Ɛsilua

8 Teleŋ Masaa Atasaasi wa o masaleŋ choo wo,+ wanaa wa yuŋgula leboltaŋ ma poonyiaa nda diolaŋ kpɛ kpɛ a yuŋgula ndalaŋ, miŋ mal naa ndaa Babilɔŋ le kɔlaŋ nda cho haa ni: 2 Kɛɛsiɔm, fulaa o pulale Finihaasi leŋ choo,+ Daaniɛɛ, fulaa o pulale Itamaa leŋ choo,+ Hatusi, fulaa o pulale Deeve leŋ chooo, 3 Sɛkalaya, fulaa o pulale Siɛkanaya leŋ choo, o fula o pulale Palɔsi leŋ choo wo. Nduyɛ puaa 150 wa ndu o ba bɛŋgu ni. 4 Ɛliɛɛho-inai, po Sɛluahaya wo, fulaa o pulale Paha-mowabi leŋ choo.+ Nduyɛ puaa 200 wa ndu o ba bɛŋgu ni. 5 Siɛkanaya, po Chahasiɛɛ wo, fulaa o pulale Satu leŋ choo.+ Nduyɛ puaa 300 wa ndu o ba bɛŋgu ni. 6 Ɛbɛdi po Chonataŋ ndo, fulaa o pulale Adiŋ ndeŋ choo.+ Nduyɛ puaa 50 wa ndu o ba bɛŋgu ni. 7 Chɛseya po Atalaya wo, fulaa o pulale Ɛlam ndeŋ choo.+ Nduyɛ puaa 70 wa ndu o ba bɛŋgu ni. 8 Sɛbadaya po Maikɛɛ wo, fulaa o pulale Siɛfatiaa leŋ choo.+ Nduyɛ puaa 80 wa ndu o ba bɛŋgu ni. 9 Obadaya po Chɛhayɛɛ wo, fulaa o pulale Chowaabi leŋ choo. Nduyɛ puaa 218 wa ndu o ba bɛŋgu ni. 10 Siɛlomiti po Choosifiya wo, fulaa o pulale Bani leŋ choo. Nduyɛ puaa 160 wa ndu o ba bɛŋgu ni. 11 Sɛkalaya po Bebai yo, fulaa o pulale Bebai leŋ choo.+ Nduyɛ puaa 28 wa ndu o ba bɛŋgu ni. 12 Chohinaŋ po Hakataŋ ndo, fulaa o pulale Asikaadi leŋ choo.+ Nduyɛ puaa 110 wa ndu o ba bɛŋgu ni. 13 Wanaa fula o pulale Adonikam ndeŋ choo+ wa wa wanaa mɛɛlaa ni. Nduyɛ diola ndalaŋ la cho laŋ ni: Ɛlifɛlɛti, Chɛyɛɛ, a Siɛmaya. Puaa 60 wa nda o ba bɛŋgu ni. 14 Yutai nda Sabudi, fulaa o pulale Bikivai leŋ choo.+ Nduyɛ puaa 70 wa nda o ba bɛŋgu ni.

15 Mi chuuŋgiaa nda o pee kuɛ Ahawa+ wo, nduyɛ miŋ kila dɔɔŋgɔɔ loŋ le palɛi i yaa. Kɛ mɛɛ ya mɛɛndaŋ waŋnda tɛɛŋ a wanaa soliaa lasalaa, mi cha maa Livaiya ve nda tɛɛŋ te. 16 Le hei, mi yooŋgu Ɛliɛɛsa, Aluɛɛ, Siɛmaya, Ɛlinataŋ, Chaluibi, Ɛlinataŋ, Netaŋ, Sɛkalaya, a Mɛsiulam, a wa chilaŋ chuaa wa, vɛlɛ a Chowaluibi nda Ɛlinataŋ, a wa wanaa pɛɛkaa wa. 17 Okoŋ, mi viam nda o Idɔɔ lo, wana wa chilaŋ chuaa Kasifiaa wo. Mi dimul nda maa a dimul Idɔɔ nda puaapiliaa nduaa, a tosa wallo o chiɛi Mɛlɛkaa* ma wa Kasifiaa wa, le ma yɔŋ naa waŋnda le wallo o chiɛi Mɛlɛka naa niŋ. 18 Le mɛɛ Mɛlɛka naa wa a naa latulu yɛ, ma hɛli po taasi pilɛ fulaa o pulale Maali leŋ choo,+ po mama Livai yo, diolaŋ aa Siɛluɛbaya.+ Livai yɛ, Isɔluɛi velu ndu ni. Ma yɔŋ naa ndu latulu a puaa nduaa vɛlɛ a puaapiliaa nduaa. Kpou kpou, a wa puaa 18. 19 Ma yɔŋ naa vɛlɛ Hasiabaya, latulu a Chɛseya, fulaa o pulale Meluali leŋ choo,+ puaapiliaa nduaa, vɛlɛ a puaa ndaa. Kpou kpou, a wa puaa 20. 20 Okoŋ kɔɔli, ma yɔŋ wanaa tosa wallo o chiɛi Mɛlɛkaa wa* 220, a Deeve a laŋgbaa kalaa ndaa hɛli le Livaiya malaa wa. Nda kpou, ma poonyiaa diola ndalaŋ o lepula kpɛ kpɛ.

21 Okoŋ mi yonda o pioo Ahawa le miŋ bii sumndo, miŋ tusiŋ Mɛlɛka naa o hɔl, nduyɛ miŋ nyuna ndu le mbo sim naa lachi, mbo manda naa, chuauwaa naa, vɛlɛ a nyɛm naŋ kpou o tiŋ naŋ wa kɔlaŋ niŋndo. 22 Siɔmbulaŋ la wa ya le masaa nyunaa le puaa chɔuwa a wanaa nyaanuŋ suaa wa, le naa mandaa o nɛi yaamɔɔwaa naa o ba. Kanifuule miŋ dimul masaa aa: “Mɛlɛka naa cho latulu a wana o wana cho ndu nuuviaa.+ Kɛ wana o wana kɛɛ Mɛlɛka pɛ,+ o dɔɔnuŋ tumbe a ndu, nduyɛ mbo tusi ndu nyɛpalaa choo.” 23 Le hei, miŋ bii sumndo, miŋ nyuna Mɛlɛka naa a hei okɔɔ, nduyɛ mbo yaŋ naa nilaŋ.+

24 Mi hɛli masaa wanaa soliaa lasalaa 12. Nda yɔŋnuŋ ni maa Siɛluɛbaya, Hasiabaya,+ a puaapiliaa ndaa tɔ. 25 Okoŋ mi tuu kaniŋ humboŋ, kooliiyoŋ, a nyɛm laandoŋ, ŋ masaa, wanaa nduaa silaa, laŋgbaa kalla, a Isɔluɛiyaa wa loŋ nda kpou yɔŋgu tooloo le chiɛi Mɛlɛka naa+ woŋ, mi ke nda. 26 Mɛɛ ya chii tuu, mi ke nda. Kaniŋ humboŋ wa talɛŋndoŋ 650,* nyɛm laanduŋ nda toosiaa a kaniŋ humboŋ ndoŋ 100, lusul ndɔɔ wa talɛŋndoŋ 2, kooliiyoŋ wa talɛŋndoŋ 100, 27 hɛŋgɛila pɔmbɔla nda toosiaa a kooliiye laŋ 20, lusul ndɔɔ wa dalikiiyoŋ 1,000,* a nyɛm laanduŋ nda toosiaa a chiliŋii siaŋɛi ŋɛlɛŋgi ŋɛlɛŋgiei laŋ la 2, nduyɛ wanaa che laŋ pɛ aa a kooliiye nda toosiaa laŋ ni.

28 Okoŋ mi dimul nda aa: “Wanaa diandaa nya cho le Chɛhowa ni,+ nduyɛ nyɛm laandoŋ muŋ bɛɛ, ŋ diandaa ŋ cho ni. Kaniŋ humboŋ a kooliŋ waŋnda yɔŋgu kelaŋ o Chɛhowa, Mɛlɛka finyaa nyaa mamaa lo a kɔl ndaa kpou woŋ cho muŋ ni. 29 La manda muŋ nyɛkɛndɛi haaa mi la kɔ tuu muŋ o lumuila* chiɛi Chɛhowa wo niŋ Chulusalɛm, masaa wanaa soliaa lasalaa o hɔl, Livaiya, a laŋgbaa kalaa cho yuŋgula leboltaŋ o Isɔluɛi niŋnda.”+ 30 Okoŋ, mi wanaa soliaa lasalaa a Livaiya chua kaniŋ humboŋ, kooliiyoŋ, a nyɛm laanduŋ nda tuu ma ke nda woŋ, le kɔlaŋ a muŋ o chiɛi Mɛlɛka naa niŋ Chulusalɛm.

31 O mɛɛlulaŋ kpɔŋ, miŋ faŋaŋ o pioo Ahawa+ o paŋgii tasei niŋ malɔ 12+ le kɔlaŋ Chulusalɛm. Nduyɛ, Mɛlɛka naa wa a naa latulu. Mbo piŋi naa yaamɔɔwaa naa a wanaa viaŋnuŋ o nɛi le waŋnda delɔɔ choo wa o ba. 32 Mɛɛ naŋ fuuluu Chulusalɛm,+ miŋ chii palɛi i yaa. 33 O paale hiɔɔlu leŋ choo, miŋ tuu kaniŋ humboŋ, kooliiyoŋ, a nyɛm laandoŋ o chiɛi Mɛlɛka naa niŋ,+ miŋ ke Meluimɔɔ+ po Yuluaacha wo, wana soliaa lasalaa. Nduyɛ Ɛlieesa po Finihaasi wo wa a ndu latulu, a Livaiya haa, Chosabadi+ po Chɛsuaa wo, a Nowadaya po Binuaa wo.+ 34 Ma chɔm nyɛ o nyɛ, nduyɛ ma tuu muŋ kpou, okoŋ ma poonyiaa lusul ndɔɔ o yau choo. 35 Mi wanaa fula o biyɔɔ niŋnda soli salala luamaa laŋ o Mɛlɛka Isɔluɛiya lo a nauwaa towaa 12+ le Isɔluɛiya kpou, saa konduaa 96,+ saa fɔŋnduaa piaanduaa 77, a chuiŋaa tooyiaa 12+ le sala hakioo. Nda kpou ma soli nda sala luamaa o Chɛhowa lo.+

36 Okoŋ, miŋ ke wanaa wa hɔlte masaa wa a masaa ŋbuŋgaa wa o Pee Bɛndoo Leeloo* wa+ sawala masaa+ ke naa laŋ. Ma toolu waŋnda, nduyɛ ma yɔŋgu nyɛ o nyɛ ndoo yeemaŋ le chiɛi Mɛlɛka tonyaa.+