mbo sɔla dindioo leŋ choo. Koŋ cho ni, paale ŋɔmmɛu leŋ. 10 O paale ŋɔmaa leŋ choo, o nɔ mbo hiŋ a piiŋnda a ŋiɔɔŋ ɔɔ kaŋgbuaa fɔŋnduaa a ŋiɔɔŋ o wana soliaa lasalaa lo o tɛndii bɔŋaŋndo hɔlndɔ. 11 Wana soliaa lasalaa cho bɛɛndiaa o pilɛ le sala hakioo, o pilɔɔ le sala luamaa, le halikpeŋ mbo sɔla malɔɔ hakioo+ le mɛɛ o pilaŋ wana* vilɛiyo yɛ. Okoŋ mbo dindi bolle ndɔleŋ o paale leŋ choo. 12 O nɔ mbo yɔŋguŋ vɛlɛ o Chɛhowa lo le waa Naasiluɛinɔɔ, nduyɛ mbo hiŋ a saa fɔŋndɔ piaandu chii wɔsioo o pilɛ wo le sala hakioo solioo. Kɛ teleŋ o wa Naasiluɛinɔɔ wo cho o chɔm choo le, kanifuule mbo nɔɔliaa ndupila.

13 “‘Sawa cho a Naasiluɛinɔɔ okɔɔ wo cho hoo ni: Te teleŋ o nɔ le waa Naasiluɛinɔɔ wo chuu pɛ,+ a nɔ ma kuɛ a ndu o tɛndii bɔŋaŋndo sondoo. 14 Sala o nɔ mbo soli loŋ o Chɛhowa lo wo cho hoo ni: Saa fɔŋndɔ piaandu chii wɔsioo o pilɛ nduyɛ o nɔ sɔŋ o sɔŋ te wo le sala luamaa,+ saa fɔŋndɔ laandu chii wɔsioo o pilɛ nduyɛ o nɔ sɔŋ o sɔŋ te wo le sala hakioo,+ saa piaandu nɔ sɔŋ o sɔŋ te wo o pilɛ le sala kɔl nyuloo,+ 15 beedii nɔ yiisii* leniŋ te wo, o nda toosiaa tiu tiu maa ikela a kpeyaŋ kɛndɛ kɛndɛ nda muuliaŋ a chuɛiyaŋ ndo kambɛiyo cha, a beedii fɛɛdɛɛ nɔ yiisii leniŋ te wo, o nda sui chuɛiyaŋ ndo. Nduyɛ mbo hiŋ vɛlɛ a sala ŋkullo,+ vɛlɛ a salala mamuɛilaŋ.+ 16 Okoŋ, mi wana soliaa lasalaa kuɛ a muŋ Chɛhowa lachi, mbo soli sala hakioo a sala luamaa. 17 Mbo soli saa piaandoo sala kɔl nyuloo o Chɛhowa lo latulu a beedii kambɛi cha nɔ yiisii leniŋ te wo. O nɔ mbo soli salaa hoo latulu a sala ŋkullo,+ vɛlɛ a sala mamuɛiyo.

18 “‘Naasiluɛinɔɔ nɔ mbo sendi yiiŋii cho ndu o lebol le teleŋ o wa Naasiluɛinɔɔ wo+ o tɛndii bɔŋaŋndo sondoo, mbo wou ndi o yiŋ o sala kɔl nyuloo bɛŋgu. 19 Te o chii pɛ yiiŋii chɔm maa Naasiluɛinɔɔ o wa ni ve sendi, wana soliaa lasalaa nɔ mbo chua choŋgu saa piaandu nda yau wo,+ beedii nɔ yiisii leniŋ te wo o pilɛ, o nda toosiaa tiu tiu maa ikela mbo wa o kambɛiyo niŋndo, a beedii fɛɛdɛɛ nɔ yiisii leniŋ te wo, mbo ke Naasiluɛinɔɔ o ba. 20 Wana soliaa lasalaa nɔ mbo keeliaa nyɛm muŋ maa sala keeliaa Chɛhowa lachi.+ Salaa hoo ni, mɛɛma sala keeliaa hoo ni, a lɔlu yɔŋguŋ le chuuŋgiaa wo+ cho nyɛ diandaa le wana soliaa lasalaa. Okoŋ kɔɔli, Naasiluɛinɔɔ nɔla niŋ mbo kol muɛiyaŋ.

21 “‘Te waŋndo chua pɛ buŋgɛi le waa Naasiluɛinɔɔ, sawa cho a ndu okɔɔ wo cho hoo ni:+ Te o chua pɛ buŋgɛi le salaa solioo o Chɛhowa lo mbo hiou mɛɛ i cho Naasiluɛinɔɔ kuee le salaa solioo yɛ, o nɔ mbo peelu buŋgɛi keŋ le sawa cho a Naasiluɛileŋ okɔɔ wo bɛɛleŋ kioo.’”

22 Okoŋ mi Chɛhowa dimul Muuse aa: 23 “Dimul Elɔŋ nda puaa nduaa aa, ‘Mɛɛ nya nɔ mi la dɔu waŋnda Isɔluɛi sala yɛ cho hoo ni.+ La dimul nda aa:

24 “Maa Chɛhowa dɔu nya sala,+ nduyɛ mbo manda nya fɔ!

25 Maa Chɛhowa tosa mi hɔlaa nduaa dendu nya choo,+ nduyɛ mbo che nya wanaa sɔvɛ fɔ!

26 Maa Chɛhowa mulul nya hɔlla, nduyɛ mbo ke nya kɔl nyuloo fɔ!”’+

27 Elɔŋ nda puaa nduaa nɔ ma handu Isɔluɛiya diola nilaŋ choo,+ le halikpeŋ mi dɔu nda sala.”+