Masaa Diiŋ Nduaa

4 Paale pilɛ, mi puaa wanaa suaa le Mɛlɛka wa,+ lanɔɔ wana pilɛ dimul Ilaisia aa: “Buɛi numndo, o wa pɔnɔ nuu wo vi. Nduyɛ a sina maa teleŋ o teleŋ ndoo nɔ siooŋii Chɛhowa ve.+ Kɛ, wana ndoo bii kuoo o ba wo hiŋ puaa niaa ŋiɔɔŋnda kpou chuaa le mbo siiŋguu nda chiaa nduaa.” 2 Okoŋ mi Ilaisia dimul ndu aa: “Yɛɛnɛ ŋ yeema yɛ mi tosal num? Dimullɔ ya, yɛɛnɛ ŋ nɔ yɛ o ba chiɛiniŋ?” Mbo mulul ndu aa: “Buɛi numndo nɔ nyɛ o nyɛ o ba chiɛiniŋ te, mɛɛ kpɛɛnɛi machuɛiye.”+ 3 Mi Ilaisia dimul ndu aa: “Kɔ ma kɔ you kpɛɛnɛŋ nyɛ cho leniŋ te woŋ wanaa nya chiɛɛliaŋ nda kpou o ba. You muŋ tau mɛɛ ŋ tiuba yɛ. 4 Okoŋ ma kuɛ chiɛiniŋ, ma kɔ kindaŋ dioo kɔɔli nya puaa numnda. Dɔu chuɛiyaŋ o kpɛɛnɔŋ muŋ niŋ kpou. Nduyɛ kpɛɛnɛi ŋ pei ko, a kɛsi ikɛi.” 5 Okoŋ, mi chuaa hoo kuaŋnuŋ.

Mɛɛ o kindaŋ dioo kɔɔli nda puaa nduaa, mi puaa nduaa wa ndu kpɛɛnɔŋ kioo, mi ndu duau chuɛiyaŋ leniŋ.+ 6 Mɛɛ kpɛɛnɔŋ kpou pɛ, mbo dimul puaa nduaa o pilɛ aa: “Ke ya kpɛɛnɛi cheleŋ.”+ Mbo mulul ndu aa: “Kpɛɛnɔŋ chuu.” Okoŋ mi chuɛiyaŋ ma kiolu kɔɔli.+ 7 Mi chuaa hoo miiŋgu pila o wana Mɛlɛka tonyaa lo, mbo kɔ dounuŋ ndu kona. Okoŋ mbo dimul chuaa hoo aa: “Kɔ ma kɔ pisi chuɛima maŋ ma soli kueela numndaŋ, nduyɛ mi num nya puaa numnda soliŋ nyɛ cho lo wo kpeku.”

8 Paale pilɛ, mi Ilaisia kua Siunim.+ Chua pilɛ wa loŋ, ndoo fula tɔɔ tau. Mi chuaa hoo dɛɛniaa Ilaisia le mbo de nyɛdiaa loŋ.+ Nduyɛ teleŋ o teleŋ ndoo wa pɛ hiouwɔɔ loŋ, mi ndoo kei o ndu lo le mbo de nyɛdiaa. 9 Mi chuaa hoo dimul pɔnɔ ndɔ aa: “Po kei hoo naŋ lɔɔlɔɔ wo, I sina maa wana Mɛlɛka tonyaa o cho ni. 10 Lelaŋ a yandii, ŋ toosial ndu lumuile pɔmbɔ o chiɛiyo choo,+ miŋ lueilul ndu kpeloo, tibiiyo,* a kpeŋgboo,* nduyɛ a nyɛ kɛsiaa lambuiyo. Okoŋ teleŋ o teleŋ o hiŋ pɛ o naa lo, o nɔla mbo wa loŋ.”+

11 Paale pilɛ mɛɛ o hiŋ loŋ, mbo kua o lumui nda toosial ndu koŋ o chiɛiyo choo wo le hinilaŋ. 12 Okoŋ mbo dimul buɛi ndɔɔ Kehaasi+ aa: “Veelullɔ ya chua Sunamaitiinɔ+ koŋ.” Mi Kehaasi veelu ndu, okoŋ mi chuaa huŋ sim ndu lachi. 13 Mi Ilaisia dimul Kehaasi aa: “Yandii, dimul ndu aa, ‘A tosa sɔɔŋ kɛndɔŋ tau le naa.+ Yɛɛnɛ ya tosa yɛ le num?+ Baa I soo o masaa lo+ ɔɔ o masa puaa chɔuwa lo le num?’” Kɛ mi chuaa muli aa: “I choŋnuŋ hɛnɛkɛ wanaa niaa tɛɛŋ.” 14 Okoŋ mi Ilaisia nyuna Kehaasi aa: “Mɛɛ yɛɛnɛ ya tosa yɛ le ndu?” Mbo muli aa: “O nɔ po le,+ nduyɛ pɔnɔ ndɔ yuuwa niŋ.” 15 Mbo dimul ndu o lepilɛ niŋ kpe aa: “Veelu ndu.” Okoŋ mbo veelu ndu, nduyɛ mi chuaa huŋ sim o dio. 16 Mi Ilaisia dimul ndu aa: “A teleŋ waa nuaa nyilasiaŋ, a cho poo violɔɔ.”+ Kɛ mi chuaa dimul ndu aa: “Sako masanɔ nuu, wana Mɛlɛka tonyaa ŋ cho ni! Dimul buɛi numndo choolaŋ te.”

17 Kɛ mɛɛ teleŋ tiŋ hiou, mi chuaa hoo chua folioo.* Nduyɛ wɔsioo o pilɔɔ, mbo vialu poo a teleŋ kpeekpei Ilaisia ndoo dimul ndu wo. 18 Mi poombɔɔ hoo sul. Nduyɛ paale pilɛ, mbo kua o finya ndɔ lo naa o wa witiiyoŋ kiolɔɔ a waŋ walla latulu wa. 19 O wa finya ndɔ dimullo kpeekpei aa: “Bolleŋ, bolleŋ le cho ya nɛiyo!” Okoŋ, mi finya ndɔ dimul buɛi ndɔɔ aa: “Kɔ a ndu o kala ndɔ lo.” 20 Mi buɛiyo hoo miŋgi ndu o kala ndɔ lo. Nduyɛ o lo kala ndɔ ichali o bɛŋgu haaa a paale kalaleŋ, okoŋ mbo wu.+ 21 Mi chuaa hoo hel mbo kɔ yambu poombɔɔ hoo o kpele wana Mɛlɛka tonyaa+ choo, mbo kinda dioo, mbo kuaŋnuŋ. 22 Okoŋ mbo veelu pɔnɔ ndɔ, mbo dimul ndu aa: “Yandii, yɔŋ ya buɛiyo o pilɛ a sofɛlɔɔ o pilɛ, mi kuɛ chɔ chɔ o wana Mɛlɛka tonyaa lo mi kɔ huŋ.” 23 Mi pɔnɔ ndɔ nyuna ndu aa: “Le yɛɛnɛ ŋ cho yɛ hau kɔlaŋ o ndu lo? O cho paŋgii sɛnɛi+ ɔɔ paale pɛŋgiaa le.” Mbo muli aa: “Buulaŋ te, I wɔɔŋ bɛɛ.” 24 Okoŋ, mbo bɛɛndiaa naa chalaa sofɛlɔɔ o kɔɔ, mbo dimul buɛi ndɔɔ aa: “Ŋ kɔ chɔ chɔ. Dɛɛna kiltaŋ le ya le, mɛɛ mi dimul num aa dɛɛna.”

25 Okoŋ, mbo kua o wana Mɛlɛka tonyaa lo o Pembii Kamɛɛ Ve. Dimioo nuaa wana Mɛlɛka tonyaa che ndu landaŋ, mbo dimul buɛi ndɔɔ Kehaasi aa: “Tofawɔ nda! Chua Sunamaitiinɔɔ cho hoo hunɔɔ ni. 26 Kɔ demul ndu ma nyuna ndu aa, ‘A cho pa kɛndɛ? Pɔnɔ num cho kɛndɛ? Po numndo cho kɛndɛ?’” Okoŋ mi chuaa muli aa: “Naa kpou ŋ cho kɛndɛ.” 27 Mɛɛ o fuuluu o wana Mɛlɛka tonyaa lo o pembei, mbo saa ndu peloŋ o lepilɛ niŋ kpe.+ Okoŋ, mi Kehaasi huŋ le ndu nyindɔɔ. Kɛ mi wana Mɛlɛka tonyaa dimul ndu aa: “Mal ndu. O kɔl tambɛi bɛndoo niŋ o cho nuaa ni. Nduyɛ Chɛhowa viŋ ya ndi, o dimul la a ndi okɔɔ le.” 28 Mi chuaa nyuna ndu aa: “Mi yaa nyuna num pa le poo? Yaa dimul num nuaa maa, ‘Ke ya tiindaŋ lachoowaa le’ le?”+

29 Mbo dimul Kɛheesai o lepilɛ niŋ kpe aa: “Yiinuŋ doma numndo o chaŋ,+ ma chua tinda nuu o ba, ma kuɛ Siunim. Wana o wana nya bɔŋaŋ pɛ, yil ndu le. Nduyɛ wana o wana yil num pɛ, miŋgul ndu le. Kɔ ma kɔ handu poombɔɔ tinda nuu o hɔl.” 30 Mi kalaa poombɔɔ hoo dimul ndu aa: “I mɛnaŋ po o Chɛhowa, Mɛlɛka cho yoomu wo lo maa te a cho pɛ yoomu, I mɛi num kɔɔli le.”+ Okoŋ, mi Ilaisia chaŋ ma kua nda ndu. 31 Mi Kehaasi hiau nda lachi, mbo kɔ handu poombɔɔ tindaa o hɔl. Kɛ kpɛkɛlɛ bɛɛ poombɔɔ kpeŋaŋ te.+ Mbo miiŋgu Ilaisia o ibuŋ, mbo dimul ndu aa: “Poombɔɔ tindu le.”

32 Mɛɛ Ilaisia luɛi chiɛiniŋ, poombɔɔ wa ihini o kpele ndɔɔ choo o vilɛiyo.+ 33 Mɛɛ o luɛi o lumuiyo niŋ, mbo kindaŋ dioo kɔɔli, ma lo nda poombɔɔ kinɛi. Nduyɛ, mbo kandu piɛileŋ o Chɛhowa lo.+ 34 Okoŋ mbo hel o kpele, mbo hini poombɔɔ choo. Mbo chiŋa sondo ndɔɔ a sondo poombɔɔ, hɔlta ndɔlaŋ a hɔlta poombɔɔ, mbo bɔŋa bala ndɔla kɔltaŋ a bala kɔlta poombɔɔ, nduyɛ mbo lo ndu ihini choo lende. Okoŋ, mi dialuŋ poombɔɔ kandu yɔŋnɔŋndo lafuu.+ 35 Mbo chaŋ, mbo balu lau lau o lumuiyo niŋ. Mbo miiŋgu o kpele, mbo kɔ hini vɛlɛ poombɔɔ choo. Mi poombɔɔ kpisiŋa le ŋɔmmɛu, okoŋ mbo kumbi hɔltaŋ.+ 36 Mi Ilaisia veelu Kehaasi, mbo dimul ndu aa: “Veelu chua Sunamaitiinɔɔ.” Okoŋ mbo veelu ndu, mi chuaa huŋ o ndu lo. Mbo dimul ndu aa: “Chua po numndo.”+ 37 Mbo luɛi chiɛiniŋ, mbo tunduŋ, mbo beŋ ndu wulaŋ. Okoŋ kɔɔli, mbo chua po ndɔɔ mbo kuaŋnuŋ.

38 Mɛɛ Ilaisia miiŋgu Kikaa, yiaaŋ ma wa o lɛŋndeŋ niŋ tau.+ Puaa wanaa suaa le Mɛlɛka wa+ wa ndu ichali lachi, okoŋ mbo dimul buɛi ndɔɔ+ aa: “Handu kpɛɛnɛi bɛnduei o yiŋ, ma yeu puaa wanaa suaa le Mɛlɛka wa nyɛdiaa.” 39 Mi wana pilɛ o nda tɛɛŋ kua billo kendioo yondoo niŋ. Mɛɛ o kuɛ, mbo saaluŋ tɔlɔɔ pum. Nduyɛ mbo kendi komɔɔ ndɔɔ, mbo pei o doma ndɔɔ niŋ cha. Okoŋ mbo miiŋgu, mbo kili kili ndu, mbo duau o kpɛɛnɛi nda wa nyɛdiaa yauwo ve niŋ. Kɛ ndoo sina komɔɔ hoo le. 40 Okoŋ kɔɔli, ma piɔu puaa haa nyɛdiaa hoo le dioo. Kɛ dimioo nuaa ma miaanuŋ ndu, ma deŋi choo choo aa: “Wana Mɛlɛka tonyaa, pɔsɔnioo cho o kpɛɛnɛi hei niŋ.” Nduyɛ, a nɔla ma de ndu le. 41 Okoŋ mbo dimi aa: “La chuu ya kpeyaŋndo nyɛɛmbɔ.” Mɛɛ o wou kpeyaŋndo hoo o kpɛɛnɛi hei niŋ, mbo dimi aa: “La piɔu waŋnda.” Nduyɛ, nyɛ o nyɛ wɔɔŋ ve lɛ o kpɛɛnɛi niŋ te.+

42 Mi poo pum fula Baal-sialiisiaa,+ mbo chuu wana Mɛlɛka tonyaa beedii* nda toosiaa a baliŋ+ taseŋ nda kou woŋ kpuŋgbaŋ 20, a baliŋ sɛnɛiyoŋ bɔlɔɔ o pilɛ.+ Mi Ilaisia dimi aa: “Ke waŋnda ma de.” 43 Kɛ mi buɛi ndɔɔ dimul ndu aa: “Nyɛdiaa hoo tiu ŋwaŋ 100 le.”+ Okoŋ mi Ilaisia dimul ndu aa: “Ke waŋnda ma de, kanifuule nyɛ Chɛhowa dimi wo cho hoo ni, ‘Nda kpou cho ndu dio, nduyɛ ma mɛi o tiŋ.’”+ 44 Okoŋ mbo ke waŋnda nyɛdiaa hoo. Nduyɛ ma dia, ma mɛi o tiŋ,+ a mɛɛ Chɛhowa dimi yɛ.