Ditɔnɔmii

12 “La nɔ mi la wa yekeŋ le nyɛ sawalaŋ ndaŋ, a nyɛ o dimul nya wo tosaa o yoomu nyaa niŋ kpou, te la huŋ wa pɛ o lɛŋnde Chɛhowa, Mɛlɛka finyaa nyaa mamaa cho nya ke leŋ niŋ. 2 Kaala nya cho lɛŋndeŋ hiɔlɔɔ o ba laŋ, la nɔ mi la tɛɛmbuu fondaŋnda nda toosiaa le mɛlɛkaa ndaa sooluuwo laŋ kpou.+ O wa o pembuŋ bɛndoŋ choo, o pembuŋ pɔmbɔŋ choo, ɔɔ o yɔm bɛndu kɛ kɛ bɛŋgu. 3 La nɔ mi la puusiaa maaŋnda ndalaŋ,+ mi la pesi suŋgbuma nda sooluu waŋ, mi la lumi suŋgbuma iyɔm nda simi le sooluuwo waŋ,*+ nduyɛ mi la pesi pesi piɔmaa nda tuuliaa maa mɛlɛkaa nda wa, le mi diola ndalaŋ la nyum pɔli o lɛŋnde leŋ niŋ.+

4 “La nɔ mi la piɛi Chɛhowa Mɛlɛka nyaa o nɛi waa nuaa choo le.+ 5 Fondaŋ kɛ kɛ Chɛhowa Mɛlɛka nyaa hɛli pɛ o kaala nyalaŋ tɛɛŋ le mi diola ndɔlaŋ la wa loŋ, loŋ nya nɔ ni mi la kɔ piɛi ndu.+ 6 Loŋ nya nɔ ni mi la kuɛ a salala nyala luamaa laŋ,+ salala cheleŋ ndaŋ, o tɔ ndɔɔ,+ chuuŋgiaala nyalaŋ,+ salala nya chua buŋgɛi le nyɛ tosa laŋ, salala nyapila kɛɛsiaŋ o kɔl le solioo laŋ,+ a kɔmnde taseleŋ o chɔluaa nyaa tɛɛŋ.+ 7 Nya a yuŋgula nyalaŋ kpou, loŋ nya nɔ ni mi la kɔ dio saŋga nyaa tɔnɔ+ Chɛhowa Mɛlɛka nyaa o hɔl.+ Kanifuule, Chɛhowa Mɛlɛka nyaa dɔu nya sala.

8 “La nɔ mi la tosa mɛɛ naŋ cho hau tosaa yɛ le. Hau, wana o wana cho tosaa nyɛ huŋ ndu o kɔllo.* 9 Kanifuule, la fuuluu wɔ o fondaŋ nya pɛŋgiaa le,+ nyɛm kɛŋ Chɛhowa Mɛlɛka nyaa cho nya kioo woŋ. 10 Te la taŋ pɛ Chɔɔdaŋ ndaŋ,+ nduyɛ mi la kɔ chal o lɛŋnde Chɛhowa Mɛlɛka nyaa cho nya kioo leŋ niŋ, o cho tosa mi la sɔla pɛŋgioo yaamɔɔwaa balu nya wa kpou tɛɛŋ, nduyɛ mi la waŋnuŋ o hɛnɛkɛyɛi niŋ.+ 11 Nyɛ o nyɛ ya dimul nya le hunɔɔ, salala nyala luamaa laŋ, salala cheleŋ ndaŋ, o tɔ ndɔɔ,+ chuuŋgiaala nyalaŋ, a sala kɛ kɛ nya chua buŋgɛi o Chɛhowa lo le nyɛ tosa, la nɔ mi la hiŋ a laŋ o fondaŋ Chɛhowa Mɛlɛka nyaa hɛli le mi diola ndɔlaŋ la wa wo.+ 12 La nɔ mi la dɔɔnuŋ nyaale Chɛhowa Mɛlɛka nyaa lachi,+ latulu a puaa nyaa, chuaa nyaa laanduaa, buɛiyaa nyaa piaanduaa a buɛiyaa nyaa laanduaa, vɛlɛ a Livaiyaa cho nya tɛɛŋ o chieeŋ nyaŋ bɛndoŋ* niŋnda, kanifuule a ke Livai nyɛm kɛ nya tɛɛŋ te.+ 13 O cho o fondaŋndaŋ kpou le nya nɔ mi la soli salala nyala luamaa laŋ te.+ 14 O fondaŋ Chɛhowa hɛli o tandala nyalaŋ tɛɛŋ ndo kinɛi nya nɔ ni mi la soli salala nyala luamaa laŋ, nduyɛ loŋ nya nɔ ni mi la tosa nyɛ o nyɛ ya dimul nya le tosaa.+

15 “Teleŋ o teleŋ nya yeema pɛ le visioŋ dioo, la nɔla mi la dii chɔloo mi la de.+ Kanifuule, Chɛhowa Mɛlɛka nyaa cho nya salaa dɔwɔɔ o chieeŋ nyaŋ bɛndoŋ niŋ kpou.* Wana cho o diandaa le wo a wana cho o diandaa wo bɛɛ tiuba mbo de ndu, mɛɛ nya dia nuaa puuwɔɔ a kiallo yɛ. 16 Kɛ la nɔ mi la de koowaŋ te,+ la nɔ mi la tala maŋ lɛŋ maa mamɛŋ.+ 17 Nyɔɔŋ muŋ kinɛi, o tɔ ndɔɔ o tɔlɔɔla nyalaŋ choo, muɛima nyama sɛnɛiyaŋ, chuɛima nyaŋ, kɔmnde taseleŋ o chɔluaa nyaa tɛɛŋ,+ sala kɛ kɛ waŋndo chua buŋgɛi le nyɛ tosa, sala waŋndo pila kɛɛsiaŋ o kɔl le solioo wo, a toolula nyalaŋ kpou, la nɔ mi la de muŋ o chieeŋ nyaŋ bɛndoŋ niŋ* te. 18 Nya, puaa nyaa, chuaa nyaa laanduaa, buɛiyaa nyaa piaanduaa a buɛiyaa nyaa laanduaa, vɛlɛ a Livaiyaa cho o chieeŋ nyaŋ bɛndoŋ* niŋnda kpou, la nɔ mi la de nyɔɔŋ muŋ Chɛhowa Mɛlɛka nyaa lachi, o fondaŋ Chɛhowa Mɛlɛka nyaa cho hɛli wo.+ Nduyɛ mi la dɔɔnuŋ nyaale Chɛhowa Mɛlɛka nyaa lachi, le nyɛ o nyɛ nya tosa. 19 La mandaŋ, yɔŋii nya puɛɛnuŋ a Livaiya+ o lɛŋnde nya cho wa leŋ niŋ.

20 “Te Chɛhowa Mɛlɛka nyaa chɔɔlu pɛ tanda nyaa pɛŋgɛla+ a mɛɛ o chua buŋgɛi yɛ,+ okoŋ mi la yeema le visioŋ dioo, la tiuba mi la de muŋ teleŋ o teleŋ nya yeema pɛ.+ 21 Kɛ te o yɔŋ pɛ mi fondaŋ Chɛhowa Mɛlɛka nyaa hɛli le mi diola ndɔlaŋ la wa wo+ wa levil a nya, la nɔla mi la dii chɔluaa Chɛhowa ke nya wa apum a mɛɛ ya dimul nya yɛ, mi la de nda o chieeŋ nyaŋ bɛndoŋ* niŋ teleŋ o teleŋ nya yeema pɛ. 22 La nɔla mi la de nda mɛɛ nya dia nuaa puuwɔɔ a kiallo yɛ.+ Nduyɛ, wana cho o diandaa le wo a wana cho o diandaa wo bɛɛ nɔla mbo de nda. 23 Kɛ la kɛsiŋ o kɔl maa la nɔ mi la de koowaŋ te,+ kanifuule koowaŋ ma cho yoomoo ni.+ Nduyɛ la nɔ mi la de yoomoo a visioŋ latulu le. 24 La nɔ mi la de maŋ te. La nɔ mi la tala maŋ lɛŋ maa mamɛŋ.+ 25 La nɔ mi la de maŋ te, le halikpeŋ mi nyɛ o nyɛ wa o kɛndɛ a nya vɛlɛ a chuauwaa nyaa o nya kɔɔli, le mɛɛ nya cho nyɛ bɛnda Chɛhowa o hɔllo tosaa yɛ. 26 Te la wa pɛ hunɔɔ o fondaŋ Chɛhowa hɛli wo, nyɛm diandaŋ cho nya o ba woŋ, a salala nya chua buŋgɛi le nyɛ tosa laŋ kinɛi nya nɔ ni mi la hiŋ. 27 Loŋ nya nɔ ni mi la soli visioŋ a koowaŋ salala luamaa laŋ+ o bandu luamaa lasala Chɛhowa Mɛlɛka nyaa choo. Nduyɛ mi la tala kooma salala nyalaŋ o bandu luamaa lasala+ Chɛhowa Mɛlɛka nyaa bɛŋgu. Kɛ visiŋ ndɔŋ muŋ, la nɔla mi la de.

28 “La wa yekeŋ le sawala ya cho nya laŋ kioo laŋ kpou diikɔŋndo, le halikpeŋ mi nyɛ o nyɛ bɛnda a nya, vɛlɛ a puaa nyaa o nya kɔɔli, le mɛɛ nya cho nyɛ bɛnda nduyɛ mbo wa sakpo Chɛhowa Mɛlɛka nyaa o hɔllo tosaa yɛ.

29 “Te Chɛhowa Mɛlɛka nyaa tɛɛmbuu pɛ kaala nya cho laŋ lɛŋnde ndaleŋ hiɔlɔɔ laŋ,+ nduyɛ mi la chal loŋ, 30 la wa yekeŋ yɔŋii nya del o yaŋɔɔle ndaleŋ niŋ, te a sɔla pɛ tambei nya lachi. La kindiŋ bɛɛ pɛŋ le sinaa mɛɛ kaalaŋ ndaŋ laa sooluu mɛlɛkaa ndaa yɛ, okoŋ mi nya bɛɛ muliŋ nyɛ pilɛ koŋ kpe tosaa le.+ 31 Kanifuule, sɔɔŋ nda tosa le mɛlɛkaa ndaa woŋ, Chɛhowa tul muŋ leyɛ. Ma bii puaa ndaa a chuaa ndaa laanduaa, ma lom nda chilikɔ o yiŋ le mɛlɛkaa ndaa. La nɔ mi la tosa keŋ a Chɛhowa Mɛlɛka nyaa le.+ 32 Nyɛ o nyɛ ya dimul nya le tosaa, ndu nya nɔ ni mi la wa yekeŋ le tosaa.+ La nɔ mi la handu lechoo ɔɔ mi la faŋa le.+