Chɔɔsuaa

18 Okoŋ, mi Isɔluɛiya kpou chuuŋgiaŋ Silɔɔ,+ ma taŋgul tɛndii bɔŋaŋndo loŋ.+ Kanifuule, lɛŋndeŋ le wa nda niŋ o ba bɛŋgu.+ 2 Kɛ kaalaŋ la ŋɔmmɛu laa lo wɔ Isɔluɛiya tɛɛŋ ni le lɛŋndeŋ sɔlaa. 3 Le hei, mi Chɔɔsuaa dimul Isɔluɛiya aa: “Yɛɛ nya cho yɛ chumndo le kɔlaŋ lɛŋnde Chɛhowa, Mɛlɛka finyaa nyaa mamaa ke nya leŋ chuaa?+ 4 La hɛli puaa a yaa o kaale kɛ kɛ niŋ mi vem nda. A nɔ ma kɔ balu o lɛŋndeŋ niŋ kpou ma tuuliaa leŋ o yauwo choo mɛɛ wana o wana nɔ le sɔlaa yɛ. Okoŋ, ma miiŋgu ya o ibuŋ. 5 A nɔ ma kili leŋ buŋgaŋ ŋɔmmɛu le ndapila.+ Chuda cho wa o buŋgɛi nduɛi niŋ ba tou wo,+ nduyɛ mi yuŋgu Choosɛ wo wa o buŋgɛi nduɛi niŋ ba luaŋ ndo.+ 6 Kɛ nya, la kɔ mi la tuuliaa lɛŋndeŋ o yauwo choo buŋgaŋ ŋɔmmɛu, mi la chuu ya yau koŋ. Okoŋ, mi wuu kooŋ+ Chɛhowa Mɛlɛka naa lachi nanuŋ, le nya leŋ piɔuwo. 7 Kɛ Livaiya nda, a cho nda lelɛŋ ke le.+ Kanifuule, Chɛhowa hɛli nda le ma wa salalaŋ solioo, nduyɛ nyɛm ndaŋ kiɔɔŋ cho muŋ ni.+ Kaale Kaadi leŋ, kaale Lubɛŋ ndeŋ, a kaale Manaasɛ leŋ tɛndaa tɛɛŋ,+ Muuse buɛi Chɛhowa wo chii nda niŋ lɛŋndeŋ ke Chɔɔdaŋ leeloo ba paaleŋ le chaŋ ndo.”

8 Mi puaa haa bɛɛndiaŋ le kɔlaŋ lɛŋndeŋ tuuliaa o yauwo choo. Okoŋ mi Chɔɔsuaa dimul nda aa: “La kɔ balu o lɛŋndeŋ niŋ kpou, mi la tuuliaa leŋ o yauwo choo, okoŋ mi la miiŋgu ya o ibuŋ. Te la hiŋ pɛ, I cho kooŋ wuu Silɔɔ nanuŋ Chɛhowa lachi, le nya leŋ piɔuwo.”+ 9 Mi puaa haa kua ma kɔ balu o lɛŋndeŋ niŋ. Ma tuuliaa leŋ a chiooŋ o yauwo choo buŋgaŋ ŋɔmmɛu, ma poonyiaa kona koŋ o yauwo niŋ. Mɛɛ nda chii, ma miiŋgu o Chɔɔsuaa lo, o dɔɔŋgɔɔ niŋ Silɔɔ. 10 Mi Chɔɔsuaa wuu kooŋ le nda Chɛhowa lachi Silɔɔ loŋ.+ Nduyɛ, mbo piɔu Isɔluɛiya lɛŋndeŋ mɛɛ wana o wana nɔ mbo sɔla yɛ.+

11 Mi kooŋ del le yuŋgula fula o kaale Bɛŋjamiŋ ndeŋ choo laŋ. Nduyɛ, o buŋgɛi Chuda ve+ a o buŋgɛi Choosɛ ve tɛɛŋ nda sɔla buŋgɛi ni.+ 12 O Chɔɔdaŋ ndaŋ pɛŋgula ndalaŋ la kanduŋ ba luaŋ ndo ni. Nduyɛ, mi la heelu mi la holnuŋ pembii cho Chɛluiko ve+ ba luaŋ ndo, mi la kua haaa o pembei ba paaleŋ le del lo. Okoŋ, mi la timbulaŋ a pollo Bɛti-aviŋ.+ 13 Mɛɛ la chɛŋ loŋ, mi la kua Luusi ba tou wo o pembei holnɔŋndo, koŋ cho ni, Bɛtɛl.+ Okoŋ, mi pɛŋgulaŋ ndaŋ la tuusu Atalɔti-ada+ o pembii cho Bɛti-hɔlɔŋ Amatou ve. Bɛti-hɔlɔŋ koŋ ba tou wo pembei hei cho ni.+ 14 Ba paaleŋ le del lo ndu, mi pɛŋgula ndalaŋ la tunduŋ ba tou wo, chɔŋ o pembii cho keŋ Bɛti-hɔlɔŋ ba tou wo ve, mi la tuusu Kiliaati-baal, koŋ cho ni Kiliaati-chiaaluim.+ O buŋgɛi Chuda ve niŋ chioo hoo cho ni. Pɛŋgula ndalaŋ ba paaleŋ le del lo la wa laŋ ni.

15 Kiliaati-chiaaluim mɛɛlulaŋ pɛŋgula ndalaŋ la kanduŋ ba tou wo ni, mi la kua ba paaleŋ le del lo, haaa o pioo Nɛfitowaa.+ 16 Mi pɛŋgulaŋ ndaŋ la tuusu mi la kua o mɛɛlula pembii cho o Kpoloŋ Po Hinɔm Ndo+ ikɛiye, o Kpoloŋndo* Luɛfem+ ba luaŋ ndo. Nduyɛ mi la tuusu o Kpoloŋndo Hinɔm, mi la kua o pembii Chɛbusaitiiya holnɔŋndo+ ba tou wo. Okoŋ, mi la kɔ del o pioo Ɛŋ-lokɛɛ.+ 17 Mɛɛ la chɛŋ loŋ, mi la heelu ba luaŋ ndo, mi la kua o pioo Ɛŋ-siɛmɛsi. Chɔnɔŋndo loŋ, mi la kua Kɛlilɔti, o cho o nɛi heelu Adumim ndo,+ mi la tunduŋ mi la kua o pou+ Bohaŋ+ ndo. Bohaŋ koŋ yɛ, Lubɛŋ velu ndu ni. 18 Mi pɛŋgulaŋ ndaŋ la holnuŋ pembii cho ba luaŋ ndo o tanda Aluaba wo ikɛiye, nduyɛ mi la tuusu mi la kua o tanda Aluaba wo niŋ. 19 Okoŋ, mi la holnuŋ pembii cho Bɛti-hɔkila ve ba luaŋ ndo,+ mi la kɔ mɛɛlu o kɔŋgɔ Pee Nyɛ Yoomaa Cho Leniŋ Te Wo ba luaŋ ndo,+ naa Chɔɔdaŋ ndaŋ ma del o pioo hoo choo wa. Pɛŋgula wa ba tou wo laŋ la wa laŋ ni. 20 Chɔɔdaŋ ndaŋ ma wa pɛŋgulaŋ ba paaleŋ le chaŋ ndo ni. Lɛŋnde yuŋgula fula o pulale Bɛŋjamiŋ ndeŋ choo laŋ la sɔla leŋ le wa leŋ ni, a pɛŋgula ndalaŋ la balaa silɔ.

21 Yuŋgula fula o kaale Bɛŋjamiŋ ndeŋ choo laŋ, chieeŋ ndaŋ bɛndoŋ cho muŋ ni: Chɛluiko, Bɛti-hɔkila, Ɛmɛki-kɛsi, 22 Bɛti-aluaba,+ Sɛmaluem, Bɛtɛl,+ 23 Avim, Paluaa, Ofiluaa, 24 Kɛfa-amɔni, Ofini, a Kiba.+ Chieeŋ bɛndoŋ 12 a sɔndɔkɔlta balu muŋ ndaŋ.

25 Kibiɔŋ,+ Luama, Biaalɔti, 26 Misipɛ, Kɛfiluaa, Moosa, 27 Luɛkɛm, Ilipiɛɛ, Taluala, 28 Sɛlai,+ Ha-ɛlɛfi, Chɛbusi, koŋ cho ni Chulusalɛm,+ Kibiya+ a Kiliaati. Chieeŋ bɛndoŋ 14 a sɔndɔkɔlta balu muŋ ndaŋ.

Lɛŋnde yuŋgula fula o pulale Bɛŋjamiŋ ndeŋ choo laŋ la sɔla leŋ le wa leŋ ni.