Saamiɛɛ Tasoo

26 Mɛɛ teleŋ tiŋ hiou, mi puaa Sifi+ kua naa Sɔɔ chua Kibiya,+ ma dimul ndu aa: “Fallo, Deeve cho o viaŋnaŋ o pembii Hakilaa ve, Chɛsimɔŋ ikɛi.”*+ 2 Okoŋ mi Sɔɔ chaŋ mbo hɛli puaa 3,000 o Isɔluɛi niŋ, ma kua Deeve nuuviaa o pollo niŋ Sifi.+ 3 Mi Sɔɔ kɔ kila dɔɔŋgɔɔ o pembii Hakilaa ve, Chɛsimɔŋ ikɛi, o nɛiyo daŋgala. A teleŋ koŋ, Deeve wa o pollo niŋ mbo tuɛi maa Sɔɔ hiŋ ndu nuuviaa loŋ. 4 Okoŋ, mi Deeve viam suaŋsuaŋnda le sinaa te Sɔɔ hiŋ pɛ loŋ lekɛndɛi. 5 Mɛɛ teleŋ tiŋ hiou, mi Deeve kua o dɔɔŋgɔ Sɔɔ wo. Mbo cha fonda Sɔɔ a Abina+ po Nɛɛ wo, masa puaa chɔuwaa Sɔɔ wa wa ihini wo. Sɔɔ waŋnuŋ o luaŋ yikpi o dɔɔŋgɔɔ niŋ, nduyɛ puaa chɔuwa wa ndu a balaa silɔ. 6 Okoŋ mi Deeve nyuna Ahimɛlɛki, Hitaitiinɔɔ,+ a Abisiaa+ po Sɛluiya wo,+ bɛndoo Chowaabi aa: “O nɛɛnɛ cho yɛ ya liila o dɔɔŋgɔ Sɔɔ wo?” Mi Abisiaa muli aa: “I cho num liila.” 7 Mi Deeve nda Abisiaa kua o dɔɔŋgɔ Sɔɔ nda puaa nduaa wa wo a nyumndaŋ. A komal Sɔɔ ihini o luaŋ yikpi puaa nduaa chɔuwa tɛɛŋ. Bal ndɔɔ wa ndu o chuaŋaa o bolleŋ ikɛi. Nduyɛ Abina a puaa chɔuwa apiliaa kpou waŋnuŋ ihini ndu a balaa silɔ.

8 Okoŋ mi Abisiaa dimul Deeve aa: “Paale hauleŋ ndeŋ, Mɛlɛka mal num yaamɔɔnɔ numndo o ba.+ Lelaŋ a yandii, chɛl la mi chuku ndu a ballo le pilɛ kpe. Diiŋ ndɔɔ bɛɛ I peelu le.” 9 Kɛ mi Deeve dimul Abisiaa aa: “Yɔŋ ndu nyɛ o nyɛ le. O nɛɛnɛ kpeekpei tosallɛ wana Chɛhowa pɔya wo+ suɛi wɔɔŋnde, mbo yiyaŋ maa tɔɔyaŋ o tɔɔyaŋ ve ndu choo le?”+ 10 Mi Deeve hiau lachi a dimioo aa: “I mɛnaŋ po o Chɛhowa, Mɛlɛka cho yoomu wo lo maa, Chɛhowa pila cho ndu diyɔɔ+ ɔɔ paale wa niŋ+ mbo vi. Te koŋ te, mbo kuɛ o chɔuwo ma kɔ dii ndu.+ 11 Pesiŋ bɛɛ Chɛhowa chɛl le mi hol wana ndu Chɛhowa pɔya wo baa le!+ Lelaŋ a yandii, chua bal cho ndu o bolleŋ ikɛiyo a nyɛ ndɔ wouwaa mamɛŋndo miŋ kuɛŋnuŋ.” 12 Okoŋ mi Deeve chua ballo a nyɛ wouwaa mamɛŋ wa Sɔɔ o bolleŋ ikɛiyo, ma kuaŋnuŋ. Wana o wana chi nda+ ɔɔ mbo sina nyɛ nda tosa wo le. Sɔɔ nda puaa nduaa kpou waŋnuŋ o luaŋ nduyɛ wana pilɛ bɛɛ tindu le, kanifuule mi Chɛhowa tosa ma hiaunuŋ o luaŋ yikpi. 13 Okoŋ mi Deeve taŋ kpoloŋndo kumbuei i pilɛi, mbo kɔ sim o pembii bɛnduei choo pɔɔli. Nduyɛ fondaa wa nda tɛɛŋ chalaŋ.

14 Mi Deeve veelu puaa chɔuwa a Abina+ po Nɛɛ wo choo choo kpeleŋ aa: “Abina, a cho ya tueiyɔɔ?” Mi Abina muli aa: “O nɛɛnɛ cho yɛ deŋi koŋ mbo wa masaa paaliaŋndo?” 15 Mi Deeve nyuna Abina aa: “Baa o cho wana pɔnɔɔ le ŋ cho le? O nɛɛnɛ kpeekpei cho yɛ maa num o Isɔluɛi niŋ? Vɛ a kɛsi masanɔ numndo hɔlteŋ choo le? Kanifuule, mi puaa chɔuwa o pilɛ kua o dɔɔŋgɔ nyaa niŋ le masanɔ numndo diyɔɔ.+ 16 A tosa suɛi kɛndɛ kposoŋ te. I mɛnaŋ po o Chɛhowa, Mɛlɛka cho yoomu wo lo maa, a nɔ ma sɔla piɔmndo, kanifuule a kɛsi masanɔ numndo, wana Chɛhowa pɔya wo+ hɔlteŋ choo le. Mɛɛndaŋndɔ loŋ! Kuɛɛnɛ bal masaa a nyɛ ndɔ wouwaa mamɛŋ+ wa ndu o bolleŋ ikɛiyo cho yɛ?”

17 Okoŋ mi Sɔɔ sina maa Deeve wa suɛi ni, mbo nyuna aa: “Po nuu Deeve, baa diom numndo ya cho hoo tueiyɔɔ ni?”+ Mi Deeve muli aa: “Ei masanɔ nuu, ya cho suɛi ni.” 18 Mi Deeve chɔɔlu dimi aa: “Le yɛɛnɛ masanɔ nuu cho yɛ buɛi ndɔɔ kiltaŋ kɔɔli?+ Yɛɛnɛ kpeekpei ya tosallɛ num, nduyɛ suɛi wɔɔŋ yɛɛ ya tosallɛ num?+ 19 A yandii masanɔ nuu, yaŋ buɛi numndo nilaŋ. Te Chɛhowa nyindu num ni le ya kiltaŋ kɔɔli, mɛɛ o chɛl* sala ni ŋkullo. Kɛ te waŋnda chieeya ni,+ maa Chɛhowa handu nda sendioo choo, kanifuule a tou ya hau mi kɛɛ le waa latulu a nyɛm kɛŋ Chɛhowa woŋ.+ Ma dimi aa: ‘Kɔ piɛi mɛlɛkaa cheleŋnda!’ 20 Tosa mi vi* o lɛŋnde isumialteŋ niŋ landaŋ a Chɛhowa le. Masaa Isɔluɛi fula ya nyɛ fondoo hoo+ touwɔɔ mɛɛ wana wa nuaa youwo* touwɔɔ o pembuŋ bɛndoŋ choo yɛ.”

21 Okoŋ mi Sɔɔ dimi aa: “I tosa hakioo.+ Po nuu Deeve, yandii miiŋgu ya o bɛŋgu choo. I cho lɛ num nyɛ o nyɛ wɔɔŋ tosal te, kanifuule a chua yoomu nuu paale hauleŋ ndeŋ nyɛ sɔvɛ bɛndu.+ A tonya, I tosa diɔmnde, nduyɛ mi tosa biondɔŋ bɛndoo.” 22 Mi Deeve muli aa: “Mi che bal numndo nanuŋ fallo masaa. Viom puaa numnda o pilɛ mbo huŋ chua. 23 Chɛhowa cho wana o wana paawa* le sandii nduɛi+ a lo lechoo ndɔɔ. Kanifuule o paale hauleŋ ndeŋ choo, mi Chɛhowa mal num ya o ba. Kɛ mi kɛɛ le wana Chɛhowa pɔya wo baa holɔɔ.+ 24 Mɛɛ yoomu numndo wa o sɔvɛ ya o hɔl paale hauleŋ ndeŋ yɛ, maa yoomu nuu wa o sɔvɛ Chɛhowa o hɔl, nduyɛ mbo piŋi ya o kpundɛlaŋ ndaŋ niŋ kpou.”+ 25 Mi Sɔɔ mulul Deeve aa: “Maa salaa wa num choo, Deeve po ni. A cho sɔɔŋ kɔndɔfiliŋ bɛndoŋ tosa, nduyɛ ma sɔla batiuwaa.”+ Okoŋ mi Deeve kuaŋnuŋ, nduyɛ mi Sɔɔ bɛɛ miiŋguŋ o ndu lo.+