Masaa Diiŋ Nduaa

15 O wɔsi 27 Chɛlobowam,* masaa le Isɔluɛi wa o masaleŋ choo wo niŋ, Asaluaya,*+ po Masaa Amasaya+ wo simnuŋ masaa le Chuda ni.+ 2 O wa wɔsilaŋ 16 mbo simnuŋ masaa, nduyɛ mbo chii wɔsilaŋ 52 o masaleŋ choo Chulusalɛm. Kala ndɔ ndoo nɔ diolaŋ ni aa Chɛkolaya, fulaa Chulusalɛm. 3 Mbo hiau lachi a nyɛ bɛnda Chɛhowa o hɔl lo tosaa, mɛɛ Amasaya finya ndɔ tosa yɛ.+ 4 Kɛ nduyɛ, fondaŋnda filioŋndaŋ la feŋaŋ te.+ Waŋnda wa wɔ salalaŋ solioo a salalaŋ lomɔɔ o fondaŋnda filioŋnda laŋ.+ 5 Mi Chɛhowa duau masaa naa ŋlɛlɔɔ+ choo, nduyɛ o lo a naa koŋ haaa mbo wu. O wa niŋ o chiɛi cheleŋ niŋ ndupilɛ,+ mi po ndɔɔ Chotam+ wa chilaŋ chuaa o chiɛi lemasaa niŋ, mbo dimi waŋnda sɔɔŋ tɛɛŋ o lɛŋndeŋ niŋ.+ 6 Sɔɔŋ cheleŋ cho a Asaluaya okɔɔ woŋ,+ nyɛ o nyɛ o tosa, ŋ cho o yau nda poonyiaa konaa a masaa keeku Chuda wa okɔɔ wo niŋ. 7 Okoŋ kɔɔli, mi Asaluaya wu,*+ ma kumbu ndu o Chiee Deeve Wo, naa nda kumbu finyaa nduaa mamaa wa. Nduyɛ, mi Chotam po ndɔ miiŋgu o masaleŋ choo o foofo ndɔɔ.

8 Wɔsi 38 Masaa Asaluaya+ wa o masaleŋ choo Chuda wo, Sɛkalaya,+ po Chɛlobowam ndo simnuŋ masaa le Isɔluɛi ni. Sameeliaa o wa ichali ni, nduyɛ mbo chii paŋgoŋ ŋɔmpum o masaleŋ choo. 9 Mbo tosa nyɛ bɛnda Chɛhowa o hɔl te wo, mɛɛ finyaa nduaa mamaa tosa yɛ. Hakila Chɛlobowam, po Nebati wo tosa mi Isɔluɛiya luei balaŋ leniŋ ndaŋ, o mel taŋ te.+ 10 Okoŋ kɔɔli, mi Sialum, po Chabɛsi wo yii ndu dumbu,* nduyɛ mbo dii ndu+ Ibiliam.+ Mɛɛ o dii ndu, mbo miiŋgu o masaleŋ choo o foofo ndɔɔ. 11 Sɔɔŋ cheleŋ cho a Sɛkalaya okɔɔ woŋ, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ. 12 Mi hei peelu nyɛ Chɛhowa dimul Chehu wo. Mbo dimul ndu aa: “Puaa a hiɔɔlu o pulale numndeŋ choo+ cho ichali o kpeŋgbei lemasaa choo Isɔluɛi.”+ Nduyɛ mi i yɔŋnuŋ mɛɛ o dimi yɛ.

13 Wɔsi 39 Masaa Yusaya+ wa o masaleŋ choo Chuda wo, Sialum, po Chabɛsi wo simnuŋ masaa ni. Nduyɛ, o wa o masaleŋ choo Sameeliaa le paŋgei kpulukuu. 14 Okoŋ kɔɔli, mi Mɛnahɛm, po Keedai yo chaŋ Tiɛsa,+ mbo kɔ dii Sialum,+ po Chabɛsi wo Sameeliaa. Mɛɛ o dii ndu, mbo miiŋgu o masaleŋ choo o foofo ndɔɔ. 15 Sɔɔŋ cheleŋ cho a Sialum okɔɔ woŋ, a dumbu o yiiyo, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ. 16 A teleŋ koŋ Mɛnahɛm chɛŋ Tiɛsa ni, mbo kɔ tɛɛmbuu Tifisa a wana o wana wa leniŋ, nduyɛ a tanda ndɔɔ kpou, kanifuule a kumbul ndu diola kpakila ndalaŋ te. Mbo tɛɛmbuu ndu, nduyɛ mbo tɛɛndiaa waŋ laanduaa wa a folilaŋ* nda dembelaŋ.

17 Wɔsi 39 Masaa Asaluaya wa o masaleŋ choo Chuda wo, Mɛnahɛm, po Keedai yo simnuŋ masaa le Isɔluɛi ni. Nduyɛ, mbo chii wɔsilaŋ tɔ o masaleŋ choo Sameeliaa. 18 Mbo hiau lachi a nyɛ bɛnda Chɛhowa o hɔl te wo tosaa. Nduyɛ hakila Chɛlobowam, po Nebati wo tosa mi Isɔluɛiya luei balaŋ leniŋ ndaŋ,+ haaa a yoomu ndɔɔ mɛɛlulaŋ, o mel taŋ te. 19 Mi Pul,+ masaa le Asiiliaa huŋ le lɛŋndeŋ delɔɔ choo a sɔŋgɔɔ. Kɛ mi Mɛnahɛm ke ndu kaniŋ humboŋ talɛŋndoŋ 1,000,* le mbo chɛl ndu mbo hiou lachi a waa o masaleŋ choo.+ 20 Wanaa fula tɔɔ ma sul o Isɔluɛi niŋnda Mɛnahɛm dimul ni, ma chuuŋgiaa kanioŋ* le masaa kioo.+ Mi wana o wana yɔŋgu kaniŋ humboŋ siɛkɛlloŋ 50.* Okoŋ mi masaa le Siiliaa faŋaŋ o lɛŋndeŋ niŋ, mbo miiŋguŋ. 21 Sɔɔŋ cheleŋ cho a Mɛnahɛm okɔɔ woŋ,+ a nyɛ o nyɛ o tosa, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ. 22 Okoŋ mi Mɛnahɛm wu,* mi Pɛkahaya po ndɔ miiŋgu o masaleŋ choo o foofo ndɔɔ.

23 Wɔsi 50 Masaa Asaluaya wa o masaleŋ choo Chuda wo, Pɛkahaya, po Mɛnahɛm ndo simnuŋ masaa le Isɔluɛi ni. Sameeliaa o wa ichali ni, nduyɛ mbo chii wɔsilaŋ la tiɔɔŋ o masaleŋ choo. 24 Mbo hiau lachi a nyɛ bɛnda Chɛhowa o hɔl te wo tosaa. Nduyɛ hakila Chɛlobowam, po Nebati wo tosa mi Isɔluɛiya luei balaŋ leniŋ ndaŋ, o mel taŋ te.+ 25 Mi puaa chɔuwaa manda ndu wa o pilɛ diolaŋ Pika,+ po Luɛmaliaa wo yii ndu dumbu. Mbo dii ndu o kpaki kala kala chiɛi lemasaa niŋ Sameeliaa a Akɔbi nda Aluaya latulu.* Puaa Kiliaadi ŋwaŋ 50 wa a ndu latulu. Nduyɛ mɛɛ o dii ndu, mbo miiŋgu o masaleŋ choo o foofo ndɔɔ. 26 Sɔɔŋ cheleŋ cho a Pɛkahaya okɔɔ woŋ, a nyɛ o nyɛ o tosa, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ.

27 Wɔsi 52 Masaa Asaluaya wa o masaleŋ choo Chuda wo, Pika,+ po Luɛmaliaa wo simnuŋ masaa le Isɔluɛi ni. Sameeliaa o wa ichali ni, nduyɛ mbo chii wɔsilaŋ 20 o masaleŋ choo. 28 Mbo hiau lachi a nyɛ bɛnda Chɛhowa o hɔl te wo tosaa. Nduyɛ hakila Chɛlobowam, po Nebati wo tosa mi Isɔluɛiya luei balaŋ leniŋ ndaŋ, o mel taŋ te.+ 29 O teleŋ Pika wo niŋ, masaa le Isɔluɛi, mi Tikilati-pilɛsa+ masaa le Asiiliaa kɔ del Ichɔŋ, Ebɛl-bɛti-maaka,+ Chanowaa, Kedɛɛsi,+ Hasɔɔ, Kiliaadi,+ a Kalili choo, mbo bii muŋ latulu a lɛŋnde Nafitalii leŋ kpou.+ Nduyɛ mbo bii wanaa wa loŋ nda, mbo kua a nda o chɛleŋ niŋ Asiiliaa.+ 30 Okoŋ mi Hoosiya,+ po Ɛlaa wo yii Pika, po Luɛmaliaa wo dumbu, mbo dii ndu. Mbo miiŋgu o masaleŋ choo o foofo ndɔɔ o wɔsi 20 Chotam,+ po Yusaya wo wa o masaleŋ choo wo niŋ. 31 Sɔɔŋ cheleŋ cho a Pika okɔɔ woŋ, a nyɛ o nyɛ o tosa, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ.

32 Wɔsi diiŋ ndɔ Pika, po Luɛmaliaa wo, masaa le Isɔluɛi wa o masaleŋ choo wo, Chotam,+ po Masaa Yusaya+ wo simnuŋ masaa le Chuda ni. 33 O wa wɔsilaŋ 25 mbo simnuŋ masaa, nduyɛ mbo chii wɔsilaŋ 16 o masaleŋ choo Chulusalɛm. Kala ndɔ ndoo nɔ diolaŋ ni aa Chɛlusia, chua Sadɔki wo.+ 34 Mbo hiau lachi a nyɛ bɛnda Chɛhowa o hɔl lo tosaa, mɛɛ Yusaya finya ndɔ tosa yɛ.+ 35 Kɛ nduyɛ, fondaŋnda filioŋndaŋ la feŋaŋ te. Waŋnda wa wɔ salalaŋ solioo a salalaŋ lomɔɔ o fondaŋnda filioŋnda laŋ.+ Ndu ndoo toosiaa dio kpakioo o chiɛi Chɛhowa wo amaluaŋ ni.+ 36 Sɔɔŋ cheleŋ cho a Chotam okɔɔ woŋ, a nyɛ o nyɛ o tosa, ŋ cho o yau nda poonyiaa konaa a masaa keeku Chuda wa okɔɔ wo niŋ. 37 A teleŋ koŋ, mi Chɛhowa tosa mi Luɛsiŋ, masaa le Siiliaa, a Pika,+ po Luɛmaliaa wo kandu Chuda chiŋalaŋndo a sɔŋgɔɔ.+ 38 Okoŋ mi Chotam wu,* ma kumbu ndu o Chiee Deeve finya ndɔ mama wo, naa nda kumbu finyaa nduaa mamaa wa. Nduyɛ, mi Ehaasi po ndɔ miiŋgu o masaleŋ choo o foofo ndɔɔ.