Masaa Diiŋ Nduaa

23 Okoŋ, mi masaa veelu waŋ banaa Chuda a haa Chulusalɛm kpou naapilɛ.+ 2 Okoŋ kɔɔli, mi masaa, puaa Chuda a waŋnda o Chulusalɛm niŋ kpou, wanaa soliaa lasalaa, wanaa suaa le Mɛlɛka wa, a wana o wana, chuaambɔ ni, bɛndu ni, ma kua latulu o chiɛi Chɛhowa wo. Mbo veelu diomndaŋ o yau+ kpema+ nda saaluŋ o chiɛi Chɛhowa wo+ niŋndo, mi nda kpou tuɛi. 3 Mi masaa sim o suŋgbuleŋ ikɛi mbo yii kpemaa* Chɛhowa o hɔl.+ Mbo chua buŋgɛi maa nyɛ o nyɛ cho o poonyiaa o yau kpemaa hoo niŋ, o cho ndu tosa, mbo tol Chɛhowa kɔɔli, mbo tosa nyɛ o dimi wo, nduyɛ mbo bii sawala ndɔlaŋ a kɔl ndɔɔ kpou vɛlɛ a yoomu* ndɔɔ kpou. Okoŋ, mi waŋnda kpou chɛl le tosaa nyɛ dimiŋ o kpemaa hoo niŋndo.+

4 Okoŋ, mi masaa dimul Hilikaya+ masa wanaa soliaa lasalaa, wanaa soliaa lasala ndaa nɔ foofo diiŋ ndɔɔ wa, a wanaa manda diolaŋ nda le ma soli nyɛm laanduŋ ndaa toosiaa le Baal, suŋgbule iyɔm ndeŋ,*+ a le nyɛm Mɛlɛka toosiaa o choo choo niŋndoŋ sooluuwo woŋ o chiɛi Chɛhowa wo niŋ. Ma faŋa muŋ Chulusalɛm, ma kɔ lom muŋ o kpoloŋndo Kidilɔŋ. Nduyɛ ma chua pulta laŋ, ma kua a laŋ Bɛtɛl.+ 5 Mbo tuau wanaa soliaa lasala ndaa soli salalaŋ o mɛlɛkaa cheleŋnda lo wa. Waŋnda haa masaa keeku Chuda wa ndaa yulu iso ni, le salalaŋ solioo o fondaŋnda filioŋndaŋ o chieeŋ bɛndoŋ niŋ Chuda, a fondaŋnda balu Chulusalɛm ndaŋ. Nda koni ndaa soli vɛlɛ salalaŋ o Baal lo ni, paaleŋ, paŋgei, looŋ kundaŋ a nyɛ o nyɛ cheleŋ Mɛlɛka toosiaa o choo choo niŋ.+ 6 Mbo soli suŋgbule iyɔm ndeŋ*+ o chiɛi Chɛhowa wo niŋ, mbo kua a leŋ Chulusalɛm chiee lekɔɔ, mbo kɔ lom ndeŋ+ o Kpoloŋndo Kidilɔŋ. Mi le simnuŋ pultaŋ, nduyɛ mbo saŋ ndaŋ o sɛila wanaa bala fonduaa.+ 7 Chiɛila wa o chiɛi Chɛhowa wo niŋ, mi waŋ piaanduaa ndaa kei hinilaŋ a chaaŋaa ndaa waŋ piaanduaa+ leniŋ ndaŋ, mbo tɛɛmbuu vɛlɛ laŋ. Loŋ waŋ laanduaa ndaa luaa tɛndiilaŋ ni le suŋgbule iyɔm ndeŋ* sooluuwo.

8 Mbo soli wanaa soliaa lasalaa wa o chieeŋ bɛndoŋ Chuda niŋnda kpou. Nduyɛ mbo tosa, fondaŋnda filioŋnda ndaa soli salalaŋ o mɛlɛkaa ndaa lo chɔŋ Kiba+ haaa Biaa-siɛba+ laŋ, laa bɛnda lɛ le salalaŋ solioo le. Mbo tɛɛmbuu vɛlɛ fondaŋnda filioŋnda diola kpakila wa le luɛiyɔɔ o dio kpaki Chɔɔsuaa wo laŋ, masa chioo. Nduyɛ te waŋndo ndoo wa luɛiyɔɔ pɛ, o ba miallo choo la wa ni. 9 Wanaa soliaa lasalaa ndaa soli salalaŋ o fondaŋnda filioŋndaŋ nda, ndaa soli lɛ salalaŋ o bandu luamaa lasala Chɛhowa wo choo Chulusalɛm te.+ Kɛ mi ndaa de beedii nɔ yiisii* leniŋ te wo nda puaapiliaa ndaa latulu. 10 Mbo tɛɛmbuu vɛlɛ Tofɛti,+ o wa o Kpoloŋ Puaa Hinɔm Nda*+ niŋndo, le halikpeŋ wana o wana soli lɛ po ndɔɔ ɔɔ chua ndɔɔ sala o yiŋndeŋ niŋ o Molɛki lo le.+ 11 Mbo kuuna suaa masaa keeku o Chuda niŋnda yɔŋgu o mɛlɛka lepaa wo lo wa luɛiyɔɔ o chiɛi Chɛhowa wo niŋ. O lumui* Netaŋ-mɛlɛki wo, wana banaa o pilɛ o chiɛi lemasaa niŋ, o wa o chiɛi masuŋgboo ikɛiyo suaa haa ndaa keeku ni. Nduyɛ mbo luam nyɛm nyaanaŋ suaa naŋndoŋ, ŋ ndaa yɔŋgu o mɛlɛka lepaa wo lo woŋ+ chilikɔ. 12 Mi masaa pesi pesi vɛlɛ bandula luamaa lasalala masaa keeku o Chuda niŋnda ndaa toosiaa o chiɛi Ehaasi wo, o lumui wa amaluaŋ ndo.+ Nduyɛ mbo tɛɛmbuu vɛlɛ bandula luamaa lasalala Manaasɛ ndoo toosiaa o luŋnda tiɔɔŋnda wa o chiɛi Chɛhowa wo laŋ.+ Mbo chuii laŋ mululu, nduyɛ mbo kuandu nyɛ chuiyaa koŋ mbo saŋ ndu o Kpoloŋndo Kidilɔŋ. 13 Mi masaa tosa, fondaŋnda filioŋnda wa Chulusalɛm hɔlndɔ o Pembii Ɔlifiive* ba tou wo* laŋ, laa bɛnda lɛ le mɛlɛkaa ndaa sooluuwo le. Sɔlɔmɔŋ, masaa le Isɔluɛi ndoo taŋgul taŋ ni le mɛlɛkaa haa: Asitɔluɛɛ mɛlɛka laandu nɔɔlɛi Saidoniaŋnda, a Kɛmɔɔsi mɛlɛka nɔɔlɛi Mowabaitiiya, a Milikɔm+ mɛlɛka wɔɔŋ wɔɔŋ Amɔnaitiiya.+ 14 Mbo pesi pesi suŋgbuma nda toosiaa a poutaŋ ndaŋ, nduyɛ mbo tɛɛmbuu suŋgbuma nda toosiaa a yɔmnde waŋ.*+ Okoŋ, mbo tosa vɛlɛ mi fondaŋnda ndalaŋ la pia cha a paala waŋnda chieeya. 15 Mbo tɛɛmbuu vɛlɛ bandu luamaa lasalaa Bɛtɛl, fondaŋ filioŋ Chɛlobowam po Nebati wo ndoo toosiaa, mbo tosa mi Isɔluɛiya luei balaŋ o yɔŋ wɔɔŋndo niŋndo.+ Mɛɛ o pesi bandu luamaa lasalaa a fondaŋ filioŋ koŋ, mbo luam fondaŋ koŋ, mbo chuii ndu mululu, nduyɛ mbo luam suŋgbule iyɔm ndeŋ.*+

16 Mɛɛ Choosaya muliŋ mbo cha sɛilaŋ o pembei choo, mbo tosa ma soli paala wa o sɛila laŋ niŋndaŋ, ma luam ndaŋ o bandu luamaa lasalaa choo. Nduyɛ mbo tosa laa bɛnda lɛ le salalaŋ solioo le. Mi wana Mɛlɛka tonyaa ndoo dimi maa sɔɔŋ muŋ nɔ le yɔŋnɔŋndo. Nduyɛ, miŋ yɔŋnuŋ mɛɛ Chɛhowa dimi yɛ.+ 17 Okoŋ mi Choosaya nyuna aa: “Sɛi nɛɛnɛ cho yɛ koŋ nda?” Mi puaa o chiee koŋ niŋ mulul ndu aa: “Sɛi wana Mɛlɛka tonyaa, o fula Chuda wo.+ Sɔɔŋ ŋ tosa muŋ a bandu luamaa lasalaa Bɛtɛl loŋ, ndu dimi a muŋ okɔɔ ni.” 18 Okoŋ mbo dimi aa: “La mal ndu loŋ yɛlɛkɛlɛɛ. Wana o wana pilaŋ paala ndɔlaŋ te.” Lelaŋ, a pilaŋ paala ndɔlaŋ te, nduyɛ a pilaŋ vɛlɛ paala wana suaa le Mɛlɛka wo, o fula Sameeliaa wo le.+

19 Mi Choosaya faaŋiaa vɛlɛ chiɛila wa o fondaŋnda filioŋndaŋ le mɛlɛkaa ndaa sooluuwo laŋ, o chieeŋ bɛndoŋ Sameeliaa niŋ kpou.+ Chiɛilaŋ ndaŋ masaa keeku Isɔluɛiya taŋgul ni le Mɛlɛka kɔllo tɛɛmbuuwo. Mɛɛ o tosa a Bɛtɛl lɛ koni o tosa a chiɛilaŋ ndaŋ ni.+ 20 Mbo soli wanaa soliaa lasalaa wa le fondaŋnda filioŋndaŋ nda kpou salaa o bandula luamaa lasalalaŋ choo. Nduyɛ, mbo luam paala waŋnda chieeya o bandula laŋ choo.+ Okoŋ kɔɔli, mbo miiŋgu Chulusalɛm.

21 Mi masaa dimul niko waŋnda kpou aa: “La bii Bɔŋaŋ Hiouwɔɔ Choo Wo+ le Chɛhowa Mɛlɛka nyaa, a mɛɛ i cho i poonyiaŋ o yau kpemaa hoo niŋ yɛ.”+ 22 Chɔŋ a teleŋ wanaa kialaa ŋyamaa ndaa dimi waŋnda sɔɔŋ tɛɛŋ o Isɔluɛi niŋndo, nduyɛ chɔŋ a teleŋ masaa o Isɔluɛi a o Chuda niŋ kpou, Bɔŋaŋ Hiouwɔɔ Choo kɛ kɛ ndoo biinuŋ ndɔ maa hoo le.+ 23 Nduyɛ wɔsi 18 Masaa Choosaya wa o masaleŋ choo wo, Bɔŋaŋ Hiouwɔɔ Choo Wo hoo biinuŋ Chulusalɛm ni le Chɛhowa.

24 Mi Choosaya faŋa vɛlɛ wanaa suaa a waŋ vilɛiya wa, wanaa dimi sɔɔŋ waa lachioŋ nda,+ piɔmaa leyuŋguaa,+ piɔmaa nɔɔlɛiya,* a nyɛm nɔɔlɛi wa o lɛŋnde Chuda leŋ niŋ a o Chulusalɛm niŋndoŋ kpou, le halikpeŋ mbo peelu Sawala+ wa la poonyiaa o yau Hilikaya, wana soliaa lasalaa saaluŋ o chiɛi Chɛhowa wo niŋndo.+ 25 Masaa keeku ndu lachi wa ni, a hiŋ o ndu kɔɔli wa ni, wana o wana miiŋgu Chɛhowa o ibuŋ a kɔl ndɔɔ kpou, a yoomu* ndɔɔ kpou,+ vɛlɛ a kpaaya ndɔɔ kpou, a mɛɛ Sawala Mɛlɛka ke Muuse Laŋ kpou la dimi yɛ maa ndu le.

26 Kɛ a koŋ kpou, tumbe Chɛhowa dɔɔnuŋ o kala kala a Chuda okɔɔ le sɔɔŋ wɔɔŋ wɔɔŋ Manaasɛ tosa le ndu kɔllo tɛɛmbuuwo woŋ, o pɔlul te.+ 27 Mi Chɛhowa dimi aa: “I cho vɛlɛ Chuda faŋa ya o hɔl,+ mɛɛ ya faŋa Isɔluɛi ya o hɔl lɛ.+ I cho Chulusalɛm, chiee ya hɛli hoo wo kɛɛ, nduyɛ chiɛi ya dimi hoo a ndu okɔɔ aa, ‘Loŋ diola nilaŋ la cho wa ni’+ wo, ndu bɛɛ mi kɛɛ ndu.”

28 Sɔɔŋ cheleŋ cho a Choosaya okɔɔ woŋ, nyɛ o nyɛ o tosa, ŋ cho o yau nda poonyiaa konaa a masaa keeku Chuda wa okɔɔ wo niŋ. 29 O palɛi Choosaya ve niŋ, mi Feloo Niko, masaa le Ichipi huŋ le ma bɔŋaŋ nda masaa le Asiiliaa o Pioo Yufiluaati. Nduyɛ, mi Masaa Choosaya kua le ndu chiŋalaŋndo a sɔŋgɔɔ. Kɛ mɛɛ Niko che ndu, mbo dii ndu Mɛkidɔɔ.+ 30 Okoŋ mi buɛiyaa nduaa chua dialuŋ ndɔŋ Mɛkidɔɔ, ma wou muŋ o nyɛ nyaanaŋ suaa naŋndo niŋ, ma kua a muŋ Chulusalɛm, ma kɔ kumbu ndu o sɛi ndɔɔ niŋ. Mi waŋnda Chuda chua Chɛhowahasi po Choosaya wo, ma pɔya ndu, nduyɛ ma siiŋguu ndu masaa o foofo finya ndɔ wo.+

31 Chɛhowahasi+ wa wɔsilaŋ 23 mbo simnuŋ masaa, nduyɛ mbo chii paŋgoŋ ŋgaa o masaleŋ choo Chulusalɛm. Kala ndɔ ndoo nɔ diolaŋ ni aa Hamuta,+ chua Chɛluimaya wo, fulaa Libina. 32 Mi Chɛhowahasi kandu sɔɔŋ bɛnda Chɛhowa o hɔl te woŋ tosaa, mɛɛ finyaa nduaa mamaa ndaa tosa yɛ.+ 33 Mi Feloo Niko+ duau ndu o chiɛi manyumndo niŋ Luibila+ o lɛŋnde Hamaati leŋ niŋ, le halikpeŋ mbo faŋa ndu o masaleŋ choo Chulusalɛm. Okoŋ, mbo kilul waŋnda o lɛŋnde leŋ niŋ paawaa* kaniŋ humboŋ talɛŋndoŋ 100* a kooliiyoŋ talɛŋnde i pilɛ.+ 34 Okoŋ kɔɔli, mi Feloo Niko siiŋguu po Choosaya wo Iliaakim masaa o foofo Choosaya finya ndɔ wo. Nduyɛ, mbo siŋga diola ndɔlaŋ aa Chɛhowakim. Kɛ mbo chua Chɛhowahasi mbo kua a ndu Ichipi.+ Loŋ o lo ni mbo wu.+ 35 Mi Chɛhowakim ke Feloo kaniŋ humboŋ a kooliiyoŋ. Kɛ waŋnda o lɛŋndeŋ niŋ o kilul paawaa ni le kaniŋ humbuŋ Feloo nyuna le muŋ ndoŋ. Mi wana o wana o lɛŋndeŋ niŋ yɔŋgu kaniŋ humboŋ a kooliŋ o nyuna nda woŋ le mbo yɔŋgu Feloo Niko.

36 Chɛhowakim+ wa wɔsilaŋ 25 mbo simnuŋ masaa, nduyɛ mbo chii wɔsilaŋ 11 o masaleŋ choo Chulusalɛm.+ Kala ndɔ ndoo nɔ diolaŋ ni aa Sɛbida, chua Pɛdaya wo, fulaa Lumaa. 37 Mi Chɛhowakim hiau lachi a nyɛ bɛnda Chɛhowa o hɔl te wo tosaa,+ mɛɛ finyaa nduaa mamaa tosa yɛ.+