Chɔɔsuaa
13 Chɔɔsuaa ndoo nɔ niŋ wɔsilaŋ tau, nduyɛ ndoo yuuwa niŋ.+ Le hei, mi Chɛhowa dimul ndu aa: “A nɔ niŋ wɔsilaŋ tau, nduyɛ a yuuwa niŋ. Kɛ lɛŋii nya nɔ mi la bii ve cho wɔ chalaŋ. 2 Lɛŋii lo ve cho hei ni:+ Tanda Filitiaŋnda a Kɛsiɔluaitiiya kpou.+ 3 Tandaa hoo wa chɔŋ o pioo Nail,* lɛuvii cho Ichipi ba paaleŋ le chaŋ ndo ve, mbo heelu o pɛŋgula Ɛkulɔŋ ndaŋ ba luaŋ ndo. Nduyɛ, waŋnda ndaa chua ndu maa tanda Kenanaitiiya o wa ni.+ Chieeŋ masaa ŋuɛɛnuaa Filitiaŋnda+ wa masaleŋ choo woŋ bɛɛ wa leniŋ. Muŋ cho ni: Kaasa, Asidɔɔ,+ Asikɛlɔŋ,+ Kaati,+ a Ɛkulɔŋ.+ Lɛŋnde Avim nda ba tou wo,+ 4 a lɛŋnde Kenanaitiiya kpou, a chɔŋ Mialuaa, chioo o Saidɔŋ niŋ,+ mbo kua Afɛki o pɛŋgula Amɔluaitiiya, 5 a lɛŋnde Kibalaitiiya,+ a lɛŋnde Lebanɔŋ ndeŋ ba paaleŋ le chaŋ ndo kpou, chɔŋ Baal-kadi o Pembii Hɛmɔŋ Nde bɛŋgu haaa mbo kua Lɛbo-hamaati,*+ 6 a wanaa cho o lɛŋnde ŋpembuleŋ chɔŋ Libanɔŋ+ kɔ Mɛsiluɛfɔti-mɛm+ nda, a waŋnda Saidɔŋ kpou.+ I cho wanaa cho o lɛŋnde hei niŋnda touwɔɔ Isɔluɛiya lachi.+ Nyɛ ŋ nɔ ma tosa kinɛiyo cho Isɔluɛiya lɛŋndeŋ ndeŋ piɔuwo ni, a mɛɛ ya dimul num yɛ.+ 7 A nɔ ma piɔu lɛŋndeŋ ndeŋ kaala ŋɔmahiɔɔlu la lo laŋ tɛɛŋ, a kaale Manaasɛ leŋ tɛndaa tɛɛŋ.”+
8 Kɛ kaale Manaasɛ leŋ kpeŋgei pilɛi, kaale Lubɛŋ ndeŋ, a kaale Kaadi leŋ, Muuse ndoo chii niŋ nda nyɛm kiɔɔŋ ke Chɔɔdaŋ leeloo ba paaleŋ le chaŋ ndo. Lɛŋii Muuse, buɛi Chɛhowa wo ke nda ve cho hei ni:+ 9 Chɔŋ Aloya,+ chiee cho o Kpoloŋndo Anɔŋ+ ikɛiyo, mbo kua o chiee cho o kpoloŋndo hoo niŋndo, a lɛŋnde dɛŋgbɛleŋ Mɛdiba kpou, haaa mbo kua Dibɔŋ, 10 a chieeŋ bɛnduŋ Saihɔŋ ndoŋ kpou, Masa Amɔluaitiiya o wa Hɛsibɔŋ ndo, mbo heelu a pɛŋgula Amɔnaitiiya,+ 11 a Kiliaadi, a tanda Kɛsiɔluaitiiya a Maakataitiiya,+ a Pembii Hɛmɔŋ Nde, a buŋgɛi Baasiaŋ nde+ haaa kɔ Salɛkaa,+ 12 a lɛŋnde Ɔku, masaa le Baasiaŋ wa masaleŋ choo leŋ kpou. Chieeŋ o wa mbo wa masaleŋ ndoŋ wa Asitalɔɔ a Ɛdului ni. (O wa wana pilɛ o wanaa fula o pulale Luɛfem ndeŋ choo ma lo yoomu wa tɛɛŋ.)+ Mi Muuse yam wanaa wa o lɛŋnde hei niŋnda, mbo soli nda loŋ po.+ 13 Kɛ Isɔluɛiya soli+ Kɛsiɔluaitiiya a Maakataitiiya o lɛŋndeŋ niŋ te. Haaa a paale hauleŋ ndeŋ, a cho wɔ Isɔluɛiya tɛɛŋ.
14 Kaale Livai leŋ kinɛi, Muuse ke nda nyɛm ŋkɛ le.+ Salala Isɔluɛiya luam o Chɛhowa Mɛlɛka ndaa lo laŋ la cho nyɛm kɛŋ ndaŋ ni,+ a mɛɛ o chuel nda buŋgɛi yɛ.+
15 Okoŋ, mi Muuse piɔu kaale Lubɛŋ ndeŋ lɛŋnde ndaleŋ* a yuŋgulaŋ kpɛ kpɛ. 16 Tanda ndaa wa chɔŋ Aloya, chiee cho o Kpoloŋndo Anɔŋ ikɛiyo, mbo kua o chiee cho o kpoloŋndo hoo niŋndo, a lɛŋnde dɛŋgbɛleŋ o pembei choo Mɛdiba ikɛi, 17 a Hɛsibɔŋ vɛlɛ a chieeŋ ndɔŋ+ cho o lɛŋnde dɛŋgbɛleŋ o pembei choo woŋ kpou, a Dibɔŋ, a Bamɔti-baal, a Bɛti-baal-miɔŋ,+ 18 a Chahasi,+ a Kɛdɛmɔti,+ a Mɛfaati,+ 19 a Kiliaatim, a Sibima,+ a Sɛluɛti-siahaa o cho o pembei choo o kpoloŋndo* ikɛiyo, 20 a Bɛti-piɔɔ, a lɛŋnde holnuŋ Pembei Pisika leŋ,+ a Bɛti-chɛsimɔti,+ 21 a chieeŋ bɛnduŋ cho o lɛŋnde dɛŋgbɛleŋ o pembei choo woŋ kpou, a lɛŋnde Saihɔŋ, masa Amɔluaitiiya wa masaleŋ choo leŋ. Chiee o wa ichali wo wa Hɛsibɔŋ ni.+ Mi Muuse yam ndu+ a masaa Midianaitiiya haa: Ivi, Luɛkɛm, Sɔu, Hɔɔ, a Luɛba.+ Masaa wa haa o lɛŋnde leŋ niŋnda kpou, Saihɔŋ o ba bɛŋgu nda wa ni. 22 Belam+ wana viamaa layawaa,+ po Biyɔɔ wo bɛɛ, o wa waŋndo o pilɛ o wanaa Isɔluɛiya diu a mɔɔŋ faŋndoŋ nda tɛɛŋ. 23 Wanaa fula o kaale Lubɛŋ ndeŋ choo wa, pioo Chɔɔdaŋ wa pɛŋgula ndalaŋ ni. Nduyɛ, tanda hoo kpou wa nyɛm kɛŋ ndaŋ ni, a chieeŋ bɛnduŋ wa loŋ ndoŋ vɛlɛ a sɔndɔkɔltaŋ.
24 Okoŋ kɔɔli, mi Muuse ke kaale Kaadi leŋ lɛŋndeŋ le ndaleŋ. Nduyɛ mbo piɔu leŋ a yuŋgulaŋ kpɛ kpɛ. 25 Tanda ndaa wa hoo ni: Chasɛɛ+ a chieeŋ bɛnduŋ cho o Kiliaadi niŋndoŋ kpou, a lɛŋnde Amɔnaitiiya tɛndaa tɛɛŋ+ haaa kɔ Aloya, chiee cho Luaba+ ikɛiyo, 26 a chɔŋ Hɛsibɔŋ+ kɔ Luamati-misipa a Bɛtɔnim, a chɔŋ Mahanɛm+ kɔ o pɛŋgulaŋ Dɛbiluii. 27 Nduyɛ chieeŋ wa o dɛŋgbɔɔ niŋndoŋ cho muŋ ni: Bɛti-haluaŋ, Bɛti-nimilua,+ Sukɔti,+ a Safɔŋ. Chiooŋ muŋ kpou, Masaa Saihɔŋ, o wa Hɛsibɔŋ ndo o ba bɛŋgu ŋ wa ni.+ Pɛŋgula lɛŋnde ndaleŋ la holnuŋ pioo Chɔɔdaŋ ba paaleŋ le chaŋ ndo ni, mi la kua haaa o Pioo Kinɛluɛti*+ amatou. 28 Yuŋgula fula o kaale Kaadi leŋ choo laŋ, lɛŋnde nda sɔla maa nyɛm ŋkɛ leŋ le wa leŋ ni, a chieeŋ bɛnduŋ wa loŋ ndoŋ vɛlɛ a sɔndɔkɔltaŋ.
29 Okoŋ kɔɔli, mi Muuse ke kaale Manaasɛ leŋ tɛndaa tɛɛŋ lɛŋndeŋ le ndaleŋ. Nduyɛ mbo piɔu leŋ a yuŋgulaŋ kpɛ kpɛ.+ 30 Tanda ndaa wa hoo ni: Chɔŋ Mahanɛm+ mbo kua a buŋgɛi Baasiaŋ nde kpou, lɛŋnde Masaa Ɔku, o wa Baasiaŋ ndo wa masaleŋ choo leŋ, a sɔndɔkɔlta Chaa laŋ kpou+ o Baasiaŋ niŋ. Tanda ndaa ndoo nɔ chiooŋ 60. 31 Buŋgɛi Kiliaadi ve tɛndaa tɛɛŋ, a Asitalɔɔ a Ɛdului,+ chieeŋ bɛnduŋ Ɔku, masaa le Baasiaŋ wa mbo wa masaleŋ ndoŋ, ma chua muŋ ma ke puaa Makaya wa+ a tiŋ a yuŋgulaŋ kpɛ kpɛ. Makaya koŋ yɛ, po Manaasɛ wo o wa ni.
32 Nyɛm kɛŋ Muuse ke kaalaŋ ndaŋ Chɔɔdaŋ leeloo woŋ wa muŋ ni. A wa o pollo niŋ o lɛŋnde dɛŋgbɛleŋ Mowaabi, Chɛluiko ba paaleŋ le chaŋ ndo mbo ke nda muŋ.+
33 Kɛ kaale Livai leŋ ndeŋ, Muuse ke nda nyɛm ŋkɛ le.+ Chɛhowa, Mɛlɛka Isɔluɛiya cho nyɛm kɛŋ ndaŋ ni, a mɛɛ o chuel nda buŋgɛi yɛ.+