Masaa Diiŋ Nduaa

13 Wɔsi 23 Chɛhowasi,+ po Ahasaya+ wo wa o masaleŋ choo Chuda wo Chɛhowahasi, po Chehu wo+ simnuŋ masaa o Isɔluɛi niŋ ni. Sameeliaa o wa ichali ni, nduyɛ wɔsilaŋ 17 o chii o masaleŋ choo ni. 2 Mbo hiau lachi a nyɛ bɛnda Chɛhowa o hɔl te wo tosaa. Nduyɛ, hakila Chɛlobowam po Nebati wo tosa mi Isɔluɛiya luei balaŋ leniŋ ndaŋ, mbo tualnuŋ o laŋ choo.+ O mel taŋ te. 3 Le hei, mi Chɛhowa tuulu kɔl+ o kala kala a Isɔluɛiya.+ Nduyɛ o boondii ndɛi niŋ kpou, mbo mal nda Hasayɛɛ+ masaa le Siiliaa, a Bɛŋ-hedadi+ po Hasayɛɛ wo o ba.

4 Okoŋ kɔɔli, mi Chɛhowahasi nyɔɔlu Chɛhowa le mbo tuiinuŋ ndu inyiɛɛ. Nduyɛ mi Chɛhowa yaŋ ndu nilaŋ, kanifuule mbo cha mɛɛ masaa le Siiliaa wa Isɔluɛiya nyɛpalaa tusioo choo yɛ.+ 5 Le hei, mi Chɛhowa yɔŋgu Isɔluɛiya wana piŋiaa,+ le nda solioo o chɛleŋ niŋ Siiliaŋnda o ba bɛŋgu. Isɔluɛiya ndaa nɔla niŋ ma waŋnuŋ o chiɛila ndalaŋ niŋ maa paandu.* 6 (Kɛ nduyɛ, hakila chiɛi Chɛlobowam ndo tosa mi Isɔluɛiya luei balaŋ leniŋ ndaŋ, a mel taŋ te.+ Ma hiau lachi a laŋ tosaa.* Nduyɛ suŋgbule iyɔm*+ nda simi Sameeliaa le sooluuwo leŋ le wa wɔ loŋ.) 7 Wanaa nyaanuŋ suaa wa 50, nyɛla nyaanaŋnda suaa naŋndaŋ 10, a puaa chɔuwaa kua a ŋpelu wa 10,000 kinɛi ndaa lo Chɛhowahasi o ba ni. Kanifuule, mi masaa le Siiliaa diu diu a tuaa kpou,+ mbo niɔu niɔu nda mɛɛ nda niɔu niɔu nuaa chundoo o yasaba luaa ŋwitiiyo yɛ.+

8 Sɔɔŋ cheleŋ cho a Chɛhowahasi okɔɔ woŋ, nyɛ o nyɛ o tosa, a kpaaya ndɔɔ, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ. 9 Okoŋ mi Chɛhowahasi wu,* ma kumbu ndu Sameeliaa.+ Nduyɛ, mi Chɛhowasi po ndɔ miiŋgu o masaleŋ choo o foofo ndɔɔ.

10 Wɔsi 37 Masaa Chɛhowasi wa o masaleŋ choo Chuda wo Chɛhowasi,+ po Chɛhowahasi wo simnuŋ masaa o Isɔluɛi niŋ ni. Sameeliaa o wa ichali ni, nduyɛ mbo chii wɔsilaŋ 16 o masaleŋ choo. 11 Mbo hiau lachi a nyɛ bɛnda Chɛhowa o hɔl te wo tosaa. Nduyɛ hakila Chɛlobowam, po Nebati wo tosa mi Isɔluɛiya luei balaŋ leniŋ ndaŋ, o mel taŋ te.+ Mbo hiau lachi* a laŋ tosaa.

12 Sɔɔŋ cheleŋ cho a Chɛhowasi okɔɔ woŋ, nyɛ o nyɛ o tosa, kpaaya ndɔɔ, a mɛɛ o chɔulaba Amasaya masaa le Chuda+ yɛ, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ. 13 Okoŋ mi Chɛhowasi wu,* ma kumbu ndu nda masaa keeku Isɔluɛi ya latulu o Sameeliaa niŋ.+ Nduyɛ, mi Chɛlobowam*+ po ndɔ chal o kpeŋgbei* ndɔ lemasaa choo.

14 Mɛɛ Ilaisia+ del a naa, nduyɛ a naa koŋ o lo ni mbo wu, mi Chɛhowasi masaa le Isɔluɛi huŋ naa ndu chua, mbo chaŋ ndu choo. Mbo wa dimioo aa: “Kɛkɛ nuu, kɛkɛ nuu! Nyɛ nyaanaŋ suaa naŋndo Isɔluɛi a wanaa nduaa nyaanuŋ suaa wa!”+ 15 Mi Ilaisia dimul ndu aa: “Chua chiɔuwo a chiŋuaŋ.” Mbo chua chiɔuwo a chiŋuaŋ. 16 Okoŋ mbo dimul masaa le Isɔluɛi aa: “Bii chiɔuwo o ba.” Mbo bii chiɔuwo o ba. Mi Ilaisia handu bala ndɔlaŋ o bala masaa choo. 17 Mbo dimul ndu aa: “Kumbi wundɛiyo* ba paaleŋ le chaŋ ndo.” Mbo kumbi wundɛiyo. Mi Ilaisia dimul ndu aa: “Wuu chiŋɔleŋ!” Mbo wuu chiŋɔleŋ. Mi Ilaisia dimi aa: “Chiŋɔle Chɛhowa leŋ, le yem chɔuwo leŋ! Chiŋɔle yem Siiliaŋnda a chɔuwo leŋ. A cho lo Siiliaŋnda diu diu wo* Afɛki+ haaa ma chii nda paku.”

18 Mbo hiau lachi a dimioo aa: “Chua chiŋuaŋ.” Mbo chua chiŋuaŋ. Okoŋ mbo dimul masaa le Isɔluɛi aa: “Lɔɔ maŋ lɛŋ.” Mbo luaa maŋ lɛŋ bɛmbɔɔ le yaa, mbo simnuŋ. 19 Mi wana Mɛlɛka tonyaa tambu kɔl tau a ndu. Mbo dimi aa: “Num oo nɔ ma lɔɔ maŋ lɛŋ bɛmbɔɔ le ŋuɛɛnu ɔɔ le ŋɔmpum! Okoŋ, a wa lo Siiliaŋnda yomɔɔ haaa mi num oo chii nda paku. Kɛ bɛmbɔɔ le yaa kinɛi ŋ cho Siiliaŋnda yomɔɔ ni.”+

20 Okoŋ kɔɔli, mi Ilaisia wu, nduyɛ ma kumbu ndu. Mi Mowabaitiiyaa ndaa kei waŋnda delɔɔ choo wa+ ndaa hiŋ o lɛŋndeŋ niŋ o wɔsioo kandɔŋndo.* 21 Mɛɛ puaa pum wa poo kumbɔɔ, ma cha wanaa wɔɔŋaa del waŋnda choo wa. Le hei, ma wuu ndu naa nda kumbu Ilaisia wa, ma nyaanuŋ. Mɛɛ dialuŋ vilɛi muŋ pilaŋ paala Ilaisia laŋ, mi poo miiŋgu yoomu,+ nduyɛ mbo chaŋ mbo sim.

22 Hasayɛɛ,+ masaa le Siiliaa wa Isɔluɛiya nyɛkindilaa handɔɔ choo+ o palɛi Chɛhowahasi ve niŋ kpou. 23 Kɛ mi Chɛhowa tuiinuŋ nda inyiɛɛ,+ mbo mulul nda hɔlla le kpema o yii a Ebilaham,+ Aase,+ a Chekɔpu+ wo. Ndoo yeema mi ndoo tɛɛmbuu nda kpou le. Nduyɛ haaa a paale hauleŋ ndeŋ, o chɛl ma faŋaŋ ndu o hɔl te. 24 Mɛɛ Hasayɛɛ masaa le Siiliaa vi, mi Bɛŋ-hedadi miiŋgu o masaleŋ choo o foofo ndɔɔ. 25 Mi Chɛhowasi po Chɛhowahasi wo bii Bɛŋ-hedadi, po Hasayɛɛ wo chieeŋ o bii Chɛhowahasi finya ndɔ o ba woŋ. Bɛmbɔɔ le yaa Chɛhowasi yem ndu ni,+ mbo bii ndu chieeŋ Isɔluɛiya o ba.