Masaa Diiŋ Nduaa

24 O palɛi Chɛhowakim nde niŋ, mi Nɛbukanɛɛsa+ masaa le Babilɔŋ huŋ chiŋalaŋ lɛŋnde Chuda leŋ a sɔŋgɔɔ. Nduyɛ, mi Chɛhowakim simnuŋ buɛi ndɔɔ le wɔsilaŋ la yaa. Kɛ mi Chɛhowakim tosa bolle kalaleŋ mbo simul ndu. 2 Mi Chɛhowa tosa mi Kaadiaŋnda,+ Siiliaŋnda, Mowabaitiiya, a Amɔnaitiiyaa kei waŋnda delɔɔ choo wa kandu kɔlaŋ o lɛŋnde leŋ niŋ. Mbo tosa mi waŋnda haa hiau lachi a kɔlaŋ o lɛŋnde Chuda leŋ niŋ le leŋ tɛɛmbuuwo, a mɛɛ ndu Chɛhowa dimi+ sanaa a wanaa suaa le ndu wa yɛ. 3 O kpeekpei niŋ, Chɛhowa tosa ni mi sɔɔŋ muŋ wa yɔŋnɔŋndo o lɛŋnde Chuda leŋ niŋ, le mbo faŋa waŋnda Chuda ndu o hɔl,+ le hakila Manaasɛ tosa laŋ,+ 4 a le mɛɛ o diu diu wanaa tɛɛmbuu isɔɔ le wa yɛ.+ Kanifuule, mbo tosa mi kooma wanaa tɛɛmbuu isɔɔ le wa ma kua koŋgilaŋ Chulusalɛm. Le hei, Chɛhowa ndoo yeema mbo mal ndu haki le.+

5 Sɔɔŋ cheleŋ cho a Chɛhowakim okɔɔ woŋ, nyɛ o nyɛ o tosa, ŋ cho o yau nda poonyiaa konaa a masaa keeku Chuda wa okɔɔ wo niŋ.+ 6 Okoŋ mi Chɛhowakim wu,*+ nduyɛ mi Chɛhowakiŋ po ndɔ miiŋgu o masaleŋ choo o foofo ndɔɔ.

7 Lepilɛ bɛɛ masaa le Ichipi soli lɛ pelei o lɛŋnde ndɔleŋ niŋ te. Kanifuule, mi masaa le Babilɔŋ poondiaa nyɛ o nyɛ masaa le Ichipi ndoo nɔ,+ chɔŋ o Kpoloŋndo* Ichipi+ haaa kɔ o Pioo Yufiluaati.+

8 Chɛhowakiŋ+ wa wɔsilaŋ 18 mbo simnuŋ masaa, nduyɛ mbo chii paŋgoŋ ŋgaa o masaleŋ choo Chulusalɛm.+ Kala ndɔ ndoo nɔ diolaŋ ni aa Nɛhusita, chua Ɛlinataŋ ndo, fulaa Chulusalɛm. 9 Mi Chɛhowakiŋ hiau lachi a sɔɔŋ bɛnda Chɛhowa o hɔl te woŋ tosaa, mɛɛ finya ndɔ ndoo tosa yɛ. 10 A teleŋ koŋ, mi buɛiyaa Nɛbukanɛɛsa wa, masaa le Babilɔŋ huŋ chiŋalaŋ Chulusalɛm, nduyɛ ma luei chioo o piŋndo niŋ.+ 11 Mi Nɛbukanɛɛsa, masaa le Babilɔŋ huŋ naa buɛiyaa nduaa luei chioo o piŋndo niŋnda.

12 Mi Chɛhowakiŋ, masaa le Chuda kua naa masaa le Babilɔŋ chua,+ latulu a kala ndɔ, buɛiyaa nduaa, laŋgbaa nduaa kalla, a waŋ banaa o chiɛi ndɔ lemasaa niŋ.+ Nduyɛ mi masaa le Babilɔŋ kua a ndu o biyɔɔ niŋ o wɔsi ŋɔmaa ndɔ o wa o masaleŋ choo wo.+ 13 Okoŋ, mbo chua nyɛ o nyɛ wa o fondaŋ nda kɛsi nyɛm baa kalaŋ o chiɛi Chɛhowa wo niŋndo, a o fondaŋ nda kɛsi nyɛm baa kalaŋ o chiɛi lemasaa niŋndo.+ Mbo pesi pesi nyɛm laanduŋ kɛ kɛ Sɔlɔmɔŋ, masaa le Isɔluɛi ndoo toosiaa a kooliiyoŋ o chiɛi Chɛhowa wo niŋ,+ mi i yɔŋnuŋ a mɛɛ Chɛhowa ndoo dimi yɛ. 14 Wana o wana wa Chulusalɛm, mbo kua a nda o biyɔɔ niŋ. Laŋgbaa kalla kpou,+ kuubaa chɔuwa kpou, wana o wana chaa nyɛ a laba, a wana o wana tosa wallo a chiliŋndoŋ.+ Wanaa o kuɛ o biyɔɔ niŋnda, kpou kpou a wa 10,000. A mɛi wana o wana kɔɔli le, mɛɛ wanaa bala fondo fonduaa.+ 15 Mbo kua vɛlɛ a Chɛhowakiŋ,+ kala ndɔ, laandaa nduaa, laŋgbaa nduaa kalla, a puaa fula tɔɔ o lɛŋndeŋ niŋnda o biyɔɔ niŋ. Mbo chua nda kpou Chulusalɛm, mbo kua a nda o biyɔɔ niŋ Babilɔŋ.+ 16 Mi masaa le Babilɔŋ kua vɛlɛ a kuubaa chɔuwa kpou o biyɔɔ niŋ Babilɔŋ, a wa 7,000. Mbo kua vɛlɛ a wanaa chaa nyɛ a laba wa, vɛlɛ a wanaa tosa wallo a chiliŋndoŋ nda 1,000. Puaa haa kpou yoomuaŋ pila ndaa nɔ ni, nduyɛ ma sɔla pɛɛkoo le chɔuwo. 17 Mi masaa le Babilɔŋ siiŋguu Mataniya, Chɛhowakiŋ finya ndɔ pɔmbɔ+ masaa o foofo ndɔɔ. Nduyɛ, mbo ke ndu diola cheleŋ aa Sɛdikaya.+

18 Sɛdikaya wa wɔsilaŋ 21 mbo simnuŋ masaa, nduyɛ mbo chii wɔsilaŋ 11 o masaleŋ choo Chulusalɛm. Kala ndɔ ndoo nɔ diolaŋ ni aa Hamuta,+ chua Chɛluimaya wo, fulaa Libina. 19 Mi Sɛdikaya hiau lachi a nyɛ bɛnda Chɛhowa o hɔl te wo tosaa, mɛɛ Chɛhowakim ndoo tosa yɛ.+ 20 Le mɛɛ Chɛhowa ndoo dɔɔnuŋ tumbe yɛ sɔɔŋ muŋ wa waŋnda Chulusalɛm a waŋnda Chuda yɔŋnɔŋndo ni, haaa mbo faŋa nda ndu o hɔl bau.+ Nduyɛ mi Sɛdikaya simul masaa le Babilɔŋ.+