Baabuiyo dimi maa ‘yoomu wana chioo bendu le.’ Nduyɛ ‘nyɛ palaa komal ndu wo cho bɔɔ.’ (Choobu 14:​1) Baa naa Mɛlɛka yeema ni mi yoomu naa wa? Te o cho lende le, mɛɛ yɛɛ cho yɛ tuu ndɔɔ le naa? Baa tuu o nɔ le naa wo yɔŋnuŋ niŋ pa? Tofawɔ mulila kɔl dɛɛniaa Baabuiyo ke naa le nyunalaŋ ndaŋ ndo.

1. Vɛɛ Chɛhowa yeema yɛ mi yoomu naa wa?

Chɛhowa yeema naa miŋ tuei yoomoo yeela. Mɛɛ o toosiaa Adam nda Ifi, mbo kɛsi nda o kpele kɛndɛ kɛndɔɔ niŋ diolaŋ aa Idɛŋ. Okoŋ, “mi Mɛlɛka duau nda sala aa, ‘La violu chuauwa mi la kuii mi la pɛ o chieeŋndo choo, nduyɛ mi chieeŋndo wa nya o ba bɛŋgu.’” (Chɛnɛsee 1:​28) Chɛhowa ndoo yeema nda ma velu chuauwa, nduyɛ ma siiŋguu chieeŋndo kpou kpele hɛnɛkiɔɔ. Ndoo yeema nda vɛlɛ ma manda visiaa. Ndoo yeema mi waŋnda chieeya kpou ndaa tuei kɛndiaa walaŋndo yeela, nduyɛ mi ndaa wa achal lefafɛɛŋ.

Yoomu wanachioo cho hau mɛɛ Mɛlɛka ndoo yeema yɛ le.a Kɛ keŋ siŋga tuu o nɔ le naa wo le. (Aisaya 46:​10, 11) O yeema wɔ mi wanaa cho hɛnaŋ ndɔɔ tosaa wa, wa achal lefafɛɛŋ o kpele hɛnɛkiɔɔ niŋ.—Nuawɔ Sɔɔŋ Chɔɔmaŋndoŋ 21:​3, 4.

2. Yɛɛ naŋ nɔ yɛ miŋ tosa le miŋ nɔ yoomu sɔviɔɔ suŋ suŋ?

Chɛhowa toosiaa naa a yeemɛi le miŋ sina ndu, nduyɛ miŋ piɛi ndu. (Nuawɔ Maatiu 5:​3-6.) O yeema naa miŋ nɔ chaŋyɛi kpɛɛluŋnde a ndu, ‘miŋ kuɛ o nɛi ndɔɔ choo, miŋ kaala ndu, nduyɛ miŋ piɛi ndu a kɔl naa kpou.’ (Ditɔnɔmii 10:​12; Sam 25:​14) Te ŋ tosa pɛ hei, ŋ cho nyaale kpeekpeiyo sɔla o yɔŋ bɛɛ mi bahawɛilaŋ la wa naa choo. Te ŋ wa pɛ Chɛhowa piɛiyo, miŋ sinaŋ maa ŋ cho wanaa sɔvɛ kanifuule, ŋ cho kɔlaŋ o nɛi ndɔɔ choo.

3. Chɛhowa yeema mi waŋnda chieeya nɔ yoomu sɔviɔɔ

Handu VIDUEIYO, okoŋ mi la suukaŋ o nyunaa hoo choo:

VIDUEIYO: Le Yɛɛ Mɛlɛka Toosiaa yɛ Chieeŋndo?​—Buŋgɛi Pɔmbɔ (1:​41)

• Le yɛɛ Mɛlɛka toosiaa yɛ chieeŋ naa kɛndɔɔ hoo?

Nuawɔ Ikilisiaatii 3:​11, okoŋ mi la suukaŋ o nyunaa hoo choo:

• Yɛɛ hei pɛɛku yɛ num a Chɛhowa okɔɔ?

4. Tuu Chɛhowa nɔ le naa wo siŋgaŋ ndɔ le

Nuawɔ Sam 37:​11, 29 a Aisaya 55:​11, okoŋ mi la suukaŋ o nyunaa hoo choo:

• Vɛɛ naŋ looku yɛ sina maa tuu Chɛhowa nɔ le naa wo siŋgaŋ ndɔ le?

5. Chɛhowa piɛiyo tosa ni miŋ nɔ yoomu sɔviɔɔ

VIDUEIYO: Mi Pɛɛku le Sabu Naŋ Cho Yoomu Wo (5:​03)

• Tɔnɔ yɛɛ Tɛlumi sɔla yɛ, mɛɛ o pɛɛku a sabu naŋ cho yoomu wo okɔɔ?

Nuawɔ Ikilisiaatii 12:​13, okoŋ mi la suukaŋ o nyunaa hoo choo:

• Le mɛɛ Chɛhowa tosal naa niŋ sɔɔŋ kɛndɔŋ tau yɛ, yɛɛ naa bɛɛ nɔ yɛ miŋ tosa le ndu balikaa mello?

SƆƆŊ KULLOŊ

Chɛhowa yeema naa miŋ tuei yoomoo yeela lefafɛɛŋ o lɛŋndeŋ choo. Te ŋ piɛi ndu pɛ a kɔl naa kpou, suŋ suŋ bɛɛ ŋ tiuba miŋ nɔ yoomu sɔviɔɔ.

Nyunala miiŋgaa choo laŋ

• Yɛɛ kpeekpei wa yɛ tuu Chɛhowaa le Adam nda Ifi?

• Vɛɛ naŋ looku yɛ sina maa tuu Mɛlɛka nɔ le waŋnda chieeya wo siŋgaŋ te?

• Yɛɛ ŋ nɔ yɛ ma tosa le ma nɔ yoomu sɔviɔɔ suŋ suŋ?

CHƆƆLU SƆƆŊ PUM TOFA

Tofawɔ ma che nyɛ chɔm maa kpeloo Idɛŋ wa kɛsɛ wo.

“Kpeloo Idɛŋ—O Wa ɔɔ O Ve Le?” (Bandu Mɛŋgɛlaa, Tɛɛkpaa 1, 2011)

Pɛɛku ma che le sabu naŋ laalaŋ maa chieeŋndo cho wa lefafɛɛŋ ndo.

“Baa Chieeŋndo Cho Pa Tambei Sɔla?” (Kɔ o tɛɛŋgei choo)

Yaasiaa wɔ ma sina nyɛ Baabuiyo dimi maa ŋ nɔ miŋ tosa le miŋ sɔla yoomu sɔviɔɔ wo.

“Yɛɛ Cho yɛ Yoomu Sɔviɔɔ?” (Kɔ o tɛɛŋgei choo)

Mi po pum yiyaŋ maa o nɔ nyɛ o nyɛ o yoomu ndɔɔ niŋ. Kɛ tofawɔ ma che nyɛ ndoo saaluŋ maa o nɔ le wo.

I Nɔ Niŋ Yoomu Sɔviɔɔ (3:​55)

2. Nɛɛ yaa cho yɛ masaleŋ tosa a Chiisu latulu?

O cho Chiisu ndupilɛ le cho masaleŋ tosa le. Waŋnda fulaa o “lekaa o lekaa niŋ, a isɔɔ o isɔɔ maŋgalaa, a lelɛŋ o lelɛŋ, . . . cho wa masaa chieeŋndo choo kpou.” (Sɔɔŋ Chɔɔmaŋndoŋ 5:​9, 10) Vɛɛ kpɛ waŋnda cho yɛ wa o masaleŋ choo a Chiisu? Chɔŋ a teleŋ Chiisu hiŋ o chieeŋndo choo wo, waŋnda o miiliɔŋndaŋ niŋ simnuŋ niŋ Kilisiɔŋnda ni, ma wa ndu tolɔɔ kɔɔli. Kɛ o nda tɛɛŋ, waŋnda 144,000 koni cho lakɔ choo choo ni le waa o masaleŋ choo a Chiisu. (Nuawɔ Sɔɔŋ Chɔɔmaŋndoŋ 14:​1-4.) Kilisiɔŋaa tuaa kpou cho wa o lɛŋndeŋ choo o Masale Mɛlɛkaleŋ bɛŋgu.​—Sam 37:29.

Masale Mɛlɛkaleŋ le kanduŋ niŋ. Le cho suŋ hunɔɔ faŋa sɔɔŋ wɔɔŋ cho yɔŋnɔŋndo o chieeŋndo niŋndoŋ. Ŋ yaasiaa wɔ sɔɔŋ kɛndɛŋ cho hunɔɔ yɔŋnɔŋ o Masale Mɛlɛkaleŋ bɛŋgu woŋ ŋ tiŋ.

1. Vɛɛ Masale Mɛlɛkaleŋ le cho yɛ hunɔɔ a kɔl nyuloo, nduyɛ mi le faŋa kafalaŋ o chieeŋndo niŋ?

Chiisu cho Masaa le Masale Mɛlɛkaleŋ ni. O cho hunɔɔ wanaa dɛnɛ wɔɔŋnda, a masɛi waŋnda chieeya tɛɛmbuu o chɔu Amakɛdɔŋ ndo niŋ. (Sɔɔŋ Chɔɔmaŋndoŋ 16:​14, 16) A teleŋ koŋ nyɛ Baabuiyo dimi hoo wo cho peelɔŋ le chieeŋndo kpede ni: “O bendu lɛ tiŋ te, mi Mɛlɛka tosa mi wanaa dɛnɛ wɔɔŋnda a lo pɛ.” (Sam 37:​10) O Masale Mɛlɛkaleŋ bɛŋgu, Chiisu cho tosa a sabu mi kɔl nyuloo wa o chieeŋndo choo kpede. Nduyɛ, mi kafalaŋ la chuu.​—Nuawɔ Aisaya 11:4.

2. Vɛɛ yoomoo wa yɛ niŋ o chieeŋndo choo, te hɛnaŋ Mɛlɛkaa huŋ yɔŋnuŋ pɛ?

O Masale Mɛlɛkaleŋ bɛŋgu, “wanaa cho sakpo Mɛlɛka o hɔl la . . . cho wa o lɛŋnde Mɛlɛka chua buŋgɛi leŋ niŋ le fɛɛŋ a fɛɛŋ.” (Sam 37:​29) Yiyaŋndɔ le waa o chieeŋndo niŋ, naa wana o wana cho wa sakpo, ma kaala Chɛhowa a wanaa cheleŋnda wa. Wana o wana nee lɛ niŋ te. Nduyɛ a waŋnuŋ niŋ achal lefafɛɛŋ.

3. Yɛɛnɛ Masale Mɛlɛkaleŋ le cho yɛ hunɔɔ tosa te wanaa dɛnɛ wɔɔŋnda sɔla pɛ tambei?

Te wanaa dɛnɛ wɔɔŋnda huŋ sɔla pɛ tambei, Chiisu cho wa Masaa le wɔsilaŋ 1,000. A teleŋ koŋ, ndu a ŋwaŋ 144,000 cho wa o Masaleŋ choo wa, cho waŋnda chieeya mala o lɛŋndeŋ choo, le ma simnuŋ wanaa walaŋ. Te wɔsiŋ muŋ chuu pɛ, chieeŋndo kpou cho simnɔŋ kpele hɛnɛkiɔɔ. Nduyɛ, wanaa cho wa loŋ nda cho wa a nyaale, le mɛɛ nda cho wa diikɔŋndo sawala Chɛhowalaŋ yɛ. Okoŋ kɔɔli, Chiisu cho chua masaleŋ mbo miŋgi Finya ndɔ o ba. “Diola [Chɛhowalaŋ la cho] wa la diandaa,” mbo hiou maa paandu. (Maatiu 6:​9, 10) A teleŋ koŋ, wana o wana cho sina maa Chɛhowa cho Masa kɛndɔɔ ni. Nduyɛ maa, o buulaŋ le wanaa cho ndu piɛiyo wa. Chɛhowa cho tɛɛmbuu Setana, nyinaa nduaa wɔɔŋnda, vɛlɛ a wanaa kɛɛ le waa o masale ndɔleŋ bɛŋgu wa. (Sɔɔŋ Chɔɔmaŋndoŋ 20:​7-10) Nyaale cho wa o Masale Mɛlɛkaleŋ bɛŋgu wo cho wa lefafɛɛŋ.

CHƆƆLU YAASIAA

4. Masale Mɛlɛkaleŋ le cho hunɔɔ masɛi waŋnda chieeya faŋa

“Waŋnda apum a nɔ kpaaya laŋ, mi waŋnda wa nda saŋgaa o ba bɛŋgu.” (Ikilisiaatii 8:9) Chɛhowa cho hunɔɔ Masale ndɔleŋ soliŋ kpeku, le kafalaŋ ndaŋ faŋaa.

Nuawɔ Daaniɛɛ 2:​44, a 2 Tɛsaloniaŋ 1:​6-8, okoŋ mi la suukaŋ o nyunalaŋ ndaŋ choo:

• Yɛɛnɛ Chɛhowa nda Chiisu Po ndɔ cho yɛ hunɔɔ tosa a masɛi waŋnda chieeya, vɛlɛ a wanaa cho ndi tooloo wa?

• Vɛɛ nyɛ ŋ pɛɛku a Chɛhowa nda Chiisu okɔɔ wo ke yɛ num tiindaŋndo maa, sɔɔŋ nda cho wa tosaa woŋ cho wa o nɛi sakpoo choo?

5. Chiisu cho Masa kɛndɔɔ ni

Te Masale Mɛlɛkaleŋ le kanduŋ pɛ o chieeŋndo choo, Chiisu cho tosa sɔɔŋ kɛndɔŋ tau le wanaa cho ndu wa o ba bɛŋgu wa. Handu VIDUEIYO le chɔɔ mɛɛ Chiisu chɔm maa o yeema le waŋnda malaa yɛ. Nduyɛ maa Mɛlɛka ke ndu kpaayaa le hei tosaa.

VIDUEIYO: Mi Chiisu Chɔm Nyɛ Masale Mɛlɛkaleŋ Le Cho Hunɔɔ Tosa Wo (1:13)

Teleŋ Chiisu wa o chieeŋndo choo wo, mbo tosa sɔɔŋ bɔɔbɔɔ. Sɔɔŋ o tosa muŋ ndoŋ chɔm nyɛ o cho hunɔɔ tosa o Masale Mɛlɛkaleŋ bɛŋgu wo. O sɔɔŋ kɛndɛŋ cho muŋ hunɔɔ yɔŋnɔŋndoŋ tɛɛŋ, i kuɛɛ num yeema yɛ ma che o peelɔŋndo? Veelu diomndaŋ o bolii Baabui soo a sɔɔŋ muŋ okɔɔ ve.

6. Masale Mɛlɛkaleŋ le cho hunɔɔ a kpele hɛnɛkiɔɔ

VIDUEIYO: Sɔɔŋ Kɛndɛŋ Cho Hunɔɔ Yɔŋnɔŋ Ndoŋ (4:38)

Nuawɔ Sam 145:​16, okoŋ mi la suukaŋ o nyunaa hoo choo:

• Vɛɛ kɔllo cho yɛ num le sinaa maa, Chɛhowa cho “tosa mi wana o wana hini kɔl”?

SƆƆŊ KULLOŊ

Masale Mɛlɛkaleŋ le cho hunɔɔ sɔɔŋ kɛndɔŋ tosa tau. Le cho tosa mi chieeŋndo kpou simnuŋ kpele hɛnɛkiɔɔ. Nduyɛ, wanaa kɛndiaa kinɛi cho wa loŋ ni ma wa Chɛhowa piɛiyo lefafɛɛŋ.

Nyunala miiŋgaa choo laŋ

• Vɛɛ Masale Mɛlɛkaleŋ le cho yɛ hunɔɔ diola Chɛhowalaŋ dindi?

• Le yɛɛ naŋ nɔ yɛ miŋ laalaŋ maa, Masale Mɛlɛkaleŋ le cho hunɔɔ peelu sɔɔŋ Baabuiyo dimi woŋ kpou?

• O sɔɔŋ kɛndɛŋ Masale Mɛlɛkaleŋ le cho hunɔɔ tosa woŋ tɛɛŋ kpou, i kuɛɛ num yeema yɛ ma che o peelɔŋndo?

CHƆƆLU SƆƆŊ PUM TOFA

Pɛɛku ma sina nyɛ cho Amakɛdɔŋ ndo.

“Yɛɛnɛ Cho yɛ Chɔu Amakɛdɔŋ Ndo?” (Kɔ o tɛɛŋgei choo)

Tofawɔ sɔɔŋ Chiisu dimi maa ŋ cho yɔŋnɔŋ a teleŋ “Nyɛpalaa Bɛndoo” wo.—Maatiu 24:21.

“Yɛɛ Cho yɛ Nyɛpalaa Bɛndoo?” (Kɔ o tɛɛŋgei choo)

Tofawɔ ma che mɛɛ yuŋgulaŋ la nɔ mi la wa yiyaŋndo a salala wa niŋ o Masale Mɛlɛkaleŋ bɛŋgu laŋ yɛ.

Nuawɔ Numpila o Kpele Hɛnɛkiɔɔ Niŋ (1:50)

Veelu wɔ diomndaŋ o buŋgɛi hei niŋ, “Yaa Nɔ Nyunala Bɔɔbɔɔ o Kɔl.” Okoŋ, ma che mɛɛ po ndoo simul masaleŋ ndo sɔla mulilaŋ le nyunala ndɔlaŋ yɛ.

“Baabuiyo Siŋga Yoomulaŋ” (Bandu Mɛŋgɛlaa, Tɛɛkpaa 1, 2012)