Ditɔnɔmii

22 “Te a che pɛ nau puaapilɛnɔ numndo ɔɔ saa ndɔ luusiaŋ ndo, mɛi ndu loŋ ma kuɛŋnuŋ te.+ Bii ndu ma miŋgi ndu o puaapilɛnɔ numndo lo. 2 Kɛ te o yɔŋ pɛ mi puaapilɛnɔ numndo wa levil a num ɔɔ ma sina ndu le, a nɔ ma hiŋ a chɔlu koŋ o numndo bɛɛ. Nduyɛ, o lo num o ba haaa mi puaapilɛnɔ numndo chɛŋ ndu nuuviaa, okoŋ ma miŋgi ndu ndu o ba.+ 3 Lende ŋ nɔ ni ma tosa a sofɛlɛ ndɔɔ, nyɛla ndɔlaŋ, vɛlɛ a nyɛ o nyɛ luusiaŋ ndu pɛ o ba ma saaluŋ ndu. A nɔ ma mɛi ndu ma kuɛŋnuŋ te.

4 “Te a komal pɛ mi sofɛlɛ puaapilɛnɔ numndo ɔɔ nau ndɔɔ bɛwa o nɛi, mɛi ndu loŋ ma kuɛŋnuŋ te. A nɔ ma mala puaapilɛnɔ numndo mi chɔlu ndɔɔ chɛŋ mbo sim.+

5 “Wana lanɔɔ nɔ mbo chuɛɛnuŋ nyɛla wana pɔnɔɔ le, nduyɛ wana pɔnɔɔ nɔ mbo chuɛɛnuŋ nyɛla wana lanɔɔ le. Wana o wana tosa lende pɛ, Chɛhowa Mɛlɛka nyaa tul ndu leyɛ.

6 “Te a wa pɛ kɔlaŋ o nɛi ma komal waaŋnde youwo a youwaa chuauwa leniŋ ɔɔ peltaŋ, o wa o yɔmndo choo ɔɔ lɛŋ, nduyɛ mi kalaa wa o kuumbaŋ o chuauwaa kaŋ choo ɔɔ pelta laŋ, a nɔ ma bii kalaa a chuauwaa nduaa latulu le.+ 7 A nɔla ma chua chuauwaa nduaa, ma mal kalaa mbo kuɛŋnuŋ. Tosa hei le mi nyɛ o nyɛ wa o kɛndɛ a num, nduyɛ ma viou achal.

8 “Te o yɔŋ pɛ ma taŋgul chiɛi sɛnɛiyo, a nɔ ma balu kakioo handɔɔ chɛ chɛ o chiɛiyo choo,+ yɔŋii waŋndo del okoŋ mi tɔɔyaŋ piɔm ndɔɔ wa yuŋgu numndo choo.

9 “Te o yɔŋ pɛ ma tosa kpele makilepiiyo, a nɔ lɛ ma tɔl nyɛ o nyɛ cheleŋ leniŋ te.+ Te a tosa lende pɛ, tɔlɔɔ koŋ ni, kilepiima maŋ ni, a nɔ ma kuɛ a maŋ o chiɛi Mɛlɛkaa.

10 “A nɔ ma baa nau towaa a sofɛlɔɔ yɔmndo o ikɛsu le ma waa diompilɛ le.+

11 “La nɔ mi la wounuŋ nyɛ chuɛɛnaŋ nda muuliaŋ yiiŋii chɔloo vɛlɛ a fuŋndeŋ le ndu toosiaa wo le.+

12 “La nɔ mi la handu misalaŋ o kpeŋguŋ hiɔɔluŋ nyɛla nyala chuɛɛnaŋ ndaŋ.+

13 “Te o yɔŋ pɛ mi poo chua lanɔɔ mbo hiviŋ ndu kɔɔli, kɛ okoŋ kɔɔli mbo tul ndu leyɛ,* 14 nduyɛ mbo baalaŋ ndu, mbo wa ndu tɔɔ wɔɔŋndo keeliaa aa: ‘I chua chuaa hoo o nɔɔ niŋ, kɛ mɛɛ ya hiviŋ ndu kɔɔli, mi saaluŋ maa o ve yufuaanɔ le,’ 15 chua koŋ kala ndɔ a finya ndɔ nɔ ma yɔŋgu waŋ banaa o dio kpaki chioo nyɛ chɔm maa yufuaanɔɔ o wa ni wo. 16 Finya ndɔ nɔ mbo dimul bɛnduaa aa, ‘I ke poo hoo chua nuu le mbo wa laa ndɔ, kɛ mbo tul ndu leyɛ,* 17 nduyɛ mbo baalaŋ ndu mbo wa dimioo aa: “I saaluŋ maa chua nyaa cho yufuaanɔ le.” Mi che nyɛ chɔm maa yufuaanɔɔ chua nuu wa ni wo.’ A nɔ ma pɛŋgɛla kola chɔm maa yufuaanɔɔ o wa ni wo waŋ banaa o hɔl. 18 Waŋ banaa+ cho po koŋ biyɔɔ ma sila ndu.+ 19 A cho ndu paawaa* kilul kaniŋ humboŋ kiloo o pilɛ,* kanifuule o tɛɛmbuu yufuaanɔɔ o Isɔluɛi niŋ labɛɛ.+ Nduyɛ o cho hiouwɔɔ lachi a waa laa ndɔ. Te o cho wɔ pɛ yoomu, a cho ndu chɛlɔɔ mbo kɛɛ chua koŋ te.

20 “Kɛ te o yɔŋ pɛ maa nyɛ o dimi wo cho tonya, nduyɛ mi nyɛ o nyɛ ve o chɔm maa yufuaanɔɔ o cho ni le wo, 21 a nɔ ma kuɛ a chuaa o chiɛi finya ndɔ wo hɔlndɔ, okoŋ mi puaa o chiee koŋ niŋ lo ndu vii viiyo a poutaŋ haaa mbo vi. Kanifuule, o tosa suɛi lasiɔmbuei o Isɔluɛi niŋ,+ mbo tosa kaa ihini nɔɔlɛiyo o chiɛi finya ndɔ wo niŋ.+ Lelaŋ, la nɔ mi la soli nyɛ cho o wɔɔŋndo wo nya tɛɛŋ.+

22 “Te la bii pɛ poo a lanɔ pilaa, po koŋ ni, chua koŋ ni, nda ŋiɔɔŋ kpou nɔ ma sɔla piɔmndo.+ Lelaŋ, la nɔ mi la soli nyɛ cho o wɔɔŋndo wo o Isɔluɛi niŋ.

23 “Te poo dɔu pɛ yufuaanɔɔ fulu, kɛ mi wana pɔnɔ cheleŋ che ndu okoŋ mbo wa a ndu, 24 nda ŋiɔɔŋ kpou, la nɔ mi la soli nda o dio kpaki chioo, mi la lo nda vii viiyo a poutaŋ haaa ma vi. Chuaa cho piɔmndo sɔla le mɛɛ o mel yioo choo choo o chioo niŋ te yɛ, nduyɛ mi poo sɔla piɔmndo le mɛɛ o tɛɛmbuu lanɔ pilaa labɛɛ yɛ.+ Lelaŋ, la nɔ mi la soli nyɛ cho o wɔɔŋndo wo nya tɛɛŋ.

25 “Te o yɔŋ pɛ mi poo komal chuaambɔ laandu nda dɔu fulu wo yondoo niŋ mbo kpuuwa ndu, po koŋ nɔ mbo sɔla piɔmndo. 26 Kɛ, la nɔ mi la tosal chuaambɔ laandu koŋ nyɛ o nyɛ le. Chuaambɔ laandu koŋ tosa haki o nɔ mbo sɔla piɔm te. Suɛi hei cho ko mɛɛ poo del nuaa chaaŋ ndɔ choo mbo dii ndu yɛ.+ 27 Kanifuule, yondoo niŋ o komal ndu ni, nduyɛ mi chuaambɔ laandu nda dɔu koŋ fulu wo mal yioo choo choo, kɛ wana o wana ve le ndu mala le.

28 “Te poo che pɛ chuaambɔ laandu nda dou wɔ fulu le wo, nduyɛ mbo bii ndu mbo wa a ndu, okoŋ mi waŋnda sina a ndi okɔɔ,+ 29 po koŋ nɔ mbo ke finyaa chuaambɔ laandu koŋ kaniŋ humboŋ Siɛkɛlloŋ 50,* nduyɛ mbo simnuŋ laa ndɔ.+ Te o cho wɔ pɛ yoomu, a nɔ ma chɛl ndu mbo kɛɛ chuaambɔ laandu koŋ te. Kanifuule, o tɛɛmbuu ndu labɛɛ.

30 “Wana o wana nɔ mbo chua lanɔɔ finya ndɔ o nɔɔ niŋ te, yɔŋii o tɛɛmbuu finya ndɔ labɛɛ.*+