Saamiɛɛ Tasoo

29 Mi Filitiaŋnda+ chuuŋgiaa puaa ndaa chɔuwa kpou Afɛki, nduyɛ Isɔluɛiya bɛɛ wa o dɔɔŋgɔɔ o pioo ikɛi Chɛsiluɛɛ.+ 2 Waŋ banaa Filitiaŋnda wa hiouwɔɔ a puaa ndaa chɔuwa o kɛmɛlaŋ niŋ a o waalaŋ niŋ. Nduyɛ Deeve nda puaa nduaa, vɛlɛ a Akisi wa nda kɔlaŋ kɔɔli.+ 3 Kɛ mi waŋ banaa Filitiaŋnda nyuna aa: “Yɛɛnɛ Hibuluiya haa hiŋ yɛ tosaa nanuŋ?” Mi Akisi mulul waŋ banaa Filitiaŋnda aa: “Deeve cho hoo ni, buɛi masaa Sɔɔ wo Isɔluɛi. O cho niŋ ya o bɛŋgu choo le wɔsioo a nyɛ lechoo.+ Nduyɛ, chɔŋ a paale o hiŋ o ya lo leŋ huŋ bii a paale hauleŋ ndeŋ, I chi sɔŋ o sɔŋ o ndu niŋ te.” 4 Kɛ mi waŋ banaa Filitiaŋnda duaunuŋ tumbe tau a ndu, ma dimul ndu aa: “Tosa mi poo hoo miiŋgu.+ O miiŋgu o fondaŋ ŋ ke ndu wo. Chɛl ndu mbo kuɛ naa kɔɔli o chɔuwo le, yɔŋii o kɔ mululaŋ naa.+ Vɛɛ kpeekpei o nɔla yɛ mbo nɛŋi masanɔ ndɔɔ kɔl te o cho a bolii puaa naa le? 5 O cho a Deeve hoo okɔɔ le waŋnda wa chondei solioo a yolaŋ ma dimi aa:

6 Mi Akisi+ veelu Deeve mbo dimul ndu aa: “I mɛnaŋ po o Chɛhowa, Mɛlɛka cho yoomu wo lo maa, wana sakpoo ŋ cho ni. Nduyɛ, yeemɛi nii wa le mi num oo kuɛ o chɔuwo a puaa niaa chɔuwa latulu ni.+ Kanifuule, chɔŋ a paale ŋ hiŋ o ya lo leŋ huŋ bii a paale hauleŋ ndeŋ, I chi sɔŋ o sɔŋ o num niŋ te.+ Kɛ waŋ banaa Filitiaŋnda laalaŋ a num te.+ 7 Lelaŋ miiŋguŋ, nduyɛ tosa nyɛ o nyɛ le ma tɛɛmbuu waŋ banaa Filitiaŋnda kɔl te.” 8 Kɛ mi Deeve nyuna Akisi aa: “Le yɛɛnɛ? Yɛɛnɛ ya tosa yɛ? Chɔŋ a paale ya hiŋ o numndo leŋ huŋ bii a paale hauleŋ ndeŋ, suɛi wɔɔŋ kuɛɛ buɛi numndo tosallɛ num? Masanɔ nuu, le yɛɛnɛ I kue a num latulu mi kɔ sɔŋga a yaamɔɔwaa numnda le?” 9 Okoŋ mi Akisi mulul Deeve aa: “Le ya ndu, a cho wana kɛndɛ maa maalikɛinɔ Mɛlɛka wo.+ Kɛ waŋ banaa Filitiaŋnda dimi aa, ‘Chɛl ndu mbo kuɛ a naa latulu o chɔuwo le.’ 10 Lelaŋ siɔdii idii puŋ, dimioo nuaa mi nyɔɔ teŋga, a chua puaa nya hiŋ latulu wa, la miiŋguŋ.”

11 Okoŋ mi Deeve nda puaa nduaa pena chɔnɔŋ puŋ, ma miiŋguŋ o lɛŋnde Filitiaŋnda niŋ, nduyɛ mi Filitiaŋnda kua Chɛsiluɛɛ.+