Polowaa
7 Po nuu, bii sawala nilaŋ,
Nduyɛ ma tosa sɔɔŋ ya dimul num ndoŋ.+
2 Bii sawala nilaŋ le ma wa yoomu.+
Bii sila* nuu mɛɛ ŋ bii hɔlte numnde kulteŋ yɛ.
3 Yiinuŋ ndaŋ o sooŋ num labaŋ,
Ma poonyiaŋ ndaŋ o kɔl.+
4 Dimul taasioo aa, “Num cho yema nuu ni,”
Nduyɛ ma veelu sinapɛŋgoo aa “wanayɛi nii,”
5 Le num mandaa a tul wana lanɔ suundɛiyo* kɔɔli le.+
Nduyɛ, o nɔla num a sondo ndɔ yeelɛiyo le.+
6 I lo o wundɛi chiɛi nuu,
Nduyɛ o wa o kumbiaa, mi wa tofaa.
7 Okoŋ mi cha wanaa kindu kɔl te wa.
O nda tɛɛŋ, mi saaluŋ po feleŋgɔnɔ nɔ kɔl kalu bɔɔ le wo.+
8 Mɛɛ o wa hiouwɔɔ, mbo keeku o kolo kolo wana lanɔ suundɛiyo hoo ikɛi,
Nduyɛ mbo kua sakpo o chiɛi ndɔɔ.
10 Okoŋ, mi cha wana lanɔɔ hunɔɔ naa ndu chua,
O doviaŋ maa wana lanɔ suundɛi,*+ mbo kɛɛsiaŋ o kɔl le poo hoo huiyo.
11 Wana lanɔ sondo yeelɛi nɔ lasiɔmbu le wo o wa ni.+
Nduyɛ, o chel* o ndu lo bɛɛ le.
12 Lepum o wa o nɛilaŋ choo. Lepum yɛ, mbo kuɛ o luŋ kpendekele.
A saaluŋ ndu o kolo kolo kɛ kɛ.+
13 Mbo kɔmaŋ poo hoo, nduyɛ mbo sɔsa ndu sondoo.
Mɛɛ o tofa ndu hɔlla chiŋ, mbo dimul ndu aa:
14 “Yaa nɔ le salala kɔl nyulu laŋ solioo.+
Nduyɛ, I chii hau buŋgɛi ya chua ve peelu.
15 Le sabu koŋ ya fula ni le num nuuviaa,
Nduyɛ I saaluŋ num.
16 I pɛŋgɛla kola kɛndɛ kɛndɔɔ o kpele nuu choo,
Kola kɛndɛ kɛndɔɔ fulaa Ichipi.+
17 I chuchu nyɛm chuŋ kɛndɛ kɛndɔŋ muŋ o kpele nuu choo: mɔɔ, aloo, a sinamɔŋ.+
18 Lelaŋ huŋ miŋ kɔ chɔmaŋ kaalaa haaa mi paaleŋ le sɛ.
Huŋ miŋ tuei kaala naa yeela diompilɛ.
19 Kanifuule, pɔnɔ nuu cho o bɛɛ le.
O kuɛ kelaa naa levil.
20 Mɛɛ o wa kɔlaŋ, mbo kua a kanioŋ bɔlɔɔ cha.
Nduyɛ o cho miiŋgu nanuŋ te haaa mi paŋgei piu.”
21 Mbo dimul ndu choolaŋ a sondo ndɔ yeelɛi bɛndoo.+
Nduyɛ, mbo hui ndu a sɔɔŋ yeelɛi o wa ndu dimullo woŋ.
22 O lepilɛ niŋ kpe, mbo kua ndu kɔɔli mɛɛ nda kua nuaa a nau towaa le ndu diyɔɔ yɛ,
Vɛlɛ a mɛɛ nda kua nuaa a diɔmndo le ndu dɔwɔɔ o kpiɔɔ,+
23 Haaa mi chiŋɔleŋ le buli ndu yemnde yɛ.
Mɛɛ youwo kua nuaa sululu o yaŋɔɔleŋ niŋ yɛ, lende o wa yoomu ndɔɔ lueiyo o kpundɔɔ niŋ ni o ve bɛɛ o sina choo le.+
24 Lelaŋ po nuu, yaŋ ya nilaŋ,
Ma handu kɔllo o nyɛ ya cho num dimullo wo choo.
26 Kanifuule, chuaa hoo tosa niŋ mi wanaa bɔɔbɔɔ sɔla piɔmndaŋ,+
Nduyɛ wanaa o dii niŋ nda chuu chɔm te.+
27 O Sɛiyo* niŋ chiɛi ndɔɔ yaa wana ni.
Kɔlaŋ o chiɛi ndɔɔ cho ko maa kɔlaŋ le piɔmndo sɔlaa.