Masaa Diiŋ Nduaa

10 Ehaabi+ ndoo nɔ puaa 70 o Sameeliaa niŋ. Le hei, mi Chehu poonyiaa yaulaŋ mbo yɔŋ ndaŋ Sameeliaa o laŋgbaa kalla lo Chɛsiluɛɛ, waŋ banaa,+ a o wanaa wa chuauwaa Ehaabi wa mandaa wa* lo. Mbo dimul nda aa: 2 “Puaa masanɔ nyaa, nyɛm nyaanaŋ suaa naŋndoŋ, suaa, chieeŋ nɔ kpakila kala kalalaŋ ndoŋ, a nyɛm chɔuwoŋ cho nya o ba. Lelaŋ te yaulaŋ ndaŋ la komal nya pɛ, 3 la hɛli wana hiou wa o sɔvɛ* o puaa masanɔ nyaa tɛɛŋ ndo, mi la kɛsi ndu o kpeŋgbei* lemasa finya ndɔ wo choo. Okoŋ, mi la chɔulaba le chiɛi masanɔ nyaa.”

4 Kɛ mi siooŋnde bii nda, okoŋ ma dimi aa: “Te masaa a ŋiɔɔŋ nɔla ndu simul te,+ baa naŋ simul ndu niŋ ni?” 5 Mi wana wa chiɛi lemasaa bolleŋ ndo, masa ibuŋga wa chiee loŋ ndo, waŋ banaa, a wanaa wa masaa mandaa wa yɔŋ Chehu yooŋgoo aa: “Buɛiyaa numnda naŋ cho ni. Nduyɛ nyɛ o nyɛ ŋ dimul naa pɛ, ŋ cho tosa. Ŋ cho wana o wana kɛsi masa le. Tosa nyɛ o nyɛ bɛnda num o hɔl.”

6 Okoŋ mbo poonyial nda yau diiŋ ndɔɔ, mbo dimi aa: “Te le ya nya cho ni nduyɛ mi la chɛl le ya diikɔŋndo, mɛɛ a teleŋ waa nuaa siɔdii, la komal la Chɛsiluɛɛ a bolii puaa masanɔ nyaa.”

Puaa 70 Masaa Ehaabi wa haa wa puaa fula tɔɔ o chioo niŋnda o ba, nduyɛ nda wa nda mandaa ni. 7 Dimioo nuaa mi yauwo hoo komal nda, ma bii puaa masaa ma diu diu nda. A wa puaa 70.+ Okoŋ, ma wou bolii ndɛi o kambɛilaŋ niŋ, ma yɔŋ Chehu Chɛsiluɛɛ chiee. 8 Mi waŋndo kɔ dimul ndu yooŋgoo aa: “A hiŋ a bolii puaa masaa.” Mbo dimi aa: “La dii ndi kundalaŋ la tiɔɔŋ o dio kpaki chioo haaa siɔdii idii.” 9 Mɛɛ o fula o bɛɛ diimandɔɔ, mbo sim waŋnda kpou o hɔl. Mbo dimi aa: “Tɔɔyaŋ cho nya choo le.* A tonya, ya yii masaa dumbu ni mi dii ndu.+ Kɛ nɛɛ dii yɛ haa kpou? 10 La sina pɛŋgu maa nyɛ o nyɛ Chɛhowa dimi a yuŋgu Ehaabi wo okɔɔ, diom Chɛhowa wo o pilɛ bɛɛ lo kɔɔli mbo kɛɛ le peelɔŋndo le.*+ Nduyɛ nyɛ Chɛhowa dimi sanaa a buɛi ndɔɔ Ilaicha wo, ndu o peelu hoo ni.”+ 11 Okoŋ kɔɔli, mi Chehu diu diu wana o wana lo o yuŋgu Ehaabi wo niŋ Chɛsiluɛɛ. Kɔ bii a puaa nduaa fula tɔɔ wa, chaŋyaŋ ndɔŋ, a wanaa nduaa soliaa lasalaa.+ O mɛi wana o wana le.+

12 Okoŋ kɔɔli, mi Chehu chaŋ mbo bii kɔlaŋ Sameeliaa. Chiɛi wanaa mandaa lasaa ndaa baa saa wo* wa o nɛi. 13 Loŋ Masaa Chehu bɔŋaŋ a wanayaŋ* Masaa Ahasaya+ woŋ ni, masaa le Chuda. Okoŋ mbo nyuna nda aa: “Wanaa maavɛɛ nya cho yɛ?” Ma mulul ndu aa: “Wanayaŋ Ahasaya woŋ naŋ cho ni. Nduyɛ ŋ cho kɔlaŋ le miŋ kɔ sina te chuauwaa masaa kpou, vɛlɛ a chuauwaa kalaa masaa cho pɛ kɛndɛ.” 14 Mi Chehu dimi aa: “La biu biu nda!” Ma biu biu nda kpou, ma kɔ diu diu nda o sooŋ wa o chiɛi nda baa saa wo. A wa puaa ŋwaŋ 42. Wana pilɛ bɛɛ o mɛi yoomu le.+

15 Mɛɛ o chɛŋ loŋ, mbo bɔŋaŋ nda Chɛhonadabi,+ po Luechabi wo.+ O wa hunɔɔ ndu bɔŋaa. Mɛɛ Chehu yil ndu, mbo nyuna ndu aa: “Kɔl numndo dendu pa a ya, mɛɛ kɔl nuu dendu a num yɛ?”

Mi Chɛhonadabi muli aa: “Ei, o dendu.”

Mi Chehu dimi aa: “Te lende i cho ni, mɛɛ ke ya ba numndo.”

Okoŋ mbo ke ndu ba ndɔɔ, nduyɛ mi Chehu naŋ ndu o nyɛ ndɔ nyaanaŋ suaa naŋndo niŋ. 16 Mi Chehu dimi aa: “Huŋ kɔ latulu, ma che maa I chɛl wanaa simul Chɛhowa wa le.”+ Okoŋ mbo kua a ndu latulu o nyɛ ndɔ nyaanaŋ suaa naŋndo niŋ. 17 Mɛɛ o fuuluu Sameeliaa, mbo diu diu wana o wana lo o yuŋgu Ehaabi wo niŋ Sameeliaa haaa mbo basu nda paku,+ a mɛɛ Chɛhowa dimi sanaa a Ilaicha yɛ.+

18 Okoŋ kɔɔli, mi Chehu chuuŋgiaa waŋnda kpou naapilɛ, mbo dimul nda aa: “Nyɛɛmbɔ koni Ehaabi sooluu Baal ni.+ Kɛ ya Chehu hiau ndu niŋ sooluu poloŋ. 19 La yooŋgu wanaa suaa le Baal la,+ wanaa sooluu ndu wa, a wanaa nduaa soliaa lasalaa kpou+ ma hiŋ naa ya chua. Wana o wana lo kɔɔli le, kanifuule I nɔ le sala bɛndu bɛndoo solioo le Baal. Wana o wana lo pɛ kɔɔli, o nɔ le piɔmndo sɔlaa.” Kɛ huiyo Chehu wa nda o nɛi chaa niŋ ni, le halikpeŋ mbo diu diu wanaa sooluu Baal la kpou.

20 Mi Chehu hiau lachi a dimioo aa: “La yonda maa bɔŋaŋ teŋgeŋndo cho le Baal.” Okoŋ, ma yonda le bɔŋaŋ teŋgeŋndo hoo. 21 Le hei, mi Chehu yɔŋ diomndeŋ o Isɔluɛi niŋ kpou. Nduyɛ, mi wanaa sooluu Baal la kpou huŋ. Wana pilɛ bɛɛ lo kɔɔli le. Ma luɛi o maaŋ nda sooluu Baal lo niŋ,+ ma pia leniŋ kiŋ kiŋ. 22 Mi Chehu dimul wana wa fondaŋ nda kɛsi nyɛla chuɛɛnaŋndaŋ hɔlteŋ ndo aa: “Huŋ a domalaŋ le wanaa sooluu Baal la kpou.” Okoŋ mbo chuu nda domalaŋ. 23 Mi Chehu luɛi o maaŋ nda sooluu Baal lo niŋ nda Chɛhonadabi,+ po Luechabi wo. Mbo dimul wanaa sooluu Baal la aa: “La mɛɛndaŋ nyɛkɛndɛi le sinaa maa o fula wɔ o wanaa sooluu Baal la kɔɔli, wanaa piɛi Chɛhowa wa cho naŋ te.” 24 O mɛɛlulaŋ kpɔŋ, ma luɛi le salalaŋ a salala luamaa laŋ solioo. Chehu ndoo simi niŋ puaa nduaa ŋwaŋ 80 o bɛɛ mbo dimul nda aa: “Puaa cho haa nanuŋ nda, te o pilɛ bɛɛ hɛluŋ pɛ wana o wana, wana koŋ cho piɔmndo sɔla o foofo ndɔɔ ni.”

25 Dimioo nuaa sala luamaa chuu soli, mi Chehu dimul wanaa manda ndu wa a wanaa nduaa malaa aa: “La luɛi mi la diu diu nda! O pilɛ bɛɛ hialuŋ nya le!”+ Mi wanaa manda ndu wa a wanaa nduaa malaa diu diu nda, ma vii vii nda o bɛɛ. A lo nda diuwo haaa ma luɛi o lumui wa o maaŋ nda sooluu Baal lo niŋ di. 26 Okoŋ, ma sooluu suŋgbuma+ wa o maaŋ nda sooluu Baal lo niŋndaŋ, ma lumi lumi maŋ.+ 27 Ma pesi pesi suŋgbule+ Baal teŋ a maaŋ nda sooluu ndu wo,+ ma siiŋguu ndu naa kuaa yondo niŋnda. Nduyɛ o cho wɔ lende haaa a paale hauleŋ ndeŋ.

28 Mɛɛ nuaa Chehu looku piɛile Baal teŋ soli po o Isɔluɛi niŋ ni. 29 Kɛ nduyɛ, hakila Chɛlobowam po Nebati wo tosa mi waŋnda Isɔluɛi luei balaŋ leniŋ ndaŋ, Chehu bɛɛ mel taŋ te. Laŋ la cho yɛ nauwaa o toosiaa o Bɛtɛl a o Daŋ niŋnda ni.+ 30 Mi Chɛhowa dimul Chehu aa: “Le mɛɛ ŋ tosa sɔɔŋ kɛndɔŋ, ma tosa nyɛ bɛnda ya o hɔllo, nduyɛ ma tosa nyɛ o nyɛ wa ya o kɔl le tosaa a yuŋgu Ehaabi wo yɛ,+ puaa a hiɔɔlu o pulale numndeŋ choo cho ichali o kpeŋgbei lemasaa choo Isɔluɛi.”+ 31 Kɛ sawala Chɛhowa, Mɛlɛka Isɔluɛiya, Chehu hiu lachi a kɔlaŋ o laŋ choo a kɔl ndɔɔ kpou le.+ Hakila Chɛlobowam tosa mi waŋnda Isɔluɛi luei balaŋ leniŋ ndaŋ, o mel taŋ te.+

32 A teleŋ koŋ, mi Chɛhowa kandu tanda Isɔluɛiyo faŋaa lechoo a buŋgaŋ. Mi Hasayɛɛ hiau lachi a tanda Isɔluɛiyo kpou chiŋalaŋndo,+ 33 chɔŋ o Chɔɔdaŋ ndaŋ ba paaleŋ le chaŋ ndo, mbo kɔ bii a tanda Kiliaadi wo kpou. Kaale Kaadi leŋ, kaale Lubɛŋ ndeŋ, a kaale Manaasɛ leŋ,+ o tandaa hoo niŋ la wa ichali ni. Tanda Aloya wo, o wa o Kpoloŋndo Anɔŋ* ikɛiyo, haaa kɔ Kiliaadi a Baasiaŋ wa o tandaa hoo niŋ.+

34 Sɔɔŋ cheleŋ cho a Chehu okɔɔ woŋ, nyɛ o nyɛ o tosa, a kpaaya ndɔɔ kpou, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ. 35 Okoŋ mi Chehu wu,* ma kumbu ndu Sameeliaa. Nduyɛ, mi po ndɔɔ Chɛhowahasi+ miiŋgu o masaleŋ choo o foofo ndɔɔ. 36 Wɔsilaŋ 28 Chehu chii o masaleŋ choo Isɔluɛi ni, nduyɛ Sameeliaa o wa ichali ni.