Ditɔnɔmii

23 “Wana pɔnɔ o wana pɔnɔ nda pɛl pɛ boosioo ɔɔ ma kelu ndu labɛŋguniŋndo, o nɔ mbo wa wanaa Chɛhowa wa tɛɛŋ te.+

2 “Wana o wana cho violɔɔ samaa, o nɔ mbo wa wanaa Chɛhowa wa tɛɛŋ te.+ Wanaa fula o pulale ndaleŋ choo wa, o pilɛ bɛɛ nɔ mbo wa wanaa Chɛhowa wa tɛɛŋ te.

3 “Amɔnaitiinɔ ni, Mowabaitiinɔ ni, o kɛ kɛ nɔ mbo wa wanaa Chɛhowa wa tɛɛŋ te.+ Wanaa fula o pulale ndaleŋ choo wa, o pilɛ bɛɛ nɔ mbo wa wanaa Chɛhowa wa tɛɛŋ te. 4 Kanifuule, a ke nya nyɛdiaa le dio, ɔɔ ma ke nya mɛŋndaŋ le kolɔɔ teleŋ nya wa fulaa Ichipi wo le.+ Nduyɛ, ma hiau Belam kɔɔli po Biyɔɔ wo, fulaa Pɛtɔɔ o Mɛsopoteemiaa niŋ, le mbo handu nya sendioo choo.+ 5 Kɛ Chɛhowa Mɛlɛka nyaa yeŋ Belam lani le.+ Mi Chɛhowa Mɛlɛka nyaa siiŋguu sendi koŋ salaa le nya,+ kanifuule Chɛhowa Mɛlɛka nyaa kaala nya.+ 6 Fɛɛŋ bɛɛ la mala nda ma wa o kɔl nyulu niŋ ɔɔ mi dɛnɛ kɛndɛ komal nda le.+

7 “La nɔ mi la tul waŋnda Idɔm leyɛ le, kanifuule puaapiliaa nyaa nda cho ni.+

“La nɔ mi la tul Ichipiaŋnda leyɛ le, kanifuule la wa paandu mialla o lɛŋnde ndaleŋ niŋ.+ 8 Nduyɛ chuauwaa mamaa o chuauwaa ndaa mamaa niŋ bɛɛ, a nɔla ma wa wanaa Chɛhowa wa tɛɛŋ.

9 “Te la kila pɛ dɔɔŋgɔɔ le yaamɔɔwaa nyaa chiŋalaŋndo, la nɔ mi la fafaŋ nyɛ o nyɛ tosa mi la simnuŋ a nɔɔlɛi.+ 10 Te o yɔŋ pɛ mi wana pɔnɔɔ simnuŋ o nɔɔlɛi le mɛɛ o chii o lɛmbɔɔ niŋ yɛ,+ o nɔ mbo faŋaŋ o dɔɔŋgɔɔ niŋ, nduyɛ o miiŋgu loŋ te. 11 Te paaleŋ le yɔŋguŋ pɛ, o nɔ mbo puluŋ okoŋ mbo miiŋgu o dɔɔŋgɔɔ niŋ a paale delaaleŋ.+ 12 La nɔ mi la hɛli fondaŋndo mbo wa landaŋ a dɔɔŋgɔɔ. Nduyɛ, loŋ nya nɔ ni mi la wa kɔlaŋ le yondo niŋndo. 13 Te la wa pɛ kɔlaŋ yondo niŋndo,* la kɔ a nyɛ o ba le sooŋndo touwɔɔ. Te la chii pɛ, la kumbu. 14 Kanifuule, Chɛhowa Mɛlɛka nyaa cho nya balɔɔ tɛɛŋ o dɔɔŋgɔ nyaa niŋ,+ le nya piŋioo a le yaamɔɔwaa nyaa malɔɔ nya o ba. Lelaŋ, dɔɔŋgɔ nyaa nɔ mbo wa o diandaa,+ yɔŋii o chɔ nyɛ nɔɔlɛi nya tɛɛŋ, okoŋ o kue lɛ a nya latulu le.

15 “Te chiɔɔ hɛluŋ pɛ masanɔ ndɔɔ mbo nyaanuŋ o nya lo, la nɔ mi la miŋgi ndu o masanɔ ndɔɔ lo le. 16 Ba o ba o yeema pɛ le challe o chieeŋ nyaŋ bɛndoŋ niŋ i pilɛ, o chal loŋ. La nɔ mi la bii ndu biyɔɔ wɔɔŋ te.+

17 “Chuaa nyaa laanduaa o Isɔluɛi niŋ nɔ ma simnuŋ wanaa suundɛiya o maaŋndaŋ niŋ te,+ nduyɛ puaa nyaa o Isɔluɛi niŋ bɛɛ nɔ ma simnuŋ wanaa suundɛiya o maaŋndaŋ niŋ te.+ 18 La nɔ mi la hiŋ a kanii* wana lanɔ suundɛiyo ɔɔ wana pɔnɔ suundɛiyo* sɔla o suundaa niŋnde o chiɛi Chɛhowa Mɛlɛka nyaa niŋ, le buŋgɛi o chua ve peeloo le. Kanifuule, nda ŋiɔɔŋ fau, Chɛhowa Mɛlɛka nyaa tul nda leyɛ.

19 “La nɔ mi la chɛl mi puaapilɛnɔ nyaa handu nyɛ o kuee o bii ɔɔ dɔndɔ o bii nya o ba wo choo le.+ O wa ikani, o wa nyɛdiaa, ɔɔ nyɛ o nyɛ waŋndo nɔ pɛ mbo handu nyɛ lechoo. 20 Mialaa cho nya tɛɛŋ nda nɔ ni ma handu nyɛ lechoo.+ Kɛ la nɔ mi la chɛl mi puaapilɛnɔ nyaa handu nyɛ lechoo le.+ Koŋ tosa mi Chɛhowa Mɛlɛka nyaa dɔu nya sala o nyɛ o nyɛ niŋ nya tosa, o lɛŋnde nya cho kɔlaŋ challe leŋ niŋ.+

21 “Te a chua pɛ buŋgɛi o Chɛhowa Mɛlɛka numndo lo,+ duaunuŋ tamala le ndi peeloo le. Kanifuule, Chɛhowa Mɛlɛka numndo yeema niŋ ma peelu buŋgɛi keŋ. Te o cho koŋ te, hakioo i cho wa le num ni.+ 22 Kɛ te a chue ibuŋga kposoŋ te, haki cho num wa choo le.+ 23 A nɔ ma tosa nyɛ ŋ dimi wo,+ nduyɛ ma peelu buŋgɛi ŋ chua o Chɛhowa Mɛlɛka numndo lo ve, maa sala numpila kɛɛsiaŋ o kɔl le solioo wo.+

24 “Te a luɛi pɛ o kpele makilepii chaaŋ numndo niŋ, dio mɛɛ o mɛɛ ŋ yeema pɛ ma pim cha. Kɛ a nɔ ma kendi ma wou maŋ o nyɛ niŋ le kɔlaŋ a maŋ te.+

25 “Te a kuɛ pɛ o chiɛi ŋwitii chaaŋ num nde niŋ, soondiaa witiiŋ vesɛiyoŋ a ba, kɛ a nɔ ma baa muŋ wɔlɔtɔɔ ma kelu le.+