Ɛsita
4 Mɛɛ Mɔdikai tuei+ a nyɛ o nyɛ yɔŋnuŋ okɔɔ,+ mbo sɛɛsiaŋ nyɛlaŋ lekɔɔ, mbo wounuŋ nyɛla labɛkilaŋ, nduyɛ mbo wounuŋ pultaŋ choo. Okoŋ mbo kua o luŋ chioo mbo wa chaŋndo choo choo kpeleŋ a kɔl tambɛi bɛndoo. 2 O lo kɔlaŋ lende haaa mbo fuuluu o dio kpaki masaa. Nduyɛ wana o wana ndoo nɔ mbo luɛi o dio kpaki masaa a nyɛla labɛkilaŋ lekɔɔ le. 3 O tandala masaa ndoo yɔŋ yaulaŋ ndaŋ kpou laŋ niŋ,+ Chuuwa wa chaŋndaŋ choo choo kpeleŋ, ma bii mɔnɛi, nduyɛ a wa vɛlɛ sumndo biyɔɔ.+ A bɔɔbɔɔ wa ihini o pultaŋ niŋ a nyɛla labɛkilaŋ lekɔɔ.+ 4 Mɛɛ buɛiyaa Ɛsita wa a wanaa wa ndu hɔlteŋ choo wa kɔ dimul ndu a suɛi hei okɔɔ, mbo tambu kɔllo tau tau. Okoŋ mbo yɔŋ Mɔdikai nyɛlaŋ le mbo wounuŋ mbo soliŋ nyɛla labɛkilaŋ lekɔɔ. Kɛ mi Mɔdikai kɛɛ le laŋ wounɔŋndo. 5 Okoŋ kɔɔli, mi Ɛsita yooŋgu le Hataki, buɛiyaa masaa yulu iso le ndu Ɛsita waa hɔlteŋ choo wa o pilɛ. Mbo dimul ndu le mbo kɔ nyuna Mɔdikai mbo tɛɛsial ndu nyɛ wa yɔŋnɔŋndo wo.
6 Le hei, mi Hataki kua naa Mɔdikai wa o luŋ o dio kpaki masaa hɔlndɔ wo. 7 Mi Mɔdikai dimul ndu a nyɛ o nyɛ okɔɔ, vɛlɛ a mɛɛ Hemaŋ chua buŋgɛi le nyɛsɔlaa+ wouwo o fondaŋ kɛsiaa nyɛsɔlaa lemasaa le Chuuwa tɛɛmbuuwo yɛ okɔɔ.+ 8 Mbo ke ndu vɛlɛ yau nda poonyiaa Susaŋ*+ le Chuuwa kpou diyɔɔ wo. Hataki ndoo nɔ mbo kuɛ o Ɛsita lo mbo tɛɛsial ndu nyɛ cho o yauwo niŋndo,+ nduyɛ mbo dimul ndu maa o nɔ mbo kuɛ o masaa lo mbo nyɔɔlu masaa le mbo tuiinuŋ Chuuwa inyiɛɛ.
9 Mi Hataki miiŋgu o Ɛsita lo, mbo dimul ndu nyɛ Mɔdikai dimul ndu wo. 10 Mi Ɛsita dimul Hataki le mbo miiŋgu mbo kɔ dimul Mɔdikai aa:+ 11 “Buɛiyaa masaa kpou, a wana o wana cho o tandala Masaa Ahasilɔɔ cho masaleŋ choo laŋ bɛŋgu sina maa te wana o wana kuɛ pɛ o luŋ chiɛi lemasaa+ mi masaa veelu ndu le, a mɛɛ sawaa dimi yɛ, o nɔ mbo sɔla piɔmndo. Kɛ te masaa yulul ndu pɛ tinda ndɔ lemasaa, o sɔla piɔm te.+ Nduyɛ o chua niŋ hau palɛi 30 masaa veelu wɔ ya le.”
12 Mɛɛ nda kɔ dimul Mɔdikai nyɛ Ɛsita dimi wo, 13 mbo dimul Ɛsita aa: “Yiyaŋ nuaa maa le mɛɛ ŋ cho o chiɛi lemasaa niŋ yɛ, a tiuba ma fulaŋ o kpundɔɔ hoo niŋ ma mɛi Chuuwaa tuaa leniŋ te. 14 Te a meinuŋ pɛ a boondei hei, wana cheleŋ cho Chuuwa mala nduyɛ mbo piŋi nda.+ Kɛ num a chiɛi finya numndo, la cho tambei sɔla. Kɛlɛŋgaa le naa solioo o sɔɔŋ waa nuaa niŋ ŋ sɔla hɛlioo le waa o chiɛi lemasaa niŋ ni.”+
15 Mi Ɛsita mulul Mɔdikai aa: 16 “Kɔ ma kɔ chuuŋgiaa Chuuwa kpou o Susaŋ* niŋ mi la bii sumndo le ya.+ Le palɛi i yaa a nyumndaŋ ma yaa, la dia nyɛdiaa ɔɔ mi la kol nyɛ o nyɛ le.+ Ya a buɛiyaa niaa laanduaa bɛɛ cho sumndo biyɔɔ. Mi che bɛɛ sawaa ya cho tɛɛmbuu ni, kɛ i cho lakɔ o masaa lo. Te i nɔ le piɔmndo sɔlaa pɛ, mɛɛ i cho piɔmndo sɔla.” 17 Mi Mɔdikai kua, mbo kɔ tosa nyɛ o nyɛ Ɛsita dimul ndu le tosaa.