Tiindaŋ Chɛhowa Maa Samsiŋ

1-2. Le yɛɛ i cho yɛ suɛi sɔvɛ le pɛɛkoo a bundɛi Samsiŋ nde okɔɔ?

YƐƐ huŋ yɛ num o kɔl te a tuei pɛ diolaŋ ndaŋ Samsiŋ? Naapum, ma yiyaŋ dɔɔ a po ndoo nɔ kpaayaa tau wo okɔɔ. Keŋ cho tonya. Kɛ mi Samsiŋ tosa kɛɛsiaa wɔɔŋndo, o chuu ndu fulamakɔɔlila wɔɔŋndaŋ ndo. A koŋ kpou, mi Chɛhowa kɛsi kɔllo o laalaŋ ndɔɔ choo. Nduyɛ mbo tosa ma poonyiaa a ndu okɔɔ o Baabuiyo niŋ le tɔnɔ naa.

² Mi Chɛhowa soliŋ Samsiŋ kpeku le sɔɔŋ kɔndɔfilloŋ tosaa, le halikpeŋ mbo mala wanaa nduaa, Isɔluɛiya. Wɔsiŋ bɔɔbɔɔ o piɔm Samsiŋ ndo kɔɔli, mi Chɛhowa ke kiilanɔɔ Pɔɔl nyina ndɔ diandaa, le mbo poonyiaa diola Samsiŋ ndaŋ, o puaa ndaa chɔm laalaŋ kala kalaa wa tɛɛŋ. (Hibu. 11:​32-34) Tamasi Samsiŋ ndo tiuba mbo dɛɛniaa naa hau kɔllo. A teleŋnda kala kalaŋ bɛɛ, mbo tiindaŋ Chɛhowa. O buŋgɛi hei niŋ, ŋ cho chɔ nyɛ naŋ pɛɛku Samsiŋ o ba wo, nduyɛ a mɛɛ tamasi ndɔɔ dɛɛniaa naa kɔllo yɛ.

MI SAMSIŊ DUAU TIINDAŊNDO O CHƐHOWA NIŊ

3. Wali kala kala kuɛɛ Samsiŋ ndoo sɔla yɛ le tosaa?

³ A teleŋ nda velu Samsiŋ ndo, kaaleŋ Isɔluɛi wa Filitiaŋnda o ba bɛŋgu. Nduyɛ, a wa Isɔluɛiya nyɛpalaa tusioo choo. (Chɔɔchi. 13:​1) Mi biyɔɔ wɔɔŋ Filitiaŋnda wa nda wo saaŋgiaa nda tau. Mi Chɛhowa hɛli Samsiŋ le “Isɔluɛiya baŋaa Filitiaŋnda o ba.” (Chɔɔchi. 13:​5) Wali kala kalaa pila wa hoo ni. Le mi Samsiŋ ndoo tosa wali kala kala keŋnuŋ ndu koŋ ndo, ndoo nɔ mbo tiindaŋ Chɛhowa.

4. Vɛɛ Chɛhowa mala yɛ Samsiŋ le mbo piŋi ndupila Filitiaŋnda o ba? (Chɔɔchiaa 15:​14-16)

⁴ Ŋ tofaŋndɔ tamaseliiyo opilɛ o Samsiŋ dɔu tiindaŋndo o Chɛhowa niŋ le ndu malaa wo. A teleŋ pilɛ, mi puaa chɔuwaa Filitiaŋnda huŋ del ndu choo o chioo Lɛhi. Naapum o Chuda niŋ chioo hoo wa ni. Mi siooŋnde bii puaa Chuda, okoŋ ma kɛɛsiaa le ma mal Samsiŋ yaamɔɔwaa nduaa o ba. Mi wanaa Samsiŋ nda yii ndu a yuei sɛnɛiye i ŋiiŋ, okoŋ ma kua a ndu o Filitiaŋnda lo. (Chɔɔchi. 15:​9-13) Kɛ “mi nyina Mɛlɛka Yaawɛɛ wo o tual Samsiŋ kɔɔli a kpaaya bɛndoo.” Okoŋ mbo kili kili yuei keŋ. Nduyɛ okoŋ kɔɔli, mbo “cha yaalo sofɛlɛ nda dii sɛnɛiyo” o malaa lɛŋ. Mbo chua ndu, okoŋ mbo soliŋ ndu kpeku le Filitiaŋnda 1,000 diyɔɔ.—Nuawɔ Chɔɔchiaa 15:​14-16.

5. Vɛɛ Samsiŋ chɔm yɛ maa Chɛhowa ndoo tiindaŋ ni?

⁵ Le yɛɛ Samsiŋ ndoo soliŋ yɛ yaalo sofɛlɔɔ kpeku? O cho yaalo sofɛlɔɔ le ndaa soliŋ kpeku le chɔuwo le. I cho kpendekele maa, Samsiŋ ndoo sina maa Chɛhowa wa ndu mala ni le batiuwaa sɔlaa. O cho nyɛ o wa soliŋ kpeku le sɔŋgaa wo le. A tonya, mi Samsiŋ soliŋ nyɛ wa ndu o ba wo kpeku, le hɛnaŋ Chɛhowaa tosaa. Fulamakɔɔlioo wa ni, mbo sɔla batiuwaa kanifuule, ndoo dɔu tiindaŋndo o Chɛhowa niŋ.

6. Te a ke naa pɛ wallo opum le tosaa o kɔɔna Chɛhowaa niŋ, yɛɛ naŋ pɛɛku yɛ Samsiŋ o ba?

⁶ Naa bɛɛ, Chɛhowa cho naa yoomuaŋ luei le halikpeŋ miŋ tosa nyɛ o nyɛ o dimul naa pɛ le tosaa, o yɔŋ bɛɛ mi wali koŋ wa o kala le tosaa. Lepum, mbo mala naa le nyɛ tosa ŋ ve kɔl kposoŋ te. Nɔ tiindaŋndo maa, Chɛhowa cho num mala mɛɛ o mala Samsiŋ yɛ, te a dɔu pɛ tiindaŋndo o ndu niŋ le num malaa.—Pulɔ. 16:​3.

7. Tamaselii kuɛɛ chɔm yɛ maa, i cho suɛi sɔvɛ le Chɛhowa nyunaa le nɛi chɔmaa?

⁷ Puaapiliaa a ndepiliaa naa cho fondaŋnda naala lepiɛilaŋ taŋgullo wa, chɔm niŋ kpendekele maa, a nɔ tiindaŋndo o Chɛhowa niŋ. O paandoo niŋ, Toŋgola leMasalaŋ a taŋgulta bɔɔbɔɔ, puaapiliaa ndaa tuuliaa laŋ o yau choo ni, okoŋ ma taŋgultaŋ. Kɛ le mɛɛ kɔɔna Chɛhowaa cho hiouwɔɔ lachi a hindɔɔ yɛ, siŋgaŋndaŋ laa nɔ mi la tosaŋ a hei okɔɔ. Le hei, mi puaapiliaa cho chilaŋ chuaa wa piɛi o Chɛhowa lo le nɛi chɔmaa, nduyɛ ma kindiŋ le nɛila sɛnɛilaŋ soliŋndo kpeku, mɛɛ chiɛilaŋ piondɔɔ a laŋ miŋgioo bɛɛndiaa cho nuaa yɛ. Mi Lɔbɔti tosa niŋ wallo o wɔsiŋ laŋga hiou woŋ niŋ le fondaŋnda naala lepiɛilaŋ taŋgullo chieeŋndo balɔɔ silɔ wo dimi aa: “O kandɔŋndo, i ve bɛɛŋ bɛɛŋ apum o ba, le siŋgaŋ sɛnɛiyo hoo chɛlɔɔ le.” Mbo hiau lachi a dimioo aa: “Nɛiyo hoo cho bɔɔ teŋgeŋ a nɛi naŋ bii niŋ soliŋndo kpeku o wɔsila hiou laŋ niŋndo. Kɛ mi puaapiliaa yɔŋguŋ a kɔllo kpou, le yɛlɛmiaalaŋ tosaa. Nduyɛ ŋ cho niŋ chɔɔ kpendekele maa, Chɛhowa cho siŋgaŋ tosaŋ hoo wo salaa dɔwɔɔ.” Tamaseliiyo opilɛ kpe cho hoo ni, le chɔmndo mɛɛ Chɛhowa cho wanaa nduaa nɛi chɔmaa kioo, le hɛnaŋ ndɔɔ tosaa yɛ. Teleŋ o teleŋ, naa kpou nɔ miŋ nyunaŋ aa: ‘Baa I cho pa nɛi chɔmaa Chɛhowaa tolɔɔ kɔɔli, nduyɛ mi chɛl le yɛlɛmiaalaŋ tosaa o ndu piɛiyo niŋ?’

MI SAMSIŊ TIINDAŊ NYƐM CHƐHOWA KE NDU WOŊ

8. A teleŋ pilɛ, mɛɛ kolɔɔ bii Samsiŋ, yɛɛ ndoo tosa yɛ?

⁸ Naapum, a loonuŋ a sɔɔŋ kɔndɔfiliŋ cheleŋ Samsiŋ tosa woŋ okɔɔ. Mbo dii kpɔkuŋndo a laba, nduyɛ mbo dii puaa chɔuwaa Filitiaŋnda 30 o chioo Asikɛlɔŋ. (Chɔɔchi. 14:​5, 6, 19) Samsiŋ ndoo sina maa pesiŋ bɛɛ ndoo tiuba mbo tosa sɔɔŋ muŋ a ba ndɔ le, mɛɛ mi Chɛhowa ndoo mala ndu. Mi hei chɔmnuŋ kpendekele a teleŋ pilɛ, mɛɛ o diu puaa chɔuwaa Filitiaŋnda 1,000, nduyɛ mi kolɔɔ bii ndu. Yɛɛ o tosa yɛ? O tiindaŋ ndupila le bahawɛi ndɔɔ solioo le. Kɛ mbo nyuna Chɛhowa le mbo mala ndu.—Chɔɔchi. 15:​18.

9. Vɛɛ Chɛhowa ndoo muli yɛ piɛile Samsiŋ ndeŋ? (Chɔɔchiaa 15:​19)

⁹ Mi Chɛhowa muli piɛile Samsiŋ ndeŋ, mɛɛ o tosa kaamaa le mbo sɔla mɛŋndaŋ. Mɛɛ Samsiŋ kol mɛŋndaŋ maŋ, “mbo miiŋgu yoomuaŋ sɔla.” (Nuawɔ Chɔɔchiaa 15:​19.) Wana che pɛ maa, naapum pee Chɛhowa tosa koŋ kaamaa le mi Samsiŋ kol mɛŋma nduaŋ ndo, wa wɔ teleŋ Saamiɛɛ wana ndoo suaa le Mɛlɛka wo poonyiaa yau Chɔɔchiaa wo. Naapum, mi Isɔluɛiyaa che pioo hoo wa loonuŋ maa, te a dɔu pɛ tiindaŋndo o Chɛhowa niŋ a teleŋ nda wa o bahawɛiyo niŋndo, o cho nda mala.

10. Yɛɛ naŋ nɔ yɛ miŋ tosa le miŋ sɔla mala Chɛhowaa? (Tofa vɛlɛ fotueiyo.)

¹⁰ Naa bɛɛ nɔ miŋ nyuna Chɛhowa le malaa, mɛɛ mɛɛ naŋ nɔ taasioo ɔɔ kpaayaa le nyɛ tosa, ɔɔ o yɔŋ bɛɛ miŋ tosa niŋ tau o ndu piɛiyo niŋ. Ŋ nɔ miŋ tusiŋ, nduyɛ miŋ chɛl maa le miŋ sɔla batiuwaa, mɛɛ miŋ tiindaŋ Chɛhowa. Mi Samsiŋ sɔla yoomuaŋ mɛɛ o kol mɛŋma Chɛhowa ke ndu waŋ. O nɛi pilɛ koŋ choo, naa bɛɛ tiuba miŋ sɔla yoomuaŋ o Chɛhowa piɛiyo niŋ, te ŋ soliŋ pɛ nyɛm o cho naa kioo woŋ kpeku.—Maa. 11:​28.

11. Vɛɛ naŋ tiindaŋ yɛ Chɛhowa le naa malaa? Chɔmndɔ tamaseliiyo.

¹¹ Ŋ tofaŋndɔ tamasi puaapilɛnɔ pilɛ o Lɔɔsiaa niŋ, diolaŋ Alɛkisi. Puaapilɛnɔɔ hoo cho nyɛpalaa kala kalaa biuwɔŋndo. Yɛɛ cho yɛ ndu malaa le nyɛpalaa koŋ biuwɔŋndo? Ndu nda laa ndɔ nɔ kɛɛsiaa kɛndɔɔ le sɔɔŋ ŋMɛlɛkayaŋ tosaa. Mbo dimi aa: “Mi kindiŋ kpoke le kɛɛsiaa ya nɔ le pɛɛkɔŋ ipilayaa a diomndaŋ veeloo o Baabuiyo niŋ lepaa o lepaa wo tolɔɔ kɔɔli. Idii o idii, mi ya naa laa nuu veelu diomndaŋ o tɛɛsiiyo niŋ, miŋ suukaŋ lechoo, nduyɛ miŋ piɛi o Chɛhowa lo le malaa.” Yɛɛ naŋ pɛɛku yɛ o tamaseliiyo hoo niŋ? Ŋ pɛɛku maa, ŋ nɔ miŋ tiindaŋ naapila le. Kɛ, ŋ nɔ miŋ dɔu tiindaŋ naa kpou o Chɛhowa niŋ. Vɛɛ naŋ tosa yɛ hei? Ŋ nɔ miŋ taŋgul laalaŋ naa, sanaa a pɛɛkɔŋ ipilayaa, vɛlɛ a sɔɔŋ ŋMɛlɛkayaŋ cheleŋ tosaa. Te ŋ tosa hei pɛ, Chɛhowa cho naa salaa dɔwɔɔ, le mɛɛ naŋ cho kindiŋndo le ndu piɛiyo yɛ. Mbo luei Samsiŋ yoomuaŋ, nduyɛ naa bɛɛ o cho naa yoomuaŋ luei.

SAMSIŊ VI ŊDIAL TE

12. Kɛɛsiaa wɔɔŋ kuɛɛ Samsiŋ ndoo tosa yɛ, nduyɛ vɛɛ kaala ndoo nɔ le Dilaila wo wa yɛ teŋgeŋ?

¹² Wana chioo Samsiŋ wa ni maa naa. Le hei, lepum mi ndoo tosa kɛɛsiaala wɔɔŋndaŋ. Nduyɛ mbo tosa kɛɛsiaa wɔɔŋndo opum, o chuu ndu fulamakɔɔlila wɔɔŋndaŋ ndo kanifuule, o kɛsiŋ wali Mɛlɛka ke ndu wo o kɔl te. Mɛɛ o sim wanaa Mɛlɛkaa lachi le teleŋ tiŋ, mbo “kaala chua pilɛ diolaŋ aa Dilaila, wana waa o chiee pilɛ o lɛŋnde dɛŋgbɛleŋ niŋ Soluɛki.” (Chɔɔchi. 16:​4) O teleŋnda hiou laŋ niŋ, Samsiŋ ndoo yeema mbo chua chua Filitiaŋnɔ pilɛ o nɔɔ niŋ. Nduyɛ “Mɛlɛka Yaawɛɛ pila bala ndɔlaŋ la wa o nyɛ Samsiŋ” wa koŋ tosaa wo niŋ. Kanifuule, ndoo yeema mi Samsiŋ sɔla fondaa, le Filitiaŋnda chɔulabaa. Okoŋ kɔɔli, mi Samsiŋ kua o chiɛi wana lanɔ tiamaa pilɛ niŋ, o chiee bɛndu Filitiaŋnda niŋ diolaŋ Kaasa. Nduyɛ mi Mɛlɛka luei ndu yoomuaŋ, le diola saasa chiee koŋ suŋgɔɔ. Mi keŋ tosa mi Filitiaŋnda wu ŋdial. (Chɔɔchi. 14:​1-4; 16:​1-3) Kɛ naapum, Isɔluɛinɔɔ Dilaila wa ni. Lelaŋ, o cho le Filitiaŋnda chɔulaba le Samsiŋ ndoo kaala ndu le.

13. Vɛɛ Dilaila kindiŋ yɛ le Samsiŋ nyindɔɔ le kɛɛsiaa wɔɔŋndo tosaa?

¹³ Mi Dilaila chɛl kaniŋ bɛnduŋ Filitiaŋnda ke ndu woŋ, le mbo pisi nda Samsiŋ o ba. Naapum le mɛɛ Samsiŋ ndoo kaala Dilaila tau yɛ, keŋ tosa ni o sina nyɛ Dilaila ndoo yeema tosaa wo le. Mɛɛ mɛɛ i wa, nyɛ naŋ sina wo cho ni maa, mi Dilaila hiau lachi a Samsiŋ kindilaa, le mbo chɔm ndu nyɛ tosa mbo nɔ kpaayaa wo. Nduyɛ o mɛɛlulaŋ kpɔŋ, mbo chɔm ndu. I cho suɛi imɔnɔ le sinaa maa, mi kɛɛsiaa wɔɔŋ Samsiŋ tosa hoo wo, chuu ndu fulamakɔɔlila wɔɔŋndaŋ. Mi kpaaya ndɔɔ hialuŋ ndu, nduyɛ le teleŋ tiŋ, Chɛhowa ndoo hini kɔl a ndu le.—Chɔɔchi. 16:​16-20.

14. Fulamakɔɔlila wɔɔŋnda kuɛɛ Samsiŋ sɔla yɛ, le mɛɛ o dɔu tiindaŋndo o Dilaila niŋ yɛ?

¹⁴ Mi Samsiŋ sɔla fulamakɔɔlila wɔɔŋndaŋ, le mɛɛ o dɔu tiindaŋndo o Dilaila niŋ, mbo kɛɛ Chɛhowa tiindaŋndo yɛ. Mi Filitiaŋnda bii ndu, nduyɛ ma kaaliaa ndu hɔltaŋ. Okoŋ, ma kɔ dɔu ndu o chiɛi manyumndo niŋ o chioo Kaasa. Loŋ o suŋgu dio saasa chioo o tasela ndɔ ni. Le hei, mi wanaa kaŋ simi ndu witiiyoŋ chuiyo o chiɛi manyum koŋ niŋ. Okoŋ kɔɔli, mɛɛ Filitiaŋnda chuuŋgiaŋ le dunyɛi, ma soli ndu le ndu siɔmbulaŋ tusioo. Ma soli salalaŋ o mɛlɛka nda lachoowaa lo Dakɔŋ, naŋ chaa ndu tosa ni ma bii Samsiŋ. Nduyɛ ma tosa le mi Samsiŋ ‘tosal nda sɔɔŋ mamaŋ’ le halikpeŋ ma mam ndu.—Chɔɔchi. 16:​21-25.

15. Vɛɛ Samsiŋ chɔm yɛ vɛlɛ maa ndoo tiindaŋ Chɛhowa? (Chɔɔchiaa 16:​28-30) (Tofa fotueiyo o kɔɔ.)

¹⁵ Mi che bɛɛ mi Samsiŋ tosa biondɔŋ wɔɔŋ wɔɔŋndo, kɛ o vi ŋdial te. Mbo nuuviaa fondaa le halikpeŋ mbo tosa wali Mɛlɛka ke ndu le Filitiaŋnda chɔulabaa wo. (Nuawɔ Chɔɔchiaa 16:​28-30.) Mbo nyɔɔlu Chɛhowa aa: “Yandii Mɛlɛka naa, ke ya [kpaayaa] mi miŋgul Filitiaŋnda haa maa.” Mi Chɛhowa tuɛi piɛile Samsiŋ ndeŋ, nduyɛ mbo luei ndu yoomuaŋ. Fulamakɔɔlioo wa ni, mi Samsiŋ sɔla batiuwaa le Filitiaŋnda diuwo, mbo hiau maa paandu.

16. Yɛɛ naŋ pɛɛku yɛ o biondɔŋ Samsiŋ tosa wo niŋ?

¹⁶ Mi che bɛɛ mi Samsiŋ sɔla fulamakɔɔlila wɔɔŋndaŋ le biondɔŋ o tosa wo, kɛ keŋ kuuna ndu hɛnaŋ Chɛhowaa tosaa le. Te o yɔŋ pɛ miŋ tosa biondɔŋndo, nduyɛ ma sila naa, ɔɔ mi dikeŋnaŋ naa hɛluŋ naa, ŋ nɔ miŋ vi ŋdial te. Loonuŋ maa, Chɛhowa cho o bɛɛndiaŋ teleŋ o teleŋ le naa malɔɔ haki. (Sam 103:​8-10) Mi che bɛɛ miŋ tosa biondɔŋndaŋ, kɛ Chɛhowa tiuwɔ ba mbo soliŋ naa kpeku, mɛɛ o soliŋ Samsiŋ kpeku yɛ.

17-18. Vɛɛ tamasi Maakɛllo dɛɛniaa yɛ num kɔllo? (Tofa vɛlɛ fotueiyo.)

¹⁷ Ŋ tofaŋndɔ tamasi puaapilɛnɔ feleŋgɔnɔ pilɛ diolaŋ Maakɛl. Puaapilɛnɔɔ hoo wa kpɔndi kpɔndi a sɔɔŋ ŋMɛlɛkayaŋ tosaa. O wa buɛi malalaŋndo vɛlɛ a kɔɔfanɔ lɔɔlɔɔ wo. I cho suɛi imɔnɔ le sinaa maa, mi puaapilɛnɔɔ hoo tosa biondɔŋndo, nduyɛ mi keŋ tosa mi dilakeŋnaŋnda ndɔlaŋ la hialuŋ ndu. Mbo dimi aa, “I wa hiouwɔɔ lachi a tosaa nyɛkɛndɛi o Chɛhowa piɛiyo niŋ. Kɛ o lepilɛ niŋ kpe, mi yiyaŋ maa, I tiu lɛ ba mi tosa nyɛ o nyɛ o Chɛhowa piɛiyo niŋ te. Fɛɛŋ bɛɛ yaa yiyaŋ maa Chɛhowa cho ya malɔɔ le. Kɛ mɛɛ ya tosa biondɔŋndo, I wa yiyaŋndo te chaŋyɛi nii a Chɛhowa miiŋgu lɛ niŋ pa maa paandu, ɔɔ te I tiu lɛ niŋ pa ba mi tosa tau o kundaa niŋ, mɛɛ ya wa tosaa yɛ.”

¹⁸ I cho suɛi kɛndɛ le sinaa maa, Maakɛl vi ŋdial te. Mbo chɔɔlu dimi aa: “Mi tosa wallo kalaŋ le miiŋgoo o chaŋyɛi kɛndɛi niŋ a Chɛhowa, sanaa a ndu dimullo nyɛ cho ya o kɔllo o piɛileŋ niŋ, pɛɛkoo vɛlɛ a yiyaŋndo o nyɛ ya pɛɛku wo choo.” Mɛɛ teleŋ tiŋ hiou, mi Maakɛl sɔla vɛlɛ dilakeŋnaŋndaŋ o kundaa niŋ. O cho niŋ bɛndu kundaa suŋ suŋ, nduyɛ mbo wa kɔɔfanɔ lɔɔlɔɔ wo. Mbo dimi aa: “Malaa a kɔl dɛɛniaa ya sɔla taama taama bɛnduaa kundaa o ba wo, mala ya ni mi sina maa Chɛhowa kaala wɔ ya. I tiu niŋ ba mi piɛi Chɛhowa o kundaa niŋ a kɔl iyama walaŋndo. Suɛi yɔŋnuŋ ya hei ve pɛɛku ya maa, wana o wana mal pɛ yɔŋ ndɔ wɔɔŋndo a kɔllo kpou, mi Chɛhowa mal ndu haki.” Te ŋ tosa pɛ biondɔŋndaŋ, ŋ nɔ miŋ nɔ tiindaŋndo maa, Chɛhowa cho naa soliŋ kpeku, mbo dɔu naa sala, te ŋ kindiŋ pɛ kpoke le siŋgaŋndaŋ tosaa, nduyɛ miŋ dɔu tiindaŋndo o ndu niŋ.—Sam 86:​5; Pulɔ. 28:​13.

19. Vɛɛ tamasi Samsiŋ ndo luei yɛ num yoomuaŋ?

¹⁹ O buŋgɛi hei niŋ, ŋ pɛɛku a sɔɔŋ yɔŋnuŋ o yoomu Samsiŋ ndo niŋndoŋ. O ve wana walaŋ te, kɛ o vi ŋdial o Chɛhowa piɛiyo niŋ te. Hali a teleŋ o tosa biondɔŋndo le Dilaila chuaa o nɔɔ niŋndo bɛɛ. Mi Chɛhowa hiau lachi a Samsiŋ soliŋndo kpeku. Mbo soliŋ ndu vɛlɛ kpeku o nɛi kɔndɔfili niŋ. Nduyɛ mbo chua ndu maa wana laalaŋndo opilɛ o wa ni kanifuule, diola ndɔlaŋ la cho la poonyiaa o wanaa chɔm laalaŋndo wa tɛɛŋ o Hibuluiya bolle 11 niŋ. I cho bɔɔ suɛi kɔl dɛɛniaa le sinaa maa, Finya naa kaalaa o choo choo niŋ nɔ yeemɛi le naa yoomuaŋ lueiyo, taama taama te ŋ vi ŋdial te. Lelaŋ maa Samsiŋ, ŋ nyɔɔluŋ Chɛhowa o piɛileŋ niŋ aa: “Loonuŋ a ya. Yandii Mɛlɛka naa, ke ya [kpaayaa.]”—Chɔɔchi. 16:​28.