Wa o Bɛɛndiaŋ le Paale Chɛhowa Leŋ

1. Yɛɛ naŋ nɔ yɛ miŋ tosa le miŋ sɔla chindaa o paale Chɛhowa leŋ choo?

TE BAABUIYO soo pɛ a “paale Chɛhowa leŋ” okɔɔ, o sim le teleŋ Chɛhowa cho yaamɔɔwaa nduaa yamɛi kilul, nduyɛ mbo chiindiaa wanaa nduaa wo. O paandoo niŋ, lepum mi Chɛhowa ndoo tusi lɛŋnde ipum nyɛpalaa choo. (Aisaya 13:​1, 6; Isi. 13:​5; Sɛfa. 1:​8) O palɛi nɛi niŋ, “paale Chɛhowa leŋ” le cho kandɔŋ a teleŋ masaa waa cho Babilɔŋ Bɛndoo delɔɔ choo, okoŋ mi chɔu Amakɛdɔŋndo kanduŋndo. Le chindaa sɔlaa o ‘paaleleŋ’ choo, naa kpou nɔ miŋ bɛɛndiaŋ suŋ suŋ. Mi Chiisu dimi maa, ŋ nɔ miŋ “wa a bɛɛndiaŋ” le “nyɛpalaa bɛndoo.” Hei sim ni maa, ŋ nɔ miŋ hiou lachi a bɛɛndiaŋndo.—Maa. 24:​21; Luku 12:​40.

2. Tɔnɔ yɛɛ naŋ sɔla yɛ o yau 1 Tɛsaloniaŋ niŋ?

² O yau tase kiilanɔɔ Pɔɔl poonyial Tɛsaloniaŋnda wo niŋ, mbo soliŋ tamaseliila bɔɔbɔɔ kpeku, le ma wa a bɛɛndiaŋ le paale kɔɔsɔle Chɛhowa leŋ chumndo. Pɔɔl ndoo sina maa, paale leŋ lee hiŋ niŋ a teleŋ koŋ te. (2 Tɛsa. 2:​1-3) A koŋ kpou, mi ndoo dɛɛniaa puaapiliaa a ndepiliaa le ma wa a bɛɛndiaŋ le paaleleŋ naŋ chaa diimandɔɔ le wa hunɔɔ ni. Naa bɛɛ nɔla hau miŋ dɔu sila ndɔɔ hoo o wali niŋ. Ŋ yaasiaŋndɔ mɛɛ o tɛɛsiaa sɔɔŋ muŋ yɛ: (1) Mɛɛ paale Chɛhowa leŋ le cho hunɔɔ yɛ, (2) nɛɛ yaa sɔla yɛ niŋ chindaa o paaleleŋ choo, nduyɛ (3) mɛɛ naŋ bɛɛndiaŋ le chindaa sɔlaa yɛ.

VƐƐ PAALE CHƐHOWA LEŊ LE HUŊ YƐ NIŊ?

3. Vɛɛ paale Chɛhowa leŋ le huŋ yɛ niŋ mɛɛ viinɔɔ huŋ nuaa o nyumndaŋ niŋ yɛ? (Tofa vɛlɛ fotueiyo.)

³ “Mɛɛ viinɔɔ huŋ nuaa o nyumndaŋ niŋ yɛ.” (1 Tɛsa. 5:​2) Tamaselii tasoo cho hoo ni o tamaseliila yaala Pɔɔl soliŋ kpeku, le tɛɛsiaa a mɛɛ paale Chɛhowa leŋ le huŋ niŋ yɛ okɔɔ. Teleŋnda bɔɔbɔɔ, mi viiya keleŋa luɛiyɔɔ chiɛiniŋ a nyumndaŋ. Nduyɛ a teleŋ koŋ, waŋnda ve nda kɔl te. Lende koni paale Chɛhowa leŋ le huŋ niŋ ni, wanaa bɔɔbɔɔ ve niŋ leŋ kɔl te. Kilisiɔŋaa tonyaa bɛɛ, naapum kɔndɔfillo cho nda biyɔɔ a mɛɛ sɔɔŋ keleŋa niŋ yɔŋnɔŋ yɛ. Kɛ wanaa dɛnɛwɔɔŋnda kinɛi sɔla niŋ tambei ni.

4. O nɛi kuɛɛ choo paale Chɛhowa leŋ le wa yɛ niŋ mɛɛ pulii vialɛi i kpuwa nuaa wana folioo yɛ?

⁴ “Mɛɛ pulii vialɛi i kpuwa nuaa wana folioo yɛ.” (1 Tɛsa. 5:​3) Wana folioo sina teleŋ kpeekpei pulii vialɛi cho ndu kandɔɔ nɛiyo wo le. Kɛ o sina maa paale wa niŋ, pulei cho ndu nɛi. Naapum o lepilɛ niŋ kpe, i kandu ndu niŋ nɛiyo ni. I lo ndu nɛiyo haaa mbo velu. O nɛi pilɛ koŋ choo, ŋ sina paaleŋ ɔɔ hawɛi paale Chɛhowa leŋ le cho hunɔɔ wo le. A koŋ kpou, ŋ sina maa paale Chɛhowa kɔɔsa niŋ a wanaa dɛnɛwɔɔŋnda leŋ, le huŋ niŋ a ve niŋ leŋ kɔl te, nduyɛ a heluŋ niŋ leŋ te.

5. Vɛɛ nyɛpalaa bɛndoo wa yɛ niŋ mɛɛ paale siaaleŋ le wa nuaa yɛ?

⁵ Mɛɛ paale siaaleŋ le wa nuaa yɛ. O tamasi yaa ndɔ Pɔɔl soliŋ kpeku wo niŋ, mbo suaa vɛlɛ a mɛɛ paale siaaleŋ le woolu nuaa viiya yɛ. Kɛ a teleŋndo hoo, tuuwo o wa paale Chɛhowa leŋ a paale siaaleŋ ni. (1 Tɛsa. 5:​4) Lepum, mi sɔɔŋ viiya wa choo o nyumndaŋ niŋndoŋ, tosa a sina mɛɛ teleŋndo wa kɔlaŋ yɛ le. Mi nyɛ teŋgaa paale siaa woolu nda, okoŋ mbo chɔɔmuu nda. O nɛi pilɛ koŋ choo, nyɛpalaa bɛndoo chɔɔmuu niŋ wanaa cho maa viiya, ma wa hiouwɔɔ lachi a sɔɔŋ nɛŋi Mɛlɛka kɔl te woŋ tosaa wa. Pesiŋ bɛɛ ŋ nɔ miŋ wa maa waŋnda haa le. Ŋ tiuba miŋ bɛɛndiaŋ le paale Chɛhowa leŋ, te ŋ fafaŋ pɛ kaala tɛɛmbuu ndu kɔllo laŋ tosaa. Ŋ nɔ “miŋ wa wanaa kɛndɛ o nɛi o nɛi niŋ, miŋ wa wanaa sakpuaa, nduyɛ miŋ kuɛ o nɛi tonyaa choo.” (Ɛfi. 5:​8-12) Mi Pɔɔl soliŋ vɛlɛ tamaseliilaŋ latiɔɔŋ kpeku, le chɔmndo wanaa sɔla niŋ chinda le wa.

NƐƐ YAA SƆLA YƐ NIŊ CHINDA O PAALE CHƐHOWA LEŊ CHOO LE?

6. O nɛi kuɛɛ choo wanaa bɔɔbɔɔ cho yɛ hau o luaŋ? (1 Tɛsaloniaŋ 5:​6, 7)

⁶ “Wanaa lɔl la.” (Nuawɔ 1 Tɛsaloniaŋ 5:​6, 7.) Mi Pɔɔl tuu wanaa sɔla niŋ chinda o paale Chɛhowa leŋ choo le wa a wanaa lɔl la. Waŋnda haa sina sɔɔŋ cho nda yɔŋnɔŋndo ikɛiyoŋ, ɔɔ mɛɛ teleŋndo cho hiouwɔɔ yɛ le. Le hei, a sina sɔɔŋ sɔvɛŋ cho nda yɔŋnɔŋndo ikɛiyoŋ, ɔɔ ma tosa nyɛ a muŋ okɔɔ le. Wanaa bɔɔbɔɔ cho hau o luaŋ o Mɛlɛka piɛiyo niŋ. (Luomaŋ. 11:​8) Pesiŋ bɛɛ waŋnda haa laalaŋ maa o palɛi mɛɛlɛi niŋ te naŋ cho le. Nduyɛ a laalaŋ vɛlɛ maa nyɛpalaa bɛndoo cho suŋ hunɔɔ le. Mi sɔɔŋ ŋpum ŋ yɔŋnuŋ o chieeŋndo niŋndoŋ tosa, mi waŋnda apum a cho o luaŋ o Mɛlɛka piɛiyo niŋnda tendu, okoŋ ma chɔm yeemɛi nyɛɛmbɔ o yooŋgu kɛndɛ lemasa naŋ dimi wo niŋ. Kɛ mi a bɔɔbɔɔ miiŋguŋ vɛlɛ o luaŋ. Mi wanaa laalaŋ maa paale kɔɔsɔleŋ le cho hunɔɔ wa bɛɛ yiyaŋ maa, le cho wɔ hunɔɔ le. (2 Pitɛ 3:​3, 4) Kɛ mɛɛ palɛi hiau fau, lende koni i wa choŋ choŋ ni, le sila Baabuiyo ke naa maa ŋ nɔ miŋ wa lahɔllo diikɔŋndo.

7. Vɛɛ wanaa sɔla niŋ chinda o paale Chɛhowa leŋ choo le wa cho yɛ maa wanaa kolaa?

⁷ “Wanaa kolaa.” Mi kiilanɔɔ Pɔɔl tuu vɛlɛ wanaa sɔla niŋ chinda o paale Chɛhowa leŋ choo le wa a wanaa kolaa. Wanaa kolaa chue sɔɔŋ wa nda yɔŋnɔŋndo ikɛiyoŋ ŋ sɔvɛ le, nduyɛ ma tosa kɛɛsiaala wɔɔŋndaŋ. O nɛi pilɛ koŋ choo, wanaa dɛnɛwɔɔŋnda chue silala Mɛlɛkalaŋ la sɔvɛ le. Mi waŋnda haa tol nɛi yaa wana o tambei niŋndo kɔɔli. Kɛ Kilisiɔŋnda nɔ ma wa yekeŋ vɛlɛ ma yiyaŋ nyɛkɛndɛi. (1 Tɛsa. 5:​6) Mi wana pilɛ tɛɛsiaa Baabuiyo wo dimi maa, wana wa yekeŋ ndo cho wana “kɛsi kɔllo, siooŋii bii ndu le wo ni. Mbo yiyaŋ nyɛkɛndɛi o sɔɔŋ choo le halikpeŋ mbo tosa kɛɛsiaala kɛndɛlaŋ.” Le yɛɛ naŋ nɔ yɛ miŋ kɛsi kɔllo, siooŋii bii naa le? Kanifuule, hei tosa ŋ luei balaŋ o yalale chieeŋndeŋ niŋ, ɔɔ o sɔɔŋ cho yɔŋnɔŋndo o chieeŋndo niŋndoŋ te. Mɛɛ paale Chɛhowa leŋ le sɔɔŋguu fau, lende koni i wa ikala naa o ba le sɔɔŋ muŋ fafaŋndo ni. Kɛ, ŋ nɔ miŋ buulaŋ a nyɛ naŋ tosa niŋndo okɔɔ le. Nyina Mɛlɛkaa tiuba mbo mala naa miŋ kɛsi kɔllo siooŋii ve naa le, nduyɛ miŋ tosa kɛɛsiaalaŋ a taasi.—Luku 12:​11, 12.

VƐƐ NAŊ BƐƐNDIAŊ YƐ LE PAALE CHƐHOWA LEŊ?

8. Vɛɛ 1 Tɛsaloniaŋ 5:​8 chɔm yɛ suliŋnda mala naa miŋ wa lahɔl, nduyɛ miŋ wa wanaa taasi wo? (Tofa vɛlɛ fotueiyo.)

⁸ ‘Wounuŋ . . . doma chɔuwo . . . a mɔsil chɔuwo.’ Mi Pɔɔl tuu naa a sovɛiyaa cho yekeŋ, ma wa a doviaŋ le chɔuwo wa. (Nuawɔ 1 Tɛsaloniaŋ 5:​8.) Sovɛinɔɔ nɔ mbo wa o bɛɛndiaŋ teleŋ o teleŋ le chɔuwo. Nyɛ pilɛ koŋ kpe cho a naa ni. Ŋ tiuba miŋ wa a bɛɛndiaŋ le paale Chɛhowa leŋ, te ŋ wounuŋ pɛ laalaŋndo a kaalaa maa doma chɔu, nduyɛ miŋ wounuŋ tiindaŋ naŋ nɔ le pioŋɔɔ sɔlaa wo maa mɔsil chɔu. Suliŋndaŋ ndaŋ la nɔla mi la mala naa tau.

9. Vɛɛ laalaŋ naa manda yɛ naa?

⁹ Mi doma chɔuwo manda sovɛinɔɔ takpaa. O nɛi pilɛ koŋ choo, mi laalaŋndo a kaalaa manda kɔlta naalaŋ. Suliŋndaŋ ndaŋ la mala naa miŋ hiou lachi a Mɛlɛka piɛiyo, vɛlɛ a Chiisu tolɔɔ kɔɔli. Laalaŋndo mala naa miŋ nɔ tiindaŋndo kɛsɛ maa, Chɛhowa cho naa fanda te ŋ hiou pɛ lachi a ndu piɛiyo a kɔllo kpou. (Hibu. 11:​6) Mi suliŋndo hoo mala naa miŋ hiou lachi a lo lechoo wo chɔmndo o simlachinɔ naa lo, Chiisu mɛɛ mɛɛ sɔɔŋ palaŋ komal naa. Ŋ tiuba miŋ kindi laalaŋ naa poŋ, te ŋ yaasiaa pɛ tamaseliila waŋnda apum o palɛi nɛi niŋ, a lo o pimbi nda simiaa choo wa, mi che bɛɛ ma tusi nda nyɛpalaa choo, ɔɔ mi bahawɛi nyɛsɔlaa komal nda. Ŋ tiu vɛlɛ ba miŋ fafaŋ yaŋɔɔleŋ le nyɛm kiɔɔŋ nuuviaa tau, te ŋ tol pɛ tamaseliila wanaa tosa yoomula ndalaŋ tɛtɛlɛ, le masale Mɛlɛkaleŋ kɛsioo nyɛ tasoo o yoomula ndalaŋ niŋ nda kɔɔli.b

10. Vɛɛ kaala naŋ nɔ le Mɛlɛka a wanaa naŋ chiɛɛliaŋnda wo mala yɛ naa miŋ biunuŋ yooŋgu kɛndɔɔ dimioo?

¹⁰ Kaalaa cho vɛlɛ suliŋ sɔvɛ sɔviɔɔ opilɛ, o mala naa miŋ wa lahɔl, nduyɛ miŋ wa wanaa taasi wo. (Maa. 22:​37-39) Mi kaala naŋ nɔ le Mɛlɛka wo mala naa miŋ biunuŋ yooŋgu kɛndɔɔ dimioo, o yɔŋ bɛɛ mi sɔɔŋ palaŋ komal naa. (2 Timo. 1:​7, 8) Nduyɛ, le mɛɛ naŋ kaala wanaa naŋ nɔ laalaŋ pilɛ le wa yɛ, miŋ hiou lachi a nda yooŋgu kɛndɔɔ dimullo o tanda naa niŋ, o yɔŋ bɛɛ aa o foŋndo choo, ɔɔ sanaa a nda yaulaŋ poonyiallo. Ŋ nɔ miŋ vi ŋdial te. Kɛ ŋ nɔ miŋ hiou lachi a tiindaŋndo nɔɔ maa, paale wa niŋ, mi waŋnda haa siŋgaŋ, okoŋ ma kandu nyɛ cho o kɛndɔɔ wo tosaa.—Isi. 18:​27, 28.

11. Vɛɛ kaala naŋ nɔ le chaaŋaa naa laalaŋnda wo mala yɛ naa? (1 Tɛsaloniaŋ 5:​11)

¹¹ Ŋ nɔ vɛlɛ miŋ kaala chaaŋaa naa laalaŋnda. Ŋ chɔmnda kaalaa te ŋ wa pɛ “dɛɛniaŋndo vellaa velle, a yoomuaŋ lueinaŋndo.” (Nuawɔ 1 Tɛsaloniaŋ 5:​11.) Mi sovɛiya kɛsi opilɛ a o cheleŋndo hɔlteŋ choo. O nɛi pilɛ koŋ choo, naa bɛɛ nɔ miŋ wa dɛɛniaŋndo vellaa velle. I cho tonya maa, lepum mi sulɛi hɛluŋ sovɛinɔɔ o chɔuwo, okoŋ mbo wuu chaaŋ ndɔ. Kɛ pesiŋ bɛɛ o tosa ndi kpɛsɛkɛɛ le. O nɛi pilɛ koŋ choo, naa bɛɛ pesiŋ bɛɛ ŋ nɔ miŋ yɔŋul chaaŋaa naa kpɛsɛkɛɛ, ɔɔ miŋ miŋgul nda maa le. (1 Tɛsa. 5:​13, 15) Ŋ chɔm vɛlɛ kaalaa, te ŋ ke pɛ puaapiliaa cho chilaŋ chuaa o kundaa niŋnda bɛɛleŋ. (1 Tɛsa. 5:​12) Teleŋ Pɔɔl poonyiaa yauwo hoo wo, kundaa Tɛsalonaika ndoo chii wɔ wɔsi pilɛ le. Le hei, naapum wanaa wa chilaŋ chuaa wa ndaa nɔ taasi bɔɔ le, nduyɛ mi ndaa tosa biondɔŋndaŋ. A koŋ kpou, ndaa nɔ ma ke nda bɛɛleŋ. Mɛɛ nyɛpalaa bɛndoo sɔɔŋguu fau, lende koni naŋ nɔ ni miŋ tiindaŋ bɛnduaa kundaa le naa nɛi chɔmaa kioo, mbo hiou mɛɛ naŋ cho tosaa suŋ suŋ yɛ. Naapum ŋ sɔla niŋ nɛila chɔmaalaŋ fondaŋnda leboltaŋ, a lɛuve o ba le. Lelaŋ, i cho suɛi sɔvɛ le miŋ pɛɛku suŋ suŋ le bɛnduaa kundaa kaalaa a nda bɛɛleŋ kioo. Mɛɛ mɛɛ sɔɔŋ yɔŋnuŋ, ŋ nɔ miŋ wa wanaa taasi. Nduyɛ ŋ nɔ miŋ kɛsi kɔllo o biondɔŋnda ndalaŋ choo le. Kɛ ŋ nɔ miŋ loonuŋ maa, Chɛhowa cho puaa haa nɛi chɔmaa kioo ni sanaa a Kiliti.

12. Vɛɛ tiindaŋ naŋ nɔ wo manda yɛ yiyaŋnda naalaŋ?

¹² Mi mɔsil puaa chɔuwa wounuŋndo manda nda bolleŋ. Naa bɛɛ, mi tiindaŋ naŋ nɔ le pioŋɔɔ sɔlaa wo manda yiyaŋnda naalaŋ. Te ŋ nɔ pɛ tiindaŋ kala kalaa, keŋ tosa miŋ sina maa nyɛ chieeŋndo ke naa wo, cho nyɛ sɔvɛ kposoŋ te. (Filipi. 3:​8) Mi tiindaŋ naa mala naa miŋ kɛsi kɔllo, siooŋii ve naa le. Mi hei yɔŋnuŋ Waliisi nda Loliŋnda cho wallo o Bɛtɛɛl o Afilika niŋndo. O lɔɔla yaa bɛŋgu, mi finyaa Waliisi sɔla piɔmndo, nduyɛ mi kalaa Loliŋnda bɛɛ sɔla piɔmndo. Kɛ le mɛɛ Naa Kolonaa wa yɛ, a nɔla ma miiŋgu o la ndalo le ma wa a yuŋgula ndalaŋ latulu le. Mi Waliisi dimi aa: “Mi tiindaŋ naŋ nɔ le miiŋgoo yoomu wo mala ya, mi yiyaŋ o cho ko a palɛi mɛɛlɛi nda wa yoomu ve le, kɛ a mɛɛ nda wa niŋ o palɛi tasei choo o chieeŋ sɛnɛiyo niŋ yɛ. Te I kandu dɔɔ pɛ mɔnɛi biyɔɔ le wana ni vi wo, mi tiindaŋndo hoo mala ya mi kɛsi kɔllo.”

13. Yɛɛ naŋ nɔ yɛ miŋ tosa le miŋ sɔla nyina diandaa?

¹³ “Kuuna nyina diandaa wallo tosaa le.” (1 Tɛsa. 5:​19) Te ŋ sɔla pɛ nyina diandaa, ŋ tiuba miŋ nɔ sɛmbɔɔ a dialuŋ fulaŋ, le nyɛ cho o kɛndɔɔ wo tosaa, vɛlɛ miŋ nɔ yoomuaŋ le wali Chɛhowaa tosaa. (Luomaŋ. 12:​11) Yɛɛ naŋ nɔ yɛ miŋ tosa le miŋ sɔla nyina diandaa? Ŋ nɔ miŋ piɛi le ndu, miŋ pɛɛku Diom Mɛlɛkaa, vɛlɛ miŋ wa latulu a kɔɔna ndɔɔ. Hei tosaa mala naa miŋ nɔ “suliŋnda nyina Mɛlɛkaa.”—Kalee. 5:​22, 23.

14. Le miŋ hiou lachi a nyina Mɛlɛkaa sɔlaa, yɛɛ naŋ nɔ yɛ miŋ fafaŋ? (Tofa vɛlɛ fotueiyo.)

¹⁴ Te Mɛlɛka ke naa pɛ nyina ndɔ diandaa, ŋ nɔ miŋ wa yekeŋ yɔŋii naŋ “kuuna [ndu] wallo tosaa.” Wanaa nɔ kaala diandaalaŋ, nduyɛ ma yiyaŋ o sɔɔŋ kɛndɔŋ choo wa kinɛi Mɛlɛka ke nyina ndɔ diandaa ni. Pesiŋ bɛɛ o ke naa nyina ndɔ diandaa le, te ŋ wa pɛ yiyaŋndo o sɔɔŋ nɔɔlɛiyoŋ choo, vɛlɛ miŋ wa muŋ tosaa. (1 Tɛsa. 4:​7, 8) Le miŋ hiou lachi a nyina diandaa sɔlaa, ŋ nɔ vɛlɛ miŋ “pɛɛsa sɔɔŋ wanaa ndaa suaa le Mɛlɛka wa dimi woŋ te.” (1 Tɛsa. 5:​20) “Sɔɔŋ wanaa ndaa suaa le Mɛlɛka wa dimi woŋ,” sim vɛlɛ le yooŋgula Mɛlɛka ke puaa, sanaa a nyina diandaa laŋ. Yooŋgulaŋ mɛɛ a paale ndɔleŋ vɛlɛ a palɛi nɛi okɔɔ cho nuaa yɛ. Kposoŋ bɛɛ ŋ nɔ miŋ puɛɛnuŋ a paaleŋ ndeŋ okɔɔ, ɔɔ miŋ yiyaŋ maa Amakɛdɔŋ komal naa niŋ yoomu le le. Kɛ ŋ nɔla miŋ kɛsiŋ paaleŋ ndeŋ o kɔl te ŋ nɔ pɛ “kaala diandaa laŋ,” nduyɛ miŋ wa “wanaa cho a yɔŋgaŋ o Mɛlɛka lo wa” lepaa o lepaa.—2 Pitɛ 3:​11, 12.

“LA MƐƐNDIAŊ NYƐ O NYƐ”

15. Yɛɛ naŋ nɔ yɛ miŋ tosa le halikpeŋ yooŋgula lachoowala waŋnda dimi laŋ, a choola nyinaa wɔɔŋnda pɛŋgɛla laŋ la hui naa le? (1 Tɛsaloniaŋ 5:​21)

¹⁵ O teleŋ biŋgi bɛŋgu, wanaa cho Mɛlɛka simullo wa cho dimi o nɛilaŋ lapum choo aa: “Kɔl nyuloo cho niŋ ba o ba fee. Mbɔ wana yɔŋnuŋ niŋ isiooŋ fuu!” (1 Tɛsa. 5:​3) Choola nyinaa wɔɔŋnda pɛŋgɛla laŋ, la cho tiu o chieeŋndo choo silɔ. Nduyɛ la cho wanaa bɔɔbɔɔ hui. (Sɔɔŋ. 16:​13, 14) Kɛ naa yɛ? Choola ndalaŋ la tiu niŋ ba mi la hui naa le, te ŋ ‘mɛɛndiaŋ pɛ nyɛ o nyɛ.’ (Nuawɔ 1 Tɛsaloniaŋ 5:​21.) Diom maKilikii nda soliŋ kpeku le diomndaŋ ndaŋ “mɛɛndiaŋ nyɛ o nyɛ” wo, sim mɛɛ waŋnda mɛɛndiaŋ nuaa kooliiye te i bɛnda pɛ yɛ. Lelaŋ, ŋ nɔ miŋ yiyaŋ nyɛkɛndɛi a nyɛ naŋ cho wa tueiyɔɔ wo, ɔɔ nyɛ naŋ cho wa diomndaŋ veeloo wo, le sinaa te tonyaa cho pɛ leniŋ. Hei wa suɛi sɔvɛ le Tɛsaloniaŋnda. Nduyɛ naa bɛɛ, mɛɛ naŋ sɔɔŋguu nyɛpalaa bɛndoo ikɛi fau, lende koni i chɔɔlu wa isɔvɛ le naa ni. Ŋ nɔ miŋ laalaŋ sɔɔŋ naŋ cho wa tueiyɔɔ woŋ te. Kɛ ŋ nɔ miŋ soliŋ yiyaŋ naa kpeku, le nyɛ naŋ cho wa diomndaŋ veeloo wo, ɔɔ sɔɔŋ naŋ cho wa tueiyɔɔ woŋ tuuwo a nyɛ Baabuiyo vɛlɛ a kɔɔna Chɛhowaa dimi wo. Hei tosaa cho naa mala, choola nyinaa wɔɔŋnda cho wa pɛŋgɛlaa laŋ la hui naa le.—Pulɔ. 14:​15; 1 Timo. 4:​1.

16. Tiindaŋ sɔvɛ kuɛɛ naŋ nɔ yɛ, nduyɛ yɛɛ naŋ nɔ yɛ miŋ kɛɛsiaŋ o kɔl le tosaa?

¹⁶ Ŋ sina maa naa wanaa Chɛhowaa cho chindaa sɔla a teleŋ nyɛpalaa bɛndoo. Kɛ naa a pilɛŋ pilɛŋnda kpou, ŋ sina mɛɛ yoomoo wa niŋ a naa o siɔdii lachioo niŋ yɛ le. (Chemi. 4:​14) A koŋ kpou, o yɔŋ bɛɛ miŋ lo yoomu haaa mi nyɛpalaa bɛndoo hiŋ, ɔɔ miŋ sɔla piɔmndo tuupa mbo hiŋ, Mɛlɛka cho naa fanda a yoomu fafɛɛŋndo te ŋ lo pɛ o laalaŋ naa choo. Kilisiɔŋaa pɔyaŋnda cho wa a Kiliti latulu o choo choo niŋ. Nduyɛ saa cheleŋnda cho wa o kpele hɛnɛkiɔɔ niŋ o chieeŋndo choo. Maa naa kpou kɛɛsiaŋ o kɔl, le kɔllo handɔɔ o tiindaŋ sɔvɛ sɔvɛ naŋ nɔ wo choo, vɛlɛ miŋ hiou lachi a bɛɛndiaŋndo le paale Chɛhowa leŋ.