Soo o Nɛi Nɛŋi Chɛhowa Kɔllo Wo Choo

Mɛɛ Chɛhowa toosiaa naa, mbo ke naa nyɛ sɔvɛ sɔviɔɔ opum. Nyɛ koŋ cho kɔl kalu naŋ nɔ le suɛiyo ni. Baa o buulaŋ pa a mɛɛ naŋ soliŋ kioo hoo kpeku yɛ? Ei, o buulaŋ tau! (Nuawɔ Chemisi 1:26.) Lelaŋ, vɛɛ naŋ soliŋ yɛ diɔɔmule naaleŋ kpeku o nɛi nɛŋi Chɛhowa kɔllo wo choo?

1. Vɛɛ naŋ nɔ yɛ miŋ soliŋ ke naŋ nɔ le suɛiyo kpeku?

Baabuiyo dɛɛniaa naa maa naŋ “hiou lachi a dɛɛniaŋndo vellaa velle, a yoomuaŋ lueinaŋndo.” (1 Tɛsaloniaŋ 5:11) A sina pa waŋnda apum a yeema kɔl dɛɛniaa wa? Yɛɛ ŋ nɔla yɛ ma tosa le nda kɔllo dɛɛniaa? Chɔm nda maa a buulaŋ a nda. Naapum a dimul nda nyɛ ŋ hɛnaŋ a nda okɔɔ wo. A sina pa bolle Baabuile ŋ nɔla ma soliŋ kpeku le wana ŋ sina wo kɔllo dɛɛniaa wo? Bolii Baabuiye cho tau. Loonuŋ vɛlɛ maa nyɛ ŋ cho dimioo wo a mɛɛ ŋ cho ndu dimi yɛ nɔla mbo piiliaŋ waŋnda tau. Lelaŋ, kindiŋ lɔɔlɔɔ le suɛi nyɛkɛndɛ bɛɛŋ bɛɛŋ o waŋnda lo.​—Pulɔwaa 15:1.

2. Diomnda suu kuɛɛ naŋ nɔ yɛ miŋ fafaŋ dimioo?

Baabuiyo dimi aa: “Diom o diom cho diom wɔɔŋ, o fula nya o sondo le.” (Nuawɔ Ɛfisiaŋnda 4:29.) Hei sim ni maa, ŋ nɔ miŋ yei ɔɔ miŋ soliŋ diomnda nɔɔlɛilaŋ o sondo le waŋndo siɔmbulaŋ tusioo le. Ŋ nɔ vɛlɛ miŋ choŋgu waŋndo ɔɔ miŋ tɛɛmbuu ndu tɔɔ le.​—Nuawɔ Pulɔwaa 16:28.

3. Yɛɛ cho yɛ naa mala miŋ soo diomnda mala waŋnda laŋ?

Teleŋnda bɔɔbɔɔ, sɔɔŋ naŋ suaa woŋ chɔm nyɛ kpeekpei cho naa o kɔllo ni. (Luku 6:45) Lelaŋ, ŋ nɔ miŋ pɛɛku le kɔllo kɛsioo o sɔɔŋ kɛndɔŋ choo. Muŋ cho ni, nyɛ o nyɛ cho suɛi sakpo, suɛi diandaa, suɛi kaalaa, a nyɛ o nyɛ cho suɛi chandaa. (Filipiaŋnda 4:8) Te ŋ yeema pɛ mi sɔɔŋ muŋ wa naa o kɔl, mɛɛ ŋ nɔ miŋ hɛli yelelaŋ naa a chaŋyaŋ naŋ a taasi. (Pulɔwaa 13:20) Hei mala naa vɛlɛ miŋ yiyaŋ fɛŋ nyɛkɛndɛi tuupa miŋ soo. Yiyaŋndɔ a mɛɛ diomnda numndaŋ la nɔla mi la paaliaŋ acheleŋnda yɛ. Baabuiyo dimi aa: “Diomnda wɔɔŋndaŋ dimioo, la yɔŋul waŋndo, nuawɔ ko mɛɛ nda lɔwa nuaa waŋndo a muɛi faŋnde yɛ. Kɛ diomnda kɔl kalula fula waŋndo o sondo laŋ ndaŋ, siŋgioo la siŋgi waŋndo ni.”​—Pulɔwaa 12:18.

CHƆƆLU YAASIAA

4. Mandaŋ a nyɛ ŋ suaa wo

Teleŋndaŋ lapum, te ŋ soo pɛ miŋ kɔ chal miŋ yiyaŋ a nyɛ naŋ dimi wo, miŋ tambu kɔl tau. (Chemisi 3:2) Nuawɔ Kaleesiaŋnda 5:​22, 23, okoŋ mi la suukaŋ o nyunalaŋ ndaŋ choo:

• O suliŋndaŋ ndaŋ tɛɛŋ, o kuɛɛ ŋ yeema yɛ ma piɛi le ndu le ma sɔla, le num malaa ma mandaŋ a nyɛ ŋ suaa wo? Vɛɛ suliŋndaŋ ndaŋ la nɔla yɛ mi la mala num?

Nuawɔ 1 Kɔliŋtiaŋ 15:​33, okoŋ mi la suukaŋ o nyunaa hoo choo:

• Kpaaya yɛɛ chaŋyaŋ numndoŋ a yelelaŋ numndo nɔ yɛ o diomnda ŋ dimi laŋ choo?

Nuawɔ Ikilisiaatii 3:​1, 7, okoŋ mi la suukaŋ o nyunaa hoo choo:

• A teleŋ kuɛɛ o bɛnda yɛ ma mei ɔɔ ma chum tuupa ma soo?

5. Soo sɔɔŋ kɛndɔŋ a waŋnda okɔɔ

VIDUEIYO: Soo “Diomnda Ke Waŋnda Kpaayaa” Laŋ (4:07)

• O vidueiyo hoo niŋ, le yɛɛ puaapilɛnɔɔ hoo ndoo yeema yɛ mbo siŋga nyɛ o dimi a waŋnda okɔɔ wo?

• Yɛɛ o tosa yɛ le mbo siŋgaŋ?

Nuawɔ Ikilisiaatii 7:​16, okoŋ mi la suukaŋ o nyunaa hoo choo:

• Te kɔllo del naa pɛ le sɔɔŋ wɔɔŋndoŋ dimioo a waŋndo okɔɔ, yɛɛ naŋ nɔ yɛ miŋ loonuŋ?

Nuawɔ Ikilisiaatii 7:​21, 22, okoŋ mi la suukaŋ o nyunaa hoo choo:

• Vɛɛ bolle Baabuileŋ ndeŋ le mala yɛ num ma fafaŋ tumboo, o yɔŋ bɛɛ mi waŋndo dimi sɔɔŋ wɔɔŋndoŋ a num okɔɔ?

6. Soo o wanaa nya cho o yuŋgoo niŋnda lo nyɛkɛndɛi

VIDUEIYO: Kaalaa a Bɛɛleŋ Tosa Mi Yuŋgulaŋ La Wa o Diompilɔɔ Niŋ (3:08)

• Yɛɛ mala yɛ num ma soo nyɛkɛndɛi o yuŋgu numndo lo?

Nuawɔ Ɛfisiaŋnda 4:​31, 32, okoŋ mi la suukaŋ o nyunaa hoo choo:

• Vɛɛ naŋ suaa yɛ o yuŋgu naa lo ma naŋ kɔl?

Mi Chɛhowa chɔm yiyaŋ o nɔ a Chiisu Po ndɔ okɔɔ wo. Nuawɔ Maatiu 17:​5, okoŋ mi la suukaŋ o nyunaa hoo choo:

• Vɛɛ num bɛɛ nɔla yɛ ma tol tamasi Chɛhowaa kɔɔli, te a wa pɛ suukaŋndo a wanaa cho o yuŋgu numndo niŋnda?

SƆƆŊ KULLOŊ

Diomnda naŋ dimi laŋ la nɔ kpaayaa. Lelaŋ tuupa miŋ soo, ŋ nɔ miŋ yiyaŋ nyɛkɛndɛi a nyɛ naŋ cho dimi wo, teleŋ naŋ cho ndu dimi wo, a mɛɛ naŋ cho ndu dimi yɛ.

Nyunala miiŋgaa choo laŋ

• O nɛila kuɛɛ choo ŋ suaa yɛ mi waŋnda hini kɔl?

• Diomnda suu kuɛɛ ŋ yeema yɛ ma fafaŋ?

• Yɛɛ mala yɛ naa miŋ soliŋ diomnda kɛndɛlaŋ kpeku?

CHƆƆLU SƆƆŊ PUM TOFA

Yɛɛ mala yɛ naa miŋ soo diomnda dɛɛniaa waŋnda laŋ?

Pɛɛku le Diomnda Kɔl Kalulaŋ Dimioo (8:04)

Pɛɛku wɔ ma che nyɛ mala num ma fafaŋ diomnda wɔɔŋndaŋ soliŋndo o sondo wo.

“Baa Yeiyo Cho Pa Suɛi Wɔɔŋ Bɛndu?” (Kɔ o tɛɛŋgei choo)

Tofawɔ ma che nyɛ mala num ma fafaŋ choŋgulaŋ ndo.

Vɛɛ Ya Pɛŋgi yɛ Choŋgulaŋ? (2:36)

Pɛɛku wɔ ma sina mɛɛ Chɛhowa mala po wa chɔulabaa le mbo mal sɔɔŋ wɔɔŋndoŋ soliŋndo o sondo wo.

“Mi Kandu Yiyaŋndo a Mɛɛ Yoomu Nuu Cho Mɛɛlu Yɛ” (Bandu Mɛŋgɛlaa, Naandɔɔ 1, 2013)