Masaa Diiŋ Nduaa

16 Wɔsi 17 Pika, po Luɛmaliaa wo wa o masaleŋ choo wo, Ehaasi,+ po Masaa Chotam ndo simnuŋ masaa le Chuda ni. 2 Ehaasi wa wɔsilaŋ 20 mbo simnuŋ masaa, nduyɛ mbo chii wɔsilaŋ 16 o masaleŋ choo Chulusalɛm. O tosa nyɛ bɛnda Chɛhowa Mɛlɛka ndɔɔ o hɔl lo, mɛɛ Deeve finya ndɔ mama tosa yɛ le.+ 3 Kɛ, mbo tual o nɛila masaa keeku o Isɔluɛi niŋnda choo.+ Sɔɔŋ wɔɔŋ wɔɔŋ kaayii Chɛhowa ndoo tou Isɔluɛiya lachi ve ndii tosa woŋ kpou,+ mbo wou balaŋ leniŋ. Nduyɛ, mbo soli pɛŋ po ndɔɔ salaa o yiŋndeŋ niŋ.*+ 4 Mbo hiau lachi a salalaŋ solioo vɛlɛ a salalaŋ lomɔɔ o fondaŋnda filioŋndaŋ,+ o pemboŋ choo, a o yɔm bɛndu kɛ kɛ bɛŋgu.+

5 A teleŋ koŋ, mi Luɛsiŋ masaa le Siiliaa, a Pika po Luɛmaliaa wo, masaa le Isɔluɛi huŋ le Chulusalɛm chiŋalaŋndo a sɔŋgɔɔ.+ Okoŋ ma huŋ luei Ehaasi a wanaa nduaa o piŋndo niŋ, kɛ a nɔla ma bii chioo le. 6 A teleŋ koŋ Luɛsiŋ, masaa le Siiliaa miŋgi chioo Ɛlati,+ Idɔmaitiiya o ba ni. Okoŋ kɔɔli, mbo soli Chuuwa* Ɛlati. Mi Idɔmaitiiya kua Ɛlati, ma kɔ chal loŋ. Nduyɛ a cho wɔ loŋ haaa a paale hauleŋ ndeŋ. 7 Mi Ehaasi viam waŋnda o Tikilati-pilɛsa+ lo, masaa le Asiiliaa, le ma dimul ndu aa: “Buɛi numndo ya cho ni, nduyɛ po numndo ya cho ni. Masaa le Siiliaa a masaa le Isɔluɛi huŋ chiŋalaŋ ya. Lelaŋ yandii, huŋ ma huŋ piŋi ya nda o ba.” 8 Okoŋ, mi Ehaasi chua kaniŋ humboŋ a kooliŋ wa o chiɛi Chɛhowa wo niŋ, vɛlɛ a fondaŋ nda kɛsi nyɛm baa kalaŋ o chiɛi lemasaa niŋndoŋ, mbo yɔŋ masaa le Asiiliaa le luɛiyɔɔ niŋndo.+ 9 Mi masaa Asiiliaa chɛl nyɛ o dimul ndu wo. Le hei, mbo kua Damasikɔɔ mbo kɔ del ndu choo mbo bii ndu, mbo kua a wanaa wa loŋ nda o biyɔɔ niŋ Kiaa,+ nduyɛ mbo dii Luɛsiŋ.+

10 Okoŋ mi Ehaasi kua Damasikɔɔ o Tikilati-pilɛsa lo, masaa le Asiiliaa. Mɛɛ Masaa Ehaasi che bandu luamaa lasala wa Damasikɔɔ wo, mbo yɔŋ Yuluaacha wana soliaa lasalaa yau bandu luamaa lasala koŋ wa o tuuliaa lechoo wo, le chɔmndo mɛɛ nda toosiaa ndu yɛ.+ 11 Mi Yuluaacha+ wana soliaa lasalaa tual nɛila chɔmaala Masaa Ehaasi yɔŋ ndu laŋ kɔɔli kpou, mbo taŋgul bandu luamaa lasalaa.+ Mi Yuluaacha wana soliaa lasalaa chii ndu taŋgul, tuupa mi Masaa Ehaasi chaŋ Damasikɔɔ mbo miiŋgu. 12 Mɛɛ o miiŋgu mbo cha bandu luamaa lasalaa, mbo sɔɔŋguu ndu ikɛi, okoŋ mbo soli salalaŋ lechoo.+ 13 Mbo hiau lachi a salala luamaa laŋ vɛlɛ a salala ŋkultaŋ solioo o bandu luamaa lasala koŋ choo. Mbo tala vɛlɛ sala mamuɛiyo lechoo, nduyɛ mbo fasaŋiaa kooma sala kɔl nyuloo lechoo. 14 Bandu luamaa lasala nda toosiaa a chiliŋii siaŋɛi yo*+ wa Chɛhowa lachi o chiɛi Mɛlɛkaa hɔlndɔ, bandu luamaa lasala Masaa Ehaasi wo tɛɛŋ a chiɛi Chɛhowa wo. Mbo faŋa ndu o fondaŋ ndɔɔ, mbo hivi ndu o bandu ndɔ luamaa lasalaa kpeŋgii ba luaŋnde. 15 Mi Masaa Ehaasi dimul Yuluaacha,+ wana soliaa lasalaa aa: “Sala luamaa idiiyo, sala ŋkul paale delaa,+ sala luamaa masaa a sala ndɔ ŋkullo, salala luamaa laŋ, salala ŋkultaŋ, a salala mamuɛila waŋnda kpou, o bandu luamaa lasala bɛndoo+ hoo choo ŋ lom ndaŋ ni. A nɔ vɛlɛ ma fasaŋiaa kooma salala luamaa laŋ kpou, a kooma salala cheleŋ kpou lechoo. Bandu luamaa lasala nda toosiaa a chiliŋii siaŋɛi yo ndu, yapila cho kɛɛsiaa nyɛ naŋ nɔ le tosaa a ndu wo.” 16 Mi Yuluaacha, wana soliaa lasalaa tosa nyɛ o nyɛ Masaa Ehaasi dimul ndu.+

17 Okoŋ kɔɔli, mi Masaa Ehaasi kili kili nyɛla viliaa mamɛŋndaŋ+ o kpeŋgoŋ a buŋgaŋ vee vee, mbo faŋa hɛŋgɛila bɛndula wa lechoo laŋ,+ nduyɛ mbo faŋa Hɛŋgɛi Mamɛŋ nda toosiaa a chiliŋii siaŋɛi mbo wa nauwa+ o kɔɔ wo, mbo kɛsi ndu o fondaŋ nda toosiaa a poutaŋ ndo.+ 18 Nduyɛ fondaŋ ndaa taŋgul o chiɛi Mɛlɛkaa le Paale Pɛŋgiaaleŋ ma kumbu ndu lechoo wo, a fondaŋ masaa ndoo keiyo, mbo faŋa laŋ o chiɛi Chɛhowa wo. Le mɛɛ ndoo nɔ siooŋnde le masaa le Asiiliaa yɛ o tosa hei ni.

19 Sɔɔŋ cheleŋ cho a Ehaasi okɔɔ woŋ, a nyɛ o nyɛ o tosa, ŋ cho o yau nda poonyiaa konaa a masaa keeku Chuda wa okɔɔ wo niŋ.+ 20 Okoŋ mi Ehaasi wu,* ma kumbu ndu o Chiee Deeve Wo, naa nda kumbu finyaa nduaa mamaa wa. Nduyɛ, mi Hɛsikaya*+ po ndɔ miiŋgu o masaleŋ choo o foofo ndɔɔ.