Ikilisiaati
1 Diomnda wana pɛɛkaa,*+ po Deeve wo, o wa masaa Chulusalɛm ndo dimi laŋ la cho laŋ ni.+
2 Mi wana pɛɛkaa dimi aa, “Nuawɔ se nyɛ fondo bɛndu!
Nyɛ o nyɛ fee, nyɛ fondoo fuu o cho ni!”+
3 Wali o wali waŋndo tosa o chieeŋndo hoo choo,
Tɔnɔ yɛɛ o sɔla yɛ o wali kala kala koŋ niŋ?+
5 Mi paaleŋ le fula, nduyɛ mi le del.
Okoŋ, mi le miiŋgu vɛlɛ chɔ chɔ naa le nɔ le fulaa wa.+
6 Mi hueiye kuɛ ba tou wo, nduyɛ mi i miiŋgu ba luaŋ ndo a hɔŋndo.
Mi i balu lende a hɔŋndo tiu tiu, nduyɛ mi i hiou lachi a hiŋnɔŋndo.
7 Peela pɔmbɔlaŋ* kpou, o pee mɛŋma ihɛllo choo la kua delɔɔ ni. Kɛ a koŋ kpou, pee mɛŋma ihɛllo pe le.+
Naa peelaŋ ndaŋ la kanduŋ nda, loŋ pila la miiŋgu vɛlɛ ni.+
8 Nyɛ o nyɛ cho o chieeŋndo hoo choo, saaŋgiaa koni o saaŋgiaa wana ni.
Wana o wana nɔla pɛŋ mbo chii isɔɔ a muŋ okɔɔ le.
Hɔlteŋ le saŋga a chɔɔ le,
Kɛlɛŋgaa niŋ te mi nileŋ le saŋga a tueiyɔɔ.
9 Nyɛ wa o paandoo niŋndo cho vɛlɛ wa.
Nduyɛ nyɛ yɔŋnuŋ niŋ o paandoo niŋndo, ndu cho vɛlɛ yɔŋnɔŋ ni.
Nyɛ o nyɛ cho o sɛnɛi o chieeŋndo hoo choo le.+
10 Baa nyɛ o nyɛ cho pa mi waŋndo dimi aa, “O sɛnɛi o cho ni”?
Nyɛ koŋ o wa niŋ paandu pa.
Nduyɛ o wa niŋ tuupa miŋ huŋ o chieeŋndo choo.
11 Wana o wana nɔla mbo loonuŋ a wanaa masindiaa okɔɔ le.
Wanaa cho hunɔɔ o chilaŋ niŋnda bɛɛ, waŋnda cho puɛɛnuŋ a nda okɔɔ.
Nduyɛ a cho bɛɛ hunɔɔ o kaŋ kɔɔli wa, waŋnda cho hunɔɔ puɛɛnɔŋ a nda okɔɔ.+
12 Ya wana pɛɛkaa, I bii niŋ waa masaa le Isɔluɛi o Chulusalɛm niŋ.+ 13 Mi kɛɛsiaa le mi soliŋ taasi nuu kpeku,+ le mi pɛɛku a nyɛ o nyɛ Mɛlɛka toosiaa o chieeŋndo hoo choo.+ Mi yaasiaa wali kɔl landɛi Mɛlɛka ke waŋnda chieeya le ma wa kpɔndi kpɔndi wo.
14 Mɛɛ ya mɛɛndaŋ walta wa tosaŋndo o chieeŋndo choo laŋ kpou,
Mi cha maa nyɛ fondoo fuu la cho ni, mɛɛ waŋndo wa nuaa hueiye nyaanɔŋndo kɔɔli yɛ.+
15 Nyɛ cho o tundɛi yo, wana nɔla ma siɛndi ndu le.
Nduyɛ nyɛ cho le wo, wana nɔla ma chɔm ndu kposoŋ te.
16 Okoŋ, mi dimi o kɔl niŋ aa: “I sɔla taasioo o hɔbɛi, mbo hiau wana o wana keeku ya lachi o Chulusalɛm niŋ.+ Nduyɛ, I nɔ taasioo a kɔl kaloo tau tau o kɔl nuu niŋ.”+ 17 Mi handu kɔllo le mi sina a taasioo okɔɔ, seemaa,* vɛlɛ a diɔmnde.+ Nduyɛ, keŋ bɛɛ cho ko mɛɛ waŋndo wa nuaa hueiye nyaanɔŋndo kɔɔli yɛ.
18 Kanifuule taasi bɛndu bɛndoo nɔɔ, kɔl tambɛiyo pila o chuu wana ni.
Lelaŋ wana o wana kindiŋ pɛ le mbo chɔɔlu kɔl kaloo sɔla, nyɛ nɛiyaa o chɔɔluŋ choo ni.+